Josué 22 - Dupade Uruode

Rubéngosode, gádgosode, manasésgosode ore chajni dacotedie, dabode ore gáyode iji yote quedéjnai Jordán uécha uñai nanique

¹ Ga jé u nanique uje Josué tibidi rubéngosode angaránone jeta ore tibágui ga catecã́ri ore to. Ga tibidápoi gádgosode ore angaránone to rĩ, jé aja manasésgosode uague uña angaránone to.

² Enga e ore chise nanique ga chojningame ore: "Ueradéjnapise uacadode uje uacabeyopísi Dupade iro casica Moisés uru casodica quigode to. Mu que gusu uacangáchoi Moisés uru casodica, mu jecucha uacangáchoi yuruode to enga angoninguite guesaguipise uaque ome yu.

³ Uje iyajmaque yóguiji yoquigaidode pocaninga gáyode to diríca mu jé uacátayo uágaja yoque to ga que ajíñoñome uacarasade uyóguiji de jmete to diríca. Uacarajáyo uje Yocangarádejnai Dupade jé ajéode u ome uaque to gu jeta átayo uágaja yoque to ome yoquigaidode pocaninga diríca, jecute uacabeyopísi uté ojningane cucha jnese jé aja deréjnane udojo to.

⁴ Uje uacamóño yóguiji de uje e Yocangarádejnai uruode tocade ome yoque ga e yugúcoji yoquidáyode iji yocuniri udé údode jnese uje yocópise paráguiji de, yocuniri udé. Jecute boyo ga ajníño uacacotedie, uacabode ore gáyode to iji uacanirone to iji yote quedéjnai Jordán uéchamitó to iji guedé garani yui. Bamo uje Dupade iro casica Moisés chisi ome punirone udore ome uaque ica iji taningapísi, ga boyo ga oyo uacaniri iji udore to jne.

⁵ Ga gusu yuruode udojo ome uaque uje cáma boyo to: Enga ca aramuráso Dupade iro casé Moisés uruode iji uacajéningo jne ga beyopísi ojningane cucha jnese to iji uacaniri uté to jne. Uje chojningame yoque nanique: 'Ajnórañopise Uacangarádejnai Dupade uté to ga cho jetiga ajnáño ũrajetique iji jnumone to jne. Ga beyoi ojningane cucha jnese to jne. Enga cho jetiga uté diguiji uacaquéode enga ajnáño guichai iji jnumi to. Enga beyoi iroquéode ga ejnáño uacáyipiedie aja, jé aja adode jnese to jne rĩ jetiga beyopísi quigode jnese.'"

⁶ Ga Josué chejna daruode udore guesi nanique, ga jé u uje chojningame ore: "Ajníño to ga yipésupú ga Yocangarádejnai Dupade nónapísa uágaja uacajesui tuté, ga chatapísaja uaque gatuaque to." Ga jé u uje ore jno nanique ga ore chicáji danirone iji yote quedéjnai uéchai ga ore quítequigája daguíjnamone cárpabio to jnese nanique.

⁷ Manasésgosode ore uáguedie gare nanique, ga ore gajnepídode erámio cãra rome ñane to nanique rĩ. Moisés casica chisi ome ore uniri Basán ome ore uague uña nanique, uje ore uniri Basán uté déji yote quedéjnai Jordán uécha uñai iji guedé garani yui nanique. Ga udore ore u uje Josué chacacãre nanique, ga chiroque ore aja doi ujetiga ore chajníja daniri Basán uté iji yote quedéjnai uéchamitó. Jé basa ga manasésgosode ore uague uña cho daniri iji ore gajnepídi jnupe iji darasade israélgose ore unirone ujai uje déji guedé cacadi yui to nanique, ga jé ore chácariji yote quedéjnai uécha uñai uté iji guedé cacadi yui to nanique.

⁸ Uje Josué chiroque rubéngosode, gádgosode, manasésgosode ore uague uña aja doi nanique enga jé u nanique uje chisi ome daru ueradéjnane ome ore to nanique ga chojningame ore nanique: "Que ajníñoja uacanirone bisideque gotique. Cachi ugúcharã́que uaque arĩa iji yoquejna casodica pidáyo ga boyo ga ajnócho uacajnéone cucha udore to. Yojningane u uacajnéone cucha uje pipesucho udore iji guebéode uje ore íode u óro, pláta, bronce, hiérro ore, uje oreránguipíso uacagúchade udore. Jé aja uacachidode cuchiso to uje jiépisi udore to. Mu jeta boyo ga eso uacarasade ore to jne iji yote quedéjnai Jordán uécha uñai to jne enga asíyo ore iji uñéngo to."

