Josué 17 - Dupade Uruode

Manasésgosode ore uague uña ore gajnei jnupe déji yote quedéjnai Jordán uécha uñai nanique iji guedé cacadi yui

¹ Jnani bajai José ape bajai tu Manasés nanique ga Manasés uté ape disi ejode ore gajnéone jnupe u yatatagode udojo jne. Ga jnani bajai Manasés uté ape bajai u Maquir to nanique rĩ ga uté ape disi ejode u uje ore cho dajnéngu dajnepídi erãpe bajaque iji yote quedéjnai Jordán uéchamitó iji guedé garani yui nanique. (Jnani bajai Maquir uté ujnacari i tu Galaad to nanique rĩ.) Ga jnani bajai Maquir uté ape disi ejode udore ore chirajapise pocaningane nanique ga jĩraque ore cho dajnéngu dajnepídode erámio to iji yote quedéjnai Jordán uécha uñai iji guedé garani yui nanique. Ga ore gajnepídode erãpe u ore unirone udore nanique uje ore íode u Galaad, Basán ore.

² Ga jnani bajai Manasés ape disi ejode uñane ore dayode íode u udojo to nanique: Abiezer, Hélec, Asriel, Siquem, Héfer, Semída ore. Ga jnani bajai José ájnape disi ejo u udore ore jnese nanique. Ga israélgosode ore angaránone doi cucaranenie ome ñane nanique ga jé u uje Manasés ape disi ejode uñane udore ore chiraja dajnepídode erãpe to. Ga ore gajnepídode déji yote quedéjnai Jordán uécha uñai uté iji guedé cacadi yui jnese.

³ Mu ore urása uñai déji ore ujade to nanique uje i tu Zelofehad. Enga Zelofehad uté urodie gapu uéguei nanique, ga ore chejna yijmanai nanique. Enga que uté ujnacánique cuse to nanique. Mu uté urodie ore íode u udojo to: Maála, Nóa, Hógla, Mílca, Tírsa ore. (Ga Zelofehad uté dai i u Héfer nanique. Jé basa ga Héfer uté daipísi u jnani bajai Galaad to nanique rĩ. Ga Galaad uté daipísi tu jnani bajai Maquir to, jé basa ga Maquir uté daipísi u jnani bajai Manasés to nanique rĩ.)

⁴ Enga Héfer uté urodie ore tibágui Josué, jorane pangarácho ore, Dupade iroi Eleazar ore ga ore chojningame ore nanique: "Yibájoi uaque gu ujetiga angáchoi yocuruode iji de. Cachi uacamóño arĩa uje íjnoque yocai ujnacánique to jeta gajnepítique jnupe cuse to. Enga jé gusu urodie uyoque to. Ise mu Dupade ajéode urásu ome yoc ujetiga yocajnepítique cuse to iji jnumi tudé to. Uje jé urúo ome Moisés nanique gu ujetiga ca jnumi chona yocuñeque nanique." Ga jé u uje Josué ore tangári ore nanique ga chapuse ore aja to uje chajuguína Manasés ape disi ejode ore gajnepídode jnupe iji Zelofehad iguiosode uñane nanique, uje jé Yocangarádejnai ajéode u to nanique gu.

^5-6 Jecute uje ore chajuque manasésgosode ore gajnéone jnumío iji ore nanique iji yote quedéjnai Jordán uécha uñai iji guedé cacadi yui ga péode chejna yijmanáyone uje chise ore nanique. Ore chapuse Zelofehad urodie aja to gu uje ore chisi ome ore gajnéone jnupe ome Manasés ape disi ejode udore nanique. Jé basa ga jnani bajai Manasés ape disi ejode uñane iji tiédaté Jordán uécha uñai iji guedé garani yui ore gajneque ore unirone Galaad, Basán ore nanique.

⁷ Enga manasésgosode uje ore déji tiédaté Jordán uécha uñai iji guedé cacadi yui ore gajnei jnupe eruei cho jñuque, jñuque, jñuque aja dajesui iji umusoi garani yui ga chise ore idáyode uñane to aja dajesui uje ore íode u Aser, Micmetat ore. Ga ore idai Micmetat uté dépisi ore idai Siquem tiógarepísi nanique. Ga ore gajnei jnupe eruei jé jno ga chisápo ore uniri rĩ iji umusoi garani yui to uje puniri uté i tu Tapúa nanique.

⁸ Ga manasésgosode ore gajneque puniri Tapúa uté nanique, mu jé basa ga efraíngosode ore gajneque ore idai Tapúa nanique to uje ore idai Tapúa uté dépisiji puniri Tapúa ejoi nanique.

