Héchos 8 - Dupade Uruode

Sáulo cho dajocaningame Jesús anguretasórone

¹ Enga jnacari uté uje i u Sáulo ajéode jé u to ujetiga chuque Estéban. Mu que gusu Estéban uje ore pota chutígome mu jé ore jno dájningane údi ome Jesús anguretasórone jnese iji oridáidatéi Jerusalén. Jecute Jesús anguretasórone ore chisite rágaja erámi jnese uje ore chayome damajosórone. Enga ore chicáji punirone uñane uje ore íode u Judéa, Samária ore. Gusu Jesús irógode apóstol udore uje ore chácariji Jerusalén.

² Mu jnani parágode uñane uje ore chijnorapise Dupade ga ore doi Estéban enga ore chijóchame. Enga ore popísiji ejode.

³ Mu Sáulo e socárome Jesús anguretasórone to. Enga chacája ore iguíjnane ujetiga jno ore údi aja ore jurúgaisórone ujetiga ore suru ore gai. Enga chátaja jnanione aja chequedíe ore.

Felipe jno Jesús ujnomei údi aja Samária

⁴ Mu dode iji Jesús anguretasórone uje ore jnoji Jerusalén que ore cha chacate ayoréode ome Dupade uruode iji daquigode erámio.

⁵ Jesús anguretasórone uñai uje i tu Felipe chicáji ore idáyode uñai iji puniri uje i tu Samária. Enga chacate guidai idaisórone iji uté ome judíode ijnati Crísto adode.

⁶ Ga guidai idaisórone udore ore chamáta ñane ujetiga ore tangári Felipe acajnaquéode enga ore tangaripísi. Enga ore pañaji to Felipe ipesútedatéode.

⁷ Uje Felipe chijnime Satanás utocaidode iji isagode ayoré ore, enga ore pijnacarachi aja guesode. Chiquetápo jnani noñángone rĩ enga chiquetápo tatógode rĩ.

⁸ Jecute guidai idaisórone udore nínapúsu re ome Felipe ipesudode iji ore idai.

⁹ Mu jnani déji to uje i tu Simón enga jecucha chãra Samária jogosórone uje chiese daijna. Enga cho dacasuté iji re rĩ.

¹⁰ Jecute guidai idaisórone tangaripísi uté jnese enga ore chejna rángaja acajnaquéode; ayoré atade, jé aja ayoré gajnaréngone ore jnese. Enga ore chicota enga ore chojninga: –Cuchadatei u jnani uté, jecute Dupade ujopié pijóguiji.–

¹¹ Enga ore tangári gu uje iyajmánguiji ore gari ome daringaquéode ome dáringai daijna.

¹² Mu Felipe chacate ore ome panguretigai ome Jesucrísto ujetiga ore chise dáringane Dupade urása. Uje ore changureta Felipe acajnaquéode udore enga jé u uje ore chaca jnanione, chequedíe ore edodie iji yodi.

¹³ Mu diga daijnai Simón changureta Jesús to, enga ore chaca edodie iji yodi. Enga e nóna Felipe aja quigode to. Enga tijapísa uje chimo Felipe ipesútedatéode cucha pitijabácho.

¹⁴ Uje Jesús irógode apóstol udore chudute to iji Jerusalén uje Samária jogosórone ore chimesẽre Dupade uruode to enga ore chiroque Pédro, Juan aja ore.

¹⁵ Uje e ore di iji Samária ga ore catecã́ri Dupade ome Jesús anguretasórone udore ujetiga Dupade Ujopié Espíritu Sánto chacája ore to.

¹⁶ Uje cáma Espíritu Sánto chacája uñénguiji ore. Gusu uje ore chaca ore iji yodi uje ore changureta Jesús.

¹⁷ Mu Pédro, Juan ore chicha dajmainie aja ore gáyode enga quene Dupade Ujopié Espíritu Sánto chacája ore.

¹⁸ Simón chimo uje Espíritu Sánto chacája Jesús anguretasórone uje Juan, Pédro ore chicha dajmainie aja ore gáyode. Jecute chingo daplátadie ome ore.

¹⁹ Enga chojninga: –Asíyo yu iji to uacajopié uaté. Yigaidi u gu ujetiga yicha yijmainie aja uñeque gánique ga Dupade Ujopié Espíritu Sánto chacája to.–

²⁰ Mu Pédro chajnai ga chojninga: –Atoina baplátadie aja gajño pioi uje bajos eti pigaidé oré Dupade Ujopié. Mu que pigaite Dupade guẽratique oréraque.

²¹ A ca togome ua ujetiga áta ua aja yoque to ujetiga acatecã́ri Dupade ujetiga Ujopié chacája uñéngo. Jé tiógara gu ome ua uje gajnarénguepísi báyipiedie gu ome Dupade.

