Héchos 22 - Dupade Uruode

¹ Páblo chojninga: –Yujode judío á, jé aja yayode uhuaque rĩ, angáchoi yuruode uje yĩrarare yibai.–

² Uje ore chudute uje Páblo doi ore uruode hebréo enga jé u uje ore cho paraque gaté. Jecute jno dacatecãraitigade údi ome ore enga chojninga:

³ –Judío yu, enga yibatigai u ore idai Társo uje déji Cilícia. Mu uje jnacare yu iji Jerusalén udé nanique enga yacadisṍri u Gamaliel. Enga uté acajnaquéode quigode jé upúsu Moisés iroquéode ojningane cucha uje yocayode jnani bajácho ore doi udore quigode to nanique. Enga jé yadode u uacadode iji de gajneri. Uje jecucha ga yajéode u ujetiga yiji Dupade iroquéode ome yúringai ayoré jnese.

⁴ Yumajo Jesús anguretasórone to nanique. Enga yajéode u ujetiga chuque ore to. Yiji jnanione, chequedíe ore údi aja ore jurúgaisórone iguíjnane to nanique ujetiga ore suru ore gáyode gu ore anguretarétigai ome Jesús.

⁵ Sacerdóteode eduguéjnai, jé aja judíode yocangaránone ore pañaji yadode jnese. Chamáñaje ore u gu uje ore chisi ome darusarane ome yu ica ujetiga yijna ome yocujode judío iji Damásco. Yigaidi u gu ujetiga yucuerási Jesús anguretasórone iji Damásco ujetiga yiji ore údi aja Jerusalén ujetiga pujuya ore iji udé.

Páblo chatata da-testimónio uje changureta Jesús ome ore

⁶ Mu uje yugúsiji dajei enga e yirõrirase Damásco uje guedé doi gatócoro enga yuningame eti dírecaringué cuchábi tṍraji gaté enga chijñate yibai.

⁷ Yicṍraja jnumi. Enga yudute darade uje chojningame yu: "Sáulo á, Sáulo á. ¿Jé gotique a uje bo bamajo yu?"

⁸ Yojninga: "¿Jé ua gosi te a?" Ga darade chojninga: "Nazarétgosi Jesús u yu. Enga bamajoi jé upúsu uyu."

⁹ Yijorane jnanío ore chimo dírecaringué cuchábi to enga chajuque ore agutedie. Mu que ore chudute yajnéone dara go.

¹⁰ Yichajnai darade udore enga yojninga: "Yangaráni á, ¿bapotigátique a ujetiga yipésu jne?" Enga yocangarádejnai Jesús chojningame yu: "Ayague. Bo ga acáji baqui ore idai Damásco enga a ore chingo bapesutique cucha aja ua jne iji uté."

¹¹ Mu dírecaringué cuchábi suru yajirigode. Jecute yijorane ore chisa yijmanai aja yoquiqui ore idáidatéi Damásco yui.

¹² Jnani déji Damásco to uje i tu Ananías enga dopísi Moisés iroquéode ojningane cucha to. Enga judíode iji Damásco ore irasique uté jnese.

¹³ Ananías uté tibágui yu. Uje di iji yu ga chojninga: "Sáulo á, yujo Jesús anguretasṍri á, a amópo bajiritígo to jne rĩ." Enga jĩrique yimo yajirigode rĩ.

¹⁴ Enga Ananías chojningápome yu rĩ: "Yocayode jnani bajácho angureni Dupa e imeserãque ua, enga ajéode u ujetiga araja áyipiedie quitígo. Enga ajéode upo rĩ ujetiga amópise utocaite paraguipísi Jesús enga adute uté uruode to iji pijnani.

¹⁵ Gaidi u gu ujetiga atata uté adode jne ome ayoréode ore iji erámone údode jnese, enga ango bamone cucha, jé aja badudigode cucha to rĩ ome ore.

¹⁶ Jecute be enga ayague ga yico enga yṍra ua aja yodi jne ome bautísmo. Acha banguretigai aja yocangarádejnai Jesús to enga jogadi u jne ujetiga churu basijnaringuéone aja jnumi."

