Josué 21 - Dupade Uruode

Israélgosode uáguedie uñanie chisi ome dajnei jnupe péode ome levígosode nanique ujetiga ore cho dedáji udore to

^1-2 Jé u nanique uje chise diri uje levígosode ore dayode chicáji Josué ore to iji ore idai Sílo, uje ore idai Sílo uté déji ore uniri Canaán ajei to nanique. Ore gaidi tu nanique gu jetiga Josué ore tangári ore áyipiedie to nanique. Ga jé u nanique uje Josué cháta raja Dupade irógode ore eduguéjna cuchábi Eleazar, jé aja israélgosode ore angaránone uñane to rĩ, enga ore tangári levígosode ore dayode uruode quigode nanique. Ga ore narare enga ore chojninga: "Yirajágo uje Dupade chingome Moisés casicaite nanique jetiga levígosode yocajneque pidáyode uñéngo to nanique iji uacajade. Ga beyoi ga asíyo yóguiji uñéngo to. Bamo uje yocachidode cuchiso cuse to, jecute asíyo guesáringane jogadode ome yoque to jeta yocachidode tagu acarane to. Chamáñaje Yocangarádejnai jé urúo udojo to nanique ujetiga osṍcho yógome to."

³ Ga jé u nanique uje israélgosode ore chisi ome dajnei jnupe péode ome levígosode iji dajade jeta ore gachidode tagábu dabosode cucha iji to. Ga ore chisiapome dedáyode uñane ome ore rĩ jeta ore cho dedai iji udore to. Chamáñaje ore gaidedie u Yocangarádejnai Dupade áyipiedie to nanique gu, ga ore chosõre levígosode iji dajade.

⁴ Ga bajai tu coátgosode uje Josué ore doi cucaranenie ome ore ujetiga ore chiraja ore gajnei jnupe to. Ga Dupade iroguipísi jnani bajai Aarón ape disi ejo coátgosode uñane nanique. Ga ore isai tu Dupade iroquéode to nanique. Enga jé u nanique uje judágosode, simeóngosode, ore chisi ome dajnéone pidáyo ome ore enga ore gueranone guidáyo gadióguiji yirídai nanique.

⁵ Mu coátgosode uñane qué ore déji to nanique uje que ore isai cucha pisaque u Aarón isai to nanique ga jé ore cãra dasagode cucha to nanique. Ga jé u nanique uje efraíngosode, dángosode, manasésgosode uague uña ore chosõre coátgosode ore uague uña ga ore chisi ome dajnéone pidáyo uñane ome ore to nanique ga chejna yijmanáyone nanique ore gueranone pidáyo to.

⁶ Ga levígosode uñane ore déji to nanique uje ore gãrapi u dáqui bajai Gersón to. Ga ísacargosode, asérgosode, neftalígosode, manasésgosode uague uña ore chisi ome dajnéone pidáyo ome Gersón ape disi ejode udore nanique ga ore gueranone guidáyo gadióguiji yirídai to. Manasésgosode uague uña uaté ore u nanique uje ore cho daniri iji ore uniri Basán nanique.

⁷ Ga levígosode uñane dépoji to nanique rĩ uje ore gãrapi u dáqui gatei to nanique uje i tu Merári nanique. Enga rubéngosode, gádgosode, zabulóngosode ore chisi ome dajnéone pidáyo ome Merári ape disi ejode ore to nanique ga ore gueranone guidáyo gariji yirídai to nanique.

⁸ Ga jé u nanique uje levígosode udore ore dayode chamáta ñane to ome dáguedie jetiga israélgosode ore chisi ome ore idáyode uñane ome ore to. Ga jé u uje ore doi cucaranenie ome ore ujetiga Dupade chingo dáyipiedie ome ore to. Ga jé u uje ore chiraja dajnéone jnumío ome raque nanique ujetiga ore gachidode taguíji udore to. Ga ore chirajápo dajnéone pidáyo to ujetiga ore cho dedáji udore to nanique rĩ. Chamáñaje Yocangarádejnai Dupade jé áyipiedie u udire ome ore nanique gu, ga cho quique daroi Moisés ome cuchade udore yúode to nanique, jecute ore dopísi Dupade uruode quigode nanique.

