Héchos 21 - Dupade Uruode

Páblo e jnome Jerusalén yui

¹ Uje e yico iji yocujode Jesús anguretasóño ore gari ga yico ga yoquiquítequigája ore idai uje i tu Cos. Dire uñai ga yico ga yico ore idai uñai uje i tu Ródas. Yico iji Ródas ga yicagóji ore idai uje i tu Pátara.

² Yico cucoi iji Pátara uje qui tu ore idai Fenícia enga yacágoja uté ga yico.

³ Enga yimóngo yote quedéjnai ajã́ro uje i tu Chipre uje déji yocarasé. Yico ga jé yusájoja puniri uje i tu Síria. Yusájoja gu uje cucoi noñome dagúcharigo iji ore idai uje déji yote quedéjnai edógai uje i tu Tíro. Enga yibájoi ore to iji ore idai uté.

⁴ Yico Jesús anguretasórone uñane iji uté enga yácagoji ore gari ga yoquejnane dire gare iji ti iji ore gari. Dupade Ujopié Espíritu Sánto chingome ore uje cucha dacate gajnaréngone a chise Páblo jne iji Jerusalén. Jecute ore chingome Páblo ujetiga ca chicáji Jerusalén.

⁵ Mu uje yejnángo yoquimochádode udore iji ore gari ga yico. Enga Jesús anguretasórone jnese, jé aja ore acotedie, jé aja ore abode to rĩ, ore nóna yógaja guidai eruei. Uje yico yote quedéjnai atetai ga yichajo yoquigataidie aja jnumi ga yicatecãcoi Dupade iji ñane gari.

⁶ Udojo quigade ga yisago ñane pajéode aja ñane enga yacágoja cucoi. Enga jé u uje ore chajni aja daguíjnane.

⁷ Yacágoja cucoi iji Tíro aja guidai uje i tu Tolemáida, enga yiyágo yoquibi cuco iji uté. Yico yocujode Jesús anguretasóño iji Tolemáida enga yoquimochádi chojmára iji ore gari.

⁸ Dire uñai ga Páblo jé aja jorane uyoque yico enga yicagóji ore idai uje i tu Cesaréa. Enga yicagóji Felipe iguíjnai uje Jesús adode júsõre. Felipe uté jõra jnanione to uje gare ore iji ti uje ore chajuguína cucha pibosode ome Jesús anguretasórone iji Jerusalén nanique. Enga yiyágoji uté gari.

⁹ Felipe urodie gagájni, enga cáma ore doi jnacánique to go. Enga udire ore chiraja uje ore chatata dajnéone Dupade urúo to.

¹⁰ Uje e diyajmaque yoque iji uté enga Dupade uruode atatasṍri uñai di iji yoque uje i u Agábo enga garani u Judéa.

¹¹ Enga qué chidójnanga yoque to. Diga uté chisa Páblo igarubi ga chigaru darídogorodíe aja dajmanegataidie ore ome Páblo igarubi. Enga chojninga: –Dupade Ujopié Espíritu Sánto chingome yu que uje judíode a ore isocai u udojo ome igarubi udé gajnesónique iji Jerusalén dirome, enga a ore chigaru jne enga a ore tẽrame purása quedéjnane jne.–

¹² Uje yudúco udojo ga cesaréagosode ore uyoque yaquírango Páblo ujetiga ca chicáji Jerusalén.

¹³ Mu Páblo chojningame yoque: –¿Gotique uje uacabóyo? Cachi uacagoyedie chusũrurase yu to. E dimane yu arĩ́e ujetiga ore chigaru yu iji Jerusalén. E dimane yu to ujetiga ore chujé yu rĩ. Chamáñaje yibai u yocangarádejnai Jesús gu.–

¹⁴ Mu uje Páblo que tangári yoque enga que yaquírangopo rĩ. Mu yojnijo: –Jé be bangaráni Jesús áyipierigui ome ua.–

¹⁵ Udojo quigade enga yipéco yocugúchade ga yico ga yicagóji Jerusalén.

¹⁶ Jesús anguretasórone uñane iji Cesaréa ore nóna yoque to enga ore jno yocúdi aja jnani iguíjnai uje tṍraji Chipre nanique ujetiga yiyágoji uté gari. Jnani uté i tu Mnasón enga e diyajmángome Jesús uje changureta to.

