Josué 14 - Dupade Uruode

Josué e chajuguína dejnane puníño ome darasade ore nanique

¹ A e yatata israélgosode ore gajnepídode erámio iji puniri Canaán uté nanique. Que gusu Josué nanique uje chajuguína dejnane puníño udore ome darasade ore, mu Eleazar déji gari to nanique uje Dupade iroque uté to nanique ujetiga catecã́ri Dupade to nanique ome ore. Jé basa ga ore angaránone uñane dépoji Josué gari to nanique rĩ uje chajuguína dejnane puníño ome israélgosode ore uáguedie jnese.

² Israélgosode ore uáguedie gagájni ore iji yijmanai uñai nanique uje Josué ore chajuguína ore ome ore gajnepídode erámio nanique. Enga ore doi Moisés isocabei ome ore nanique. Chamáñaje jé Dupade urúo gu ome Moisés nanique ujetiga ore doi cucaranenie ome ñane uje ore chajuguína dejnane puníño ome darasade ore nanique. Ga jé u uje ore tṍra cucaranenie aja jnumi bajaque nanique ujetiga gosi yuque enga jé u uje uté gosi urasade ore cho dajnéngu dajnepítigo to iji cananéogosode ore unirone udore nanique. Ga ore cháta manasésgosode ore uague uña aja israélgosode ore uáguedie udire nanique uje ore chajuguína ore ome punirone udore nanique.

³ Mu uje Moisés qué eca nanique enga chisi ome rubéngosode ore gajnepídi ome ore nanique iji yote quedéjnai Jordán uéchamitó. Jé aja gádgosode ore to rĩ, jé aja manasésgosode ore uague uña to nanique rĩ. Mu que Moisés chisi ome cuchárique ome levígosode ore nanique.

⁴ Jnani bajai Israel ujnacarode uñai uje i tu José uté ujnacarode gare nanique uje ore íode u Manasés, Efraín ore. Ga jé basa udore ore ape disi ejode gajnepídode cuse to iji israélgosode ore guejnane puníño to, mu que levígosode ore gajnetique cuse nanique iji udore. Mu ore juéga guidáyode uñane ome ore nanique ujetiga ore chácariji udore bisideque, enga ore juégapo ujetiga ore gachidode aquirájna, áyasa ore, ore taguíji ore gueranone pidáyo udore ujade to nanique rĩ.

⁵ Ga jé u nanique uje israélgosode que ore chó Dupade iro casicaite Moisés urúrique gánique nanique uje ore chajuguína dejnane puníño ome ñane nanique. Chamáñaje Dupade chingopísa dáyipiedie ome Moisés nanique, ga jé basa Moisés chingopísa dajnéone Dupade urúo ome Josué ore to nanique.

Caleb gajnepídi erãpe u cucarãte umarejna nanique uje uté i tu Hebrón nanique

⁶ Ga chise diri nanique uje jnani bajai Judá ape disi ejode ore tibágui Josué nanique jetiga ore catecã́ri to, ga ore jno nanique ga ore chicáji Josué jogadi to nanique iji ore irengúi ore apáringa uje i tu Gilgal nanique. Ga cenezéogosi Jefone ujnacari Caleb déji ore gari to nanique. Enga Caleb uté catecã́ri Josué nanique enga chojningame: "Josué á, barajapise Dupade iro casicaite Moisés uru cásodicáite to ome yoque nanique uje yugúcoji ore uniri Cádes-barnéa nanique. Uje Moisés casica chingome Dupade áyipiedie ome yoque nanique.

⁷ Uje yugúcoji ore uniri Cádes-barnéa nanique enga Moisés casica chiroque yógaja cananéogosode ore uniri to nanique ujeta yoco guidáyo ome ore nanique ga yejnanie siquerei chise 40 nanique. Uje yiríngo iji punire ueradéjnai tudé nanique uje yajmitágo nanique ga yatata yoquimone cucha jnese ome Moisés, ga ũrepise yu ome yuruode jnese nanique.

