Josué 2 - Dupade UruodeJosué tibidi dajegaidode jnanío nanique ujetiga ore cho guidai ome jericógosode ore 1 Uje qué Josué urasade ore déji darengúi nanique uje i tu Sitim enga Josué catecã́ri jnani gárode iji darasade ujade nanique. Ga tibidi dajegaidode udore nanique ujetiga gusu ore ome Josué enga chingo daruode aja ore nanique. Enga chojningame ore: "Boyo ga ajnáñoji ore idai Jericó ga oyo guidai jne ome ore iji ore idai. Enga ajicho ore idai uté údode, jé aja eruéode jnese." Ore jno nanique ga ore chise daqui guidai uté to nanique. Ga jé u nanique uje ore chucué damochápirique guiguíjna to nanique. Mu ore chise chequéraque nanique uje dibéchoquí uaté to nanique. Enga ore moji uaté iguíjnai ajei to nanique. Ga chequé uaté chañuru ore guio nanique uje i tu Rahab to nanique. 2 Mu jericógosode uñeque chimo ore nanique ga uté jno nanique ga chicáji ore eduguéjna cuchábi iguíjnai to. Enga chingo ore ome eduguéjna cuchábi. Enga chojninga: –Ísenga israélgose udore ore to jõ. Ise mu ore di gu jeta ore chajire yocadode aja quigode iji de yoquidai, enga a ore chajire erámi to iji yoquidai udé ejode. A ore urasade doi pocaningai ome yoque to jne gu.– 3 Mu jé u nanique uje ore eduguéjna cuchábi chiroque daroi taja chequé dibéchoquía Rahab yui to ujetiga chingo eduguéjnai uruode aja uaté. Ga jé u nanique uje chise chequé dibéchoquía iguíjnai nanique ga chojningame to nanique: –Ajnime jnani gárode iji baguíjnai to. Ja seca guidáyo ore ome yoque to.– 4 Mu Rahab tuaté e pógu jnani gárode udore iji eduguéjnai iroi iquei to nanique. Ga chojningame eduguéjnai iroi uté nanique: –Jé ũré ua uje jnani gárode udore chise yu to iji de yiguíjnai, mu que yiraja ore garãtique to. 5 Mu uje guedé e chacási enga jé u uje ore jnoji yari to. Uje a ore chiraja gu uje e dejaque enga ore suru yoquidai ujuyaquéode jorídedie jnese iji yoquibai to. Que yiraja ore quitique, mu boyo ga ajnáño ore uje qué upo ore to gu uje ore jno que, ga cáma iyajmaque ore. Enga a eso ore to jne.– 6 Mu Rahab pogupúsu jnani gárode udore ore to nanique iji eduguéjnai iroi iquei to nanique. Ga chojningame ore to nanique: "A ore chucué uaque to iji de gajneri. Enga ocho yiguíjnai gajiné ga ácayoji ójo to jne enga aterẽtáyo iji ójo to jne. Uje yigaidode ore aquesucádode porójodie línoi déji yiguíjnai ójo ujetiga yijnime cuca ásegajnúone iji udore to ga yucare to jne enga a yaco uacabai to jne ome udore." 7 Mu eduguéjnai irógode ore tangaripísi Rahab uruode to nanique ga jĩraque ore jno ujetiga ore chajnai Josué irógode udore. Mu ore déji dedai ujuyaquéode uéchai enga jé u uje ore jorane suru ore quigade ¡paque! to nanique. Jé u uje ore chajna jóroque dajéode ome jnani gárode udore, ga e idájapise ore nanique ga ore chise tié to nanique uje i tu Jordán to nanique. Ore chise jogadi uté uje cucode jnome uécha uñai, mu uje que ore chiraja ore jogatique, ga jé u uje ore chajni to nanique. 8 Ga jé u nanique uje Rahab choru daguíjnai to ga chicáji ójo to jetiga catecã́ri jnani gárode udore uje cáma ore mo to. 9 Ga jé u nanique uje chojningame ore to: –Yirajapise uje israélgosode uacangureni Dupa a u jne jeta chijna yocuniri tudé iji yocari ga a uacajneque to jne. Chamáñaje uacangureni tuté e chisi ome pisadodéringai ome yóguiji yoquidai tudé ome israélgosode uaque gu, enga uacajuchópise yocagutedie jnese iji yoquidai tudé údode jnese to. 10 Chamáñaje e yudúco uacajnoméone nanique gu uje boyóji egíptogosode to nanique enga uacajucho tiédatéraque to nanique uje i tu Yote Quedéjna Caratai to nanique. Ga yudúco uje Dupade chajúgome uaque nanique ga nóña ga dajeque cajnore ome uaque to nanique. Gaidi tu nanique gu ujetiga aquesúyo nanique. Yirajágo to nanique uje uaquejnáño amorréogosode eduguéjna cuchábode jé aja ore urasade ore to nanique uje eduguéjna gárode udore ore íode u Sehón, aja Og, uje udore ore unirone déji tié Jordán uéchamitó nanique. 