Héchos 27 - Dupade Uruode

Ore chorei Páblo iji Róma

¹ Uje e ore chimate dáyipiedie ujetiga ore chorei Páblo uyóguiji Itália, enga ore chisi ome Páblo, ujode pujurúgayo ore ome soldádode eduguéjnarique uje i tu Júlio. Soldádode uague uje i tu Augústo Irógode ore eduguéjnai u uté.

² Yico ga yacágoja cuco cuchábi uje garani u ore idai Adramítio. Enga cucoi uté quigode u guidáyode iji yote quedéjnai edógayode iji Ásia. Aristárco nóna yoque to uje uté idai u Tesalónica uje déji ore uniri Macedónia.

³ Dire uñai ga yico ore idai uje i tu Sidón uje déji yote quedéjnai edógai. Ore idai uté u uje Júlio chosõripise Páblo iji enga juéga disorãi ome ujetiga tibágabi dajorane enga udore ore cháta cuchade aja.

⁴ Yicoji Sidón mu úyujna cuchabé chãraque yoquiquei, jecute yicagóji yote quedéjnai ajã́ro Chipre uécha uñai uje úyujna cuchabé garósi iji uté gu.

⁵ Yico ga yiyógo punirone Cilícia, Panfília ore gai. Enga yico ore idai Míra uje déji ore uniri Lícia.

⁶ Soldádode eduguéjnai Júlio chise cucoi iji uté ore idai uje garani u ore idai uje i tu Alejandría. Enga uté qui u Itália. Enga eduguéjnai Júlio chiroque yógaja cuco cuchábi uté ujetiga yacágoja ujetiga jé yico.

⁷ Jiei yoquimochádode iji dajei. Quĩrique yico gu. Enga ore chidota rágaja uje ore chijocase cucoi aja ore idai Gnído yui. Yico Gnído tiógarei mu qué úyujna chãraque yoquiquei. Enga yinguírangoja ore idai Salmón gai uje déji yote quedéjnai ajã́ro uje i tu Créta.

⁸ Yico ga ore chidota rágaja uje ore chijocase cucoi uje yajnángo yote quedéjnai qui iji. Enga yico yote quedéjnai ocóro uje i tu Ocóro Ueradé. Yote quedéjnai ocóro uaté idógosiji ore idai uje i tu Laséa.

⁹ Diyajmaque yóguiji yote quedéjnai ocóro. Enga esoi chise yóguiji. Enga gajnareque jeta ore chacája cucode iji esoi iji yote quedéjnai uté. Jecute Páblo cho ore quique.

¹⁰ Enga chojninga: –Yijorane uaque á, gajnareque jeta yicopo rĩ. Uje a yoquibi cuco péro jne gu. Enga a yijnájoi yocugúchade jnese jne. Jé soca yijnájopoi uyoque jnese to jne rĩ.–

¹¹ Mu que eduguéjnai Júlio tangári Páblo aquĩraquéode udore go. Chamáñaje cucoi gajnesṍri, jé aja ijocayasórone ore irósõri ore chajo raja jnese gu uje a ca cuchárique chósi ti iji ore ujetiga ore jnopo aja daqui rĩ. Jecute eduguéjnai Júlio angaránone u ore.

¹² Gajnareque yote quedéjnai ocóro uaté iji esode. Jecute ore ajéode u ujetiga ore jnoji uté, soca ore chise ore idai iji yote quedéjnai edógai uje i tu Fenice. Enga jé u ujetiga ore chácariji uté jé aja esoi eruei. Chamáñaje yote quedéjnai ajã́ro uaté chãraque umusoi, casaque ore iquéode gu.

Acherangóri chachẽre ore iji ore pi cuco iji yote quedéjnai

¹³ Emami diósi ga tṍraji umusoi garani. Jecute ore jose eti jé areque jeta ore jno. Ore jno enga ore charose rágaja yote quedéjnai ajã́ro uje i tu Créta.

