Josué 24 - Dupade Uruode

Josué cho darasade quique nanique uje qué eca nanique

¹ Ga udojo quigade nanique ga Josué pésu daquiningamei iji ore idai Siquem to nanique. Ga jé u uje tibidi israélgosode ore uáguedie jnese, jé aja ore angaránone jnese to, jé aja padode irajasórone jnese to, jé aja ore angarãte uñane jnese to rĩ. Enga ore tibágui pijnane jnese nanique. Uje ore déji ñane gari jnese nanique iji Dupade iguíjna cuchábi iquei enga jé u uje Josué catecã́ri ore.

² Ga chojninga: –Israélgosode Yocangarádejnai Dupade uruode u udojo ome uaque, ga chósi tome uaque: 'Iji taningapísode nanique ga jnani déji to nanique uje i tu Taré. Ga uté ujnacarode déji nanique ga gare ore nanique. Uñai i tu Abraham, jé basa ga uñai i tu Nacor. Ga uacãrapíode u ore nanique. Ga ore idai déji tiédaté edúdi to nanique uje tié tuaté i tu Éufrates. Ga que udore chirajapise yu to nanique, mu ore catecãrainone u dupa quedéjnane to nanique.

³ Mu yijnimique uacai casicaite Abraham iji tiédaté Éufrates edúdi to nanique, ga yo quique dajéode ome ore nanique jeta chise puniri to uje i tu Canaán nanique. Garósipise Abraham ore to nanique uje ore tṍraji daniri uté nanique mu yipésu ore uatigájnane to nanique. Ga uyu u to uje yisi ome Abraham abi ome nanique, enga ore chĩ́care Isaac aja dabi uté to nanique.

⁴ Ga yisi ome Isaac ujnacare gárode to ome nanique rĩ ga ore íode u udojo to: Jacob, Esaú ore. Ga yisi ome Esaú uniri ome to nanique ga uniri déji cucarani Seir jmainie to nanique. Mu Jacob, ujnacarode ore jnoji puniri Canaán to nanique ga ore chicáji ore uniri Egípto to nanique.

⁵ Udojo quigade nanique ga yiroque yirógode Moisés, Aarón ore aja uacãrapíode udore ujetiga ore jno ore údi to nanique. Mu egíptogosode ore charanguipise doi ome ore nanique, ga yujé ore ape bajade jnese nanique, enga quene ore juéga doi ome uacayode udore nanique. Ga jé u uje yijnime ore iji egíptogosode ore jmainie nanique.

⁶ Mu uje uacayode ore jnoji Egípto nanique enga Faraón nóna darógode soldácho aja ore quigade to nanique uje gaidi u gu nanique jeta jnopo ore údi rĩ aja daniri to nanique. Ga ore chacája dachidode guebéquedatéo to nanique, jé basa ga uñane choru buricade to ga ore chajna uacayode aja yote quedéjnai to nanique uje i tu Yote Quedéjna Caratai to nanique.

⁷ Mu uacayode ore tibidípisi yu nanique ga ore chutṍri yu ome ore nanique. Ga jé u uje yicha gue abuja utata taja ore ujai nanique ga que toque dajetígo ome Faraón ore nanique, jé aja uje e uacayode ore chise yote quedéjnai uécha uñai nanique. Chamáñaje yajuque yote quedéjnai taja ore dosadode nanique ga nóña ga dajeque cajnore nanique ome uacayode ore. Enga Faraón ore chajnárase ore aja uéchai to nanique mu yaco ore gai ome yote quedéjnai nanique ga ore toi jnese nanique iji yote quedéjnai ajei to. Ga qué uacuñane eca to iji deréjnane udojo to uje uacamóñopise cucha dacadode udore to nanique, ga cucha dacadode udore pijogúsorone u uaque to. Uje uacaboyo iji Egípto nanique ga yorei uáguiji erãpetarei nanique ga iyajmanguipise uáguiji erãpetarei uté ajei to nanique.

⁸ Mu udojo quigade to nanique ga yorei uáguiji amorréogosode ore uniri to nanique iji yote quedéjnai Jordán uécha uñai iji guedé garani yui. Mu ore pota chijócãre uáguiji daniri tuté nanique ga ore pésu pocaningai ome uaque to nanique. Mu yatapísaja uaque nanique, ga que udore ujñapéguiji uacajmainie to nanique. Ga uaquejnáñopise udore ore to nanique ga uacoyo uacaniri iji ore uniri to nanique.

