Josué 11 - Dupade Uruode

Josué suépise ore eduguéjna cuchábi Jabín, jorane peduguéjna ore nanique

¹ Ga hazórgosode ore eduguéjna cuchátique déji nanique uje i tu Jabín. Ga uté chudute to uje israélgosode e ore chejnápise cananéogosode uñane enga jĩraque chiroque datocaidode ore aja madóngosode ore eduguéjna cuchábi uje i tu Jobab ujetiga ore cháta rágaja ñane nanique ome israélgosode. Ga Jabín uté tibidápoi ore eduguéjnane gaté rĩ ujeta ore cháta rágaja ñane ome israélgosode ore yui to. Uje pijnangaite ejode udore ore idáyode íode u Simrón, Acsaf ore nanique.

² Mu que gusu ore mu tibidápoi eduguéjnane uñane to rĩ ujetiga ore cháta rágaja ore to ome israélgosode ore yui. Ga é u uje ibididigode udore ore tṍraji dajñarenie ome ñane jeta ore catecã́ri ñane. Ga uñane tṍraji cucarãte umarone yúode iji casaque garani yui to, jé basa uñane tṍraji atétadie iji yote quedéjnai Jordán ejode to iji umusoi garani yui to uje idógosi ore unirone iji gajño cuchabé uje i tu Cineret. Jé basa uñane tṍraji atétadie to iji cucaranone jmainie to rĩ iji guedé cacadi yui to uje cucaranone udore idógosi ore idai Dor nanique.

³ Ga cananéogosode ore eduguéjnane uñane tṍraji guedé garani yui to, jé basa uñane tṍraji guedé cacadi yui to. Ga amorréogosode, hitítagosode, ferezéogosode ore eduguéjna cuchábode ore di to. Ga jebuséogosode ore eduguéjnai di to uje ore uniri déji cucarãte umarone nanique. Ga hevéogosode ore eduguéjnane tṍraji ore uniri Mízpa to rĩ uje ore uniri uté idógosiji cucarãte cototé to uje i tu Hermón.

⁴ Ga jé u uje ore eduguéjnane udore ore nóna pocaningai gaisórone jnese. Ga ore chacája guebéquedatéode. Jé basa ga uñane choru buricade to. Enga pocaningai gaisórone udore jiépisi ore to nanique enga a pisecarãte ore mu que pirajaque ore batigárique to. Ga ore gajnui tu jnumi urui nanique uje que toc jeta pisecarãte ore.

⁵ Ga eduguéjnane udore ore urasade cháta rágaja ñane nanique enga ore irengudatéo nanique. E ore chicha darengúi taja jómiodatérique ejórique nanique uje uté i tu Merom nanique. Ga jé ore chetingare rome pocaningai yui to nanique iji uté ujetiga ore doi israélgosode ore enga ore cugujnáji ore dirome.

⁶ Ga Yocangarádejnai Dupade catecã́ri Josué nanique. Enga chojninga: "Josué á, ca atodo cuchárique yúrique to. Uje a yijína ua aja quedéjnane to dirome. Adójningapísa guedé batigai udé to, ujetiga chisápo dabatigai udé dirome rĩ ga a amo bamajosórone udore ore to dirome ujetiga jiei ore iji jnumone jnese dirome, enga ajnangarase ore gachidode guebéquedatéo aja jnumone enga aquetame to dirome. Jé basa ga beyoi ore gachidode burica enga amochécho ore otadábode ¡tais! ¡taise!"

⁷ Ga jé u nanique uje Josué nóna darasade aja eduguéjnane, irógode ore irengúi tuti iji jómiodatéi tuté ejode uje jómiodatéi uté i tu Merom nanique. Enga jé u uje ore cugujnáji ore iji ore irengúi uté.