⁸ Mu yoquijõrapísode udore uje ore nóna yógaja punire ueradéjnai tuté to nanique ore atatagode chajuque yocurasade agutedie nanique uje ore chaquĩ́ra ore nanique ujetiga ca ore chicáji Dupade guerani punire nanique. Mu uyu nanique ga yajopise yu aja yanguretigai nanique iji Yangarádejnai Dupade jetiga chisi ome yocajnepítigo jnupe ome yoque iji ojningai tuté punire ueradéjnai to nanique.

⁹ Ga jé u nanique uje Moisés casica chisi ome daru iyiejájnane ome yu nanique enga chojningame yu to nanique: 'Caleb á, barodie qué pijóguiji punire ueradéjnai tuté ajéode to arĩa, enga a amo to jne ujetiga Dupade chorepoi uáji barodie udire jogadi tuté punire ueradéjnai to rĩ. Enga a ayáji barodie jogadode udore to jne jé aja bape disi ejórigo ore to. Chamáñaje banguretigai que chicai jnutique gu ome Yangarádejnai Dupade to.'

¹⁰ Siqueredie e 45 uje yudúco yocajnéone Yocangarádejnai urúo iji Moisés pijnani to nanique iji erãpetarei ajei nanique, mu Yocangarádejnai Dupade uruode a jé jogate ome yoque. Chamáñaje uté chajiripise yoqui iji deréjnane jnese ga que cuchárique chósi ti iji yoque iji yocurasade israélgoso yocajesúode erámio iji erãpetarei ajei to nanique, ga jé chuságaja deréjnane udojo to uje chajire yoquíode. Enga a jé uté doi daruode ome yu gajiné uje yejnanie siquerei e chise 85 mu.

¹¹ Bamo yu iji de arĩa uje yetotiguei jé cho yúringa casicaite jnacare gajnei yetotiguei to uje Moisés chiroque yu ujeta yo guidai nanique ome punire ueradéjnai tudé to iji taningai. Enga qué dicase yu to iji deréjnane udojo to rĩ ome pocaningai yúode.

¹² Jecute, Josué á, be Yocangarádejnai uruode to enga asi ome yajnepítique jnumome yu to jetiga déji cucarãte umarejnájnane usodi to. Josué á, bamo arĩa uje jnani bajai Anac ape disi ejode ore déji ore uniri uté nanique uje yudúco yocajnéone Dupade urúo iji Moisés pijnani nanique, enga qué ore déji yojningai cucarãte umarejnájnai uté to iji deréjnane udojo to. Enga ore ujuyaquéode déji ore gáyode iji ore idáidatéode gáyode jnese to. Mu que pisadodéringárique déji yu to ome ore yúrique to. Uje Yangarádejnai uruode u nanique ome yu jetiga nóna yu aja udore ore to. Enga a jĩraque yejna ore iji ore idáyode to jne iji cucarãte umarejnájnane ore ujade to."

¹³ Ga jé u nanique uje Josué chacacãre dajõrai Caleb uté nanique ga chisi ome cucarãte umarejna Hebrón ome uté to nanique ujetiga Caleb, ape disi ejórigo ore cho dajnéngu uté to jnese.

¹⁴ Isocai u uté nanique uje Caleb e chimate dajnepídi cucarãte umarejna Hebrón taja re nanique. Ga uté ape disi ejode jé gajneque uté to jé iji dirode udojo to. Chamáñaje Dupade chatapísaja nanique gu uje anguretigai jogadípise israélgosode ore angureni Dupa nanique gu.

¹⁵ Enga guidáidatérique déji Caleb uté gajnei jnupe nanique ga uté i bajai tu Quiriat-árba nanique. Uje ujnomeránguipíse jnani bajai Anac ape disi ejórique uñeque nanique. Uje umarejnápise uté nanique ga i tu Árba. Jecute ore pésu dedai i nanique ga ore chĩ́care Quiriat-árba aja nanique. Mu quigade u nanique uje ore pésu i ejoi nanique ga i ejoi u Hebrón nanique uje Caleb cho dajnenguíji ore idai uté nanique. Jé u nanique uje Caleb chimate dajnei tuté jnupe aja re nanique ga jé u nanique uje cho paráguiji daniri tuté.