Josué 18 - Dupade Uruode

Josué e chingo ore gajnetígo jnumío ome israélgosode ore uague uñanie nanique uje gare ore iji ti yijmanai uñai

¹ Chise diri nanique iji ore jocaningane quigade uje israélgosode ore chimáta ñane aja ore idai Sílo. Ore gaidi u Dupade iguíjna cucha ao ujetiga ore pésu uté aja quigode iji uté nanique.

² Mu israélgosode ore uáguedie gare ore iji ti yijmanai uñai uje cáma Josué chingo ore gajnetígo jnumío ome ore to.

³ Enga e ore déji ñane gari nanique iji ore idai Sílo uté enga Josué catecã́ri ore ga chojningame ore: "¿Gotique gu uje uacácayoji de bisideque to? Uacamóño uje yocáqui cásodicáite ore angureni Dupa gueranone ore idáyo qué déji uacaquei to jetiga oyo uacaniri iji udore to. ¿Ama ca Yocangarádejnai uté ajéode u ujetiga israélgosode uyoque yoco yocuniri iji puniri udé údode jnese a?"

⁴ Ga jé u nanique uje Josué catecã́ri darasade ore uje ore uáguedie udire gare iji ti yijmanai uñai. Enga chojningame ore: "Uje uacáguedie gare ore iji ti ga ajnicho jnani gadiótigo, gadiótigo, gadiótigo iji uacáguedie udire jnese. A yutṍri ore jne ujetiga ore cho guidáyo ome cananéogosode ore jne. Enga a ore chajire ore uniri údode jnese to. Ga ore chirajapise ore uniri jogadode ome yoque to jne. Yigaidi u gu ujetiga ore di datatagode údi ome yu jne ga a jé u jne ujetiga yajuguína ore uniri tome jnumi chonángone uaque to jne.

⁵ A ore chasingara jnumone iji cananéogosode ore uniri uté aja uaque jne, ga péode gare iji ti yijmanai uñai jne ujetiga jnumi déji ome uacáguedie udire jnese. Mu a ca ore chapuse judágosode aja to uje e ore gajnei jnupe cuse gu iji umusoi garani yui. Ga jé chopo jnani bajai José ape disi ejode to rĩ, a ca ore chapuse ore aja to uje e ore chácariji dajnei jnupe to iji casaque garani yui.

⁶ Uje e ore chimate dasingarájnane jnumi pecho udore ujeta péode gare iji ti yijmanai uñai, enga a ore churúsãre quigode ome yu jne. Enga a ore di darusarane udore údi ome yu ga a jé u jne ujetiga yiji cucaranenie ome ore jne iji Yocangarádejnai Dupade iquei, ga jé u jne jeta Dupade chingo gajnesórone ome yu, ga jé basa ga a yajuguína ore isingarájnane jnumío ome uacáguedie udire jnese jne.

⁷ Mu a jé ca levígosode gajnepítique cuse to iji jnumi tuté jne. Chamáñaje ore gajnepídi tu Dupade iroquéode gu ga jecucha ga Dupade chajire ore yui jne. Mu rubéngosode, jé aja gádgosode, jé aja manasésgosode uague uña jé jogate ore gari to ore gajnéone jnumío uje Dupade iroi Moisés e chisi ome ore nanique gu iji yote quedéjnai Jordán uécha uñai iji guedé garani yui."

⁸ Ga jé u nanique uje Josué e chimate daruode aja ore nanique ga jé u uje guidáyode ore pésu dagúchade aja ñane to nanique enga jé u uje ore jno nanique. Uje cáma ore jno nanique mu Josué catecã́ri ore bajaque enga chojningame ore: "Boyo ga ajichopise ore idáyode údode to ga asingacho jnumi eruéode aja ñane to jne. Uacagaidi tu gu jeta uacasingarájnane jnumi pecho chopise uacáguedie ore to jne. Ga arúsãcho udore, ga a esópo yóguiji yoquidai Sílo udé to jne rĩ, enga a yicagóji Dupade iguíjnai to jnese ujetiga yiji cucaranenie ome uaque iji Yocangarádejnai iquei jne. Enga jé u jeta yiraja gajnesórone iji uacáguedie udire, ga jé u jne jeta yajuguína uacasingarájnane jnumío ome uacarasade to jne jeta ore cho danirone iji udore to."

⁹ Ga jé u uje guidáyode ore jno nanique enga ore chajiripise ore uniri uté údode jnese. Ga ore chise ore idáyode jnese enga que ore imótique ore idai cuse. Enga ore churúsãre ore idáyode íode jnese jetiga ore chiraja ore idáyode jnese. Mu darujna aode gare iji ti yijmanai uñai nanique ome ore urusarane ore idáyo udore, ga chopise chonángone ore uáguedie to iji israélgosode ore nanique uje cáma ore gajnepítigo cuse iji cananéogosode ore uniri uté nanique. Ga jé u nanique uje ore chajníja ore idai Sílo to nanique ga ore quítequiguíji Josué, ore iji ore irengúi uté ga ore chingo darusarane aja to nanique.

¹⁰ Ga jé u nanique uje Josué chajuque jnumone udore iji chonángone ore nanique. Ga jé u uje doi cucaranenie ome ore iji Dupade iguíjnai uté iquei iji ore idai Sílo nanique, enga jé u uje Dupade chingo dáyipiedie ome ore nanique to rĩ jeta ore chiraja dajnéone jnumío ome cucaranenie udire to nanique.

Benjamíngosode ore gajnei jnupe eruéode u udojo nanique

¹¹ Enga benjamíngosode gajnei jnupe chajo raja judágosode, joségosode ore gajnéone jnumío ujai nanique.

