Jonás 2 - Dupade Uruode

Jonás catecã́ri Dupade ome re iji oyite cuchábi ajei

¹ Enga jé u uje Jonás déji oyite cuchábi ajei enga quene jnusina Dupade. Enga jé u uje catecã́ri Pangarádejnai Dupade ome re iji oyite cuchábi ajei.

² Ga chósi tome dacatecãraitigade udore nanique: "Enga e yapu yu iji oyite cuchábi ajei enga jé u uje quene yijócha bajei údi ome yu, Pangarádejná. Enga jĩraque bangári yu, enga babé yuruode. Cho ujetiga yugúsiji jnaropié ajei mu bajnimápo yu iji jnaropié ajei rĩ. Yicatecã́ri ua gu ga bangári yicatecãraitigade ga bajnime yu iji jnaropié ajei.

³ Basa yu enga bṍra yu aja yote quedéjnai údi. Igode jno yúdi aja daquigode uje yugúsiji tié cuchabé údi. Igojnane udore doi baroquéode enga ore chacópise yibai iji údi.

⁴ Uje e yugúsiji tié cuchabé ajedatei gatócoro ga jé u uje yojningame yu: ¡Yangureni Dupade a e noñome yu iji te jmete jõ! A jé ca yimópo Dupade iguíjna cucha iyiejájnai rĩ ome yedominone. Chamáñaje Dupade e tṍra yu gu.

⁵ Yodi e déji yibai jnese ga yote quedéjnai chacópise yibai jnese. Ga jotábidie déji yibai jnese ga dépoji yatoi gai te rĩ.

⁶ Yuniname eti mu igojnane e jno yúdi aja yodi údipísi. Ga yojningame yu: Cho jetiga pujurúgai yu iji yodi údipísi udé ga a ca yijiápo guetique rĩ ome yúringai pórecajna. Mu Pangarádejná, Yudupá, ua u uje bajnime yu iji yajnei tuté pitoringa ajei.

⁷ E yapu yu ga quene yáyipie doi ua ome yu, Pangaradejná, Dupade á. Uje yicatecã́ri ua iji uté, mu cho ujetiga yuruode tibágui ua iji baguíjna cuchape iyiejájnai.

⁸ Mu udore ore jnese uje ore icatecãrainone u dangurenone ayoré gajnúo, udore ore u uje ore chisi ome dedobode ome bacaniratiguédatéode jnese uje ũrepísode ore gajnecho.

⁹ Mu uyu ga a yicota ua jne ome bátegoningádatéode ome yu, ga a yẽrája ua jne ome bátegoningáne. Ga que cachi yurúo ga a yijípisi yojningane cucha jnese ome ua iji deréjnane jnese. Pangarádejná, Dupade á, cucha pirotangóri tu ua ga gusu ua uje baqueta uyoque ome cucha pirosobádode."

¹⁰ Uje Jonás cha dacatecãraitigade udore ome Dupade nanique, ga jé u uje oyite cuchábi chicáji yote quedéjnai pijnanai enga jé u uje chise pijnanai enga pogaya Jonás iji uté.