Héchos 9 - Dupade Uruode

Sáulo e changureta Jesús to

¹ Mu Sáulo que cha jmongarája Jesús anguretasórone ore ujetiga chujé ore. Jecute tibágui sacerdóteode ore eduguéjna cuchábi.

² Enga chutai eduguéjna cuchábi urusãratígo ujetiga chijna aja ore idai Damásco. Gaidi u gu ujetiga chisi ome uté urusãratígo ome judíode eduguéjnane iji ore aquiningamei guiguíjna. Enga ore juéga Jesús anguretasórone ome ujetiga jno ore údi aja Jerusalén ujetiga suru ore gai iji. Que gusu jnanione uje chucué ore mu chátaja chequedíe aja dacuegode udore to.

³ E déji dajei enga e chirõre Damásco, mu chuningame eti dírecaringué cuchábi tṍraji gaté enga chijñate gai.

⁴ Enga Sáulo cṍraja jnumi enga chudute darade uje chojningame: –Sáulo á, Sáulo á. ¿Jé gotique gu a uje bo bamajo yu?–

⁵ Enga Sáulo chojningame: –¿Jé ua gosi te a?– Ga darade chojninga: –Jesús u yu. Bamajoi tu yu. Mu jé bamajo ua to. Bajnui tu aquirájnai uje chuchiéjna uburuco asõre uje gachisṍri ipesudé ome.–

⁶ Sáulo tãrara ome dasadodéringai enga chojningame Jesús: –Yangaráni á, ¿bapotigátique a ujetiga yipésu ome ua ya?– Enga yocangarádejnai Jesús chojningame: –Ayague. Bo ga acáji ore idai enga a ore chingo bapesutígaja ua jne.–

⁷ Darade chajuguipise Sáulo jorane jnanío ore agutedie uje que ore chimo ayorérique iji darade garani.

⁸ Sáulo jĩrique chague. Chuchẽre dedodie gáyode, mu que chimo dajiritique. Jecute chisa dajorane jmanáyone, ga ore jno údi aja guidáidatéi Damásco yui.

⁹ Dirode gadioque iji uté ore idai uje que chimo dajiritique. Enga que tagu dabotique. Enga que chójiapo yotique rĩ.

¹⁰ Jesús anguretasórone uñai déji Damásco uje i tu Ananías. Chimo Jesús iji denominone enga Jesús catecã́ri. Chojninga: –Ananías á.– Enga Ananías chajnai ga chojninga: –Yangaráni á, yugúsiji de.–

¹¹ Enga yocangarádejnai Jesús chojningame: –Bo ga ajna dajere uje i tu Cáputaji Dajesui aja Júdas iguíjnai. Acatecã́ri ore ome társogosi uje i tu Sáulo. Yojningai uté qué catecã́ri Dupade ome re.

¹² Chimo denominone to enga chimo ua rĩ enga chiraja bei. Chimo uje bacája iguíjnai iji denominone enga bachai bajmainie aja gai ujetiga chimópo dajiritígo rĩ.–

¹³ Mu Ananías chojningame Jesús: –Ore chingo yu jnese uje sijnaque uté enga gajnarenguipise adode ome banguretasórone iji Jerusalén.

¹⁴ Ga sacerdóteode ore eduguéjna cuchábi irógaja de gu ujetiga jno banguretasórone ore údi ujetiga suru ore gáyode jnese uje ore changureta ua.–

¹⁵ Mu yocangarádejnai Jesús chojningame: –Bo ga abágui, uje yajegaite uté ujetiga jno yujnomei údi aja purása quedéjnane; jé aja ore eduguéjna cuchábode rĩ. Jé aja bojode israélgoso ore to rĩ.

¹⁶ A yatatame Sáulo jne uje a chopise daba yu jne.–

¹⁷ Jecute Ananías jno ga chicáji Sáulo charidi guiguíjna. Chacája ajei enga chicha dajmainie aja Sáulo gai enga chojningame: –Sáulo á, yujo Jesús anguretasṍri á, yocangarádejnai Jesús u uje chiqueta raja ua iji dajei diríca uje bacai yoqui. Enga uté u uje chiroque yu aja ua to ujetiga yicha yijmainie aja babai enga amópo bajiritígo rĩ. Enga a Espíritu Sánto chacája ua to jne rĩ.–

¹⁸ Jĩrique cho ujetiga cucha aórigo basíji edodie, enga chimópo dajirigode rĩ. Jecute niji iji damochápi enga jno ga ore chaca edodie iji yodi uje changureta Jesús to.

¹⁹ Udojo quigade ga tagúpo cucha pibosode rĩ. Enga etotiguei cusapo rĩ. Orocoi guejnane díño iji Dupade anguretasórone gari iji Damásco.

Sáulo e chacate Damásco idaisórone ome Jesús adode

²⁰ Jĩrique Sáulo chacate ore ome Dupade uruode iji judíode aquiningaméone guiguíjna enga chojningame ore: –Dupade ujnacari jé upúsu Jesús.–

²¹ Chajuque ore agutedie jnese uje ore chudute Sáulo acajnaquéode udore enga ore chojningame ñane: –¿Ja ca uté u a uje umajo Jesús anguretasórone iji Jerusalén diríca? ¿Ja ca uté upo rĩ uje gaidode u Jesús anguretasórone iji yoquidai udé ujetiga jno ore údi aja sacerdóteode eduguéjnane jeta ore suru ore gai?–

²² Mu Sáulo qué chejna raja dacajnaquéode enga chingopísa Dupade uruode ome ore enga obiréjnapise acajnaquéode quigode uje Jesús jé upúsu Dupade utocaidi Crísto. Jecute judíode iji ore idai Damásco que ore chirajapise daru quitígome ujetiga ore botare.