^9-10 A qué yatataba Aarón ape disi ejode coátgosode ore gajnéone pidáyo bajaque jne uje judágosode, simeóngosode ore chisi ome ore nanique. Uje bajaque coátgosode nanique gu iji darasade levígoso ore ujade uje ore gajnéone pidáyo cuse to nanique, jecute yatatagode u ore gajnéone pidáyo bajaque.

¹¹ Ga ore gajneque ore idai nanique iji judágosode ore gajnepídi pei uje i tu Quiriat-árba. (Ore idai uté gajnesõre bajade u jnani bajai Anac ape disi ejode nanique, uje jnani umarejnájnapise Anac uté nanique). Ga ore idai uté déji cucarani jmané nanique ga i uñai cuse to nanique ga i tu Hebrón. Mu que gusu ore idai Hebrón uté nanique mu ore chisiapome guesáringane jogadode ome ore to nanique rĩ jeta ore gachidode tagu guesáringane acãrai to nanique.

¹² Mu jnani bajai Jefone ujnacari Caleb e gajneque ore idáyode uñane iji Quiriat-árba uté ejode, jé aja garáijnane to ujetiga gachidode taguíji udore to. Uje e ore chisi ome udore ome Caleb nanique ga que pijocayaque ome ore.

¹³ Guidai pãreque Hebrón uté nanique ujetiga ca ore chujé ayorérique iji ajénique to nanique. Jecute ujetiga gosi chujé dojórique ayoré nanique ujetiga ca ájningarángome mu chujé bisideque, enga chijna dagajñua aja ore idai Hebrón uté to nanique enga ca chuque uté gosi tiji ore idai tuté ajénique to nanique. Mu qué ore idáyode uñane déji to nanique uje Aarón ape disi ejode ore cho dajnenguíji to ga udore uñai i tu Líbna nanique.

¹⁴ Ga ore chopo dajnenguíji uñane to nanique rĩ uje ore íode u Jatir, Estemóa ore.

¹⁵ Jé aja Holón, Debir ore to.

¹⁶ Jé aja Aín, Júta, Bet-semes ore to. Ga gagájni iji ti yijmanai uñai ore gajnéone guidáyo udore to nanique ga ore chátaja guesáringane jogadode iji ejode ujetiga ore gachidode taguíji guesáringane to nanique.

¹⁷ Mu benjamíngosode ore gueranone pidáyo déji to nanique uje ore chisi ome coátgosode ore nanique ga ore íode u udojo to nanique: Gabaón, Géba ore.

¹⁸ Jé aja Anatot, Almón ore to. Ga ore gueranone guidáyo gagájni nanique ga jé ore chatapója guesáringane to nanique rĩ iji ore idáyode udore ejode to.

¹⁹ Uje yátago ore gueranone guidáyo aja ñane ga gadióguiji yirídai to, ga ore chátaja guesáringane jogadode iji ore idáyode udore ejode to ome Aarón ape disi ejode udore ore gachidode ujetiga ore taguíji guesáringane to nanique.

²⁰ Ga qué yatataba coátgosode uague uña ore gajnéone pidáyo uñane to jne rĩ uje efraíngosode ore chisi ome ore to nanique.

²¹ Ga ore gueranone uñai i tu Siquem to nanique. Ga ore idai uté jogadi u cucarani jmané to uje cucarani uté i tu Efraín Gajneque to nanique. Ga guidai paréngone uñai jé u uté to nanique. Ga ayorérique jeta chujé dojórique ayoré nanique ujetiga ca ájningarángome dojórique ayoré mu chujé bisidec, ga chijna dagajñúraque aja ore idai uté to nanique, enga chacája ajei to nanique enga que toc jeta yui iguiotique chacája ore idai uté ajei to nanique jeta doi ga chujé iji ore idai ajénique to. Mu que gusu guidai uté uje ore chisi ome ore nanique, mu ore chisi ome ore idai Gezer ome ore to nanique.

