Josué 13 - Dupade Uruode

Dupade chiroque Josué aja cananéogosode ore unire uñane nanique ujetiga ore chejna udore ore to

¹ Enga e chise diri nanique uje Josué choquíjnajnupípis. Ga jé u nanique uje Yocangarádejnai Dupade catecãrápoi rĩ. Enga chojningame nanique: "E choquíjnapise ua to. Mu jiei ore unirone uñane ujeta ejnáño udore ore jnese to, ujetiga israélgosode uaque oyo uacajnéngu udore to.

^2-3 Filistéogosode, gesuréogosode qué jiei udore ore idáyode iji ore uniri Canaán uté ujetiga ejnáño udore ore jnese to. Ore unirone udore erué uñai chise tié Sihor edógai iji umusoi garani yui, uje egíptogosode ore uniri déji tié uaté edógai to iji guedé garani yui. Enga erué uñai chise ore idai Ecrón iji casaque garani yui to. Enga filistéogosode ore eduguéjna cuchábode chejna yijmanai iji ore uniri uté ga udore ore idáyode íode u udojo to: Gáza, Asdod, Ascalón, Gat, Ecrón ore. Avéogosode ore uniri qué déji umusoi garani yui to jeta ejnáñopo ore uniri uté unirisórone ore to jne rĩ.

⁴ Cananéogosode uñane ore unirone uñane qué déji to jeta ejnáñopo ore to jne rĩ uje ore déji sidóniogosode ore idáyode, afécgosode ore idai ujai uje ore idai Afec uté chise amorréogosode ore unirone eruei to.

⁵ Giblítagosode ore uniri dépoji to rĩ jeta ejnáñopo ore to jne rĩ. Jé aja líbanogosode ore uniri to uje ore uniri uté déji guedé garani yui, ga eruéode idája ome ñane to. Uje erué uñai chise ore idai Baal-gad iji cucarani Hermón údi, ga jé basa ga erué uñai chise ore idai Hamat eruébi."

⁶ Yocangarádejnai Dupade qué jno daruode údi ome Josué nanique ga chojninga: "A yijócãre sidóniogosode iji israélgosode uacaquéode jne. Enga a yátaja udore ore jnese to uje ore idáyode déji cucaranone ujade iji ore uniri Líbano, ore uniri Misrefot-maim ore ujai. Mu bajnei tu, Josué a, ujetiga ejna ua aja yuruode uje yiroque ua aja barasade israélgose ore ica ujetiga ajuguína uaquejnane guidáyo ome ore.

⁷ Yojningane u israélgosode uáguedie amirenie jnese uje gagájni ore iji yijmanai uñai, jé aja manasésgosode uague uña rĩ uje cáma ore gajnepítique déji to iji yerani punire ueradéjna tudé."

Moisés chajuguína manasésgosode, rubéngosode, gádgosode ore ome dejnane puníño nanique, ga ore cho dajnéngu udore nanique iji tiédaté Jordán uéchamitó uña iji guedé garani yui

⁸ Uje cáma Moisés toi nanique, enga chajuguína dejnane guidáyo ome rubéngosode, gádgosode ore, jé iji manasésgosode ore uague uña to nanique. Jecute e ore cho dajnepídi iji ore guejnane pidáyo udore iji yote quedéjnai Jordán uéchamitó iji guedé garani yui nanique.

⁹ Enga ore gajnei jnupe jiei to. Ore gajneque ore idai Aroer uje ore idai uté déji tié Arnón edógai nanique, jé aja guidáidatéi uté to uje déji atétadie ajei iji tiédaté uaté edógai, jé aja garáijnai to uje i tu Medéba, jé aja ore idai Dibón to. Enga ore gajneque jnumone jnese to uje ore déji jogadode udore ore ujade.

¹⁰ Enga ore cho dajnéngu eduguéjna cásodicáite Sihón uniri údode jnese to jé aja amonítagosode ore uniri eruei. (Amorréogosode ore eduguéjnai u Sihón uté nanique ga uté cho dedáji ore idai Hesbón nanique.)

