Héchos 5 - Dupade Uruode

Ananías, Safíra ore toi gu darupatáringane

¹ Mu jnani uñai uje i tu Ananías, acoté Safíra ore tẽra dajnepídi jnupe to.

² Mu Ananías uté pógu dajnepídi jnupe oredie pei ga chisi ome pei ome Jesús irógode apóstol udore. Chiese oredie u jnese. Ga acoté chirajapise dabai aringaquéode to.

³ Mu Pédro chojningame Ananías: –Ananías á, que oredie u jnese go. Jé bapógu pei. ¿Gotique gu a uje bajuéga ujetiga Satanás chacája bajei? Chamáñaje uté ipesudei báyipie gajnarénguenie udire gu uje bo barupatáringa que ome Dupade Ujopié Espíritu Sánto.

⁴ ¿Ja ca bajneque bajnepídi jnupe uté diríca? Uje babé oré tome ga ¿jé ca bajnei oredie to a? ¿Ome gotique gu a uje uacapéso udore? A ajoso ati uacãrai u jnanione uyoque. Mu barupatáringane udore gajnesṍri upúsu Dupade.–

⁵ Uje Ananías chudute Pédro uruode udore ga cṍra enga toi. Enga pisadodéringai jogadi u uté ome udore ore jnese uje ore chudute Ananías ujnomei.

⁶ Enga jnacarode uñane ore di ga ore chigaru Ananías gai iji boraidie enga ore jno údi ujetiga ore chijóchame.

⁷ A déji 3 hóras iji udojo quigade uje Ananías acoté chacája ore iguíjnai uté to. Mu cáma uaté chudute dabai tuqué ujnomei to.

⁸ Enga Pédro e catecã́ri uaté ga chojningame: –¿Jec ũré uacajnepídi jnupe oredie jé u udire a?– Enga uaté chajnai ga chojninga: –Jé oredie upúsu udire.–

⁹ Ga Pédro chojningame Safíra: –¿Jé gotique gu a uje uacapéso uacajéode ujeta etingacho yocangarádejnai Ujopié Espíritu Sánto? Jõ, ¿adute ore guichai to a uje ore chijóchame babai que? Enga a ore chijóchame ua to jne.–

¹⁰ Enga jĩrique Safíra cṍraja jnumi to iji Pédro iquei enga toi. Enga jnacarode udore ore chacápoja guiguíjnai tuté ajei rĩ enga ore chise Safíra iji jnumi uje e toi. Ga ore jno údi ga ore chijóchame to iji abai dosadi.

¹¹ Jecute Jesús anguretasórone ore todópisa. Mu que gusu ore, mu jé cho ayoréode ore jnese uje ore chudute Ananías, Safíra ore ujnomei, enga ore todópisa to.

Jesús irógode apóstoles ore pésu cucha pitijádode to

¹² Jesús irógode apóstoles ore ipesútedatéode, cucha pitijádode jiépisi iji ayoréode ujade nanique. Enga Jesús irógode udore ore chamáta ñane gatuaque aja Dupade iguíjna cuchábi imeñé uje ore chĩ́care Salomón Gajnei aja.

¹³ Mu Jesús anguretasórone uñane que ore cási ujetiga ore cháta raja ore iji uté. Jé basa ayoréode uñane ore tangaripísi ore.

¹⁴ Enga jiépisi jnanione, chequedíe uje ore changureta yocangarádejnai Jesús ome ore acajnaquéode.

¹⁵ Enga ayoréode ore chijna ejnaretade aja dajéode aja Pédro ore iquéode. Uñane moji damochápiode gáyode, ga uñane chitarano dataranone. Ore gaidi u ujetiga Pédro oré chise ore ga chiqueta ore.

¹⁶ Jerusalén ejominórone guidáyo ore idaisórone di ejnaretade údi to iji Pédro ujetiga chiqueta ore. Enga ore di Satanás utocaidode píode údi to rĩ. Enga Pédro chiqueta ore jnese.

Apóstoles Pédro, Juan ore urasade asutedie cho damajo ore

¹⁷ Mu sacerdóteode ore eduguéjna cuchábi, saducéode ore uje ore nóna, ore charatáyime ayoréode ome Pédro ore.

¹⁸ Jecute ore chigaru Jesús irógode apóstol udore enga ore jno ore údi aja guidai jurúgaisórone iguíjnai.

¹⁹ Mu dejaque ga Dupade utocaidode gateminore uñai, chuchẽre guiguíjna piagoi gai enga jno ore údi aja guesi.

²⁰ Enga Dupade utocaidi chojningame ore: –Boyo, enga ayáyoji Dupade iguíjna cuchábi Témplo ujetiga angoño ayoréode iji dati ome pucuecaringué ichai isocade jnese.–

²¹ Enga jĩrique Jesús irógode apóstol ore doi Dupade utocaidi uté uruode. Uje e dire iji dire uñai enga jĩrique ore chacája Dupade iguíjna cuchábi. Enga ore chacate ore. Mu sacerdóteode eduguéjna cuchábi, jorane, ore tibidi judíode ore angaránone iji daquíningai. Enga udore ore chiroque darógode ore aja Pédro ore ujetiga ore di ore údi.