¹² Enga ore gajnei jnupe eruei uñai iji casaque garani yui chichaga raja yote quedéjnai Jordán edúdi nanique, enga jno nanique ga chicáji guedé cacadi yui nanique aja dajesui, ga charose raja ore idai Jericó uécha uñai iji casaque garani yui to, enga jnopo rĩ ga chise cucaranone iji uté uéchai. Ga chichagápise raja erãpetarei to nanique rĩ uje erãpetarei uté i tu Bet-avén nanique.

¹³ Enga e cho jñuque ga chicáji umusoi garani yui nanique ga chise ore idai uñai aja dajesui uje íode gare to nanique ga íode u udojo: Luz, Betel ore. Ga ore gajnei jnupe eruei uté qué chicáji umusoi garani yui ga chise ore idai uñai uje déji cucarani jmané to uje uté i tu Atarot-adar. Enga cucarani uté dépisi ore idai Bet-horón de Abájo tiógarei to nanique iji umusoi garani yui uté.

¹⁴ Enga ore gajnepídi jnupe eruei uté e cho jñuque iji cucarani uécha uñai uté iji umusoi garani yui, ga chicáji yote quedéjnai Mediterráneo yui iji guedé cacadi yui nanique. Cucarani uté u uje déji ore idai Bet-horón tiógarei to nanique. Enga chise ore idai Quiriat-baal aja dajesui uté nanique. (Ore idai uté i uñai cuse to nanique ga i uñai uté u Quiriat-jearim, enga judágosode ore gajneque guidáidatéi Quiriat-jearim uté nanique.)

¹⁵ Ga ore gajnei jnupe eruei uté iji umusoi garani yui jnoji ore idai Quiriat-jearim uté nanique ga chicáji guedé cacadi yui ga chichagápise raja sibíjnai to nanique uje i tu Neftóa.

¹⁶ Enga qué jnoja dajesui nanique ga chise tuijnai iji cucarani údi to nanique, uje cucarani uté déji pararinguérique tiógarei nanique. Pararinguei uté i tu Ben-hinom, ga déji pararinguei uñai uécha uñai nanique iji casaque garani yui uje pararinguei uñai uté i tu Refaim nanique. Enga ore gajnei jnupe eruei uté jé jnopo rĩ ga chicapóji pararinguei uñai gaté rĩ uje uté i tu Hinom nanique. Ga jno enga chichaga raja jebuséode ore idai uécha uñai iji umusoi garani yui, ga jé jnoja dajesui ga chise sibíjnai nanique uje uté i tu En-rogel.

¹⁷ Enga jno ga cho jñuque ga chicapóji casaque garani yui to rĩ enga jno ga chise guidáyode uñane aja dajesui uje ore íode u En-semes, Gelilot ore. Ga ore idai Gelilot uté dépisiji cucaranone iquéjongami to nanique uje uté i tu Adumín. Ga qué jnopo rĩ ga chise cucarané cuchabé aja dajesui uje ore chĩ́care Bohán aja uaté nanique. (Jnani bajai Rubén ujnacare Bohán uté nanique.)

¹⁸ Ga jno ga chise cucarani imochẽracádi iji casaque garani yui to uje uté déji pararinguei iquei to uje ore chĩ́care Pararinguei Jordán aja uté nanique, ga jé jno ga chicai jnumi iji uté ga chise garáijnai to iji yote quedéjnai Jordán edúdi.

¹⁹ Ga jnopo rĩ ga chisápo ore idai Bet-hógla uécha uñai iji casaque garani yui to rĩ ga jé jnoji uté ga chichaga raja yote quedéjnai Jordán ajécatadé to uje ore chĩ́care Echujna aja yote quedéjnai ajécatadé uté nanique. Ga benjamíngosode ore gajnei jnupe eruei iji umusoi garani yui jé u uté nanique.

²⁰ Jé basa ga ore gajnei jnupe eruei uñai iji guedé garani yui chichagápise raja yote quedéjnai Jordán to nanique. Enga e yiya yatata benjamíngosode ore gajnei jnupe eruéode to, ga e yatatapo ore gajnéone pidáyo to rĩ iji ore gajnei jnupe tuté ajéode to nanique.

²¹ Ga ore íode u udojo nanique: Jericó, Bet-hógla, Emec-casis, ore.

²² Jé aja Bet-arabá, Zemaraim, Betel ore to.

²³ Jé aja Avim, Pará, Ófra ore.

²⁴ Jé aja Quefar-haamóni, Ófni, Géba ore to. Uje yisecãru ore gajnéone pidáyo udore enga ore chise 12 nanique. Mu que gusu ore mu ore gajnengápo guidai ajámamone to rĩ iji guidáidatéode udore ejode.

²⁵ Enga ore gajnéone pidáyo uñane déji to nanique enga ore íode u udojo to nanique: Gabaón, Ramá, Beerot ore.

²⁶ Jé aja Mízpa, Cafíra, Mozah ore.

²⁷ Jé aja Requem, Irpeel, Tarála ore.

²⁸ Jé aja Zéla, Elef, Jebús ore to uje Jebús uté i uñai u Jerusalén nanique. Jé aja Guibeá, Quiriát ore to nanique rĩ. Uje yisecãco ore gajnéone pidáyo udore enga ore chise 14 nanique. Mu que gusu ore gotique, mu ore gajnengápo guidai ajámamone to rĩ iji guidáidatéode udore ore ejode. Enga benjamíngosode ore chajuguína dajnei tuté jnupe iji ñane nanique enga que chonapísa jnani uñeque to nanique, mu ore gajnepídode jnupe déji ome ore jnese nanique.