²² Jé aja ore idáyode uñane to uje ore íode u udojo nanique: Kibsaim, Bet-horón ore. Enga efraíngosode ore gueranone guidáyo gagájni nanique uje ore chisi ome coátgosode uague uña uaté to nanique. Ga ore chátaja guesáringane iji ejode to nanique ujetiga ore gachidode taguíji guesáringane to.

^23-24 Enga dángosode ore gueranone guidáyo dépoji to nanique rĩ ome coátgosode ore uague uña ga ore gueranone guidáyo íode u udojo to: Elteque, Gibetón, Ajalón, Gat-rimón. Enga gagájni ore gueranone guidáyo to nanique. Enga ore chátaja guesáringane iji ejode to nanique ujetiga ore gachidode taguíji guesáringane to.

²⁵ Enga manasésgosode uague uña gueranone guidáyo dépoji to nanique rĩ uje ore chisi ome coátgosode ore uague uña to nanique. Enga gare ore gueranone guidáyo to nanique ga ore íode u udojo: Taanac, Gat-rimón uñai. Enga ore chátaja guesáringane iji udore ejode to nanique ujetiga ore gachidode taguíji guesáringane to nanique.

²⁶ Uje yisecãco israélgosode ore gueranone guidáyo ome coátgosode uague uña enga ore chejna yijmanáyone. Ga coátgosode uague uña uaté ore chopise dedáji udore to nanique, ga chopo dajnecho iji guesáringane iji udojo ejode to nanique rĩ.

²⁷ Ga manasésgosode uague uña gueranone guidáyo déji to nanique rĩ uje ore chisi ome levígosode uñane uje ore gãrapi u dáqui gatei Gersón to nanique. Enga ore gueranone gare to nanique ga ore íode u udojo: ore idai Golán u uñai uje déji ore uniri Basán ajei to nanique, jé basa ga ore idai Beestéra u uñai to rĩ. Ga guidai paréngone jõra ore idai Golán uté to nanique. Jetiga gosi chujé dojórique ayoré bisideque nanique, jetiga ca ájningarángome detique dojo ayoré nanique, enga chijna dagajñúrangaja guidai uté to nanique enga ore charángome ájningarã́tique nanique. Ga ájningarã́tique uté que toc jeta jnutaque ga chacája ore idai uté to nanique jeta chujé uté gosi uje chujé ujórique ayoré bisideque. Uje que ájningarángome gu.

^28-29 Mu que gusu manasésgosode uague uña uje ore chosõre Gersón ape disi ejode ore to nanique. Mu ísacargosode ore chosõre ore to nanique ga ore gueranone guidáyo gagájni to nanique uje ore chisi ome Gersón ape disi ejode ore to nanique, ga ore íode u udojo to rĩ: Cisón, Daberat, Jarmut, En-ganim ore. Enga ore chátaja guesáringane jogadode iji ejode to nanique ujetiga ore gachidode taguíji guesáringane iji ejode to.

^30-31 Enga asérgosode ore chosõrapo Gersón ape disi ejode to nanique rĩ enga gagájni ore gueranone pidáyo ome ore to nanique enga ore íode u udojo to: Miseal, Abdón, Helcat, Rehob. Enga ore chátaja guesáringane iji ejode to nanique rĩ jeta ore gachidode taguíji guesáringane to nanique.

³² Ga neftalígosode ore gueranone pidáyo gadioque to nanique ome Gersón ape disi ejode ore to nanique ga ore íode u udojo to: ore idai Cédes u uñai uje ore idai uté déji ore uniri Galiléa ajei to nanique. Enga guidai paréngone jõra uté to nanique rĩ. Ga ore idai Hamot-dor u uñai to nanique rĩ. Ga ore idai Cartán upo uñai to nanique rĩ. Enga ore chátaja guesáringane iji ejode to nanique rĩ ujetiga ore gachidode taguíji guesáringane iji udore ejode to.

³³ Uje yátago ore gueranone guidáyo aja ñane ga gadióguiji yirídai to. Enga Gersón ape disi ejode ore chopise dedáji udore to nanique, jé aja guesáringane iji ejode to rĩ ore cho dajnenguíji guesáringane iji ejode to ujetiga ore gachidode taguíji guesáringane udore.

