Héchos 23 - Dupade Uruode

¹ Páblo chajire eduguéjnane iji ore aquíningai enga chojninga: –Yujode judío uaque á, que yagutéraque cho jora ome yipesutígo cucha gajnarécho ome Dupade gotique nanique, ga jé chuságaja deréjnai udé gajneri.–

² Enga jĩrique sacerdóteode eduguéjna cuchábi Ananías chetaque Páblo uruode udore enga chojningame Páblo ejominórone: –Anguíraño uacajmanáyone aja uté pijnani.–

³ Mu Páblo chajnai uruode enga chojninga: –Chiese jnani paraque ua mu taque ua. A Dupade chujé ua to jne ome báringai táquechoquí. ¿Ja ca agúsi te gu a ujetiga ajire yocadode aja quigode uje bajna Moisés iroquéode ojningane cucha ome bajirigode udore? Jé quigode u arĩ́e. Jecute, ¿gotique gu a uje bapota jeta ore chujé yu uje Moisés iroquéode chãraque pisocade udore múñi?–

⁴ Páblo ejominórone ore chojninga: –¿Ja jé barúo udore ome Dupade iroi, yoqueduguéjna cuchábi a?–

⁵ Páblo chojninga: –Yujode judío uhuaque. Que yiraja que uje sacerdóteode eduguéjna cuchábi tu uté. Jec ũré uje Dupade uruode chojninga: "Jé ca barúrique chamáña aja dacasutéraque iji bedánique."–

⁶ Enga Páblo chajire ore enga chimo uje saducéode déji ore ujade, anírone fariséode dépoji ore ujade rĩ. Jecute chejnapúsu daruode enga chojninga: –Yujode judío uaque. Fariséo yu to jé aja yayode ore jnese. Yangureta to uje togode ecápo jne rĩ. Ise ga yanguretigai ome udore u uje ore chetaque yadode enga ore chijna yu aja de ujetiga pajirique yadode.–

⁷ Uje urúo udojo enga jogadi u uje fariséode, saducéode ore botare ñane, enga ore cãra dáyipiedie quigode ome ñane.

⁸ Uje saducéode ore chojninga: "A ca togode ecápo jne rĩ." Ore chotigase rĩ jeta gaté unirísoningo cuse. Enga que poré gatérigui cusapo ome ore rĩ. Jé basa fariséode que ore chotigase cuchade udojo gotique.

⁹ Ore tibite jnese enga ore acadisórone uñane chague uje udore ore chacate ore ome Moisés iroquéode ojningane cucha. Fariséo ore to gu enga ore narare Páblo gai enga ore chojninga: –Jnani tuté que pésu cucha gajnarétique. Ujetiga jec ũré enga poré gatéraque jeoga gaté unirísonique catecã́ri diríca enga obiréjna uje garani u Dupade. Jecute gajnarenguirase ujetiga yetájo Dupade ipesutígo.–

¹⁰ Ore botaripise ñane enga soldádode eduguéjnai todo ujetiga ore chaquesu Páblo aja jnumi. Jecute chiroque darógode aja Páblo ujetiga ore napo aja soldádode iguíjnane ajei rĩ.

¹¹ Uje e dejaque iji dire uñai enga Yocangarádejnai chiqueta raja Páblo enga chojninga: –Páblo á, jé ca atodo. E bacate jerusaléngosode ome yadode, enga a jé badi upo jne rĩ iji Róma uje bajnei tu gu ujetiga atata yadode ome rómagosode to jne rĩ.–

¹² Dire uñai ga judíode uñane ore pésu dáyipiedie ome Páblo ujetiga ore chujé. Ore cho darúja re enga ore chojninga: –Yoco yocujuñame yoque jne ujetiga ca yujégo Páblo. Enga a ca yajo cuchárique jne enga a ca yójigopo cuchárique jne rĩ ujetiga ca yujégo Páblo.–

¹³ Jiei jnanione udore uje ore jmongarája Páblo. Enga ore sué 40 gai.

¹⁴ Diga ore tibágui sacerdóteode ore eduguéjnane, judíode angaránone ore enga ore chojninga: –A yoco yocujuñame yoque jne ujetiga ca yujégo Páblo. Enga a ca yajópo cucha pibotique jne rĩ enga a ca yójigopo cuchárique rĩ ujetiga ca yujégo Páblo.

¹⁵ Jecute átayoja yoque to, enga angoño soldádode ore eduguéjnai ujetiga chijnapo Páblo aja uacaquiningamei dirome rĩ. Enga chiese angachopísi bárique dirome. Mu a yujégo iji garãtique dirome ujetiga cáma chise uaque.–

¹⁶ Mu Páblo nero abi chudute uje ore jmongarája Páblo enga jno ga chicáji soldádode iguíjnai ujetiga chingome Páblo.