⁸ Enga jé u nanique uje Dupade chisi ome ore úringane ayoré pujnuéngaisóño ome israélgosode to nanique. Ga ore chicha degode aja ore irengúi tuté nanique ga jiei ore yugode iji ore nanique. Mu uñane qué chayome ore. Ga uñane chijna dagajñunie aja ore idáidaté cuchábi Sidón. Mu que ore chise ore idai tuté nanique uje ore chejna ore iji yúode to. Ga uñane ore chicapóji ore idáidatéi Misrefot-maim to rĩ, mu jé ate uje ore chujé ore to iji ore idai tuté yúode. Ga uñane chicapóji guedé garani yui to nanique rĩ. Ore qui turásu atétadie uje i tu Mízpa, mu ore chejnapo ore rĩ aja ore qui tuté yui to rĩ. Ore chejna ore jnese nanique, enga que toc jeta eduguéjnane udore urásarique uñeque chapídiji uté to nanique.

⁹ Ga jé u nanique uje Josué dopísi Dupade uruode. Ga doi ore gachidode burica ga chimochẽre ore otadábode ¡tais! ¡tais! Enga chiquetásiapome ore gachidábode guebéquedatábio to rĩ.

^10-11 Jé u nanique uje Josué chajni ore idai gai uje i tu Hazor uje ore eduguéjna cuchábi ijnimique pocaningai bajaque nanique gu. Enga chejnápise ore iji ore idai tuté jnese ga chátaja ore eduguéjna cuchábi to uje chujé to. Ga jé upo rĩ uje chãrupo ore idai gai to rĩ.

¹² Mu jé ca gusu Hazor uje Josué ore chejna ore nanique iji uté. Mu ore dopoi jõcarata casodé ore idáyode uñane jnese to rĩ, enga ore chejnápise jõcarata casé ore idáyode udore jnese, enga ore chujépise udore ore eduguéjna cuchábode ore jnese to uje ore cháta rágaja ñane ome israélgosode nanique. Ga jé Josué isocai u uté nanique uje chejnápise ore idáyode, unirisórone ore jnese ga que uecárique déji ore idáyode uñeque. Uje doi Moisés uru cásodicáite quigode gu. Uje Dupade jé urúo nanique ome daroi Moisés ujetiga ore chejnápise cananéogosode ore jnese nanique.

¹³ Ga hazórgosode ore pésu dedai nanique uje umarejna qui ome ore, ga idáyode uñane jé doi ore isocade to. Mu gusu Hazor uje Josué chiquetame nanique, jé basa ore idáyode uñane uje umarejna quigode gusu uje Josué chujé ore iji bisideque ga que chiquetame ore idáyode to.

¹⁴ Ga jé u uje israélgosode ore chejna ore ome dasórenie nanique, enga jé u uje ore chase ore ugúchade aja dejode to jetiga ore chijna dameserãtígo iji to. Ga ore chatapója ore gachidode cuchiso jnese to rĩ.

Moisés chajnerame Dupade uruode ome Josué nanique, ga Josué pésupúsu udore quigode uje chise cananéogosode ore uniri nanique

¹⁵ Iji taningai nanique uje qué ore déji erãpetarei nanique, ga Dupade catecãripísi Moisés iji uté nanique enga chingo dojningane cucha aja iji uté nanique. Jé basa ga Moisés chajnerame Dupade uruode nanique enga chingome Josué gaté. Jecute Josué u uje chise Dupade ojningai punire ueradéjnai nanique ome darasade ore. Enga Josué dopísi Dupade ojninga casodica cucha jnese enga que chó ojninga casodica uñeque gai mu jé doi jnese.

