Josué 20 - Dupade Uruode

Israélgosode ore aréngone pidáyo íode u udojo nanique

¹ Ga e chise diri nanique uje Dupade catecãrápoi Josué gaté rĩ.

² Enga chojningame: "Acatecã́ri barasade israélgoso ore jne ujetiga ore chucué guidai uñéngo to jetiga ayoré piyátique chayome dojórique ayoré enga chijna dagajñúraque aja ore idáyode udore uñeque to. Enga a ca toque jne jeta gosi chajna ayoré piyátique uté aja ore idáyode udore to jne enga chicha uñeque cachotígaja ajénique to jne. Jé yurúo ome cuchade udore ome yiroi Moisés uté to nanique, enga jé basa ga uté churúsãre yuruode udore quigode jnese nanique.

³ Ujetiga gosi que chimo dojórique ayoré enga chujé bisideque, mu que ájningarángome dei tuté dojo ayoré to, enga jé arec ujetiga chayome dei tuté iguiotígo jne ga chijna dagajñua aja ore aréngone pidáyo uñeque. A uté gaidi u gu ujetiga ore chãraque jne ome yuque bisidétique dojo ayoré iguiotígo iji ore idai uté ajénique.

⁴ Ujetiga ayorérique chujé dojórique ayoré bisideque uje que ájningarãque gosi to, ga chijna dagajñúraque aja uacaréngone pidáyo uñeque to ga chijna dagajñúrangaja ore ujuyaquéode iji ore idai gai piagórique uje joride déji to, ga chácariji guesi iji joride uéchai iji guesi. Ga a tibidi ore angaránone iji uté to jne jetiga ore doi ga ore tangári uruode quigode iji uté to. Jetiga ore chirajapise uruode quigode to ujetiga jé ũrepise ome daruode quigode to enga jé u ujetiga ore chuchẽre joride gai ga chacája ore idai ajei to, ga a cho dedai iji ore idai to jne.

⁵ Enga jetiga jnutaque yui uté iguiotique to ga chajna aja ore idai tuté to enga chojningame ore angaránone to jne: 'Ajnicho uté ga yujégo to.' Mu ore angaránone a ore chojninga: 'Que chuque to arĩa. Uje yangacopísi uruode diríca enga que ájningarángome dei tuté ayoré to. Ga jé dóji de, enga que chugome ujórique ayoré to.'

⁶ Mu ayorei uté uje chujé dojórique ayoré bisideque a jé jogate ore idai uté ajépisi ujetiga idaité ore yore gai jnese. Enga ore chicháji dajei to ga ore catecã́ri. Enga a ore chojninga: 'Yipótago yangácoi bojñane to ome bei tuté bojo ayoré. Yoquigaidi tu gu jeta yirajágo bojñane to ga ca chuque ua ome bojórique ayoré to.' Enga jé u uje ore juegapísa dedai uté ome uté to uje ore chiraja ojñane úringane ũréo gu. A uté qué chácariji ore gari to iji ore idai uté iji deréjnane jnese, jé aja diri ujetiga yirógode sacerdóteo uje ore catecã́ri yu ome darasade, ore eduguéjna cuchábi topísi to. Mu uté e topísi enga jé u uje ore chorepóji dedáipisi to rĩ ujetiga dépoji darasade ujade iji uté to."

⁷ Ga jé u nanique uje israélgosode ore chucué guidáyode uñane jetiga gosi chijna dagajñúraque aja ome dáringárique sadodé bisideque to uje chujé dojórique ayoré bisideque gu, mu que ájningarãque ome uté gotique to. Enga guidáyode udore ore íode u udojo to nanique: ore idai Cédes u uñai to nanique uje ore idai uté déji ore uniri Galiléa to nanique ga uté dépisiji cucaranone jmainie ajei to nanique, ga cucaranone udore i tu Neftalí nanique. Ore idai Siquem u uñai to nanique ga uté dépisiji cucaranone uñane jmainie ajéode to iji ore uniri Efraín. Ore idai Quiriat-árba u uñai nanique rĩ, ga ore idai uté i uñai cusapo nanique rĩ ga i tu Hebrón nanique. Ga ore idai tuté déji cucarani jmainie ajei to nanique uje cucarani uté déji ore uniri Judá ajei nanique.

⁸ Ga ore chucué guidáyode uñane to iji ore idai Jericó, yote quedéjnai Jordán ore uécha uñai iji guedé garani yui, ga ore ucuegode pidáyo udore uñai u ore idai Béser nanique. Ga ore idai Béser uté déji rubéngosode ore uniri ajei to nanique. Ga ore idai uté jnumi chicáji gaté nanique, ga cho jetiga déji gaté ome ore. Ga ore idai Béser uté déji erãpetarei ajei to nanique. Ore idai Ramot u uñai to nanique uje uté déji gádgosode ore uniri Galaad ajei to nanique rĩ. Ore idai Golán u uñai nanique rĩ enga déji manasésgosode ore uniri Basán ajei to nanique rĩ.

⁹ Yujúdode udojo ore idáyo júdi tu ujetiga israélgosode uñeque chujé dojórique ayoré bisideque enga que ájningarãque gosi to ga chijna dagajñua aja guidáyode udore uñeque to enga que toc jetiga chuque gosi to ome dojórique ayoré to iji guidáyode udore uñeque ajénique to. Ujeta purása quedéjnarique gosi marínga, chujé dojórique ayoré bisideque iji israélgosode ore unínique to ga chijna dagajñúrangaja ore idáyode udore uñeque to jne enga a pududique uté gosi adode jnese to ome ore angaránone to. Jeta purása quedéjna uté mu jetiga ca ájningarãque uté ome detique dojo ayoré ga ore chãraque gosi to. Dupade ajéode u ujetiga ore aréngone pidáyo déji nanique uje gaidi u gu jeta yui tuté gosi iguiotique ca doi enga chujé uté gosi yungónique bisideque to uje cáma pirajaque uru quigode to ome darasade.