⁹ Mu moábgosode ore eduguéjna cuchábi doi uaque to nanique, ga pota nanique jeta chijócãre uaque to nanique. Ga moábgosode ore eduguéjnai uté i tu Balac nanique ga uté dai i tu Zipor to nanique. Mu Balac uté tibidi daijnárique bajaque nanique uje i tu Balaam ujetiga cho darúja israélgosode uaque to. Gaidi tu jórogu nanique ujetiga pésu uacáringáringo serẽrája nanique. (Daijnai Balaam uté dai i tu Beor nanique.)

¹⁰ Mu yaquĩ́ra Balaam uru gajnaréngone iji pijnani to nanique, enga yicha dara omone aja pijnani to nanique. Ga jé u nanique uje Balaam narare nanique ga cho darúja israélgosode nanique ome cucha omone to nanique. Ga jé u nanique uje yiqueta uágome cucha gajnaréngone nanique ga jé u uje uacajnuéño ore gáyode jnese nanique.

^11-12 Mu chise diri nanique uje uacaquesúyo yote quedéjnai Jordán nanique. Ga uacaquítequigája ore idai nanique uje i tu Jericó ujetiga ejnáño ore to iji uté to nanique. Ore pota charángui jóroque dedai ome uaque to nanique, mu que togome ore nanique uje Uacangarádejnai uyu yisi ome uacáringane dequejnangóño ome uaque to nanique gu. Ga purása quedéjnane uñane ore besíji ore uniri Canaán uté to nanique uje ore dopoi pocaningai ome uaque to nanique rĩ, mu jé ate nanique uje serẽrája ore iji uacajmainie ga ajnuéño ore gáyode to nanique. Yojningane u amorréogosode ore, jé aja ferezéogosode ore to rĩ, jé aja cananéogosode, jé aja hitítagosode, jé aja gergeséogosode, jé aja hevéogosode, jebuséogosode ore to. Amorréogosode ore eduguéjna cuchábode gare ore nanique, mu jé ajnuéño ore gáyode to nanique. Mu que uacuñeque chichagu uñeque ome dasṍreraque to nanique, enga que uacuñeque chichopo uñeque ome dojórigui to nanique rĩ, mu e ore chayóji uacaquei bisideque nanique. Chamáñaje yisi ome pisadodéringai ome ore urasade nanique gu, ga ore chayome uaque jnese ome cutejmai dasadodéringadaté uté to nanique.

¹³ Yisi ome ore unirone ome uaque to nanique. Ga que ajóyo uaquejnatígo iji udore nanique iji taningapísi, mu uacoyo uacajnéngu ore jutícabidie to nanique ga uacacho ore acade cucha bisideque nanique. Jé chopo ore idáyode to nanique rĩ. Uje uacoyo uacajnéngu ore unirone nanique ga que uacapéso uaquedáningo iji gotique to, mu uacoyópo uacajnéngu ore idáyode nanique uje dimane cuchade jnese iji udore nanique iji uacaquéode; ore iguíjnane, jé aja ore idáyode ujuyaquéode to rĩ, dimane cuchade udore jnese iji uacaquéode nanique. Enga qué uacagúsoji uaquedáyode udore to, ga qué uacacho ore acadie úvai to iji deréjnane udojo to. Enga ore acadie pore qué déji uaquedáyode udore to ga uacagutíyabádedie u udire to uje poria tuaté adie i tu aceitúna.'– Ga Dupade uruode upúsu udojo ome daroi Josué nanique ga Josué chajnerame ome darasade ore to nanique. Mu Josué e chatata dáyipiedie ome darasade to nanique.

¹⁴ Ga chósi tome ore to: –Yocangarádejnai Dupade icaniratiguei cuchadatépise ome uaque. Jecute jé tiógara to jeta ajnórañopise Dupade gaté to ga beyopísi ojningane cucha jnese to. Uje yirajagopise uje yocãrapíode jnani bajácho ore angurenone u dangurenone dupa quedéjna to nanique iji daniri uté to nanique uje déji tiédaté Éufrates edúdi to nanique. Yirajagópo uje ore déji egíptogosode ore ujade to nanique rĩ ga jĩraque ore áyipiedie dopísi ore angurenone dupa quedéjna to nanique. Ga yicoi enga ca yicoi yoca cásodicáite ore isocade to jne. Ga ca yajico purása quedéjnaringo ore angurenone cucha uña yúode to. Chamáñaje Dupa uecai tu yocangureni gu ga yicopísi uté adode to.

