Josué 19 - Dupade Uruode

Simeóngosode ore gajnéone pidáyo u udojo nanique

¹ E Josué chimate uje chatata benjamíngosode ore gajnei jnupe eruéode ome ore to nanique, ga e doi cucaranenie ome simeóngosode ore to. Ga jé u uje chatatapo simeóngosode ore gajnei jnupe isocade to rĩ. Enga ore gajnei jnupe déji judágosode ore gajnei jnupe ajei to nanique.

² Enga ore gajnéone pidáyo íode u udojo to nanique: Beerséba, Séba, Moláda ore.

³ Jé aja Hazar-sual, Bála, Ezem ore.

⁴ Jé aja Eltolad, Betul, Hórma ore.

⁵ Jé aja Síclag, Bet-marcabot, Hazar-súsa ore.

⁶ Jé aja Bet-lebaot, Saruhén ore to. Uje yisecãco ore gajnéone pidáyo udore enga ore chise 13 nanique. Mu que gusu ore mu ore gajnengápo guidai ajámamone to rĩ iji guidáidatéode udore ejode.

⁷ Ga ore gajnéone pidáyo uñéngo déji to nanique enga ore íode u udojo to nanique: Aín, Rimón, Eter, Asán ore. Mu que gusu ore mu ore gajneque guidai ajámamone to rĩ iji guidáidatéode udore ore ejode.

⁸ Enga ore gajnéone pidáyo uñane déji erãpetarei ajei to uje erãpetarei uté i tu Neguev nanique. Enga guidáyode udore uñai i tu Baalat-beer uje i uñai u Ramat. Enga ore gajneque guidai ajámamone to iji Baalat-beer uté ejode. Simeóngosode ore gajneque guidáyode udore jnese nanique uje Josué chajuguína ore uniri uté ome ore.

⁹ Querújnapise judágosode ore gajnei jnupe nanique ga sué ore gai, jecute Josué chisi ome ore uniri uté petique ome simeóngosode, ga jé u nanique uje simeóngosode ore uniri chachẽre judágosode ore uniri ajéjonguei to nanique.

Zabulóngosode ore gajnéone pidáyo u udojo nanique

¹⁰ Uje Josué e chimate uje chatata benjamíngosode, simeóngosode ore gajnei jnupe adode ome ore, enga jé u uje dopoi cucaranenie ome zabulóngosode to nanique rĩ. Ga jé u uje chingo ore gajnei jnupe eruéode ome ore to. Ga ore gajnei jnupe erué uñai chise ore idai Sarid nanique.

¹¹ Ga jnoji uté ga chicáji guedé cacadi yui to, ga chise ore idáyode uñane aja dajesui uté uje ore íode u Marála, Dabeset ore. Ga e jnopo rĩ ga cáputaji dajesui to ga chise tié pujnua to uje tié pujnua tuaté idógosiji ore idai uñai uje i tu Jocneam.

¹² Ga e yatata ore gajnei jnupe erué uñai to rĩ uje jnoji ore idai Sarid uté ga chicáji guedé garani yui iji uté. Enga chise ore idáyode uñane aja dajesui uje ore íode u Quislot-tabor, Daberat ore. Ga jnumi chãrai re iji gaté iji uté ga ore gajnei jnupe eruei uté chise ore idai uñai iji uté uje i tu Jafía.

¹³ Enga jnopo rĩ ga chisápo ore idáyode uñane to rĩ iji guedé garani yui uje ore íode u udore to: Gat-hefer, Ita-cazín, Rimón ore. Ga chise uté enga e cho jñuque ga chise ore idai Nea iji uté.

¹⁴ Enga ore gajnei jnupe eruei uté chicáji casaque garani yui to nanique ga cho jñuque iji uté ga chise ore idai uñai aja dajesui uje i tu Hanatón. Ga jnoji uté ga chicáji uéchai enga chise pararinguei iji uéchai uje pararinguei uté i tu Jefte-el.

¹⁵ Enga ore idáyode déji pararinguei uté ejode to nanique ga gare iji yirídai chojmarai. Enga guidai ibijógode iji guidáyode udore ujade ore íode u udojo nanique: Catat, Naalal, Simrón, Idála, Belén ore.

¹⁶ Enga zabulóngosode ore gajneque yatatagode guidáyo udore ore jnese jé aja ore idai ajámamone iji udore ejode to. Enga zabulóngosode ore gajnei jnupe jé chopise ore nanique, enga que chona zabulóngosode uñeque.

Ísacargosode ore gajnei jnupe isocade u udojo to nanique rĩ

¹⁷ Ga Josué e chimate punire gadiógode aja darasade to uje ore uáguedie íode u benjamíngosode, simeóngosode, zabulóngosode ore nanique, ga e dopoi cucaranenie ome ísacargosode ore to rĩ. Enga jé u uje Josué chiraja ore gajnei jnupe eruéode to nanique rĩ.

¹⁸ Ga jé u nanique uje ísacargosode ore chiraja dajnéone pidáyo íode to ujetiga ore cho dajnéngu udore jne, ga ore íode u udojo nanique: Jezreel, Quesulot, Sunem ore.

