Josué 10 - Dupade Uruode

Josué, urasade ore suépise amorréogosode ore gáyode nanique

^1-2 Uje jerusaléngosode ore eduguéjnai Adoni-bezec chudute uje Josué ore chejna ore idai Hai nanique enga ore chujé ore eduguéjna cuchábi ga chojninga: "Ore isocai jé u dasocai uje ore chejna jericógosode ore to nanique enga ore chujépise ore eduguéjna cuchábi to nanique rĩ." Ga jé u uje eduguéjnai Adoni-bezec todópisa Josué ore yúode to nanique. Cuchiyi tupúsu uje chudute to gabaóngosode ore ujnomei uje ore cháta rágaja Josué ore to. Chiraja gu uje gabaóngosode ore idai cuchadaté, ga suépise ore idai Hai gai to nanique. Chudute uje dicasepise jnanione iji Gabaón uté to ome pocaningane yúode. Jecute eduguéjna cuchábi Adoni-bezec aguté tutáji ore ujnomei jmainie nanique.

³ Jecute ore eduguéjnai Adoni-bezec uté pésu dáyipieraque iji dajei nanique ujetiga tibidi dojode eduguéjna ore ujetiga ore cháta raja ñane to ome pocaningai yui. Ga ibididigode u hebróngosode ore eduguéjnai uje i tu Hoham, jé aja jarmútgosode ore eduguéjnai to uje i tu Piream, jé aja láquisgosode ore eduguéjnai to uje i tu Jafía, jé aja eglóngosode ore eduguéjnai to uje i tu Debir.

⁴ Ga chojningame ore: "Yibidi uaque gu jeta acayóji de to jetiga yátago yógaja ñane to ome gabaóngosode. Chamáñaje ore cháta rágaja Josué urasade israélgoso diríca gu enga pajesereringai e déji ore ome ñane. Ja seca ore doi pocaningai ome yoque jne. Mu uerate jeta yátago yógaja ñane ga yicoi ore bajaque jne."

⁵ Jé u uje eduguéjnane udore ore chamáta darógode dasoldácho ore aja ñane ga jé u uje ore jno to, ga ore chicha darengúi taja ore idai Gabaón ejoi to jetiga dimane ore ome pocaningai yui to. Ga chejna yijmanai amorréogosode ore eduguéjnane udore ore ga ore tṍraji dedáyode nanique ujetiga ore doi dajocaningai ome gabaóngosode ore. Enga ore idáyode udore ore íode u udojo nanique: Jerusalén, Hebrón, Jarmut, Láquis, Eglón ore, ga ore nóna darógode aja pocaningai yui jnese.

⁶ Mu gabaóngosode ore chiroque darógode aja israélgosode ore apáringaméi Gilgal yui jetiga ore catecã́ri Josué ore to, ga ore chojninga: "¡Boyo iji te á! ¡Abáchoi uacarógode uyoque á! Yudúco gu uje amorréogosode ore eduguéjnane tṍraji dedáyode udore jnese iji cucarãte cuchábode údode, enga a ore gaidi tu pocaningai ome yoque to jne. Ca etácho jne jeta átayobája yoque to. Ga a arotáyo yógome yocumajosórone ore to jne. Chamáñaje a ore chejna yoque dirome."

⁷ Ga jé u nanique uje que Josué chajirape cucháringome gabaóngosode ore pijnane, mu chimáta dangurenéjnane bajaque jetiga ore jnome ore idai Gabaón yui to.

⁸ Ga jé u uje Yocangarádejnai Dupade catecã́ri Josué nanique ga chojningame: "Ca atodo ore yui. Uje a yisi ome uacáringáringo dequejnangóño ome uaque to jne. Enga a ca ore ujñapeque jne ome uaque to."

⁹ Ga e dejaque nanique uje Josué ore jno, enga ore quítequiguíji amorréogosode ore irengúi to ga que ore chunina ore. Ga ore chajire dabai, mu ore chimo ore iji to.

¹⁰ Enga Yocangarádejnai pésu ore nanique enga que ore chunina ore, ga pésu jeta ca ore ujñapegome Josué ore. Ga jé u nanique uje ore chejna ujade, jé basa ga uñane chayome ore. Ga amorréogosode uje chayome Josué ore ga ore chicai guesi ga ore chajna dajei taja ore idai Bet-horón, mu Josué cugujnáji ore ga ore chicha degode aja guidai uté yui. Qué uñane jnopo rĩ ga ore chucajningárome ore to ga ore chichapo deque gatéode aja ore idai Azéca ejábi to rĩ. Mu uñane qué jnopo rĩ ga qué ore cugujnápoi ore gaté rĩ ga ore chicha deque gatéode aja ore idai Macéda ejábi to.