¹⁵ Ga beyoi ga apéso uacáyipie ome uacangurenone cucha. Ujetiga ca apótayo beyoi Yocangarádejnai Dupade adode enga beyoi ga eduyo yocayode jnani bajácho ore angureni cásodicáite cucha bisideque adode ome uaque to. Jeoga uacáyipierigui déji yocuniri tudé unirísõre bajade amorréogoso ore angurenone cucha uña adode to enga ejnáño uágaja ore adode to. Mu jé ca amere Dupápisi adode iji cucha uñane adode to. Mu angarami yuruode udojo to: uje e yipésu yáyipiedie udire to enga yijogasúode, uyoque a yicopísi Yocangarádejnai Dupade adode to, ga yedugopise uté adode iji yocajéode to.–

¹⁶ Ga jé u uje Josué urasade ore chajna uruode ga ore chojninga jnese: –Que dépisi yocajénique to jetiga yichago Dupápisi adode aja ti yui to, ga yicoi cucha uñéngo atígo to.

¹⁷ Chamáñaje Yocangarádejnai Dupade u gu uje chijnime yóguiji egíptogosode ore josipiedie jmainie nanique uje egíptogosode ore chiroque yoque bisideque nanique. Ga yimóngo cutejmane uté ipesútedatéo ome yoquedodie to nanique uje uté nóna yógaja dajei nanique uje yicagóji de nanique. Enga irotaque yóguiji pocaningane to nanique, ga basája yoquiquéode nanique ome cuchade yúode ga choréji quedéjnane ome yoque to nanique. Jiei purása quedéjnane unirone nanique uje yaquesúgo iji gatócoro aja puniri udé yui nanique.

¹⁸ Enga cho jetiga uté chijócãre ore aja quedéjnane iji yoquiquéode to nanique. Ga jé chopome amorréogosode ore rĩ uje ore déji puniri ueradéjnai udé to nanique, ga tṍra udore aja quedéjnane to nanique iji yoquiquéode to nanique. Que yicadíjoi yocangureni uté ipesútedatéode udore ome yoque to. Ga a yedugo uté ojningane cucha iji yocajéode to jnese ga jé yejnángo yógaja ojningane cucha to. Chamáñaje israélgosode yoquidupai u uté to gu.–

¹⁹ Mu Josué e narare ga chojningame ore to: –Cachi uacarúo to arĩa. Que toc eti beyoi Dupade adode to. Chamáñaje ueguipise Dupade ome pisijnaringuéone gu, enga a ca chidota re ome uacate gajnaréngone jne. Chamáñaje uacacho uruode aja gu, enga uacajóyo uágaja uacasijnaringuéone to. Ocáca Dupade to arĩa, enga a chetaque re ome uaque to jne uje chiraja uje uacapótayo cucha uñane gu ome uacáyipiedie.

²⁰ Uásejnapise Dupade átegoningáne ome uaque nanique, mu ujetiga ayáyo adode enga beyoi purása quedéjnane ore angurenone dupa quedéjna adode enga a oyo uacaba uacasocade udore jne, uje Dupade a cho dajuñame uaque ga chejnápise uaque jne.–

²¹ Mu israélgosode ore chajnai uruode udore to ga ore chojningame Josué to: –A ca cho dajuñame yoque to jne arĩa. Uje a jecucha yicoi Yocangarádejnai uté adode gu.–

²² Ga jé u uje Josué narare ga chajnápoi ore uruode gaté rĩ enga chojninga: –Uacadúcho ñane uruode iji de jnese uje uacajegaidode a u Dupade adode jnese ome uaque. Jecute uacapijogúsorone a u uágome ñane to jne.– Enga jĩraque ore chajnai Josué uruode udore enga ore chojninga: –Cachi jé ũré yoque arĩa. Ga yoquipijogúsorone a u yógome ñane to jne uje a yicopísi Dupade adode to jne.–

²³ Ga jé u uje Josué chojninga: –Ujetiga jé ũrepise uágome uacaruode to ga beyoi uacangurenone cucha bisidécho iji uacaguíjnane ajéode to enga órañoja guesode iji uacaguíjnane ajéode to. Ga beyoi ga ajníño israélgosode Yocangureni Dupa uecai gai to. Enga ejnáñopise uacáyipiedie aja uté to jne.–

²⁴ Ga israélgosode ore chojninga: –A yipéco Yocangarádejnai Dupade ojningane cucha jnese jne. Enga a ca yicagóji quedéjnarique ome ojningane cucha jne.–

²⁵ Uje qué ore déji ore idai Siquem uté nanique, iji diri tuté nanique ga Josué jĩraque chingo Dupade uru quigode ome ore ome ipotigádode cucha ujetiga ore pésu udore aja quigode jnese.