⁹ Ga ore uniri eruei uté jno nanique ga chise tié pujnua to nanique uje i tu Caná. Efraíngosode ore gajneque guidáyode uñane iji tié pujnua uaté uécha uñai iji umusoi garani yui, enga ore idáyode udore uñane déji manasésgosode gajnéone guidáyo ujade to nanique. Jé basa ga manasésgosode ore gajnepídi erãpe eruépisi déji tié pujnua uaté uécha uñai iji casaque garani yui ga jnoji uté ga chisípise yote quedéjnai nanique uje uté i tu Mediterráneo.

¹⁰ Efraíngosode ore gajnei jnupe erué uñai déji tié pujnua uaté uécha uñai iji umusoi garani yui nanique. Jé basa ga manasésgosode ore gajnei jnupe eruei déji tié pujnua uaté uécha uñai iji casaque garani yui. Ga ore gajnei jnupe uté chise yote quedéjnai Mediterráneo to. Jé basa ga chise ísacargosode ore gajnei jnupe to iji guedé garani yui, ga chichaga raja asérgosode ore gajnei jnupe to iji casaque garani yui uté nanique.

¹¹ Jé ate nanique uje manasésgosode ore gajnéone pidáyo uñane déji asérgosode ore gajnei jnupe ajei to, jé iji ísacargosode ore gajnei jnupe ajei to rĩ. Ga ore gajnéone pidáyo udore ore íode u udojo to nanique: Bet-seán, Ibleam, Dor, Endor, Taanac, Meguído ore. Mu que gusu ore mu ore gajneque guidai ajámamone to iji guidáyode udore ujade, jé aja cucarãte ijnosoco umarejnájna gadiógode to nanique rĩ.

¹² Manasésgosode ore gajneque guidáyode udore ome Josué nanique, mu que togome ore nanique jeta ore cho dajnéngu to gu uje cananéogosode jé ore déji to gu ga etoguipise udore ore.

¹³ Enga udojo quigade nanique ga israélgosode ore etotiguei quérã ga suépise cananéogosode ore etotiguei gai to nanique, mu que ore chijócãre cananéogosode ore iji ore idáyode udore to nanique. Mu ore chojningame ore nanique: "Jecucha amácho yoque ga ca yujégo uaque to jne."

Jnani bajai José ape disi ejode ore dajneque uguíjnamúone to nanique uje ore déji cananéogosode ore uniri ajei

¹⁴ Mu jnani bajei José ape disi ejode udore manasésgosode, efraíngosode ore, qué ore chachoque dajnéone jnumío nanique enga qué ore chayója Josué gaté rĩ. Enga ore chojningame uté nanique: –Josué á, ¿Ama ca amo yoque to a? Uje chojmarápise yocajnei jnupe. Jiépisi José ape disi ejode yoque to ga yocajnéone jnupe qué chona yocujade to. Chamáñaje Yocangarádejnai chatapísaja yoque gu ga jiépisi yocapiedie to.–

¹⁵ Ga Josué catecã́ri ore ga chojninga: –Uacajneque cucaranone udojo údode jnese uje ore íode u Cucaranone Efraín ujetiga oyo uacarani iji udore. Mu jeta jnumi qué chona uaque boyo ga acayóji ferezéogosode, refaítagosode ore uniri to uje ueradéjnapise uguíjnamúone iji uté to. Aquesúyo poridie iji uguíjnamúone udore enga apéso uaquedáyode iji ore uniri uté jne.–

¹⁶ Ga jé u nanique uje ore chojningame Josué: –Cachi u arĩa. Uje qué tuijnane iji cucaranone Efraín chona yoque gu. Mu bamo to arĩa uje a ca toque uguíjnamúone udore ome yoque to jne uje etoguipise cananéogosode iji ore unirone udore. Cuchiyíode u cananéogosode ore uje ore idáyode u Betseán, Jezreel ore uje Jezreel uté déji pararinguei ajei. Uje guebéquedatéode déji ore gari to ome pocaningane yúode ga ore gachidode udore pipesucho iji guebeguipísode.–

¹⁷ Ga jé u uje Josué catecãrápoi efraíngosode, manasésgosode gaté rĩ. Ga chojningame ore: –Cachi jiépisi uaque to arĩa, enga etoguipise uaque to rĩ. Enga a ca gusu uacajnei jnupe uté uje a yisígo ome uaque.

¹⁸ Mu a uacajneque uguíjnamudatéode udore to jne, ga uacagutíyabádode u uguíjnamúone udore to jne ome uaque. Uacoyo cuchadatéo iji ore gachidode guebéquedatéo, enga chiese etoguipise ore ome uaque, mu que qui tu gotique ome uaque to. Uje a ajócãcho cananéogosode ore iji ore uniri uté jne enga a oyo uacajnéngu uguíjnamúone udore to jne rĩ.–