¹⁴ Mu ore chuningame eti úyujna cuchabé chachẽre ore enga chaquesu cucoi údode uje tṍraji casaque garani.

¹⁵ Casaque chorei yoquibi cuco iji quedéjnane. Jecute que ore chijocásapo rĩ enga chorei yóguiji dajesui. Chamáñaje que ore chajno cucoi gu ujetiga ore chorei yoquiqui.

¹⁶ Yicagóji yote quedéjnai ajã́ro atíamia uéchai uje i tu Cláuda, enga que urénga úyujna chubúchu jnumi iji uécha uñai. Yidotágo yógaja enga yimácosi yocujnungámi cuco abape aja cucoi ajei uje cucoi churugúsosi iji daquigade.

¹⁷ Uje e ore chimánosi cucábi aja cuco cuchábi ajei ga ore chigaru cuco cuchábi ome enuéjnane. Ore todo yui gu ujetiga cucoi chicáji ujnanie jogadi uje i tu Sirte. Jecute ore chiramurase borapéode iji cucoi gai, enga cucoi chicai úyujna quigode.

¹⁸ Mu dire uñai ga acherangóri jé ate. Jecute ore tṍra cucoi ugúchade aja yote quedéjnai.

¹⁹ Dirode e gadiógome úyujna cuchabé iji yote quedéjnai ajei, enga yórango cucoi erásorone cucha aja yote quedéjnai to.

²⁰ Chamáñaje dirode e jiei uje guedé que tocadepo rĩ. Enga que yimóngo guédoraque iji dejade rĩ. Enga acherangóri jé ate, uje tṍra yoquibi cuco aja quedéjnane. Enga yijoco ati que yiquecágopo jne rĩ.

²¹ Uje e iyajmaque uje que yajo yoquibotique enga Páblo chague enga chojningame yoque: –Yijorane uaque á, a angáchoi yu diríca enga ca yicórase iji yote quedéjnai ajã́ro Créta casé diríca. Enga a ca yijnájorási cucoi ugúcha casodé. Enga a ca yijnájoporási cucoi te rĩ.

²² Mu ca oyo uacáyugu uaque. Uje a cucoi péro jne marínga, a ca uacuñeque toi jne.

²³ Uje Dupade iroi gaté unirísõre uñai chiqueta raja yu que iji dejai udé. Yajnesṍri Dupade chiroque uté aja yu. Chamáñaje yiji Dupade uté iroquéode gu.

²⁴ Enga Dupade iroi uté chojningame yu que: "Páblo á. Ca atodo. Bajnei tu ujetiga ango ua aja rómagosode eduguéjna cuchábi emperador dirome jne. Enga Dupade pota chiqueta ua iji yote quedéjnai udé. Jecute a chiquetápo bajõráringo ore jnese to jne enga a ca uñeque toi jne. Yojningane u udore ore jnese uje ore déji cucoi udé ajei."

²⁵ Jecute jé ejnáño uágaja, yijorane uaque á. Chamáñaje yangureta Dupade ome udore, enga a Dupade iroi uruode tocade jnese jne ome yoque.

²⁶ A péro yoquibi cuco udé uje acherangóri a tṍra yoquibi cuco aja yote quedéjnai ajã́roraque jne.–

²⁷ Dirode e gagájni iji yirídai ome acherangore cuchábi iji yote quedéjnai ajei. Enga yugúcoji yote quedéjnai jogadi uje i tu Ádria. E dejaque enga acherangore cuchábi chorei yoquibi cuco iji quedéjnane. Mu uje e dejnínga gatócoro enga cucoi ijocayasórone ore chiraja uje e yirõco yote quedéjnai ajã́roraque.

²⁸ Ore chuga jnumi yui enga 36 métros iji jnumi yui. Enga ore jnopo rĩ enga ore chugapo jnumi yui iji ta rĩ enga e 27 métros iji jnumi yui.