¹⁷ Uje Páblo chudute ojñane enga catecã́ri eduguéjnai uñai enga chojninga: –Bo ga ajínasia disi sudé aja eduguéjna cuchábi uje a chingo gojñáringo aja jne.–

¹⁸ Soldádode eduguéjnai uté jnosi disi údi aja eduguéjnai ga chojninga: –Yocujurúgai Páblo tibidi yu que ujetiga yijínasia disi sudé aja ua, ujetiga angári ojñáringo jne.–

¹⁹ Eduguéjnai chisa disi jmanecai ga jno údi aja quedéjnai. Catecã́ri ga chojninga: –¿Jé gotígo a bojñáringo ome yu?–

²⁰ Enga disi chojninga: –Judíode e ore chimate dáyipiedie ome Páblo yui. Enga a ore chutai Páblo iji ua dirome ujetiga ajna Páblo aja ore aquiningamei ujetiga ore eduguéjna cuchábi, ore tangári Páblo ojñáringo dirome. Enga chiese ore tangaripísi dirome.

²¹ Mu ca angári ore jne. Bamo gu uje 40 jnanione udore uñane uje a ore pógu re jne iji judíode eduguéjnane aquiningamei yui ujetiga ore chujé Páblo dirome. Enga a ore cho dajuñame raque jne ujetiga ca ore chujé. Enga a ca ore tagápo cucha pibotique rĩ, enga ca ore chójiapo cuchárique rĩ ujetiga ca ore chujé. E ore chimate dáyipiedie mu cucha amiri tu ujetiga ajuéga Páblo ome ore dirome ujetiga ore chajirápo adode aja quigode rĩ.–

²² Soldádode eduguéjna cuchábi chiroque disi aja doi mu chojningame: –Bo ga ca ango erámi jne uje yudute bojñane udore.–

Ore jno Páblo údi aja eduguéjnai Félix

²³ Udojo quigade enga eduguéjna cuchábi tibidi dojode eduguéjna gáño ujetiga chingo dáyipierigui aja ore enga chojninga: –Ajócãcho enga boyo iji dejai udé ujetiga e dejnínga. Enga acayóji Cesaréa. Enga ajínaño soldátigo jne. Ga 200 a diguiji jnumi jne. Jeque buricai charisóningo 70 ore jne. Jeque ujórigo 200 diguiji jnumi jne ujetiga ore chijna dasṍreringui.–

²⁴ Chingo dáyipiedie ome ore to ujetiga Páblo cháji buricárique gai. Enga chingo ore ujetiga ore susípise Páblo guio iji dajei enga di dáringárique ueca údi iji eduguéjnai Félix.

²⁵ Chisi ome darusarane ome ore to ujetiga ore chijnóngaja eduguéjnai Félix.

²⁶ Enga urusarane quigode u udojo: "Eduguéjnai Cláudio Lísias u yu uje yurúsãre yurusarane ome ua, eduguéjna Félix. Eduguéjna cuchape ua enga yirasiguipise bei.

²⁷ Judíode ore chisa jnani tudé diríca enga a ore chujérase jne. Mu uje yudute ujnomei to uje rómagose enga yiji enga yijína yirógode soldácho aja ore enga yarángome ore.

²⁸ Mu yipota jeta yiraja uté bárique enga yiji údi aja judíode eduguéjnane aquíningai.

²⁹ Mu jĩrique yiraja uje cucha bisidécho bade. Uje bade jé u ore dayode jnani bajácho iroquéode ojningane cucha. Mu que tiógarapísa gotique ujetiga yujégo. Que tiógara to ujetiga pujuru gai.

³⁰ Mu yudute to uje judíode chimate dáyipiedie quigode ome Páblo uté ujetiga udore ore chujé. Jecute yirógaja ua enga e yingome guetesórone to ujetiga ore chatata detétigade ome Páblo ome ua ujetiga ajire cuchade udore aja quigode. E gusu yurusarane."

³¹ Soldádode ore doi deduguéjnai uté áyipiedie ga ore jno Páblo údi iji dejai. Enga ore chise guidai iji dejai uje i tu Antípatris.

³² Dire uñai enga soldádode uje ore diguiji jnumone ore chajni aja soldádode iguíjnai. Mu buricai jnungórone jé ore nóna Páblo aja Cesaréa.

³³ Uje ore di iji Cesaréa enga ore chisi ome eduguéjnai Cláudio urusarane ome eduguéjnai Félix, enga ore chisiapome Páblo ome to rĩ.

³⁴ Uje chejna urusarane guesi uje chajire enga Félix catecã́ri Páblo ome Páblo unínique. Enga Páblo chojninga: –Yuniri tu Cilícia.– Uje chudute uje cilíciagose enga chojninga:

³⁵ –A yangári bojñáringo ujetiga betesórone ore di jne.– Enga chiroque soldádode uñéngo ujetiga ore na Páblo aja Heródes iguíjna cuchábi ajei, enga ore chirote iji uté.