¹¹ Ga amorréogosode ucajningati dajeque uté uje chicáji Bet-horón, Azéca ore yúode chicai pararinguei tiji jnumi. Mu Yocangarádejnai chamurase guetṍrai ore gai iji uté to ga nóna ebe cuchábedie aja jnumi to ga querújnapise basuguedie, enga íjnonguiji ore gatoidie ga Yocangarádejnai yugode iji amorréogosode ore suépise israélgosode ore yugode gai to nanique uje chejna ore iji ore idáyode Bet-horón, Azéca ore yúode.

¹² Ga jé u nanique iji diri uté nanique uje Dupade chicha amorréogosode iji Josué ore jmainie. Enga uje e ore déji dajocaningane nanique enga Josué tibidi Yocangarádejnai Dupade enga chojningame: "¡Dupade á, aquĩ́rape guedé ga jé ca chacape jne iji ore idai Gabaón ejode! ¡Jé aja guedoside to á, ga jé chácarabíji dayaridi to é iji pararinguei Ajalón edógai é!"

¹³ Enga jé u nanique uje guedé jé charite ti dayaridi ga que chaca to. Jé aja guedoside rĩ, jé charidápo dayaridi to rĩ. Enga jé u nanique uje ore chejnápise damajosórone ga quene guedé digápo rĩ, jé aja guedoside ga e digápo to rĩ. Ga purusãraque cuchade udojo nanique iji jnani bajai Jaser urusarane to uje uté pésu darujna aode nanique ome jnani bajade nanique ujetiga churúsãre ore átedatéode iji uté nanique. Ga jé u nanique uje Dupade chaquĩ́ra guedé ome Josué nanique ga jé chácariji gatócoro iji dire chojmarai údode uje Dupade chãraque urugúi ome nanique gu ga que diguípise rĩ. Enga quene juéga urugúi tome rĩ jeta digápo to rĩ uje e israélgosode ore chejnápise damajosórone jnese to nanique.

¹⁴ Que yocáquiode ore chimo cuchadatérique ome raque to nanique jeta cho Dupade átedatéi uté ome Josué to. Uje cachi ayoré Josué to nanique mu Dupápisi tangári uté nanique enga chãraque urugúi tome guedé to. Jé cho disi ejode uyoque to uje a ca yimóngo jne cuchadatéringome yoque to jeta cho Dupade átedatéi uté. Uje Dupade chirota israélgosode ore nanique, enga doi pocaningai ome ore umajosórone to.

¹⁵ Iji Josué ore jocaningai quigábode enga jé u uje Josué, urasade ore chajníja darengúmei dapáringaméque uje i tu Gilgal.

¹⁶ Jé basa ga eduguéjnane udore uje ore chejna yijmanai ore chapídome pocaningai nanique enga ore chacose ráguiji cucarã́tedó to nanique iji ore idai Macéda ejoi.

¹⁷ Ga eduguéjnane ore ujnomei chise Josué to nanique uje ore chojningame: "E ore chise bamajósõri casodé eduguéjna uñane uje ore chejna yijmanai diríca. E ore chacose ráguiji cucarani edóraque to diríca, enga qué ore déji uté ajei."

¹⁸ Ga jé u nanique uje Josué chiroque darasade aja ore enga chojningame ore: "Boyo ga beyoi cucarané querudie ga ajucho ore piagoi ome udire to jne. Enga uacuñéngo cháji ore ejode jne jetiga ca uñeque doi guesi to."

¹⁹ Enga Josué chojningame darasade uñane: "Boyo ga ajnáño bayade uñane to enga ajéyo ore aja ore ajesui erãpe yui to jeta ca uñeque chise dedánique to. Chamáñaje Yocangarádejnai jé urúo diríca gu ujetiga chichaba yocumajosórone ore aja yoquijmana ajã́ronie to diríca, enga a chatapísaja uaque jne ga a ejnáño ore jne."

²⁰ Ga jé ũrepise Josué uruode nanique uje ore chejnápise amorréogosode ore aja ore ajesúode, ga jiei ore yugode uje ore chejna bayade to. Jé basa ga garósosi uecábode uje ore chise dedáyode to uje ore idáyode udore ujuyaquéode déji to ga etoguipísiji ore idai gai.