²² Mu uje ore jurúgaisórone que ore chise dajurúgayode enga ore chajni ga ore chingome sacerdóteode eduguéjna cuchábi.

²³ Enga ore chojninga: –Yico yocujurúgayode jogadi guiguíjna que enga irodisórone jé ore chirote piagoi. Piagoi jorídedie etoguipísiji to rĩ. Mu uje yuchẽco gai ga íjnoque ajei ome yocujurúgayode.–

²⁴ Uje ore chudute ore ojñane enga Dupade iguíjna cuchábi irodisórone ore eduguéjnane, sacerdóteode ore eduguéjnane ore chopise dáyugu jnese. Enga ore chojningame ñane: –¿Jé ore cho píringome re que a?–

²⁵ Uje qué ore déji daruode gai enga jnani uñai di ga chojningame ore: –Uacajurúgayode jnanío ore déji Dupade iguíjna cuchábi enga jé ore déji dacajnaquéode gai uje ore chacate ayoréode ore.–

²⁶ Dupade iguíjna cuchábi irodisórone ore eduguéjnai nóna ore jurúgaisórone aja Dupade iguíjna cuchábi. Enga ore jno Jesús irógode údi aja daquíningai. Mu que ore cho ore ate go uje ore todo ayorébui ujetiga ore chujé ore ome cucaranenie.

²⁷ Ore di ore údi ga ore chicha ore aja eduguéjnane iquei iji ore aquíningai. Sacerdóteode ore eduguéjnai chojningame Jesús irógode:

²⁸ –Yãrájo ome uaque diríca ujetiga acacho ore ome Jesús adode. Mu que angáchoi yoque gotique. Enga Jerusalén idaisórone ore íjnongaja uacacajnaquéode. Enga a aguhétayo yoquibai uje chiese yoquique Jesús.–

²⁹ Enga jé u uje Pédro, ujode apóstol udore, ore chajnai ore ga ore chojninga: –Yocangaráni u Dupade, ga que yangácoi uaque go.

³⁰ Yocayode, jnani bajácho ore angaráni Dupa chiqueta uaquei Jesús uje uacajóyo aja curesei ica.

³¹ Mu Dupade e chosi iji gaté enga e chicháji dãrachua iji gaté. Pésu úringai yoqueduguéjna to. Que gusu udore mu pésapo úringai yoquiquetangore rĩ. Gaidi u gu ujetiga israélgosode chécãre dáyipie quigode ome Dupade ujetiga pĩroque ore isijnaringuéone.

³² Cuchade udore atatasórone u yoque. Mu que gusu yoque mu Dupade Ujopié Espíritu Sánto chajo raja yoque ujetiga yangácoi Jesús adode. Ga Dupade chisi ome Dajopié Espíritu Sánto ome dangarásorone ore jnese.–

³³ Uje eduguéjnane chudute ore uruode enga ore ajéode dotãre ome ore. Jecute ore pésu dáyipiedie ome ñane ujetiga ore chisi ome pitoringai ome ore.

³⁴ Mu eduguéjnai uñai déji ore gari uje i tu Gamaliel. Fariséo u uté to ga chacate ore ome Moisés urusarane. Enga guidai idaisórone ore irasique uté enga ore tangaripísi. Uté chague iji ore ajei ga chiroque darógode ore aja ujetiga ore chijnáma Jesús irógode apóstol ore aja guesi.

³⁵ Ga jé u uje catecã́ri dojode eduguéjna ga chojninga: –Yujode israélgose uaque á, ajuso uacasocárique guio ome jnanione udore uje cáma yirajágo ujetiga jé ũré ore jeoga taque ore.

³⁶ Ísega ajnusináño uje jnani chingo raja ore nanique uje i tu Téudas. Chiese pangarádejna cuchape uté nanique enga jĩrique chamáta dacadigode aja re nanique. Enga 400 ore nanique. Mu uje ore chujé uté enga jĩrique acadigode chisite raja quedéjnane. Enga que cuchárique tṍraji uté acajnaquéode gotique.

³⁷ Udojo quigade enga galiléagosode uñai chingo raja ayoréode ore to uje i tu Júdas. Ore cho dangarádejnai iji uté to enga angarásorone jiei to. Mu ore chujé uté to enga angarásorone ore chisite raja quedéjnane to.

³⁸ Jecute ayáyo Jesús irógode udore unerane to enga ca ajocáso ore. Ujetiga ore acajnaquéode garani u ore enga a íjnoque bisideque jne.

³⁹ Mu ujetiga garani u Dupade a ca dequejnacho jne. Jecute ajuso uacasocárique guio ome ore. Jé socaseti uaquetei u Dupade.–

⁴⁰ Eduguéjnane udore ore chimesẽre Gamaliel uruode. Enga ore tibidápoi Jesús irógode apóstol udore rĩ, enga ore chaquesu ore údode. Enga ore chãraque ujetiga ore chacate ayoréode ome Jesús adode.

⁴¹ Jecute ore jnoji eduguéjnane ejode, mu ore irasiguipise re uje Dupade juéga ome ore ujetiga ore cho daba Jesús.

⁴² Enga que ore cha ore chacate ore ome Jesús adode gotique. Mu ore chacate ayoréode iji Dupade iguíjna cuchábi iji dirode jnese, jec iji ore iguíjnane to rĩ.