Héchos 25 - Dupade Uruode

Páblo narare dabai iji eduguéjnai Fésto iquei

¹ Fésto di iji Cesaréa enga doi eduguéjnai Félix charidi. Mu dirode gadióguiji udore quigade enga jnopo rĩ enga chicáji Jerusalén.

² Uje Fésto di iji Jerusalén enga sacerdóteode ore eduguéjnane, judíode ore urása obiréjnane ore chayója Fésto ome Páblo.

³ Enga ore chutai Fésto ujetiga chorepoi Páblo iji Jerusalén rĩ. Mu ore ajéode u ujetiga ore chujé Páblo iji Jerusalén yui.

⁴ Mu Fésto chojninga: –Cachi ore suru Páblo gai iji Cesaréa arĩ́e. Enga yajéode u ujetiga jĩrique yajniápo jne rĩ aja uté.

⁵ Omi tu ujetiga dacasutedie uñanie iji uacajade ore nóna yu aja Cesaréa enga jogadi u jne ujetiga udore ore chatata uaquetétigárigo ome Páblo ujetiga gajnarécho adode ome uaque.–

⁶ Que yimo ujetiga Fésto mochádode 8 jeoga 10 u iji Jerusalén. Mu iji dirode udojo quigade enga chajniápo aja Cesaréa rĩ. Dire uñai u enga chácariji dáringai eduguéjna charipi gai iji ore aquiningamei. Enga jé u uje chiroque ore ujetiga ore doi Páblo.

⁷ Uje Páblo chacája gari enga judíode ore sose yui uje ore tṍraji Jerusalén. Enga ore chaguhéta cuchadatéode Páblo gai. Mu que toc ujetiga ore chise udore ore atatagode úringáringo ũréo go.

⁸ Páblo narare dabai enga chojninga: –Que yipésu cucha gajnarétique gotique. Que yetaque Moisés urusarane ojningárique cucha go uje purusãracho ome judíode uyoque. Que yopo cucha bisidéguiji Dupade iguíjna cuchábi rĩ. Que yiyópo rómagosode eduguéjna cuchábi emperador gãrétique cucha gai rĩ.–

⁹ Mu Fésto que pota jeta judíode chetaque atique, jecute chojningame Páblo: –¿Ja apota ya jeta yicagobíji Jerusalén ujetiga pajirique badode iji uté a?–

¹⁰ Mu Páblo chojninga: –Rómagosode yoqueduguéjna cuchábi ipesute bajogadi udé ujetiga ajire cuchade aja quigode iji. Jecute jé tiógara ujetiga pajirique yadode aja quigode iji udé. Barajapise to uje que yipésu cucha gajnarétique ome judíode gotique.

¹¹ Ujetiga jec ũré yibárique u cuchadatei enga que yãraque yu ujetiga ore chujé yu. Mu ujetiga cachi ore chaguhéta cuchade yibai enga que ese udore ore atatagode úringane ũréo enga que tiógara go ujetiga pẽrate yu ome judíode ore. Yipotigádi u ujetiga rómagosode eduguéjna cuchábi emperador chajire yadode aja quigode.–

¹² Uje Fésto chejna guesi uje catecã́ri dojode eduguéjna iji uraque daquíringai enga Fésto chojningame Páblo: –Bajéode u ujetiga rómagosode ore eduguéjna cuchábi emperador uté chajire badode aja quigode. Jec areque. A acáji Róma jne.–

¹³ Jiei dirode iji udojo yui enga eduguéjnai Agrípa, Berenice ore chicáji Cesaréa ujetiga ore chidójnanga Fésto.

¹⁴ Uje e ore mochádode jiei iji Cesaréa ga Fésto chingo Páblo adode aja eduguéjnai Agrípa enga chojninga: –Ore jurúgai déji de uje Félix noñome iji de diríca.

¹⁵ Uje yugúsi Jerusalén enga sacerdóteode eduguéjnane, jé aja judíode angaránone ore chayója yu ome uté ujetiga yisi ome pitoringai ome.

¹⁶ Mu yojningame ore uje dacasutedie uyoque uje rómagose yoque ga que yoquisoca to go ujetiga yujégo yocujórique ayoré ujetiga ca uté narare dabai iji detesórone iquei.

¹⁷ Jecute uje ore di diríca enga que yãra yu iji cuchárique. Dire uñai ga jĩrique yiyáji yúringai eduguéjna charipi gai iji yocaquiningamei. Ga yiroque yirógode aja ujetiga ore doi jnani tuté.

¹⁸ Cachi yajéo uje Páblo jodeti bárique cuchadaté. Mu yudute guetesórone ore ojñane enga cucha bisidécho ore aguhétajade ome Páblo.

¹⁹ Gusu ore guetei iji uté u uje chiese ca doi dayode jnani bajácho adode. Ore chotigásapo rĩ ome jnani uje i tu Jesús uje toi mu chiese ecápo rĩ ome Páblo.

²⁰ Que yiraja yisocáringome cuchade udore. Jecute yojningame Páblo: "¿Ja apota ya jeta yico ga yicagóji Jerusalén ujetiga pajirique badode aja quigode iji uté?"

²¹ Mu Páblo pota jeta rómagosode yoqueduguéjna cuchábi emperador Augústo chajire adode aja quigode. Jecute qué yaquĩ́ra iji úringai pujurúgai iji de, jé aja diri ujetiga yorei iji Róma.–

²² Enga Agrípa chojninga: –Fésto á, yajéode u ujetiga qué yangári jnani uté ojñáringo to.– Enga Fésto chojningame: –Jec arec. A angári ojñáringo dirome.–

²³ Dire uñai ga Agrípa, Berenice ore di enga ore chacája daguidé ueradéjnanie. Soldádode eduguéjnane ore di to, jé aja ayoré atade uje ore tṍraji ore idáidatéi. Enga ore chacája guijnatajé cuchábi jnese. Enga que ore chuseque rágaja ajei. Enga jé u uje Fésto chiroque darógode aja Páblo ujetiga ore di údi.

²⁴ Uje Páblo di enga eduguéjnai Fésto catecã́ri daríjogonórone enga chojninga: –Yijna jnani uté aja de gu ujetiga eduguéjnai Agrípa, yocaríjogonórone uáguiji de ajicho to. Jiei jnanione iji judíode ore uje ore chingo detétigade aja yu ome uté adode. Que gusu iji Jerusalén, mu jé u to iji Cesaréa udé. Enga que ore cha catecã́ri yu ome uté ujetiga yisi ome pitoringai ome.

²⁵ Mu uté bade que cuchadatéo gotique. Jecute que tiógara ujetiga chuque ome yajéode. Mu uté pota jetiga eduguéjna cuchábi emperador César Augústo chajire adode aja quigode. Jecute yajéode u ujetiga yoréji eduguéjnai Augústo.

²⁶ Mu que yiraja yuru quitígo iji yurusãratígo ome yeduguéjnai César Augústo uté. Jecute yijnája uacari iji de. Cuchiyi tupúsu ua eduguéjna Agrípa. Enga yajéode u ujetiga acatecã́ri enga angári ojñáringo enga jé u ujetiga ango yu bárique ujetiga yiraja yuru quitígo ome yurusãratígo.

²⁷ Uje quedéjna ome yu ujetiga piroque pujurúgarique aja yoqueduguéjna cuchábi ujetiga ca pirajaque bárique.–