²¹ Mu Josué urasade ga ca uñeque chuque to nanique iji ore jocaningane udojo nanique. Ga jé u uje ore chajni deduguéjnai Josué gai to nanique iji daquigade ga ore chise Josué iji israélgosode ore irengúi iji Macéda ejode. Pisadodéringai déji purása quedéjnane ore jnese nanique uje ore chudute israélgosode ore ujnomédatéi ga que togome ayorérique jeta dojnóngapója ore nanique rĩ.

²² Ga jé u uje Josué chojningame darasade nanique: "Boyo ga beyoi cucaranenie iji eduguéjnane ore piago casé enga achẽcho ore gai to jne, enga óraño aja quedéjnane iji ore piagoi to. Enga ajnicho udore ore jne uje ore chejna yijmanai iji ajei diríca."

²³ Ga jé u uje ore doi eduguéjnane udore uje ore gaite pocaningai bajaque ome israélgosode to diríca. Uje ore idáyode u udojo: Jerusalén, Hebrón, Jarmut, Láquis, Eglón ore.

²⁴ Ga jé u uje ore jno ore údi nanique enga ore chicha udore aja Josué iquei nanique. Enga jé u uje Josué tibidi darasade jnanío ore jnese. Ga jé u uje catecã́ri pocaningai gaisórone ore eduguéjnane uñane to. Enga chojningame ore: "Beyoi amorréogosode ore eduguéjnane udore ore to enga achayo ore aja jnumi iji uacádode, enga achiéjnaño ore potogórodie aja jnumone." Enga jé u uje ore doi Josué uruode jnese.

²⁵ Uje e ore chuchiéjna ore potogórodie aja jnumone jnese enga Josué chojningame ore: "Ca atodóyo cucha dacadode yúode to ome uaque. Ga ajnusoi uágome cucha ponáyone yúode jnese to. Uje a Yocangarádejnai Dupade chuchiéjna uacamajosórone potogórodie to jnese jne iji uacajocaningáringo jnese dirome."

²⁶ Ga jé u nanique uje Josué doi ore enga chigota eduguéjnane udore ore to. Ga jé u uje catecã́ri darógode ore ga chojningame ore: "Beyoi yugode ore ga agacho ore etabícorodie ga adíyo ore aja poridie iji gaté. Mu jeta guedé jno enga ejñúño ore iji poridie to jne."

²⁷ Uje e chise guedéjnoringái nanique enga jé u uje ore chejñu ore iji poridie ga ore jno ore údi aja cucarã́tedó to rĩ uje jé u uje ore chacose re iji diríca. Ga ore nápo ore aja ajei to rĩ. Ga jé u uje ore doi cucarané cuchábedie ga jé u uje ore suru ore piagoi ¡pac! Ga a qué ore déji dayaridi tuté jé aja deréjnane udojo to.

Que gusu amorréogosode uje Josué ore sué ore gai nanique, mu ore sué damajosórone uñane gáyode to nanique rĩ

²⁸ Iji diri uté uje ore suru eduguéjna cuchábode ore ajnoquéode gai, ga jé u uje ore dopoi dajocaningai gaté rĩ ome macédagosode. Ga ore cugujnápoji macédagosode ore rĩ iji ore idáidatéi ga ore chejnápise ore jnese to rĩ iji ore idai tuté. Ga ore chejna ore ome dasṍrenie udire to, ga que uñeque ecápisiji uté to. Ga Josué doi macédagosode ore eduguéjna cuchábi to, enga chujépise to, ga isocai tu dasocai uté uje chujépise jericógosode ore eduguéjna cuchábi to nanique.

²⁹ Uje e ore chimate macédagosode aja jnumi to nanique enga jé u nanique uje ore cugujnápoji líbnagosode ore to rĩ.

³⁰ Ga Yocangarádejnai Dupade gueranípise ore ome israélgosode ore to nanique rĩ uje ore chejnápise ore jnese. Ga jé ore doi dajmapié ome líbnagosode ore eduguéjna cuchábi to uje ore chujé uté to ga ore isocai jé u dasocai nanique uje ore chujé jericógosode ore eduguéjna cuchábi uté to nanique.

³¹ Uje e ore chejnápise líbnagosode ore to nanique rĩ, enga Josué, urasade israélgose ore dopoi láquisgosode ore rĩ iji ore idáidatéi uté nanique.