¹¹ Mu que gusu udore mu ore chopo dajnéngu ore uniri Galaad údode jnese to nanique rĩ, jé aja gesuréogosode, maacatéogosode ore unirone to jnese. Enga ore chopo dajnéngu cucarãte cuchábi Hermón údode to nanique rĩ, jé aja ore uniri Basán jnese to rĩ, jé aja ore idáidatéi uté uje i tu Sálca nanique.

¹² Enga ore chopo dajnéngu basángosode ore eduguéjna cuchábi Og gajnéone pidáyo uñane to nanique rĩ. Yojningai Og uté u uje cho dedáji ore idáyode Astarot, Edrei ore jnese nanique. Refaítagose uté to nanique, ga gusu uté nanique uje qué chapite iji dayode refaítagose ore quigade. Moisés casé u nanique uje doi eduguéjna Og urasade enga chejnápise ore nanique.

¹³ Mu uje rubéngosode, gádgosode, manasésgosode ore cho dajnéngu dajnepídode udore nanique, mu que ore chejna gesuréogosode, maacatéogosode ore nanique, ga jé u uje purása quedéjnane udore qué ore chimere ránguiji israélgosode ore ujade jé aja deréjnane udojo to.

¹⁴ Uje Moisés chajuguína dejnane pidáyo iji darasade nanique, mu que chisi ome cuchárique ome levígosode nanique. Uje israélgosode ore angarádejnai Dupade jé urúo nanique gu ujetiga levígosode ore cho dajnéngu darasade ore guẽrapáidode cucha petígo jne ujetiga ore tẽrája Dupade ome udore. Yojningane u ore gueranone cucha uje ore chãru udore iji daseradéjnai ome Dupade nanique.

¹⁵ Uje Moisés chajuguína dejnane pidáyo ome rubéngosode ore nanique enga chisecãru ore dayode bajaque, jé aja udore ore jogasúode enga jé u nanique uje chisi ome ore gajnéone jnupe ome ore ujetiga jé chopise ore, enga ca chona uñeque.

¹⁶ Ga jé u nanique uje rubéngosode ore gajnei jnupe chise ore idai Aroer uje uté déji garáijnane iji tiédaté Arnón edógai, ga chisápo guidai uté uñai to rĩ uje uté idógosi tié tuaté edógai to, jé aja garáijnai to uje i tu Medéba.

¹⁷ Ore gajneque ore idai Hesbón to nanique rĩ, jé aja guidáyode uñane to uje ore déji garáijnai uté ajei nanique uje udore ore íode u udojo nanique: Dibón, Bamot-baal, Bet-baal-meón,

¹⁸ Jaháza, Cademot, Mefaat,

¹⁹ Quiriataim, Síbma, Zaret-sahar uje ore pésu dedai uté iji cototé umaré gai nanique uje cototé tuaté déji atétadie ajei nanique,

²⁰ Bet-peor; Bet-jesimot; jé aja guidáyode uñane jnese uje ore déji cucarani Písga jmainie to.

²¹ Ore gajneque guidáyode udore ore jnese uje ore chisite rágaja quedéjnane iji garáijnai uté nanique, jé aja amorréogosode ore eduguéjna cuchábi Sehón uniri údode jnese to uje uté idaipísi u Hesbón nanique. Chamáñaje Moisés ore chujé eduguéjnai Sehón uté nanique, ga ore cháta madiángosode ore eduguéjnane to nanique uje udore ore doi Sehón uté iroquéode nanique. Ga Sehón ujode eduguéjna udore ore íode u udojo nanique: Évi, Requem, Zur, Hur, Réba ore.

²² Que gusu ore uje israélgosode ore chujé ore nanique mu ore chujé jnani bajai Beor ujnacari Balaam to nanique uje pujopié uña irajasõre uté nanique. Ga jiei ore yugode uñane to nanique uje ore chujé ore iji dajocaningai uté nanique.