Sáulo adode u udojo uje chise Jerusalén

²³ Dirode e jiei iji udore quigade uje judíode pésu dáyipiedie ome ñane ujetiga ore chujé Sáulo.

²⁴ Mu Sáulo chudute to uje ore jmongarája. Ore chirote guidai piagode iji dirode jnese ujetiga ore chujé Sáulo; jec iji dejade to rĩ.

²⁵ Mu dejaque uñai enga Jesús anguretasórone jno Sáulo údi aja ore idai ujuyaquéode. Enga ore choru ujuyaquéode enga ore na Sáulo aja ore ora ijnaque quedéjna ojo gajnua. Enga ore jno údi aja jnumi ome enuéjnane. Enga adi jé u uté uje Sáulo pógu re enga chayome dajmongarájasórone ore.

Sáulo adode u udojo uje chise Jerusalén

²⁶ Uje Sáulo chise Jerusalén ga pota jeta cháta raja Jesús anguretasórone to, mu ore todo jnese. Ore chotigase Sáulo gu ome úringai Jesús anguretasõre.

²⁷ Mu Bernabé chijna Sáulo aja Jesús irógode apóstol ore gari enga chatata adode ome ore. Enga chojninga: –Jesús chiqueta raja Sáulo iji dajei iji Damásco yui, enga catecã́ri. Enga udojo quigade ga Sáulo chatata Jesús adode ome ore to iji Damásco enga que chagutu re ome go uje chacate ore.–

²⁸ Jecute ore cha chotigase Sáulo enga Sáulo nóna ore aja ore ajesúode erámio iji Jerusalén.

²⁹ Que Sáulo chagutu re ome uje chingo Jesús adode aja ayoréode ore. Catecã́ri judíode to uje ore uruode u griégo, enga botare ore. Mu udore ore pota jeta ore chujé.

³⁰ Uje ujode Jesús anguretasórone ore chudute uje ore jmongarája Sáulo enga ore chirógaja ore idai uñai uje i tu Cesaréa, enga ore chorepóji Társo rĩ.

³¹ Udojo quigade enga tijode cho jnángome Jesús anguretasórone iji Judéa, Galiléa, Samária ore uje ayoréode cha cho damajo ore. Enga etoguipise ore iji danguretarétigade iji Jesús. Enga ore tangaripísi Dupade. Enga Espíritu Sánto chatapísaja ore. Jecute Dupade anguretasórone chõre re iji dirode udore.

Pédro chiqueta jnani uje i tu Enéas

³² Pédro jecucha chidójnanga Jesús anguretasórone iji ore idáyode. Chidójnanga Jesús anguretasórone to iji ore idai uje i tu Lída.

³³ Enga Pédro chise jnani iji uté ore idai uje i tu Enéas. Sequeredie gadióguiji ti uje piñoñane chisa enga que cháguepo rĩ.

³⁴ Mu Pédro chojningame Enéas: –Enéas á, ayague enga apocásu bataranone uje Jesucrísto a chiqueta ua jne.– Enga Enéas jĩrique chague.

³⁵ Uje Lída idaisórone, Sarón idaisórone ore chimo uje Enéas eca, ga ore cha dangurete cucha bajade ga ore changuretapise yocangarádejnai Jesús.

Dórcas ecápo iji datoringai rĩ

³⁶ Chequé déji ore idai Jope iji dirode udore uje i tu Tabíta. Enga Jesús anguretato. Uaté i qui tu Dórcas ome gréciagosode ore uruode. Canírepise enga jecucha ga chátaja cuchade aja darasade uje ate omé.

³⁷ Diga Dórcas uaté chejnáreque re iji dirode udore enga toi ome dejnarei. Jecute ore churu gai ga ore chijna aja guiguíjnai ajei gatéminóri.

³⁸ Enga ore chiroque Jesús anguretasõre gáreode aja Lída ujetiga ore chingo Pédro. Chamáñaje ore chiraja gu uje Pédro déji Lída. Enga ore idai Lída idógosiji Jope. Uje ore di ga ore chojningame Pédro: –Pédro á, aguito ga ajína yoque ga yajnésacoja Jope.–

³⁹ Uje ore díji Jope ga Pédro nóna ore aja Dórcas jogadi, guiguíjnai ajei gatéminóri. Enga chequé ecadie qué ore po iji ejode. Enga ore chingo Dórcas ugaguedie ore iguidei aja Pédro uje ugaguei uje qué eca.

⁴⁰ Mu jĩrique Pédro chiroque ore aja guesi jnese. Enga chichaga dagataidie aja jnumi enga catecã́ri Dupade. Quigade ga chajire chequé togué ga chojningame: –Tabíta, ãriji.– Enga Tabíta niji ga chuchẽre dedodie gai. Uje chimo Pédro enga jĩrique chácare.

⁴¹ Pédro chisi ome dajmanai ome enga chiringare. Enga tibidi dojode Jesús anguretasõre, jé aja chequé ecadie ore ujetiga ore chajire to uje Tabíta e eca.

⁴² Enga Jope idaisórone chudute jnese Tabíta ujnomei uje Pédro chiqueta, enga jiei ore uje ore changureta Jesús to.

⁴³ Enga orocoi dirode iji ore idai uje Pédro cháji, enga cháji cucha aode acangóri iguíjnai uje i tu Simón.