¹⁹ Jé aja Hafaraim, Sihón, Anaharat ore.

²⁰ Jé aja Rabit, Quisión, Abez ore.

²¹ Jé aja Remet, En-ganim, En-háda, Bet-pases ore.

²² Enga ísacargosode ore gajnepídi jnupe eruei chisápo ore idáyode uñane aja dajesui to nanique rĩ uje ore íode u udojo: Tabor, Sahazíma, Bet-semes, ga jé jno ga chisípise yote quedéjnai to nanique uje i tu Jordán. Uje yisecãco ore gajnéone pidáyo enga chojmára ore iji yirídai uñai nanique. Mu que gusu udojo mu ore gajneque ore idai ajámamone ore to iji udore ejode to.

²³ Enga yatatagode udojo u ísacargosode ore gajnei jnupe eruéode nanique jé aja guidáidatéode íode to uje ore cho dajnéngu udore to nanique. Ga ore gajnei jnupe jé chopise ore to ga que chonatique déji ome uñeque to.

Asérgosode ore gajnéone pidáyo u udojo to nanique

²⁴ Enga e israélgosode uáguedie gagájni nanique uje Josué chisi ome ore gajnepídode jnupe ome ore, ga e doi cucaranenie ome asérgosode ore to ujetiga chiraja ore gajnei jnupe isocade to.

²⁵ Ga jé u nanique uje Josué chingome ore gajnéone pidáyo ome ore to. Ga ore idáyode udore uñane íode u udojo to nanique: Helcat, Halí, Betén, Acsaf ore.

²⁶ Jé aja Alamelec, Amad, Miseal ore. Ga ore gajnei jnupe erué uñai iji guedé cacadi yui chise cucarãte umarejnájna to uje i tu Carmélo nanique, ga chisápo tié jmané to rĩ uje tié uaté i tu Sihor-libnat nanique.

²⁷ Enga ore gajnei jnupe eruei uñai uté e cho jñúngaja guedé garani yui, ga chise ore idai uñai aja dajesui uje i tu Bet-dagón nanique. Enga jno ga chajna zabulóngosode ore gajnei jnupe údabi to. Enga jno ga chise pararinguei nanique uje pararinguei uté i tu Jefte-el nanique, ga cho jñuque iji uté nanique ga chicáji casaque garani yui ga chise ore idáyode uñane aja dajesui uje ore íode u: Bet-emec, Neiel ore. Ga ore idai Cabul déji ore idai Neiel uté uécha uñai nanique, mu que asérgosode ore gajnei jnupe eruei chisípise ore idai Cabul uté nanique aja dajesui uté.

²⁸ Enga e cáputapísiji dajesui to ga chise ore idáyode aja dajesui to uje ore íode u Abdón, Rehob, Hamón, Caná ore ga chichagápise raja ore idáidatéi Sidón to nanique rĩ.

²⁹ Enga chise caputaringuei eruei enga cho jñuque ga jé jnopo rĩ ga chise ore idai uñai aja dajesui to uje i tu Ramá nanique. Ga e cho cutuque, cutuque to rĩ ga chise ore idáidatéi Tíro to. Ga ore idáidatéi uté u uje ore chijnópise dabai to nanique enga etoguipise ore idai ujuyaquéode iji gai to. Ga dimanepise ore ome ayoré jõcaratade yúode to. Enga qué jnopo rĩ ga chise ore idai uñai to uje i tu Hósa ga jé u uje chajna yote quedéjnai Mediterráneo caputaringuei iji jnumi. Mu qué ore gajnéone pidáyo déji ore gajnei jnupe ajéode to ga ore íode u udojo to: Mahaleb, Aczib ore.

³⁰ Jé aja Úma, Afec, Rehob ore to rĩ. Uje yisecãco ore gajnéone pidáyo ga yátago ore aja ñane ga 22 u nanique. Mu que gusu ore idáidatéode mu ore gajneque guidai ajámamone to rĩ iji ore idáidatéode ejode to.

³¹ Enga asérgosode jé ore gajnei jnupe eruéode u yatatagode udojo ga ore gajnei jnupe uté jé chopise ore to nanique enga que chonatique déji uñeque to nanique.

Neftalígosode ore gajnéone pidáyo u udojo to nanique

³² Enga Josué e chimate israélgosode ore uáguedie gajnéone jnupe aja ore to uje ore uáguedie udire chejna yijmanai nanique. Ga e doi cucaranenie ome neftalígosode ore to ujetiga chiraja ore gajnei jnupe eruéode to.

³³ Ga Josué e cho quique ore gajnei jnupe eruéode ome ore to. Enga erué uñai chise ore idáyode uñane aja dajesui uje ore íode u udojo nanique: Helef, Alón-saananim, Adami-neceb, Jabneel, Lacum ore. Ga jno ga caputapísaja dajesui ga chichagápise raja yote quedéjnai Jordán nanique.

