Jonás 4 - Dupade Uruode

Jonás chudute Dupade uruode uje a ca chejna nínivegosode ga jé u uje ájningaránguipíse Jonás uté nanique

¹ Mu Jonás chudute Dupade uruode uje a ca chejna nínivegosode ga jé u uje Jonás chetaque Dupade áyipiedie ome ore. Uté ajegaidi tu gu jeta Dupade chejna jóroque nínivegosode ome ajéode.

² Ga jé u uje Jonás catecã́ri Dupade enga chósi tome: –¡Urénga, Pangarádejná Dupade á! Uje batṍri yu ome nínivegosode iji yidaipísi diríca ga e yiraja uje jĩraque bosongaquei déji ome ayoréode. Yiraja to uje que jĩraque bajei dotãre ome ayoréode ore uyoque. Uje bango bajuyaquédatéi úringárique pejnangore ome ore mu bajnoraquédatéi e dépoji ore rĩ ome udore ore uje jecucha bajnorapise ayoréode uyoque jnese gu. Mu bejnárase ore, mu ore cha dadode enga e bajnorápo ore rĩ uje ore doi báyipiedie gu. Jecute que yiji baruode quigode diríca, enga jé u uje yicárasi pidáidaté uñai uje i tu Társis, uje yajéode u jetiga yipógu yu ome ua gu. Deroco yui ome yu gu jeta yingome nínivegosode ore úringárique pujuya ome ore, mu quigade enga baqueta ore enga yuruode ca tocade ome ore jne.–

³ Jonás chojningápome Dupade rĩ: –Jecute be ga ajé yu jne uje que ejna betei casodé ore gu. Deroco yucuecaringuei ome yu uje que ejna ore gu.–

⁴ Mu Pangarádejnai chojningame Jonás: –¿Ja ueradírase baruode udore a? Gajnareque baru quigode gu uje tṍraji bajei dotáningai.–

⁵ Ga Jonás doi guesi tiji ore idáidatéi ga jé u uje chicáji guedé garani yui ga chácariji uté. Mu ãre tagu uté iji charidi ga jé u uje e pésu gaserani ome re ga doi ga jé u uje chácarósiji daserani údi. Ga chácariji daserani údi ga edodie jé jogate ore idáidatéi uté. Ajéode u gu ujetiga chimo Dupade ujuyaquei aja jnumi ome udore ore.

⁶ Mu chunina mu chimo duchúbiedie uje choru aserani ga duchúbiedie pésu gaserani úringai purute ga aréredatépise údi ome uburúdi. Enga Dupade u uje pésu iquéraningai ome uje gaidi u gu ujetiga tijode cho jnángome Jonás uté gu. Ga Jonás chajire daserani tiji dabai mu chimo orutodie duchubie dugúgode uje choru ga jé u uje irasiguipise re ome udore.

⁷ Ga Jonás moji daserani tuté údi iji dejai údode. Mu direjnipe ga jé u uje Dupade chiroque ujũri ga jé u uje ujũri tagu, tagu, tagu ga jé u uje e betája aca duchubie dugúgode iji gai casé.

⁸ Mu uje guedé e idájai jnumi ga jé u uje guedé ojodie pioque erámi ome duchubie dugúgode iji gai. Mu quigade ga Dupade chiroque úyujna aja erámi uje tṍraji guedé garani yui ga pioguipise erámi ome Jonás uquécasé uje topísi duchubie dugúgode iji Jonás aserani gai ga jé u uje pioque Jonás gai to. Ga quigade ga jé u uje edodie cho jise ome erãpe dotáningai. Enga Jonás chojningame re: –Unere pitoringai yui ome yu uje que cucha yucuecaringuei ome yu gu.–

⁹ Mu Dupade catecã́ri Jonás ga chojningame: –Yiraja bajei dotáningai gajnengóri uje duchubie dugúgode ore toji baserani gai ga íjnoque uburúdi. ¿Mu jé ca gajnareque ome ua ya bajei dotáningane udore ome yu?– Mu jnani bajai Jonás jĩraque chajnai Dupade uruode ga chojningame: –Jé ũrepise ua ome yu uje yajei dotãripise. Mu jé tiógara arĩa yajei dotáningai ome ua. Enga que toc jetiga yajéngome yajei dotáningai uté.–

¹⁰ Mu Dupade chojningame Jonás: –Que ua u gotique ujetiga bacaque erejnane, duchúbiedie udire ore iji babai diríca iji baserani tuté. Enga que ua u gotique uje basi ome piquéraningai ome udire, udore ore. Uyu u uje yisi ome piquéraningai ome udore iji dejaque chojmarai, mu quigade ga dejaque uñai te rĩ ga jec u uje e topoi jnese rĩ iji baserani tuté gai. Mu uje bajire erejnane iji babai diríca ga betápise ga jé u uje e bosõre udore uje cachi cucha pacacho mu.–

¹¹ Ga Dupade chopósi tome Jonás rĩ: –Que yiraja gotique uje bajnorapise erejna quedéjnane úringane udore ujníerãcho uje cucha bisidécho mu. Que ayoréo gotique. E mu uyu ga yajire nínivegosode ore ga yosõripise ore uje ayoréo ore gu. Jecute yejnápise yosongaquei aja ayoréode ore iji ore idáidatéi Nínive uté.– Enga Dupade chojningame Jonás: –Yisecãru nínivegosode ore abode que ga a ore cho jnumi tuté petique uje jiépisi ore abode ome dáringane dipeséo ga 120.000 u ore. Mu que máraque disabode sudore ome yu. ¿Ga yejnárase udore ore a? Que gusu ome ayoréode ore, mu ore gachidode cuchiso jé upo yijnoraquei gajnesórone to rĩ iji ore ujade. Ga jiépisi ore to uje e ore chapídome yu.–