⁹ Ga jé u nanique uje rubéngosode ore jnoji darasade israélgoso uñane gari iji ore idai Sílo nanique uje ore idai uté déji puniri Canaán ajei nanique. Jé aja gádgosode, manasésgosode uague uña ore jno to, ga ore nóna ñane aja dajesui nanique uje ore chajníja daniripísi iji yote quedéjnai Jordán uéchamitó iji guedé garani yui, uje ore uniri uté i tu Galaad nanique. Chamáñaje Dupade iro casica Moisés chisi ome ore gajnepídode erámio ome ore nanique gu iji puniri uté ajei, uje Yocangarádejnai jé ajéode u ome ore nanique gu.

Uje e ore chajníja daniripísi ga rubéngosode, gádgosode, manasésgosode ore pésu daseradéjna cuchábi nanique iji ore uniri Canaán ajei

¹⁰ Mu uje e ore chise yote quedéjnai Jordán nanique aja dajesui uté nanique, enga rubéngosode, gádgosode, manasésgosode ore uague uña ore pésu daserani tiji darasade israélgoso ore uniri Canaán eruépisi uté nanique. Enga ore aseradéjnai uté querújnapise nanique. Mu uje e ore chimate dapesudi uté nanique, enga jé u uje ore chaquesu yote quedéjnai nanique aja danirípisode iji ore uniri Galaad uté ajei nanique.

¹¹ Mu ore ipesudi daserãte ujnomei chise israélgosode uñane nanique uje ore ipesudi tuté dépisiji ore uniri Canaán ajépisi to iji yote quedéjnai Jordán edúdi.

¹² Enga ájningarãque ore ome rubéngosode, gádgosode, manasésgosode uague uña nanique, ga jĩraque ore cháta rágaja ñane iji ore idai Sílo nanique ujetiga ore doi pocaningai ome darása dode udore uje ore pésu daseradéjnai iji quedéjnarique ome Dupade iguíjnai gajnei paseradéjna gu.

¹³ Ga jé u uje ore chiroque Dupade iroi Eleazar ujnacari Finees aja ore uniri Galaad uté bajaque to. Uje rubéngosode, gádgosode, manasésgosode ore uague uña e ore chise daniri uté gu, ga ore gaidi u ujetiga Finees tangarami ore uruode bajaque to.

¹⁴ Mu que gusu Finees nanique mu ore uáguedie uñanie ore chiroque dangurenéjnane to ujetiga ore nóna uté aja ore to, ga ore angurenéjnane udore ore chejna yijmanáyone nanique.

¹⁵ Ga jé u nanique uje ore jno ga ore chicáji ore uniri Galaad nanique. Ga ore catecã́ri rubéngosode, gádgosode, manasésgosode uague uña ore angarádejnane ore iji uté.

¹⁶ Enga ore chojningame ore: –Cachi Yocangarádejnai Dupade urasapísode iroque yógaja uaque arĩa ujetiga yirajágo uacapesudi gaserãte cuchape quitique iji yocuniri casé iji yote quedéjnai edúdi to. ¿Ama jé ca gajnareque uacadode ome israélgosode Yocangarádejnai Dupade diríca ya? Uje uacapéso uacaseradéjnarique iji sañeque ome yocaseradéjnai uté uje déji yoquidai Sílo ajei. Uacarajáyo uje Dupade ajéode u ujetiga gajnei gaserãte chojmarápise, mu uacacho uacangureni Dupade uruode aja diríca enga jĩraque uacapéso uacaseradéjna uñeque iji siñeque to.

¹⁷ ¿Ama ca ajnusínaño Dupade ujuyaquéode ome israélgosode uyoque nanique? Uje yocurása cásodicáite ore chisa dacotedie iji purása quedéjnane ore urodie to nanique. Enga ore acotedie udire jno ore údi aja ore angureni Peor adode to nanique. Udore ore pésu israélgosode yoquiyoguéode to nanique ome Dupade. Enga jé cho jetiga yoquiyogué casica qué catája yóguiji de to.

¹⁸ ¿Uacagaidi urásu to a ujetiga acayóji quedéjnarique ome Dupade ga jé chiborátapoja Dupade ájninga ejóringome yoque to rĩ a? Ujetiga Dupade ájningai tocade ome uaque to, mu a jé chisírase uacarasade uyoque to iji yote quedéjnai uécha uñai to.–

¹⁹ Ga ore chojningápome ore rĩ: –Cachi a qué purása quedéjnane déji uacajade iji uacaniri udé, enga cho jetiga ore ate gajnaréngone catája uacaniri udé. Enga boyo ga ajíñoñome uacaniri udé unirísõre bajade angurenone cucha to ga ajníñopója yocuniri casé to iji yote quedéjnai uéchamitó uña iji ti ga oyópo uacaniri iji yocuniri to rĩ. Enga ayáyo uacangoninguite paritigade ome Dupade uje uacapéso uacaseradéjnai uñeque iji quedéjnarique to ome Dupade gajnenguipísi yocaseradéjna to.–

