Josué 12 - Dupade Uruode

Patatagode udojo u Moisés ore guejnane puníño uje ore chejna ore iji tié Jordán uéchamitó nanique iji guedé garani yui

¹ Yatatagode udojo u israélgosode ore guejnane eduguéjna íode uje Moisés, ore chejna ore nanique iji yote quedéjnai Jordán uéchamitó nanique iji guedé garani yui. Ga ore íode u Sehón, Og ore nanique. Enga yatatapo punirone íode to rĩ uje Moisés, urasade ore chijna iji eduguéjnane udore ore gari nanique iji yote quedéjnai Arnón, cucarani Hermón ore ujai nanique iji garáijnai uté iji yote quedéjna cuchábi Jordán edógai uté iji guedé garani yui nanique.

² Eduguéjnane udore uñai uje uté i tu Sehón nanique, ga amorréogose u uté urasade nanique, ga uté idai i tu Hesbón to nanique rĩ. Ga eduguéjnai uté uniri eruéode idájapise ome ñane, ga erué uñai chise ore idai Aroer iji yote quedéjnai Arnón edógai, jé basa ga eruei uñai chise yote quedéjna uñai uje i tu Jaboc, uje yote quedéjnai uté chisípise amonítagosode ore uniri eruei to. Ga eduguéjnai Sehón uté gajnepídi erãpe chajuque puniri Galaad gatócoro nanique.

³ Ga uté gajnepídi erãpe chise atétadie jnese iji tiédaté Jordán ejode uje atétadie udire chise tié ajécatadé to nanique uje i tu Cineret iji casaque garani yui jé aja ajécatadé uña to rĩ uje uaté i tu Pitoringai Gajneto, jé aja ore idai Bet-jesimot, jé aja cucarani Písga údipísi to iji umusoi garani yui.

⁴ Ga israélgosode ore guejnai eduguéjna cuchape uñai u basángosode ore eduguéjnai nanique uje i tu Og. Refaítagose uté to nanique uje uté dáquiode umarejna ore nanique iji taningai nanique. Mu uté dáquiode ore toi jnese ga gusúpusu iji dáquiode quigade nanique. Enga uté cho dedáji ore idáyode Astarot, Edrei ore nanique, ga iguíjnane déji ore idáyode jnese.

⁵ Uté uniri eruéode idájapísiji ñane to nanique ga eruei uñai chise cucarãte cuchábi Hermón údi to nanique iji casaque garani yui. Ga eruei uñai chise ore idai Sálca iji cucarani Basán údi iji guedé garani yui to nanique. Jé basa ga eruei uñai chisípise gesuréogosode, maacatéogosode ore gajnei jnupe nanique to iji guedé cacadi yui. Jé basa ga eruei uñai chise hesbóngosode ore eduguéjna cuchábi Sehón gajnei jnupe eruépisi to nanique iji umusoi garani yui to nanique, enga chaquesu puniri Galaad pajei to nanique rĩ.

⁶ Uje Moisés, israélgosode ore chejna eduguéjna cuchábode udore ore nanique, ga Moisés chajuguína ore gajnepídode erámio iji darasade uñane nanique. Yojningane u rubéngosode, gádgosode, manasésgosode ore, ga udore ore cho dajnéngu punirone udore ore jnese iji yote quedéjnai Jordán uéchamitó iji guedé garani yui. (Manasésgosode ore cho jmíti, jmíti ome ñane nanique ga uñane cãra daqui nanique ga udore ore u uje ore cho dajnéngu Moisés guejnane puníño udore nanique.)

Patatagode udojo u Josué ore guejnane puníño uje ore chejna ore iji tié Jordán uéchamitó uña nanique iji guedé cacadi yui

⁷ Yatataque ejode udojo u Josué, israélgosode ore guejnane eduguéjna uñane uje udore ore unirone déji yote quedéjnai Jordán uéchamitó iji guedé cacadi yui. Enga eduguéjnane udore ore idáyode chisite rágaja quedéjnane nanique, ga ore idáyode udore déji guidáidatéi Baal-gad, cucarani Halac ore ujai nanique. Uje Baal-gad uté déji cucarani Líbano údi to nanique iji casaque garani yui iji ¡tiiii! Jé basa ga cucarani Halac uté déji cucarani Seir tiógarei to iji umusoi garani yui to nanique. Uje ore chejna eduguéjna cuchábode udore nanique ga Josué chajuguína ore unirone iji darasade israélgoso ore nanique ujetiga ore chopise dajnéngu ore unirone to jé aja deréjnane jnese.

⁸ Ga jé u uje israélgosode uáguedie uñanie ore gajnéone jnupe chajuque atétadie nanique; jé basa ga uñane ore gajnéone jnupe déji garáijnane to iji yote quedéjnai Jordán edógai to nanique; jé basa ga uñane ore gajnéone jnupe déji cucaranone údode to nanique; jé basa ga uñane ore gajnéone jnupe déji garáijnai to uje uté i tu Neguev to nanique rĩ. Ga ore gajnéone jnupe unirísõre bajade u hitítagosode nanique, jé aja amorréogosode, cananéogosode, ferezéogosode, hevéogosode, jebuséogosode ore to nanique.

⁹ Mu unirisórone udore ore eduguéjna cuchábode que togome uñeque nanique ujetiga sué Josué ore gai to nanique. Ga Josué ore chejnápise ore jnese nanique. Ga Josué guejnane eduguéjna cuchape u udojo nanique: Jericógosode ore eduguéjna cuchábi. Háigosode ore eduguéjna cuchábi. (Uje háigosode ore idai idógosiji guidai Betel nanique.)

¹⁰ Jerusaléngosode ore eduguéjna cuchábi. Hebróngosode ore eduguéjna cuchábi.

¹¹ Jarmútgosode ore eduguéjna cuchábi. Láquisgosode ore eduguéjna cuchábi.

¹² Eglóngosode ore eduguéjna cuchábi. Gezérgosode ore eduguéjna cuchábi.

¹³ Debírgosode ore eduguéjna cuchábi. Gedérgosode ore eduguéjna cuchábi.

¹⁴ Hórmagosode ore eduguéjna cuchábi. Arádgosode ore eduguéjna cuchábi.

¹⁵ Líbnagosode ore eduguéjna cuchábi. Adulámgosode ore eduguéjna cuchábi.

¹⁶ Macédagosode ore eduguéjna cuchábi. Betélgosode ore eduguéjna cuchábi.

¹⁷ Tapúagosode ore eduguéjna cuchábi. Heférgosode ore eduguéjna cuchábi.

¹⁸ Afécgosode ore eduguéjna cuchábi. Saróngosode ore eduguéjna cuchábi.

¹⁹ Madóngosode ore eduguéjna cuchábi. Hazórgosode ore eduguéjna cuchábi.

²⁰ Simrón-meróngosode ore eduguéjna cuchábi. Acsáfgosode ore eduguéjna cuchábi.

²¹ Taanácgosode ore eduguéjna cuchábi. Meguídogosode ore eduguéjna cuchábi.

²² Cédesgosode ore eduguéjna cuchábi. Jocneámgosode ore eduguéjna cuchábi uje ore idai uté déji cucarani Carmélo jmainie nanique.

²³ Dórgosode ore eduguéjna cuchábi uje ore idai Dor uté déji ore uniri Dor to nanique. Goímgosode ore eduguéjna cuchábi uje ore idai uté déji ore uniri Gilgal nanique.

²⁴ Tírsagosode ore eduguéjna cuchábi. Uje ore chisecãru Josué ore guejnane eduguéjna udore ore íode enga ore batigai chise 31 nanique.