³⁴ Mu jé cho jñuque iji uté ga chicáji guedé cacadi yui nanique ga chise ore idáyode uñane aja dajesui uté uje ore íode u Aznot-tabor, Hucoc ore nanique. Ga jé u nanique uje neftalígosode ore gajnei jnupe chichaga raja zabulóngosode ore gajnei jnupe iji umusoi garani yui, jé basa ga chajnapise asérgosode ore gajnei jnupe to iji guedé cacadi yui to nanique rĩ. Enga chichagápo raja yote quedéjnai Jordán to nanique rĩ iji guedé garani yui.

³⁵ Enga ore gajnéone pidáyo uñane iji ore gajnei jnupe ajéode ga uajadipise ujuyaquéode iji ore gáyode nanique to. Ga ore íode u udojo to: Sidim, Zer, Hamat, Racat, Cineret ore.

³⁶ Jé aja Adáma, Ramá, Hazor ore to.

³⁷ Jé aja Cédes, Edrei, En-hazor ore to.

³⁸ Jé aja Irón, Migdal-el, Horem, Bet-anat, Bet-semes ore to rĩ. Uje yisecãco ore gajnéone pidáyo ga 19 u ore nanique. Mu que gusu udojo mu ore gajneque guidai ajámamone to iji udore ejode to.

³⁹ Ga yatatagode udojo u neftalígosode ore gajnei jnupe eruéode, jé aja ore gajnéone pidáyo ore íode to nanique rĩ. Mu neftalígosode ore gajnei jnupe jé chopise ore to nanique ga que chonatique déji udore uñeque to.

Dángosode ore gajnéone pidáyo u udojo to nanique rĩ

⁴⁰ Ga e Josué chimate israélgosode ore uáguedie uñane ore gajnéone jnumío aja ore nanique ga chojmára ore uáguedie udire iji ti nanique enga amirone u dángosode ore. Ga jé u nanique uje Josué doi cucaranenie ome ore to ujetiga chiraja ore gajnei jnupe eruéode to. Ga e chimate ga chingo ore gajnei jnupe aja ore to nanique rĩ.

⁴¹ Ga jé u uje Josué chingome ore gajnéone pidáyo íode ome ore nanique uje ore íode u udojo to nanique: Zóra, Estaol, Ir-semes ore.

⁴² Jé aja Saalabín, Ajalón, Jétla ore.

⁴³ Jé aja Elón, Timnat, Ecrón ore.

⁴⁴ Jé aja Elteque, Gibetón, Baalat ore.

⁴⁵ Jé aja Jehúd, Bene-berac, Gat-rimón ore.

⁴⁶ Jé aja Mejarcón, Racón ore to. Ga jé ore gajneque jnumone to jnese iji ore idai Jope tiógarei.

⁴⁷ Mu ore gajnei jnupe cáma chise ore jnese nanique ga qué chona ujade nanique. Ga jé u nanique uje dángosode ore cugujnáji ore idai uñai uje i tu Lesem, enga ore chejnápise ore iji guidai tuté. Ga ore cho dajnéngu ore idai uté to. Ga jé u nanique uje dángosode uñane chácariji ore idai uté to ga ore cho dedai iji uté to. Mu ore chécãre ore idai uté i to nanique. Ga ore cho i iji dáqui gatei i to nanique ga ore idai tuté i tu Dan to nanique.

⁴⁸ Yatatagode udojo u dángosode ore gajnéone pidáyo íode. Enga dángosode ore gajnei jnupe uté e chopise ore jnese nanique ga que chonatique déji uñeque to.

Josué gajnei jnupe isocade u udojo to nanique

⁴⁹ Ga jé u nanique uje israélgosode e ore gajnéone jnumío cuse jnese ga ore chisi ome Josué gajnei jnupe ome uté to. Mu Josué gajnei jnupe déji ore urasade efraíngose ore gajnei jnupe ajénique.

⁵⁰ Ga ore dopísi Yocangarádejnai Dupade áyipiedie ga ore chisi ome ore idai Timnat-séra ome Josué nanique uje uté déji cucarani údi nanique iji tuijnai ajei. Chamáñaje Josué chutai Dupade nanique gu iji taningai ujetiga cho dajnéngu cucaranone udore jne. Jecute efraíngosode ore juéga dajnepídi petique ome Josué, urasade ore nanique, ga Josué ore cho dajnéngu cucaranone udore údode nanique. Enga Josué chirópo ore idai Timnat-séra tuté aja gaté rĩ ga chimánaja gaté ga jé u uje cho dedai iji uté to nanique.

⁵¹ Ga yujúdode udojo u uje israélgosode ore angaránone chimáta raja Josué, Eleazar ore gari to nanique aja ore idai Sílo. Ga ore chácariji Dupade iguíjna cucha ao iquei nanique uje ore doi cucaranenie ome darasade nanique. Ga jé u nanique uje ore chiraja ore uáguedie chojmara, chojmarane gajnéone jnumío adode nanique ga ore chajuguína jnumone udore aja darasade to. Ga jé u nanique uje ueradípise ore isocade nanique ga que chonatique déji ore urasade uñeque to nanique iji Dupade guerani uté jnupe to.