Josué 1 - Dupade Uruode

Dupade chutṍri Josué aja daroquéode to nanique, ujetiga basája Moisés jogadi

¹ Pangarádejnai Dupade iroguipísi u Moisés nanique iji taningai, mu uté toi nanique enga jé basa ga Pangarádejnai Dupade catecãrápoi Nun ujnacari nanique rĩ uje uté i tu Josué nanique. Ga Josué uté u nanique uje chatapísa cuchade aja Moisés uje qué eca nanique.

² Dupade catecã́ri Josué enga chojninga: "Josué á, bamo uje yiroguipísi Moisés e toi arĩa. A ua u jne jeta aquesu yote quedéjnai Jordán aja yojningai punire uerate yui. Chamáñaje jé yurúo nanique gu jetiga uacajneque jne. Mu que gusu ua gotique ujetiga aquesu yote quedéjnai tuté, mu jé u jnani bajai Israel ape disi ejode uaque jnese.

³ Yingopísa Moisés ica yojningai punire eruéode jnese. Mu yojningame Moisés nanique: 'Jetiga eso puniri tuté jne enga a jé uacajneque jne jetiga ariguiji údode jnese. Jetiga ayáji petique ga a bajnepídi jé u pei uté jne uje bácariji gu. Mu jetiga bopo rĩ enga ácarapóji peque uñai te rĩ ga jé bajnepídi tupo bayaridi tuté rĩ. Ga jé basa ga jeta ese puniri tuté eruéode jnese jne enga a jé uacajneque puniri tuté jnese jne jeta ese eruéode jnese uje bariguiji údode gu.'"

⁴ Dupade chojningápome Josué rĩ: "A yisi ome yojningai tuté punire ome uaque jne, ga a uacajneque jnumone jnese iji yote quedéjnane Éufrates, Mediterráneo ore ujai, jé aja jnumone jnese iji erãpetarei Neguev, cucarani Líbano ore ujai to jne rĩ.

⁵ Uje qué baqueca iji erámi tudé enga a yipésu ua jne ga a ajnuépise cuchade gáyode jnese jne, enga ca togome uñeque ujeta sué babánique. Bamo uje yijína Moisés aja quedéjnane ica, enga adi jé upo ome ua to jne rĩ jeta jecucha ga yijína ua aja quedéjnane ga a ca yijíñome ua iji te jmete to jne.

⁶ Be ga dicase ua jne ome cuchade yúode. Chamáñaje ua u gu ujeta ajína barasade ore aja yojningai punire. Chamáñaje yingonguémeque uacayode jnani bajácho ore nanique ujetiga ore ape disi ejórigo uaque, uacajneque jne enga a ua u jne ujetiga ajuguína ore gajnepídode jnumío ome ore.

⁷ Jecute be ga etoguipise ua ome cuchade yúode enga dicasepise ua rĩ. Enga bepísi yiroi Moisés casica urusarane yurúo quigode to jne. Ujetiga apésupúsu yojningane cucha enga ca ayó uñeque gai jne enga a ueradípiso bapesutígo cucha to jne ome yu.

⁸ Ajire Moisés casicaite urusarane yurúo gatuaque to jne enga acate barasade ore ome to gatuaque. Enga báyipie jogate yuruode iji dejade, dirode ore jnese to jne. Enga bagaidi tu gu ujetiga apésu yajegaidode cucha jnese to jne. Ujetiga apésu yojningane udojo to enga a amo jne uje bapesutígo cucha a quene ueracho jnese to jne ome yu.

⁹ Enga Dupade uyu u bacatecãraini ome cuchade udore. Jecute ajnusi ua ome cuchade yúode to jne. Enga ca atodópisa cuchade yúode. Chamáñaje bangarádejnai Dupade uyu gu enga a yijína ua aja quedéjnane gatuaque to jne."

Josué chutṍri darasade nanique ujetiga ore chijócãre cananéogosode ore iji ore uniri Canaán ga ore cho dajnéngu puniri uté údode jnese to

¹⁰ Ga jé u nanique uje Josué tibidi ore asutedie iji israélgosode ore ujade jeta chimáta ore aja ñane.

¹¹ Ga jé u nanique uje e ore déji Josué iquei enga uté catecã́ri ore enga chojninga: "Boyo ga angome uacarasade ujetiga ore pésu dagúchade aja ñane, jé aja ore posode to rĩ uje a yico jne enga a yaquesúgo yote quedéjnai Jordán jne, enga a yicagóji Yocangarádejnai Dupade ingonguémei punire uté jne enga a jé u jne jetiga yoco yocuniri iji uté jne. Enga a yico jne jeta dirode e gadioc."

¹² Mu Josué chaquĩ́ra ore asutedie uñanie iji dari to jetiga catecãrámi ore gaté to rĩ. Ga chojningame ore to: –Rubén urasade uaque á, jé aja Gad urasade uaque to rĩ, jé aja Manasés urasade uaque to rĩ uje uacajucho uáguiji ñane nanique, yuruode gajnengórone e u uaque iji de.

¹³ Ajnusínaño to Dupade iro casicaite Moisés uru cásodicáite to. Uje chojningame uaque nanique: 'Dupade juéga uacanirone udojo ome uaque to, jetiga oyo uacaniri iji puniri udé to.'

¹⁴ Jecute ajíñoñome uacacotedie iji Moisés guerani jnupe udé iji yote quedéjnai uécha uñai udé iji guedé garani yui. Jé aja uacabode, uacachidode cucha ore to rĩ. Enga gusu jetiga ajnáño uacõrachade to jne ga jnanione uaque ajínaño yoque to jne aja yote quedéjnai uéchamitó jeta yaquesúgo tié tuaté to. Yojningane u pocaningai gaisórone iji uaque jeta ajínaño yoque to. Boyo ga bajaque uágaja bojode israélgose uñane ore yoquiquei, ga aquesúyo yote quedéjnai bajaque jne.

¹⁵ Enga a jé u ujetiga Yocangarádejnai chimate yógaja yoquidáningo iji puniri údode jnese jne ga a jé u jne ujetiga ajníñopója uaquedáyode to jne rĩ uje Moisés chisi ome uaque to ica iji tié uécha uñai udé iji guedé garani yui. Enga a jé u jetiga jé ayáyopísiji uaquedáyode to jne.–

¹⁶ Enga jé u uje dacasutedie udire ore chajnai Josué uruode nanique enga ore chojninga: –A yipéco bojningane cucha jnese jne. A yijínango ua jne enga a yoco yocasuté iji ua to jne. Jetiga aroque yógaja bojningárique cucha enga a yicoi bojningáringo cucha to jne.

¹⁷ Bamo arĩa uje dimane yógome Moisés iroquéode nanique, enga a dimane yoque to jne ome bojningáringo cucha jetiga yicoi to.– Enga ore chojningápome Josué nanique rĩ: –Yoquipotigádi u cucha chojmarai iji ua to. Enga u ujetiga bangureni Dupa nóna ua aja quedéjnane uje nóna Moisés aja quedéjnane to nanique.

¹⁸ Jetiga yocurasade uñeque ca tangári baruode to jne enga jé u ujetiga yujégopise gosi to jne. Mu ua ga etoguipise ua ome cuchade yúode enga jé ejna ua aja basocade udore ome cuchade yúode.–