²⁰ Ga jé u nanique uje ore jno darai údi ome ore ga ore chojningame ore: –Ga ca Zéra ujnacari átedatéode jnoji uacajénique to uje uté i u Acán nanique. Uje Dupade chojningame ore nanique: 'Ejnáño jericógosode ore to jne, mu ca asayo ore ugúcharique to jne.' Bamo uje Acán dojnóngaja Dupade uruode udore nanique ga toria ore ugúchade uñane nanique. Dupade ájningai tocade ome Acán uté to nanique, mu chise yoque jnese to nanique. Ga Acán uté chopise daba dasijnaringuéone to nanique ga yocurasade ore chujépise uté nanique. Mu que gusu uté uje toi nanique uje ore chujé, mu uté isijnaringuéone jé chiborátaja nanique uje Dupade noñome yoque iji te jmete nanique, enga háigosode ore chujé yocurasade uñane to nanique uje ore doi pocaningane ome ñane nanique.–

²¹ Ga jé u nanique uje rubéngosode, gádgosode, manasésgosode ore angaránone chajnai israélgosode ore angaránone uruode to nanique.

²² Ga ore chojninga: –Ayáyo dara ga angachobi yoque to. Uje que gajnarénguei yocáyipiedie diríca uje yipéco yocaserani iji uacaniri eruei iji yote quedéjnai pijnanai diríca. Enga Yocangarádejnai Dupade uje suépise dupa quedéjnane gáyode jnese uté chirajapise yocáyipiedie uje ũrepise yoque to. Ga chiraja uje que angoninguite paricho yoque to diríca. Uacajoso ati yingarángo yocaseradéjnai ome Dupade gajnei daseradéjnai to diríca. Mu que qui tu gotique. Ga yocajéode upúsu jeta Dupade cho quique yocáyipiedie ome uaque to enga arajáyo uje ũrepise yoque to.– Ga ore chojningame israélgosode angaránone udore: –Jeta jé ũrepise uacaruode ga jé tiógarapísa jeta ajéyo yoque to ga apéso jaribei tiji yoque jnese. Mu uacoyo paraque gu ome uacáyipiedie udire, ga que arajáyo yocáyipiedie quitique to.

²³ A ajoso ati yoquigaidi tu diríca jeta yiboco yoquẽrapáidode cucha iji yoquipesudi yocaserãte gai ome uacajéode to, jeoga cuchiso u, jeoga trígo ubugode u, jeoga cucha uñeque. A ajoso ati yicoi israélgosode yoquijmapiedie diríca gu uje yoquigaidi tu yocúringáringo ujñapetaque to ome Dupade. Ujetiga jé ũré uacajéode udore enga jé areque jeta Dupade cho dajuñame yoque to. Chamáñaje que pujuegádome uñeque gu jeta yipéco yocaserãte uñeque iji siñeque ome Dupade iguíjnai jogosṍri gaserãte uté uje déji iguíjna puyai iquei.–

²⁴ Ga jé u nanique uje ore chingopísa daserani isocade ome ore to nanique ga ore chojningame ore: –Yipéco yocaserani uté to diríca gu jeta yocúringane israélgose pijógome uacape disi ejórigo dirome. Uje yitodógo diríca gu jeta uacape disi ejórigo ore chojningárasome yocape disi ejórigo to: 'Que israélgosode Yocangarádejnai Dupade urasapísode u uaque gotique.'

²⁵ Jeoga ore chojningárasome ore: 'Cachi Dupade chicha yote quedéjnai iji yocujai to arĩa. Gaidi tu gu jeta yingarángo yocunirone ome ñane. Ga yirajagopise uje Dupade ajirigode upúsu yóguiji de, jé basa ga Dupade cho ayoré unejánguiji rubéngosode, gádgosode uáguiji yote quedéjnai uéchamitó to.' Ome yocajéode diríca ga uacape disi ejode ore chujñietárase darábarigo yocape to jne, enga a chisírase diri jne jeta yocabode chejnáreque ore ujñiequérigo to jne, ga ore anguretigai ome Yocangarádejnai Dupade chicárasi jnumone to.

²⁶ Ga jé u diríca uje yicatecãcoi ñane ga yojnijome ñane: 'Beyoi ga yipéco yocaseradéjnai iji ore uniri eruei jne. Mu a ca qui tu jeta yẽcója Dupade ome cuchisórique iji gai jne.'