^34-35 Mu jé levígosode uáguedie uña qué déji to uje jnani bajai Merári ape disi ejode u udore ore to nanique. Mu jé u nanique uje zabulóngosode ore chosõre Merári ape disi ejode ore to rĩ enga ore chisi ome dajnéone guidáyo uñane ome ore to nanique. Enga gagájni ore gueranone guidáyo to nanique ga ore íode u udojo to: ore idai Jocneam, ore idai Cárta, ore idai Dímna, ore idai Naalal ore. Enga ore chátaja dajnéone guesáringa to iji ejode to jeta ore gachidode taguíji guesáringane ujade to.

^36-37 Ga jé u nanique uje rubéngosode ore chisiapome dajnéone pidáyo uñane ome Merári ape disi ejode to rĩ enga gagájni ore gueranone ome ore to rĩ. Enga ore íode u udojo to: ore idai Beser u uñai, jé basa ga ore idai Jaháza upo uñai to rĩ, jé basa ga ore idai Cademot upo uñai to rĩ, jé aja ore idai uñai to rĩ uje i tu Mefaat to. Enga ore chátaja guesáringane iji ejode to ujetiga ore gachidode taguíji guesáringane ujade to.

^38-39 Jé basa ga gádgosode ore gueranone guidai gagájni to nanique ome Merári ape disi ejode ore enga ore íode u udojo to nanique: ore idai Ramot u uñai to nanique uje ore idai uté déji ore uniri Galaad ajei to nanique. Ga ore juegate ore idai Ramot uté to nanique ome ayorérique ujetiga chujé dojórique ayoré bisideque nanique ujetiga ca ájningarángome detique dojo ayoré, ga uté doi nanique ga chacája ore idai ajei to ga que chugome ujórique ayoré. Jé basa ga ore charángome yutique iguiotique jetiga jnutágome, ga que toc jeta chacája ore idai ajei nanique jetiga ájningarãque. Jé basa ga ore gueranone guidáyo uñane ore íode u Mahanaim, Hesbón, Jazer ore. Enga ore chátaja guesáringane iji udore ejode to nanique ujetiga ore gachidode taguíji guesáringane ujade to iji udore, udore.

⁴⁰ Uje yátago ore gueranone guidáyo aja ñane enga ore chejna yijmanáyone ga gare iji yirídai. Enga Merári ape disi ejode ore cho dajnechóji guidáyode udore jnese to nanique.

^41-42 Ga jé u nanique uje israélgosode ore chimate deranone pidáyo aja levígosode to. Enga 48 ore gueranone pidáyo udore jnese nanique. Enga que chimoque nanique uje ore chátaja guesáringane iji deranone guidáyo gáyode jnese to nanique.

Ũrepise Dupade, ga dopísi daruode ome israélgosode ore nanique

⁴³ Iji taningapísode nanique enga jecucha Dupade chichaga punire ueradéjna taja israélgosode ore dáquiode nanique. Ga chise diri nanique uje Dupade uruode tocade ga ore ape disi ejode gajnepídode cuse iji ojningai tuté punire ueradéjna údode jnese to nanique. Chamáñaje uru iyiejájna nanique gu ga que toc jeta ca doi daru iyiejájnane to nanique.

⁴⁴ Ga jé u uje Dupade e chimate israélgosode aja dojningai punire ueradéjna enga jé upo rĩ uje chisiapome pajesereringai ome ore jnese iji ore uniri uté údode jnese rĩ jetiga ore cho paráguiji jnumi údode jnese to. Ga que toque nanique jeta ore umajósonique sué ore gai nanique uje Yocangarádejnai Dupade guẽrate israélgosode ore úringane pujnuéngaisóño ome ore gu.

⁴⁵ Chamáñaje Yocangarádejnai Dupade chacacãre israélgosode ore dáquiode nanique, ga jé basa ga chise diri nanique uje uru omone udore tocade jnese ome ore ape disi ejode.