³² Ga chise dire uñai ga Yocangarádejnai Dupade tẽra ore ome Josué ore ga jé u nanique uje ore socárome ore. Enga ore chejnápise ore to, ga ore chichagu ore údode ome dasṍrenie ga adi jé u uje ore chejna líbnagosode to nanique. Ga ore chátaja ore gachidode to ga chichagu ore údode ome dasṍrenie to nanique, ga ore chejnápise ore jnese to nanique.

³³ Mu uje gezérgosode ore eduguéjnai Horam chudute uje Josué doi pocaningai ome láquisgosode, enga jé u uje chojningame darasade ore: "Boyo yico ga yirotágo yoquijorane ore to iji ore idai Láquis uje israélgosode a ore chejna ore jne." Ga jé u uje ore jno jórogome dáyuquetoringane to, mu Josué chejnápise ore to nanique. Enga que udore uñeque chapídome ore to nanique.

³⁴ Uje israélgosode ore chimate ore idai Láquis aja jnumi to nanique enga jé ore jnopome ore idai uñai to rĩ uje i tu Eglón. Ga jé ore isocai tu nanique uje ore pésu rágome dajocaningai enga ore cugujnáji ore idai to nanique.

³⁵ Ga jé ore isocai tupo nanique rĩ iji diri uté nanique uje ore chejnápise eglóngosode ome doidedie dasṍrei to rĩ. Ga adi jé upúsu to uje ore chujé láquisgosode to, uje jĩraque ore chejnápise eglóngosode to nanique ga que togome uñeque jeta uñeque eca.

³⁶ Enga jé adi tupo ome ore idai uñai te rĩ uje i tu Hebrón uje israélgosode ore cugujnáji ore iji ore idai tuté to.

³⁷ Ga jé ore chejnápise ore jnese nanique ga jĩraque ore chátaja ore eduguéjna cuchábi ga jĩraque patĩ́ora darasade ore to. Ore chejna ore jnese ome dasṍrenie, jé aja ore gachidode jnese, ore chejna ore to. Jé aja ore idai ajámamone iji ore idáidatéi Hebrón uté ejode to, ore chejna ore idáyabode idaisórone ore jnese to. Ga ore adi jé upo eglóngosode ore adi to rĩ uje que uñeque ecáji to, uje ore chejnápise ore to gu.

³⁸ Ga ore jnopo rĩ ga ore chicapoi ore idai uñai rĩ uje ore idai uté i tu Debir enga ore cugujnápoji ore to rĩ.

³⁹ Ga ore chejna ore nanique ga ore chejna ore ome dasṍrenie ga ore chejnápise ore enga ore eduguéjnai jĩraque patĩ́ora ore to. Ga ore dosiápoi idai ajámamone rĩ iji Debir ejode ga ore chejnápise idaisórone udore ore jnese to. Ga jé u nanique uje que israélgosode checãrápo dasocárique rĩ ga ore isocai chojmára ome dejnane ore idáyo jnese to: Hebrón, Líbna, Debir ore jnese.

⁴⁰ Enga jé u nanique uje Josué dopísi israélgosode ore angureni Dupa uruode enga chejnápise puniri uté unirisórone ¡jaripe! Jé aja cucarãte umarone unirisórone, jé aja Neguev unirisórone ore to, jé aja atétadie unirisórone ore to. Ga jé chejnápise ore jnese, jé aja ore eduguéjna cuchábode ore to. Ga que noñome uecárique iji guesi nanique. Chejnápise ore jnese.

⁴¹ Ga Josué que ore chacho doi pocaningane ome ore nanique. Ga ore chejna ore idáyode jnese iji ore idáyode Cádes-barnéa, Gáza ore ujai nanique. Ga chejnapo ore idáyode jnese to iji puniri Gosén, ore idai Gabaón ore ujai to rĩ. (Mu que ore chujé Gabaóngosode nanique uje ore chisi ome daru iyiejájnane ome ore nanique gu.)

⁴² Israélgosode ore angarádejnai Dupade chatapísaja ore nanique gu iji ore jocaningai uté ga jé u nanique uje ore chejna guidáyode udore jnese nanique, ga ore chujépise ore eduguéjna cuchábode jnese to.

⁴³ Mu uje e ore chejna damajosórone udore nanique enga Josué ore jnopome darengúmei dapáringa rĩ uje i tu Gilgal enga e ore chácarapóji darengúi tuté rĩ.