Josué 23 - Dupade Uruode

Garósi jeta Josué toi nanique, ga jé u uje chijócha darasade ajei údi nanique ujetiga ore chajo raja dajnoraquéode ome dangarádejnai Dupade

¹ E iyajmanguipise nanique uje israélgosode que ore dopoi pocaningárique to rĩ ome damajósoningo, uje Yocangarádejnai Dupade chisi ome pajesereringai tome ore to nanique ga ore cho paráguiji jnumone iji dedáyode. Ga Josué e choquíjnapise nanique.

² Ga jé u uje Josué tibidi darasade israélgose ore nanique ujetiga ore tibágui jnese. Ga ore tṍraji quedéjnane ome Josué nanique uje ore tibágui. Jé aja ore angaranipísode, jé aja padode irajasórone jnese, jé aja ore angaránone uñane to rĩ ga ore tibágui Josué jnese to nanique. Uje e ore déji jnese ga jé u uje Josué narare, ga chojningame ore: "Uacamóño uje e choquíjnacasépise yu iji de. Ga a e yingo yuruode aja uaque to uje qué yiqueca to.

³ Uacamóño Yocangarádejnai Dupade átedatéode jnese ica uje cháta raja yoque ome yocuniri tudé unirísõre bajade. Ga cho jõcaratáguebéguiji re to nanique ga guejnaque ore ome yoque to nanique.

⁴ Ga yujnusina ome uaque uje yiji cucaranenie ome uacáguedie chojmara, chojmarane jnese nanique ujetiga Dupade chingo uacajnepídode erámio eruéode ome yu, ga jé u uje yajuguque cananéogosode ore uniri tudé iji yurasade uaque to nanique. Ga yojningane u punirone udore jnese uje ore déji yote quedéjnane ujai ga udore u uje yajuguque iji uaque nanique, ga yote quedéjnane udore uñai déji guedé garani yui ga i tu Jordán, jé basa ga uñai déji guedé cacadi yui to ga i tu Mediterráneo to. Ga yejnángo punirone udore unirisórone uñane nanique ga yoco yocajnéngu ore unirone, jé basa ga uñane qué déji ujetiga yejnángopo ore to jne rĩ.

⁵ Enga a Yocangarádejnai u jne jeta chijócãre purása quedéjna amirone udore jne iji ore idáyode udore jnese jne iji uacaquéode jetiga beyoi pocaningane ome ore to. Enga a oyo uacajnéngu udore ore idáyode to jne. Uje Yocangarádejnai chisi ome daru iyiejájnane ome yoque nanique ujetiga chijócãre ore enga a uruode udore tocade jnese jne."

⁶ Ga Josué qué jno daruode údi ome ore enga chojningame ore: "Jecute beyoi enga ejnáñopise uágaja Moisés urusarane Dupade urúo quigode to. Ga ca amócho uruode quitígo to jeta apesopúsu to jnese.

⁷ Enga angaráño uacajogatígo ome purása quedéjnane gatuaque uje qué ore déji yocujade to. Enga ca oyo Dupade iji ore angurenone cucha uñane to enga ca angáchoi ore uruode to ome ore angurenone cucha udore. Ga ca ẽ́cacho udore ore angurenone íode to. Ga a ore chojningárasome uaque to: 'Quene pangurete uaque ome yoque to jeta ẽ́cacho yocangurenone íode to,' mu ca ẽ́cacho to. Enga ca achacho uacagataidie aja jnumone to iji udore iquéode to.

⁸ Yimo uje uacadode ueradéjnapise nanique jé aja dirode udojo to uje uacabeyopísi yocangureni Dupade adode to. Jecute yósi tome uaque to: beyoi enga ajóyopise uágaja uacátegoningáne udore to enga jé asáchoja uaqueruéningo to jne.