¹⁶ Jecute chise diri nanique uje Josué ore guejnane guidáyo jiépisi nanique. Ga ore cho dajnéngu udore ore jnese. Ga ore cho dajnéngu cucaranone údode jnese; jé aja garáijnane to iji umusoi garani yui uje ore chojningame uté Neguev; jé aja ore unirone to iji puniri Gosén údode jnese; jé aja garáijnane, atétadie ore jnese iji tié Jordán ejode; jé aja cucarãte umarejnai uté to uje ore chojningame uté Israel gajnei cucarãte nanique;

¹⁷ jé aja ore unirone jnese to iji cucarãte cuchábi Halac, ore idáidatéi Baal-gad ore ujai. Ga cucarani Halac uté u nanique uje déji ore idai Seir ejoi, jé basa ga ore idáidatéi Baal-gad uté déji atétadie udire ajei iji cucarani Hermón údi. Cucarani Hermón uté déji cucaranone ujai uje ore chĩ́care Líbano aja cucaranone udore nanique. Enga Josué chisa ore eduguéjna cuchábode jnese iji jogadode udore jnese, enga chujépise ore jnese nanique.

¹⁸ Mu etoguipise cananéogosode nanique ga que Josué ore chejna ore aja jnumi míraque nanique. Ore chachẽre ore, ore chachẽre ore, mu iyajmanguipise ore ome ñane nanique uje ore chujé ñane. Mu chise diri nanique uje Josué ore chejnápise ore, ga ore cho dajnéngu ore idáyode jnese.

¹⁹ Enga gusu hevéogosode uje ore idai u Gabaón nanique uje ore chapídome Josué ore. Udore ore chãra Josué ore nanique gu, enga chiese ore tṍraji Canaán uéchade iji ti. Ga jé Josué tangári ore nanique enga chisi ome daru iyiejnane ome ore nanique enga que chuque ore to nanique. Mu gusúpusu udore ore nanique uje ore chapídome Josué ore nanique, uje uté chejnápise puniri uté unirisórone uñane jnese nanique.

²⁰ Ga Yocangarádejnai chisi ome cananéogosode uñane ore úringáringo ducusuréchoquío ome ore nanique. Enga ore changureta rángome pocaningai yúode to ome israélgosode ore. Mu cachi ore angurete re nanique ome pocaningai yúode. Que uñeque ujñapeque nanique gu iji israélgosode ore jmainie. Enga Josué dopísi Dupade áyipiedie jnese nanique uje Moisés chingo Dupade uruode aja nanique gu. Jecute que posongaquei déji ajénique nanique enga chejnápise Canaán unirisórone ore jnese.

²¹ Uje qué Josué ore déji dajocaningane gáyode nanique, enga ore doi pocaningai ome anaquítagosode to iji cucaranone údode nanique. Ga ore chejnápise ore idáyode jnese uje ore íode u Hebrón, Debir, Anab ore, jé aja ore idáyode uñane to uje ore déji cucaranone údode iji ore unirone Judá, Israel ore to. Enga chejna anaquítagosode ore jnese iji ore unirone udore jnese.

²² Uje anaquítagosode ore dáqui gatei umarejna nanique ga jé ájnape gatéode ore chajna uté to nanique ga umarejnápise ájnape gatéode udore to nanique. Mu ájnamone udore que uñeque chapídome ore nanique enga Josué ore chejnápise ore jnese to nanique iji danire ichai Israel údode jnese. Mu anaquítagosode idáyode uñane qué déji israélgosode ore uniri eruéode uéchade nanique uje ore idáyode íode u Gáza, Gat, Asdod ore. Enga gusu uecade u pidáyode udore idaisórone ore nanique iji jnani bajai Anac ájnape disi ejode ore to.

²³ Josué e chimanipise Yocangarádejnai uru casodica aja jnumone jnese, uje tangaripísi iji Moisés pijnani nanique gu. Ga uje chejnápise cananéogosode ore jnese nanique enga jé u nanique uje chajuguína ore uniri ome darasade ore nanique. Ga jnani bajai Israel ujnacarode uje gare ore iji yirídai nanique, ore ape disi ejode cuse to nanique enga ore u uje Josué chajuguína puniri peque chojmara, chojmarane ome ore nanique ujetiga ore cho daniri iji péode, péode nanique. Ga jé u nanique uje quene ore cho dajñare to nanique ga que ore dopoi pocaningane to nanique rĩ, uje e ore gajneque puniri uté nanique gu uje ore chejna puniri uté unirísõre bajade ore to nanique.