²² Aya báyipie gajnarénguenie enga ajócha Dupade ajei údi ome ua. Jé soca Dupade chĩro báyipie gajnarénguenie udire.

²³ Obiréjna gu ome yu uje cachi basijnaringuéone qué chijocase ua. Bajnari cuchade ome ua mu cachi bagaidi u gu báringai cuchadaté. Cho ujetiga irágu bajei ome cucha otate uneroi.–

²⁴ Uje Simón chudute Pédro uruode udore enga chojninga: –Acatecãchoi Dupade ome yu ujetiga ca uacojningane cucha chise yu.–

²⁵ Jesús irógode ore chingopísa Dupade isocade ome ore iji jogadi uté enga ore chatatapo Dupade uruode ome ore rĩ. Quigade enga ore jno Jesús ujnomei údi aja guidáyode uñane iji Samária ejode ujetiga ore nína raque ome Jesús ujnomei to. Udojo quigade enga ore chajni aja Jerusalén.

Felipe tuangóa jnani uje uniri u Etiopía

²⁶ Udojo quigade enga Dupade iroque gaté unirísonique chiqueta raja Felipe. Enga chojningame: –Bo ga ajna dajei aja Gáza uje chicáji umusoi garani. Dajei uté u uje garani u Jerusalén ga chiramísara erãpetarei.–

²⁷ Enga jé u uje Felipe jno ga chise etiopíagosi iji dajei. Eunúco uté enga eduguejẽ́ Candace iroque. Enga eduguejẽ́ tuaté iplátadie irodisõre. Enga uté sué irógode uñane gáyode. Chicai Jerusalén gu ujetiga catecã́ri Dupade iji.

²⁸ Mu e chajni to aja daniri Etiopía. Chácariji dachidi guebéquedaté ajei enga chajire Dupade uruode atatasṍri Isaías urusarane aja daquigode.

²⁹ Enga jé u uje Espíritu Sánto chojningame Felipe: –Ajose guebéquedatéi uté yui ga ajína aja dajei.–

³⁰ Jecute Felipe chayóji yui ga uje qué idógosi iji ga chudute uje etiopíagosi naráraja darujna aode gai, Isaías urusarane. Enga Felipe chojningame: –¿Ja araja bajirigode quigode a?–

³¹ Jnani chojninga: –¿Ja yirajárase? uje que pacadique yu ome.– Enga chojningápome Felipe rĩ: –Oru enga ácariji yejoi.–

³² Ajiripídi u iji Dupade uruode uje chojninga: Jnani uté gajnua tu áyasa uje ore jno údi ujetiga ore chujé. Gajnua upo áyasa ape pujúgayabia rĩ uje que pijnatique cuse uje ore chuju ojode iji gai. Adi jé u jnani tuté. Gajnareque ore adode ome mu que cho chimíyimi.

³³ Que chosi re iji gaté go jecute que uñeque narare gai. Que toc ujetiga pisecarãte ape disi ejórigo. Chamáñaje ore chujé enga Dupade jno údi aja gaté iji jnumi udé.

³⁴ Enga eduguejẽ́ iroi chojningame Felipe: –Ango yu udojo quitígo. ¿Ujetiga Dupade uruode atatasṍri ojningai tu re, jeoga ojningai tu uñeque?–

³⁵ Enga jé u uje Felipe cho quique ajiripídi iji Isaías urusarane. Mu quigade enga chopo Dupade uruode uñane quigode rĩ. Enga chingome eduguejẽ́ iroi uje Dupade uruode udore jnese ore ojningai u Jesús. Enga unere Jesús ujnomei uje Felipe chatatame etiopíagosi uté.

³⁶ Jecute uje ore chise yodi iji dajei tuté dosadi ga jnani chojningame Felipe: –Cajire to, yodi de ti. ¿Jé go que acape yu iji yodi a?–

³⁷ Felipe chojninga: –Ujetiga angureta Jesús ome báringai ayoré jnese ga a yacape ua iji jne.– Enga jnani chajnai ga chojninga: –Yangureta uje Dupade ujnacare Jesucrísto.–

³⁸ Jé u uje chojningame daroi: –Aquĩ́ra guebéquedatéi.– Enga ore doi jnumi iji guebéquedatéi enga ore chicáji yodi. Enga Felipe chaca jnani iji yodi ome bautísmo.

³⁹ Uje ore doi guesi tiji yodi ga jĩrique Dupade Ujopié Espíritu Sánto jno Felipe údi. Enga eduguejẽ́ iróquegatéi que chimópo rĩ. Mu jno ga irasique re aja dajei.

⁴⁰ Enga Felipe chuningame eti e déji ore idai Azóto. Jecute chatata Jesús ujnomei ome ore iji uté. Enga jno ga chacate ayoréode ore to iji idáyode uñane aja Cesaréa yui.