²³ Rubéngosode ore gajneque yojningane guidáyo udore ore jnese, jé aja guidai ajámamone to iji guidáyode udore ore ujade, jé aja yote quedéjnai Jordán edógai to nanique. Moisés chisecãru rubéngosode ore bajaque nanique ga jé u uje chisi ome ore gajnéone jnupe ome ore ga ore gajnepídode cuse jnese, enga que chonatique cuse iji ayorérique jogasúrique nanique uje Moisés chajuguína udore ome ore nanique.

²⁴ Moisés doi dasocabei to nanique uje chisecãru gádgosode ore dayode to nanique, enga quene chisi ome ore gajnepídode jnumío ome ore to nanique uje chisecãru ore batigade bajaque to.

²⁵ Enga gádgosode ore gajneque ore idai Jazer nanique, jé aja ore idáyode jnese to iji ore uniri Galaad údode jnese. Ore chajuque amonítagosode ore uniri iji gatócoro to nanique ga gádgosode ore gajneque amonítagosode ore uniri peque uñai jé aja ore idáidatéi Aroer, uje uté déji ore idai Rabá tiógarei to.

²⁶ Ore gajnengápo jogadode jnese to nanique rĩ uje déji guidáidatéode Hesbón, Ramat-mízpa, Betonim ore ujade to; jé aja jogadode jnese to uje ore déji guidáidatéode Mahanaim, Debir ore ujai.

²⁷ Ore gajnéone upo hesbóngosode eduguéjnai Sehón idáyode amirone to rĩ uje udore déji atétadie ajei to uje ore íode u udojo nanique: Bet-aram, Bet-nímra, Sucot, Zafón ore. Ga jé u nanique uje gádgosode ore gajnepídode jnupe erué uñai chujé raja yote quedéjnai Jordán edógai iji guedé garani yui. Jé basa ga erué uñai chise gajño Cineret uécha uñai iji umusoi garani yui to.

²⁸ Enga gádgosode ore gajnepídode jnumío udore jé chopise ore to nanique, enga que chonatique déji ore to nanique, mu ore gajnepídode cuse jnese nanique iji ore uniri uté uje Moisés chajuguína dejnane guidáyo ome ore nanique, jé aja guidai ajámamone ore to iji guidáyode udore ore ujade.

²⁹ Moisés chisecãru manasésgosode uague uña nanique to enga jé u nanique uje chajuguína ore guejnane guidáyo ome ore to nanique.

³⁰ Ga ore gajneque basángosode ore eduguéjna casodica Og uniri Basán údode to, jé aja ore idáidatéi Mahanaim, jé aja jnani bajai Jaír gajnéone pidáyo to uje 60 u ore nanique.

³¹ Ore chajuque ore uniri Galaad iji gatócoro to nanique ga manasésgosode ore gajneque puniri uté peque uñai to nanique, jé aja ore idáidatéode Astarot, Edrei ore to. Ga manasésgosode uague uña uaté cho dajnéngu guidáyode udore jnese nanique. Jnani bajai Manasés ujnacarode uñai u Maquir nanique, ga uté ájnamone u uje ore cho dajnéngu pidáyode udore ore jnese. Chamáñaje Moisés chajuguína guidáyode udore iji ore gu nanique uje chisecãru ore bajaque nanique, ga que chonatique déji ore gotique, mu ore gajnéone jnupe cuse jnese.

³² Ga yatatagode puníño udojo u uje Moisés chajuguína iji darasade israélgose ore uje qué ore déji garáijnai nanique iji tiédaté Jordán edógai iji guedé garani yui uje garáijnai uté i tu Moab Gajnei Garáijna. Cáma israélgosode ore chaquesu tié nanique ujetiga ore doi pocaningai ome ore idáidatéi Jericó nanique uje Moisés chajuguína dejnane pidáyo ome ore nanique.

³³ Uje Moisés chajuguína ore guejnane guidáyo ome darasade israélgose ore nanique ga que chisi ome cuchárique ome levígosode ore, mu catecã́ri ore to enga chojninga: "Cucha gose Dupade ome uaque jne. A uacojode israélgose ore cho dajnéngu dajnepítigo erãpe jnese jne, jé basa uaque ga a oyo uacagutíyamáni iji Dupade jne, enga Dupade a chosõripise uágome cuchade gatuáguiji deréjnane jnese jne."