²⁹ Ore todo ujetiga cucoi chinguíra raja cucaranéringui, jecute ore tṍra cucoi isangurúone, guebeque iménuo gagájnione aja jnumi iji quigade ujetiga ca jno. Enga ore jnátu diri yui uje ore todópisa jnese.

³⁰ Mu cucoi ijocayasórone ore tõrasia cucoi ababi aja yote quedéjnai. Ore ajéode u gu ujetiga ore chayome cucoi ujetiga diga péro. Mu ore chãra ránguiji cucoi isangurúone iji iquei uje chiese qué ore chiramurásaja jnumi. Ore gaidi u gu ujetiga uñane ca chiraja ore.

³¹ Mu Páblo chiraja enga catecã́ri soldádode eduguéjnai, jé aja soldádode ore rĩ enga chojninga: –Udore a ore jno iji cucoi jne enga a ca uacuñeque eca jne.–

³² Jecute soldádode ore chaquesu enuéjnane iji cucoi ababi enga yote quedéjnai jnosi údi.

³³ Dirájnai enga Páblo chingome ore ujetiga ore tagu cuchárique. Enga chojninga: –Dirode e gagájni iji yirídai uje que amóñopo rĩ enga que achopo uacabotique to rĩ.

³⁴ Angáchoi yu enga acho uacabotígo enga etoque uágaja jnumi ome yote quedéjnai yui jne. Enga a ca yijnájoi yocuñeque jne. A yiríngopo yocúringane etoque údi jnese jne rĩ.–

³⁵ Uje Páblo chejna daruode guesi enga chisa arurétique. Mu qué catecã́ri Dupade bajaque iji dajorane ore iquei. Enga jé u uje chajuque enga tagu.

³⁶ Enga jĩrique ore cha dasadodéringai enga ore chirate Páblo aja chagúi enga ore tagu dabosode jnese.

³⁷ Jiei yoque ga 276 yoque iji yoquibi cuco ajei.

³⁸ Uje ore chejna chagúi guesi enga ore tṍra cucoi yuguedie trígo aja yote quedéjnai. Ore ajéode u ujetiga cucoi cho pujnúrique.

Yote quedéjnai chibéro cucoi

³⁹ Uje direjnipe ga cucoi ijocayasórone ore chiraja uje e idógosi ore iji yote quedéjnai ajã́ro uaté, mu que ore chimo to nanique, enga que ore chirajápo írique rĩ. Mu ore chimo uje yote quedéjnai ocóro déji uje jnumi chajnecara raja enga ore pésu dáyipiedie ujetiga ore chijocase cucoi aja ocóro uaté, ¿jé soca ore chise jne?

⁴⁰ Jecute ore chaquesu enuéjnane iji cucoi isangurúone, enga guebeque iménuone udore noñaji yote quedéjnai údi. Ore chejñu cucoi erásorone to enga ore chijocase cucoi ome udore. Enga ore chasingare cucoi jogosórone borapecho iji cucoi iquei ujetiga emi chubúchu enga jno cucoi údi. Enga cucoi jnome jnumi yui.

⁴¹ Mu cucoi chise uje yote quedéjnai jochade gare iji enga cucoi únoi catája jnumi. Enga yote quedéjnai imeséra cuchábedie chibéro cucoi iji quigade enga chajuque aja quedéjnane.

⁴² Soldádode ajéode u ujetiga ore chujé darodigode pujurúgayo. Ore todo gu ujetiga ore doi jnacoi aja yote quedéjnai ajã́ro enga ore noñaji uté.

⁴³ Mu soldádode eduguéjnai que pota chugome Páblo, jecute que juéga chui ome ore jurúgayode. Mu chojninga: –Boyo, enga uñéngo doi jnacoi bajagája yote quedéjnai ajã́ro ujetiga chiraja.

⁴⁴ Enga uacuñéngo chujé rágaja cucoi péode gai aja guesi yui.– Enga jé u uje ore di iji jnumi jnese enga que uñeque toi.