²⁷ Jecute yipéco yocaseradéjnai tuté diríca uje yoquigaidi tu gu jeta yocurasade uáguiji guedé cacadi yui ajicho ga jĩraque ajnusínaño uje que unejaque yoque gotique mu yocajnei tu to ujetiga yicoi Dupade adode to. Enga yocajnei tupo ujetiga yingongo yógome Dupade to ga yiboco yoquẽrapáidode ome to iji gaseradéjnai uté gai uje uté déji Dupade iguíjna cuchábi iquei. Uje yoquigaidi u uacagaidi to gu ujetiga Dupade chimo yoquẽrapáidode udore enga chĩro yoquisijnaringuéone to, jé aja ujetiga pajesereringane déji Dupade, uyógome ñane gatuaque to. Que gusu uaque mu a uacape disi ejórigo a ore chimo yocaseradéjnai tuté iji uacaniri eruei tuté enga ore chiraja uje jé yoco ñane jnese iji yote quedéjnai uéchade jnese, enga a ca ore chojningame yocape disi ejórigo jne: 'Unejanguipise uaque to ga que uacajnei tu gotique ujetiga átayo uágaja yoque uje yicoi Dupade adode to.'

²⁸ Yipéco yocaseradéjnai uté diríca gu ujetiga yipijójo ome uaque jne. Uje yojnijome ñane diríca: "Jé socaseti ore ape disi ejórigo chotigasirase yocúringane israélgose dirome enga a yojnijome ore jne: 'Cajicho to uje yugúcoji uacaniri to nanique ga yocaserani qué déji uacaniri eruei to iji gadoi to. Mu que yirógo nanique gu jeta yẽcója Dupade iji to, mu yirógo nanique gu jeta arajáyo uje israélgose yoque to iji yote quedéjnai pijnanai iji uécha uñai.'"–

²⁹ Ga jé u nanique uje ore catecã́ri ore ga ore chijaropise daruode iji jnumi ga ore chojninga: –Que angoninguite parique yoque to diríca. Ga que yocáyipieraque dépisi cuchiso pẽrapáitique to diríca ome yoquipesudi tuté yocaserãte to. Yirajágo gu jetiga gosi tẽrája Dupade iji quedéjnarique iji siñeque enga gosi ba obiréjnai u dapesutique uté to. Chamáñaje Dupade gajnei daserãte chojmára gu, ga déji iguíjna pirosobádi iquei to. Enga gusu uté jeta yẽcója Dupade iji uté gai jnese to. Ujetiga cuchiso yoquẽrapáidi, jeoga arroz quedéjnai u mu paseradéjnai jé chojmára ome yoquẽrapáidode jnese, ga uté u uje déji Dupade iguíjnai iquei.–

³⁰ Uje ore chudute ore uruode udore nanique ga ore uruode udore uerate ome Dupade iroi Finees, jorane pangarácho ore, ga jé u uje ore cha dájningai jnese nanique ome rubéngosode, gádgosode, manasésgosode uague uña ore.

³¹ Enga jé u nanique uje Dupade iroguipísi Eleazar ujnacari Finees narare to nanique. Enga chojninga: –Quene tijode chopo jnángome yoque to rĩ, ga yirajagopise uje Yocangarádejnai Dupade qué déji yocari iji de, ga que noñome yóguiji te jmete diríca gu uacapesudi uté. Uje yitodógo diríca gu jeta uacacho Dupade uruode aja enga jé chiborátaja Dupade ájningai ome yoque to. Mu e yudúco uje que uacacho Dupade uruode aja diríca uje uacapéso uacaseradéjnai uté, ga cho jetiga e uacajnicho yóguiji Yocangarádejnai Dupade ujuyaquédatéi jmainie.–

³² Ga jé u nanique uje Finees, jorane ore jnoji ore uniri Galaad uté ga ore chajníja israélgosode ore uniri Canaán uté nanique. Ga jé u nanique uje ore jno ga ore chise darasade nanique ga ore chingopísa israélgosode uñane iji yote quedéjnai uéchamitó ore uruode ome darasade ore to nanique.

³³ Ga jé u nanique uje ore chiraja ore ojñane nanique ga tijode quene cho jnángome ore to nanique. Ga ore chacãre Dupade gai nanique, uje ore chudute uje que gajnarénguei rubéngosode ore áyipiedie ome dapesudi daserãte uté nanique. Ga jé u nanique uje que ore potapo pocaningárique ome rubéngosode, gádgosode ore to nanique rĩ. Ga que ore áyipie dépoji rĩ jeta ore chejna ore idáyode.

³⁴ Ga jé u nanique uje rubéngosode, gádgosode ore pésu dapesudi daserãte uté i to nanique. Ga i tu "Padode Pijogúsõri" to nanique. Ga ore chojninga: "Yoquipesudi yocaserãte udé imoi tu ome yóguiji yote quedéjnai uéchade jnese uje Dupápisi u israélgosode Yocangarádejnai Dupade."