Páblo chidójnanga Jacóbo ore

¹⁷ Uje yico Jerusalén ga yocujode Jesús anguretasóño ore nína yoque.

¹⁸ Dire uñai ga Páblo nóna yoque to uje yibájoi Jacóbo to iji iguíjnai. Enga yico Jesús anguretasórone angaránone anciánoi iji uté jnese.

¹⁹ Páblo chingo darasitigai ome ore uje déji ore gari, enga jé u uje jĩrique chatata Dupade ipesudode jnese uje angúromei u iji purása quedéjnane ujade.

²⁰ Uje ore chudute Páblo ojñane udore enga ore chacãre Dupade gai enga ore chojningame Páblo: –Ueracho bojñane mu bamo to uje jiépisi judíode uje ore changureta Jesús to. Enga udore ore chajo rágaja jnese ujetiga judíode uyoque jé yicoi Moisés iroquéode quigode to.

²¹ Enga ore guetei u uje ore chudute uje bacate judíode iji purása quedéjnane ujade ujetiga ore cha ore doi Moisés iroquéode ojningane cucha. Enga chiese aquĩ́rapo ore rĩ ujetiga ca ore chica dabode. Chiese cucha omi tu ome ua ujetiga judíode uyoque yiyágo yocayode jnani bajácho ore isocade to.

²² Ujetiga yocujode Jesús anguretasõre judíode ore chudute uje e bãri iji yoque enga a jĩrique ore chamáta rágaja yoque. ¿Jé yoco ringome udore jne ujetiga diga ore catecã́ri yógome cuchade udore?

^23-24 Cucha omi tu ujetiga yocujode Jesús anguretasõre judío udore ore chimo ua iji judíode yoquisocade uñeque gánique. Jogadi u jne ujetiga obiréjna ome ore uje babé Moisés urusarane ojningane cucha to, enga cachi ore urúo uje ore chaguhéta babai uje betaque judíode yoquisocade. Jecute be yocáyipiedie quigode enga ajína yoquijorane iji de uje gagájni ore ujetiga ore chicáji Dupade iguíjna cuchábi jne. Chamáñaje udore ore chajo daruode aja ome Dupade diríca enga e ore gaidode u ujetiga ore chimate daruode udore ome Dupade. Be enga amate oredie ome ore, uhuaque jnese ujetiga eso uacáringane icha ome Dupade. Enga ujetiga ejnáño udore guesi enga a ore chuju dacarane. Jogadi a u jne ujetiga ca potigayaquérique dépoji uñeque rĩ ome báringai Moisés urusarane angarásõre.

²⁵ Mu yocáyipiedie jé jogate ome purása quedéjnane ore. Chamáñaje yurúsãco yocáyipiedie udire ome ore diríca ujetiga ca ore doi judíode yoquisocade to. Mu gusu uje yãrájo ome ore ujetiga ore tagu ayoré gajnúone gajnéone cucha ãrío. Ujetiga ca ore tagu cucha iyojnanie rĩ. Ujetiga ca ore tagu cuchiso pimocherane. Jé u to ujetiga ca uñeque tungarája gapu quedéjnaraque, gusu dacotéraque. Enga ca uñáraque tungarája jnani quedéjnarique, gusu abai ome.–

Ore chijnime Páblo iji Dupade iguíjna cuchábi Témplo

²⁶ Jé u uje Páblo doi ore uruode enga dejéna jnani gagájnione udore aja daquigade. Dire uñai enga ore doi judíode isocai ome raque ujetiga ore úringai icha u ome Dupade. Quigade enga Páblo chacája Dupade iguíjna cuchábi ujetiga chingo diri aja ore ujetiga cho doré iji enga jé u ujetiga ore chimate pisocade udore jnese.

²⁷ Mu uje e ore chejnárase dire gare iji ti ujetiga ore tẽrája Dupade mu judíode uñane uje ore tṍraji Ásia ore chimo Páblo iji Dupade iguíjna cuchábi ajei enga ore pijnacarachi. Ore gaidi u ujetiga ore urasade chirate ore aja ore ájningai. Enga jé u uje ore chisa Páblo.