⁹ Uacarajáyo uje ujnomeranguipise yocumajosórone udore nanique, ga etoguipise ore ome pocaningai yúode. Mu Yocangarádejnai uté tṍra ore aja quedéjnane iji yoquiquéode uje yicoi ore nanique. Ore ajéode u jórogu jeta etoque ore iji yoquiquéode nanique, yu yicoi ore ga jĩraque serẽrája ore nanique iji yoquiquéode to. Ga jé chuságaja deréjnane udojo to uje que punirone udore uñeque doi ga sué yoquibáyode to.

¹⁰ Cachi a chojmára israélgosode yoque gosi marínga, a yocumajósoningo todópisa uté jne ga ore chayome jnese. A mil u ore marínga, a jé ate jne, a ore todópisa ayoré chojmarai uté jnese. Chamáñaje israélgosi uté jõrai tu dangarádejnai Dupade gu ome pocaningai yúode, uje jé urúo nanique gu ujetiga nóna yógaja quedéjnane ujetiga dicase yógome pocaningai yúode.

¹¹ Jecute añuchopúsu uaqueo to, enga beyoi enga ajnórañopise uacangarádejnai Dupade to.

^12-13 Mu ujetiga ayáyo uacajnoraquéode ome Dupade enga a jĩraque acayóji quedéjnane ome adode to. Enga a chise diri jne ujetiga uacabode ore chóji purása quedéjnane urodie gari to jne. Jé basa ore abode chóji uacarodie gari to jne. Ga jé u jne jeta purása quedéjnane, uaque amecho uáguiji ñane to. Enga a chise dínique jeta apótayo jóroga pocaningai ome purása quedéjna amirone udore ore iji uacajade jne, mu a ca Yocangarádejnai chátapo raja uaque to jne ome ore, uje chetaque uacasocade udore gu. Enga Dupade a cho dajuñame uaque jne, ga angúroméone u purása quedéjnane udore jne iji uacajade. Ga a ore gajnua tu pujuyáraque jne jeta ore chisa uaque to iji dajade enga uacajogate ore ajéode to. Ga a ore gajnui tupo paójnarique to jne rĩ, jetiga Dupade chaquesu uacádode ome uté to. Que gusu yojningane unojo mu ore gajnui jé upo ojnaque pichajusónique to rĩ ujetiga ore chichagu uaquedodie ajéode ome to. Ga a ore tṍra uágaja quedéjnane to iji Yocangarádejnai Dupade guerani punire ueradéjna tudé údode jnese. Ga a cho jetiga íjnoque uáguiji údode bisideque jne.

¹⁴ Uacarajáyo uje e garósi jeta yitoi jne, jecute angáchoi yu jnese: a ca potigayaquérique déji yoc uñeque uje Yocangarádejnai Dupade ojningane cucha omío e tocade jnese ome yoque. Ga que uruode udore amínique déji uje cáma tocade to.

¹⁵ Uje e Dupade uru ueradode udore tocade ome yoque to, ¿ama uru gajnaréngone ja ca tocade ome yoque to jne a? Jeta angoninguite parique uaque to jne, enga a Dupade chisi ome cucha gajnarénguipísode ome uaque to jne rĩ. Ga a cucha gajnaréngone tṍraji dajñarenie ome uaque to jne ga a ca uacuñeque chapídome udore to jne. Enga punire ueradéjnai tudé titapísome uaque to jne.

¹⁶ Uacajneque Dupade uru iyiejájnane nanique gu, mu ujetiga oyo cucha bisidéguiji udore jne enga a Dupade cho dajuñame uaque jne. Ujetiga yocuñeque cho Dupade iji purása quedéjnane angurenone cucha enga doi ga chichaga dagataidie iji jnumi iji udore iquéode to, enga jé u jne jeta yocangureni Dupa ájningai tocade ome yoque to. Enga a chĩro israélgosode uyoque ¡táca, tac! ga a íjnonguipíse yóguiji guerani punire ueradéjna tudé dirome jne."