11 Ga yoquisadodéringadatéode u ome uaque uje que yocurasade uñeque cási uaque to. Yirajagópo to rĩ uje uacangureni Dupade u uje pujnuéngaisṍre iji gaté, mu que gusu gaté mu pujnuéngaisṍre to iji jnumi tudé. 12 Jecute e yijócha uacajéode údi ujetiga asíyo uacaru iyiejájnane ome yu to jetiga jé ãraque yu to uje yañuru uaqueo enga añucho yio to jne, jé aja yijogasúode ore to iji diri uté jne ujetiga beyoi pocaningai ome yoque. Mu asíñome uacaru iyiejájnane ome yu to jne ga a imoi tu jne jeta jé ca ajéyo yoque to.– 13 Ga chojningame ore: –Cuchiyi tupúsu ome ité ore, iapade, jé aja yeronie ore to, jé aja yajade ore to jeta ca ajéyo ore to ome yu. Enga ãracho ore jogasúode to jne rĩ iji pocaningai uté jeta ga ejnáño yocurasade ore to.– 14 Enga jé u nanique uje jnani gárode ore chajnai uruode enga ore chojninga: –Ca atatapísa yoque jne ome barasade ore jne ga a jé u jne jetiga caniranguipise yoque jne ome ua enga yicopísi bojningane cucha to. A chise dínique jne ujetiga Yocangarádejnai chicha uacarasade uaque aja yoquijmainie enga a yichago yógaja uaquei to jne enga a ca chugué bajogasui uhuaque jne.– 15 Ga Rahab iguíjnai uté chujé raja ore ujuyaquei iji ore idai cuchábi gai nanique. Enga iguíjnai piago ajámami désiji gaté yui to uje idájasi jnumi yui to nanique. Enga Rahab doi enuéjnai nanique enga tṍra enuéjnai uté aja jnumi tiji piago ajámami suté ga jé u uje jnani gárode ore doi jnumi tiji Rahab iguíjnai enga ore chajna enuéjnai aja jnumi. 16 Enga Rahab catecã́ri jnani gárode udore enga chojningame ore: –Cucaranone idógosiji ti, ga ajnáñoji ti enga apáyoji uacarengúrique enga uacamochádode gadioque jne iji uacarengúrique iji ta. Chamáñaje uacacuesórone qué ore déji uje ore chĩro erámi jeta ore chucué uaque jeta ore chujé uaque. Ga a uacacuesórone ore cha uacanerai enga a ore chajniapója yoquidai to jne rĩ, ga a jé u jne ujetiga boyo ga aquesúyo dajei yui to jne enga ajniñopója uacarasade ore irengúone to jne rĩ.– 17 Ga jé u nanique uje jnani gárode udore ore narare nanique. Enga ore chojninga: –Yisígo yocuru iyiejájnane ome ua que uje bajócha yocajéode údi gu. Enga a jé ca yicadíjoi yocuru casodé ome ua to jne jé aja bajogasui uaque enga a ca yujégo uaque to jne jetiga ga israélgosode uyoque yiríngo iji de ga yejnángo barasade ore. 18 Mu jetiga yiríngo enga enuéjna caratai jé dóji gaté jne jeta cho cochógaja jnumi iji baguíjnai bocadábi uté uje yicoi jnumi iji uté que. Enga abidi bayé, baté ore jnese, jé aja baguiosode ore to rĩ jeta ore chácariji baguíjnai ajei. Bagaidi tu gu jeta ca chuque ore jne ujetiga yocurasade doi pocaningai ome uacarasade. 19 Mu jetiga uñeque ca tangári yocuruode udore ga doi guesi tiji baguíjnai ga gosi jé yuque re. Enga a ca yoco yoquiba jne uje jé yuque re gu. Jé basa ga jeta yocurásarique uñeque chujé uacuñeque iji baguíjnai ajei enga quene yoco yoquiba uté gosi jne. 20 Mu ujetiga atata uyoque to jne enga a ca yicoi yocuruode udojo to jne ome uaque. Mu a yejnángo uaque jnese jne jeta yicoi pocaningai tome uaque.– 21 Enga Rahab chojninga: –Ueracho uacaruode udore ome yu. A yangaripísi uacaruode to, ga a ca yingopísa uaque jne ome yoqueduguéjnai irógode ore jne.– Enga jé u nanique uje jnani gárode ore jno. Enga Rahab chipocásu enuéjna caratai ga quejname enga tṍra enuéjnai eruei aja guesi garósi jeta cho cochógaja jnumi jeta pijógome ore. 22 Mu jé u uje jnani gárode ore jno ga ore chicáji cucarani ójo enga ore chacose re iji cucarani ójo. Enga ore mochádode gadióguiji cucarani ójo uté nanique. Ore ucuesórone eduguéjna cuchábi irócho chucuépisi ore iji puniri uté údode, mu que ore chise ore gotique, ga jé u uje ore chajníja uraque dedai Jericó nanique. 23 Enga ore doi jnumi tiji cucarani ójo to enga jé ore chaquesu tiédaté yui enga ore chise darasade ore irengúone uje ore apáringamécho. Mu que ore chajire cuchárique, enga ore chijnare raja Josué irengúi jetiga ore chingo cucha dacadode aja to. 24 Enga ore chisósi Josué enga ore catecã́ri enga ore chojninga: "Cho jetiga Yocangarádejnai Dupade ichajapite jericógosode aja yoquijmainie, ga cho jeta ore chácariji yoquijmainie ajéode ¡pac! Enga Dupade chisi ome pisadodéringárique ome ore, jé aja ore idáyode uñane idaisórone iji ore ejode to rĩ." |
© 2021 Ethnos360
Global Partners