Héchos 3 - Dupade Uruode

Jnani noñai úringai piquetaque adode u udojo

¹ Dire uñai ga Pédro, Juan ore nóna ñane aja Dupade iguíjna cuchábi uje guedé cho jñuque. Judíode ore isocabei u gu uje ore catecã́ri Dupade iji uté uje guedé cho jñuque.

² Jnani noñai jecucha ga déji Dupade iguíjna cuchábi piagoi iji dirode jnese uje noñaque aja guesi iji daté. Enga jnani uté jorane jecucha ga ore chijnóngaja Dupade iguíjna cuchábi piagoi uje i tu Piago Ueradi ujetiga chutai ayoréode uje ore chacája Dupade iguíjna cuchábi.

³ Uje jnani noñai chimo Juan, Pédro ore ga chutai ore to uje ore chacája Dupade iguíjna cuchábi.

⁴ Pédro, Juan ore toji jnani noñai gai ga Pédro chojningame: –Cajire yoque.–

⁵ Enga jnani noñai chajire ore ga jos eti ore chisi ome cucháringome.

⁶ Mu Pédro chojningame jnani noñai: –Que yiplátaraque cuse. Íjnoque óro iji yu rĩ. Mu yisi ome yaríjogonóri cucha ome ua jne. A yiqueta ua jne ome Jesús, nazarétgosi ujopié. Ayague enga arique.–

⁷ Pédro e doi enga chisa jnani noñai jmanai ãrachua enga chiringare aja gaté. Enga jĩrique etoque guídade, guídogorodíe ore.

⁸ Jnani noñai chãrai re iji gaté enga chague. Enga jĩrique dique enga nóna Pédro ore aja Dupade iguíjna cuchábi ajei. Chãrai re iji gaté uje irasiguipise re gu enga chicota Dupade uje diguiji Dupade iguíjnai ajei.

⁹ Enga guidai idaisórone ore chimo jnese uje dique enga ore chicota Dupade to.

¹⁰ Enga ore chirajapise uje jé ũré uje uté u uje jecucha chácariji Dupade iguíjnai piagoi ejoi uje i tu Piago Ueradi ujetiga chutai ore. Jecute ore tijapísa uje e dique.

Pédro cho ore quique iji Dupade iguíjna cuchábi imeñé

¹¹ Jnani noñai que chirame Pédro, Juan ore gotique uje ore déji Dupade iguíjna cuchábi imeñé uña uje eduguéjna cuchábi Salomón gajneque nanique. Enga Dupade iguíjna cuchábi piésorone, ejominórone ore, ore tibágui ore jnese uje ore tija jnani noñai uje e dique.

¹² Uje Pédro chimo ore uje ore tijapísa ore enga chojningame ore: –Israélgosode uaque á, ¿gotique uje uacatijayo yoque enga uacatoyóji yoquibai? Ísega ajoso ati jnani uté dique gu yocujopié, jeoga uacajéode u uje yoquijnoraquéode ome Dupade u uje chiqueta.

¹³ Mu que quigode u gotique. Yocai cásodicáite jnani bajácho Abraham, Isaac, Jacob ore angureni Dupade pésu dajnacari Jesús ujetiga sué ore gáyode jnese. Yocojningai Jesús uté u uje uaquẽchome eduguéjnane ica. Enga uje Piláto pota jeta chirame ica mu uaquetácho.

¹⁴ Ueque Jesús ome pisijnaringuéone ga uerate adode jnese, mu que apótayo ica jeta Piláto chirame. Mu uacameserãi u jnani sijnanguipísi ica ujetiga Piláto chirame.

¹⁵ Diga uacajéyo pucuecaringuei guẽrasṍri mu Dupade chiquetápo iji itoringai rĩ. Ga imosórone u yoque uje ecápo rĩ, enga jé yingongome uaque.

¹⁶ Uacarajáyopise jnani uté úringai noñaque diríca mu uje yĩ́care Jesús i que enga jĩrique etoque. Yocanguretarétigai ome Jesús u uje chiqueta jnani uté. Enga uacamóño jnese uje e etoque jnani noñai.

¹⁷ Yurasade uaque á, jé yiraja uje que arajáyo cuchárique ica uje uacajéyo Jesús. Jé cho uaqueduguéjnane to rĩ.

¹⁸ Mu Dupade ojningane e tocade ome uacapesudode udore. Uje jé Dupade urúo nanique ome daruode atatasórone uje ore churúsãre enga ore chojninga: Dupade utocaidi Crísto gajnei tu ujetiga chejnáreque re.

¹⁹ Jecute ecãcho uacáyipiedie quigode, uacadode ore ome Dupade enga ajníño gai ujetiga chĩro uacasijnaringuéone to. Quene jogadi u jne ujetiga Dupade pésu cuchade aja quigode ujetiga tijode cho jnángome uaque.

²⁰ Enga Dupade a chiroque uacajnati Crísto aja uaque jne. Uje chimate dáyipiedie ome nanique ujetiga chirógaja uaque.

²¹ Mu Jesucrísto qué déji gaté uje Dupade qué pésu cuchade aja quigode gu. Uje jé urúo nanique ome daruode atatasórone iji jnani bajade uje ore chedu Dupade iji re. Uje a chatire cuchade jnese úringáringo ujñapetágaja ore jne.

²² Moisés acajnaquéode u ome yocayode jnani bajácho enga chojninga: "Yocangaráni Dupade a chiroque daruode atatasónique aja uaque jne. Adi jé u uje chiroque yu aja uaque. Enga garani jé upúsu uaque. Ujetiga di gojni enga angachopísi ome ojningane cucha jnese.

²³ Ore jnese uje que ore tangári Dupade uruode atatasṍri uté ga pujuyápise ore jne, enga ducarãte ore iji israélgosode gari."

²⁴ Dupade uruode atatasṍri Samuel jé aja ujode Dupade uruode atatasõre ejo jnese ore chatata jnese cucha dacadode udojo icaite uje a tocade jne.

²⁵ Dupade jé urúo ome yocayode jnani bajácho nanique uje chojningame Abraham: "Bape disi ejórique a erámi unirisórone jnese agutíyamáite jne." Dupade ojningane cucha udore gajnengórone u uaque to uje Dupade uruode atatasórone chingome yoque iji darusarane.

²⁶ Uje Dupade chiqueta dabi ga chiroque aja judíode uaque bajaque ujetiga uacagutíyamáite enga ujetiga ayáyo uacasijnaringuéone jnese.–