Páblo chatatame ore uje Jesús chirógaja purása quedéjnane

¹⁷ Uje yajníja Jerusalén nanique ga yicáji Dupade iguíjna cuchábi ujetiga yicatecã́ri Dupade iji. Uje qué yicatecã́ri enga yimo yenominone.

¹⁸ Yimo yocangarádejnai Jesús iji yenominone enga chojningame yu: "Aguito ga boji Jerusalén. Chamáñaje a ca ore tangári bacajnaquéode ome yu iji de jne."

¹⁹ Mu yojningame Yocangarádejnai: "Mu ore chiraja yu jnese. Uje ore pañaji yadode uje yicáji judíode aquiningaméone guiguíjna jnese nanique ujetiga yi banguretasórone údi aja ore jurúgaisórone. Ore pañaji to uje yaquesu ore údode rĩ.

²⁰ Uje ore chujé baroi Estéban uje chatata badode to nanique enga yugúsi to. Yiyáguena ejoi enga yajire to, enga ueradome yu uje ore chujé. Yirote yungórone iguidedie to nanique uje ore chujé."

²¹ Mu yocangarádejnai Jesús chojningame yu: "Bo ga bo. Uje a yorei ua iji tiiii jne. Yigaidi u gu ujetiga acate purása quedéjnane ome yadode."–

Soldádode eduguéjnai chijna Páblo iji ayorébui gari

²² Ayorébui ore cho paráguiji Páblo uté acajnaquéode údi jé aja uruode udore uje chĩ́care uje Dupade chiroque uté aja purása quedéjnane. Enga e que ore tangárapoi Páblo acajnaquéode rĩ. Mu ore chinguírapo dabijnanone aja dejode rĩ enga ore chojninga: –¡Ajéyo jnani tuté! ¡Gajnareque adode gu!–

²³ Uje ore tibite gaté ga ore chãrai daguidedie iji gatéode enga ore chicosapója gaté rĩ.

²⁴ Jé u uje eduguéjnai chiroque darógode aja Páblo ujetiga ore nája soldádode iguíjnane ajei enga chojninga: –Aquesúyo údode ujetiga chatata dabárique cucha ome yoque uje ayoréode chinguíra dabijnanone aja.–

²⁵ Uje e ore chigaru Páblo ujetiga ore chaquesu údode, mu Páblo catecã́ri ore eduguéjnai uñai uje déji ejoi enga chojninga: –¿Ja uacajnéone u ujetiga aquesúyo rómagotique údode uje cáma arajáyo bárique?–

²⁶ Uje chudute udojo ga eduguéjnai uté jno ga chingome ore eduguéjna cuchábi. Enga chojninga: –Ajuse beo ome jnani uté gajneri. Uje rómagose.–

²⁷ Jecute eduguéjna cuchábi sose Páblo yui enga catecã́ri enga chojninga: –¿Jec ũré enga rómagose ua ya?– Enga Páblo chojninga: –Ejẽ́.–

²⁸ Jecute eduguéjnai uté chojningame: –Jiei yoredie nanique uje yiji yoré ujetiga rómagose yu to. Mu Páblo chojninga: –Rómagosípise yu arĩ́e, uje rómagose yayode gu.–

²⁹ Páblo igarisórone ore chudute udojo ga jĩrique ore sose quedéjnane ome. Enga ore eduguéjnai uté jé upo rĩ uje todo deduguéjnapísode yui, uje gajnareque adode gu uje chigaru Páblo uje rómagose.

Ore chijna Páblo aja judíode eduguéjnane

³⁰ Dire uñai enga eduguéjna cuchábi chiroque darógode aja sacerdóteode, jé aja judíode eduguéjnane uñane ore rĩ ujetiga ore chamáta ñane enga catecãripísi ore ome Páblo bárique cucha. Chejñu ojnaquérodie iji Páblo jmanegataidie enga jno údi aja judíode eduguéjnane aquiningamei enga chijnája ore iquei.