Jonás 3 - Dupade Uruode

Nínivegosode áyuguhebátaquedaté ore nanique gu uje a Dupade chejna ore jne gu ore ate gajnaréngone

¹ Enga jé u uje Pangarádejnai dopoi Jonás rĩ ga jé u uje catecãrápoi rĩ ome daroquéode.

² Chojninga: "Jonás, be ga ãriji ga acapóji yojningai ore idai cuchape rĩ uje i tu Nínive ga angongara yuruode aja udore ore uje a yingome ua jne."

^3-4 Mu Jonás e jno enga que chajirape cuchárique ga quene doi Dupade iroquéode. Mu ore idáidatéi Nínive querúpise nanique ga umaripise rĩ. Ujetiga ayorérique chaparúrasu gai ga guejnane dire gadióguirase ujeta chisápo uéchai te rĩ uje chaparu gai. Uje e Jonás chise ore idáidatéi ajei ga jé u uje diguiji údode. Ga chinguíra dabijnanone aja ore iji dejode aja dajesúode ga chojningame daruode: "¡Dirode guejnanie ayoré e gare iji yui ujetiga Dupade chejna uáguiji de ome uacate gajnaréngone!" Jonás uruode u udojo ome idáidatéi idaisórone ore aja dajesúode.

⁵ Uje Jonás e chise ore idáidatéi Nínive ga chacate nínivegosode ome Dupade adode ga jé u uje eduguéjnane ore changuretapise Dupade to ome Jonás acajnaquéode, jé aja ayoré gajnaréngone ore. Enga jé u uje ore eduguéjnane chiroque ore aja daguidé nañorenie uje chichagu ore gai ¡tec, teque! ujetiga ore chejñu daguidé omenie enga ore chigui daguidé nañorenie udire jnese uje imoi u uje áyuguhebátaquedaté ore gu ome cuchade udore uje a Dupade chejna ore jne gu. Que gusu cuchade udore mu ore chãraque chagúi ome ore ga ore cho dayágome raque jnese ga que ore taque gotique.

⁶ Jé cho ore eduguéjna cuchábi to, uje Jonás acajnaquéode ujnomei chise uté ga jé u uje ore eduguéjna cuchábi chague iji dayaripi querui gai ga chejñu daguidé omepísedie ga chigui daguidé nañorenie uje chichagu gai ¡tec, teque! to, enga que chácarapóji dayaripi omejnai tuqué gai rĩ mu gusu chácariji jnumi tiji ejoi ome cutejmai dáyuguhebátigadaté ome raque uje a Dupade chejnápise urasade ore jne gu iji ore idáidatéi Nínive uté údode.

⁷ Enga ore eduguéjnai tuté chiroque dojodie dacasuté cuchábedie aja guidáidaté údode jnese ujetiga ore chaquĩ́ra guidai idaisórone ore jnese. Ga ore jno nanique, ga ore chósi tome guidai idaisórone: "Ca achópo uacabotique to jne rĩ jé aja uacachidode cuchiso to jetiga ca aningachópo ore to jne rĩ.

^8-9 Ga yicoi ga yiguigo yoquiguidé nañorenie uje chichagu yoquibáyode ¡tec, teque! jnese ga yiyágo yocate gajnaréngone, yoquisijnaringuéone ore. Enga a yijóchago Dupade ajei údi jnese jne ome yoque ujetiga chosõripise yoque enga chécãre dajéode ome yoque enga jogadi u jne ujeta ca chejna yoque ome dajuyaquédatéi."

¹⁰ Uje Dupade chimo ore iji denominone iquei, enga chiraja uje e ore cha date gajnaréngone, date bajade ore. Enga jé u uje Dupade chécãre dáyipie quigode ome nínivegosode uje chimo ore isocade udojo. Jecute chojningame re: "A ca yejna ore jne. Chamáñaje yimo ore gu uje ore cha dadode ga que toque ujetiga yiji yuruode quigode ome ore."