²⁸ Ore chejnapúsu daruode enga ore chojninga: –Israélgosode uaque é, átayo uágaja yoque to é. Jnani tudé u uje chacate ayoréode ore aja dajesúode erámio ome dacajnaqué gajnaréngone. Chamáñaje dojnóngaja yocurasade ore iji yocuniri. Dojnóngapója Moisés iroquéode to rĩ. Dojnóngapója Dupade iguíjna cuchábi udé rĩ. Que gusu udore mu e cho cucha bisidéguiji udé rĩ. Chamáñaje puyágome purása quedéjnane ujetiga ore chacája Dupade iguíjnai Témplo to mu Páblo udé chijna gréciagosode uñéngo aja de uje purása quedéjna ore múñi.–

²⁹ Ore urúo udojo gu uje ore chimo éfesogosi Trófimo iji Páblo gari iji guidáidatéi Jerusalén. Enga ore jose eti Páblo nóna uté aja Dupade iguíjna cuchábi ajei.

³⁰ Ayoréode iji ore idáidatéi údode ore chirate ore aja ore ájningai. Enga ore chayóji Páblo ore yui. Ore chisa Páblo enga jĩrique ore jno údi aja guesi iji Dupade iguíjna cuchábi. Enga jĩrique ore suru Dupade iguíjna cuchábi piagode gáyode.

³¹ E ore chujérase Páblo mu soldádode ore eduguéjna cuchábi chudute ujnomei to uje ájningarãque Jerusalén gosode ore jnese.

³² Jecute soldádode ore eduguéjnai uté chamáta soldádode, jé aja ore eduguéjnane uñane rĩ enga ore chayóji ayorébui yui. Uje ayorébui chimo ore ga quene u uje ore cha chujé Páblo údode.

³³ Enga soldádode eduguéjna cuchábi sose Páblo yui, chisa enga chiroque soldádode uñane aja ujetiga ore chigaru ome ojnaquéro gáredie. Udojo quigade ga catecã́ri ore enga chojninga: –¿Jé jnani uté gosi a? ¿Ja pésu cucha gajnarétique a?–

³⁴ Mu ayorébui chinguíra dabijnanone aja dejode uje ore chatata Páblo bade. Mu ore ojñane que cho ñane gotique. Jecute soldádode eduguéjna cuchábi que chiraja ore ojningárique cucha ome ore ichorájnai. Enga jé u uje chiroque darógode aja ujetiga ore chorei Páblo iji soldádode iguíjnai.

³⁵ Uje e ore chise ore uchiejnáquepíode iji soldádode iguíjnane yui enga soldádode ore chijnoque Páblo. Ore chijnoque gu uje ájningaránguipíse ayorébui.

³⁶ Chamáñaje ore chajna ore gu enga ore chinguíra dabijnanone aja enga ore chojninga: –Ajéyo.–

Páblo narare dabai iji ayorébui iquei

³⁷ Uje e ore nárasa Páblo aja soldádode iguíjnane ajei enga Páblo chojningame eduguéjnane uñai: –Yajéode u ujetiga qué yicatecã́ri ua.– Enga chajuque soldádode eduguéjnai aguté uje Páblo doi gréciagosode ore uruode to. Jecute chojningame Páblo: –¿Ga araja gréciagosode uruode to a?

³⁸ ¿Ja ca egíptogosi tu ua ya? uje uté chijna ayoréode nanique aja erãpetarei uje 4.000 ore. Uje jõcaratáguebeque ore jnese enga ore pota pocaningane ome eduguéjnane.–

³⁹ Mu Páblo chojninga: –Úngare. Judío u yu. Yibatigai u Társo nanique ga yuniri u Cilícia. Yidai Társo obiréjnapise iji Cilícia. Mu be ga ajuégabá darai tome yu ga yicatecãrami ayoréode.–

⁴⁰ Uje eduguéjnai juéga darai tome Páblo enga Páblo chague iji ore uchiejnáquepíode gai. Chãrai dajmanai iji detesórone ujetiga ore cho parac. Uje e ore cho paraque enga narare iji ore uruode hebréo.