²⁶ Ga jĩraque Josué doi darujna aode uje purusãracho Dupade iroquéode iji udore nanique ga churúsãrapo Dupade uru iyiejájnane udore iji uté to rĩ, ga imoi tu uje urasade udore ore chimesẽre Dupade áyipiedie udire ome raque to jnese. Udojo quigade ga Josué doi cucarané cuchátique ga chicháji poredatéraque údi, uje poria uaté déji Dupade iguíjna pirosobádi ejoi to nanique. Ga poria uaté i tu encína nanique.

²⁷ Ga Josué dopoi nanique rĩ ga catecãrápoi israélgosode ore rĩ. Enga chojningame ore: –Dupade uruode pijoguto tu cucarané tuaté jne ome uaque, uje tangári Dupade uruode udore gu ome uaque, ga tangárapoi uacaruode ome Dupade to rĩ. Jecute ujetiga taque uaque ome uacaruode udore enga a oyo uacaba uacasocade udore jne.–

²⁸ Ga jé u uje Josué chiroque darasade udore aja dode nanique jetiga ore chajníja dajnepídode erámio jnese.

Uje Josué toi nanique, ga ore chijóchame iji dajnepídi erãpe ajei nanique iji cucaranone jmainie

²⁹ Enga garósi dirode iji udojo quigade nanique uje Dupade iroi Josué topísi to nanique. Ga Josué uté dai i tu Nun nanique. Ga Josué guejnanie siquerei chise 110 nanique uje topísi to nanique.

³⁰ Ga jé u nanique uje ore jno údi aja dajnepídi jnupe nanique. Enga ore chicha ode taja ore idai Timnat-séra to nanique uje ore idai uté déji Josué gajnepídi jnupe ajei to nanique. Ga Josué gajnepídi jnupe uté déji cucarani uté jmainie to nanique uje cucarani uté déji efraíngosode ore uniri ajei to nanique. Enga cucaranone uñane déji uté tiógarei to nanique iji umusoi garani yui to nanique uje ore íode u Gaas.

³¹ Enga jecucha ga israélgosode ore gaidode u Dupade ajegaidode cucha to uje Josué qué eca nanique. Ga jé ore chuságaja ore angarãte uñane to uje qué ore eca iji Josué itoringai quigade nanique, udore ore uje ore pañapísiji Dupade átedatéode to iji taningai nanique uje Dupade chijnime ore iji egíptogosode ore jmainie nanique. Mu uje ore angaránone udore ore toi jnese nanique ga jé u uje quene israélgosode ore áyipiedie chicai quedéjnane ome Dupade adode.

Israélgosode ore chijóchame dáqui gaté José ajnoquéode to nanique ga ore chicha ode taja jnupe pei nanique iji ore idai Siquem ajei

³² Ga chise diri nanique uje quene ore chijóchame daqui gaté José ajnoquéode iji ore idai Siquem uté nanique. Chamáñaje uje israélgosode ore jnoji egíptogosode ore gari nanique ga ore chijnoque dáqui gaté uté ajnoquéode aja dajesúode erámio nanique. Ga ore chicha uté ode taja jnupe pei nanique uje dai jnani bajai Jacob gaite ore uté nanique tome jnani bajai Siquem dayé Hamor ujnacarode uñane. Ga oredie jé u pláta guebéode nanique uje 100 u nanique. Jecute uje israélgosode ore chajuguína cananéogosode ore unirone péode iji ñane nanique ga José ape disi ejode ore cho dajnéngu jnupe pei uté iji ore idai Siquem ajei. Chamáñaje ore dai jnani bajai Jacob doi oré tome uté nanique gu.

Jnani bajai Aarón ujnacari Eleazar toi to nanique ga ore chijóchame uté to nanique iji cucaranone jmainie to

³³ Uje jnani bajade uñai Aarón ujnacari Eleazar topoi to nanique rĩ, ga ore chicha uté ode taja ujnacarode uñai Finees gajnei jnupe to nanique iji ore idai Guibeá uté. Enga Finees uté gajnei jnupe uté dépisiji efraíngosode ore uniri ajei to nanique iji cucaranone jmainie to nanique.