Héchos 20 - Dupade Uruode

Páblo e jnome Macedónia, Grécia ore yui

¹ Uje ayorébui e cha dajei dotáningane udore enga Páblo tibidi dojode Jesús anguretasóño enga cho ore quique. Uje chejna udore guesi enga chingo dacoringai aja ore enga jé u uje jno enga chicáji Macedónia.

² Enga chidójninga Jesús anguretasórone iji ore idáyode jnese aja dajesúode enga cho ore quique ujetiga ore chidota re iji danguretarétigade. Udojo quigade ga chise ore uniri Grécia.

³ Guedosíode gadiógome Páblo iji Grécia. Uje e jnorásome cucoi ujetiga chicáji Síria mu chudute to uje judíode ore jmongarája. Jecute chécãre dajéode enga diguiji jnumi aja Macedónia yui.

⁴ Jnanione uñane nóna enga beréagosi u uñai enga i tu Sópater. Jeque uñane ore íode u Aristárco, Segúndo ore enga ore idai u Tesalónica. Uñai i tu Gáyo, enga idai u Derbe. Enga Timotéo déji ore gari to, jé aja Tíquico, Trófimo ore uje ore uniri u Ásia.

⁵ Yoquijorane udore, bajaque ore ome yoque enga ore chirote yóguiji ore idai uje i tu Tróas.

⁶ Páblo uyoque yejnángo dirode guesi uje judíode ore tagu arureque uneróngone iji. Mu quigade enga yico to iji Filípos. Enga yacágoja cucoi enga yoquejnane dire chejna yijmanai iji cucoi ajei uje yico ore iji Tróas. Enga yoquimochádode gare iji ti iji Tróas.

Páblo adode u udojo iji Tróas

⁷ Uje domíngo enga Jesús anguretasórone yamátago ñane ujetiga yujnusinángo yocangarádejnai Jesús itoringai. Enga Páblo chacate yoc enga chuságaja dejai gatócoro. Iyajmángome dacajnaquéode gu uje a jno dirome.

⁸ Yocuague déji guiguíjnai ajei gateminóri enga jiei ore apósode iji.

⁹ Jnacarabi désiji yocuague uaté to uje i tu Eutíco enga chácarosi piago catadé. Uje Páblo acajnaquéode umáño enga moi chujési jnacarabi. Enga mósi. Mu basosíji guiguíjnai ajei gateminore gadioi uté. Jĩrique ore doi jnumi enga ore chiringarósi mu íjnoque ujñari enga tosipísi.

¹⁰ Mu Páblo doi jnumi to ga chungare riji jnacarabi gai enga chisa aja re. Enga chojningame dojode Jesús anguretasóño: –Ca oyo uacáyugu, e ecásiapo rĩ.–

¹¹ Mu Páblo chorápo guiguíjna ajei gateminóri rĩ enga jé u uje yajo Jesús gai gajnui arureque uje yujnusinángo itoringai. Páblo chacate ore gaté enga chuságaja diri. Enga jé u uje jno.

¹² Uje ore jno jnacarabi údi ga ore irasiguipise re uje ecásiapo rĩ.

Páblo jnoji Tróas enga chicáji Miléto

¹³ Yico bajaque ga yacágoja cucoi. Enga yicagóji Asón. Enga yiroco Páblo yui iji uté. Chamáñaje Páblo pota diguiji jnumi aja yoquiquigade gu.

¹⁴ Uje Páblo yico ñane iji Asón enga jé u uje nóna uyóguiji yoquibi cuco to. Enga yicagóji ore idai Mitilene.

¹⁵ Yicoji uté ga dire uñai ga yimóngo yote quedéjnai ajã́ro uje i tu Quío. Yoquejnai dire chojmarai iji dajei uje yicoji uté enga yico ore idai iji yote quedéjnai edógai uje i tu Sámos. Yicoji Sámos uté ga yimóngoji guidai uje i tu Trogílio. Enga dire uñai ga yico guidai uje i tu Miléto.

¹⁶ Yiyógo Éfeso gai gu uje Páblo que pota jeta iyajmánguiji Ásia. Ajéode u gu ujetiga jĩrique chise Jerusalén ome judíode ore jnusinamáni dire uje i tu Pentecostés.

Páblo cho Jesús anguretasórone angaránone anciáno ore quique uje ore tṍraji Éfeso

¹⁷ Mu uje yugúcoji Miléto enga Páblo tibidi Jesús anguretasórone angaránone anciáno iji Éfeso ujetiga ore tibágabíji uté.

¹⁸ Uje ore di ga Páblo catecã́ri ore enga chojninga: –Uacapáñañoji yadode iji uacaniri Ásia jnese. Jec iji taningápisi uje quene yĩríji uaque.

¹⁹ Uacarajáyo to uje paraque yu ica uje yiji Yangarádejnai Jesús iroquéode iji uacajade. Uacarajáyo to yáyuguhebátigadatéode ica ome judíode ore isoca gajnaréngone ome yu.

²⁰ Mu que yiya yacate uaque go. Yigaidi u gu ujetiga yátapísa cuchade aja uaque. Jecute yacate uaque iji uacáguedie enga yacadápo uáguiji uacaguíjnane rĩ.

²¹ Jecucha yingome judíode, purása quedéjnane ore jnese ujetiga ore chécãre dáyipie quigode, dadode ore ome Dupade enga ore changureta Yocangarádejnai Jesucrísto to.

²² A e yiji jne enga a yicáji Jerusalén. Chamáñaje Dupade Ujopié Espíritu Sánto iroque yu aja gu. Mu que yiraja ayoréode áyipierigui ome yu iji uté.

²³ Mu gusu yirajade u Dupade Ujopié Espíritu Sánto uruode atatasórone ojningane ome yu. Uje udore ore chingome yu iji ore idáyode jnese uje a ore suru yibai jne enga yúringai ducañerájma déji yiquei.

²⁴ Mu que yo yáyugu yu ome yajnéone cucha dacate gajnarécho udore gotique. Ujetiga ore chujé yu mu que cucha to ome yu. Uje yigaidi u gu ujetiga yejna yu aja Yangarádejnai Jesús iroquéode enga yimate udore aja guesi jnese. Uje chiroque yu aja erámi nanique gu ujetiga yatatame ore jnese pujnomé ueradi uté uje Dupade chijnorapise ore enga pota chiqueta ore to.

²⁵ Yirajapise ujetiga yiji jne mu yacadigode uaque a ca amóñopo yu to jne rĩ. Yojningane u uaque jnese uje yingome quigode ome uaque ica ujetiga eso uacáringane Dupade urása to ujetiga uacasuté u Dupade jne.

²⁶ Jecute yingome uaque gajneri uje que toc ujetiga uacuñeque chaguhéta dáringárique bijnaque yibai jne ome Dupade.

²⁷ Chamáñaje e yingo Dupade ojningane cucha jnese aja uaque gu enga que yipógu ojningárique cucha.

²⁸ Jecute yingome uaque ujetiga ajuso uaqueo, enga ajuso uacojode Jesús anguretasóño guio to rĩ. Uacamóño uje Dupade Ujopié Espíritu Sánto utocaidode u uaque gu ujetiga arocho Yocangarádejnai Jesús anguretasórone guio uje gaite oré ore. Enga oré tu úringai chuque uje chojne dayoi ome ore nanique.

²⁹ Yiraja ujetiga yiji iji uacari enga a jĩrique ayoré aringácachoquírigo chacája uaque jne. Enga a ore gajnúone u cuchiso sijnángone uje ore gaidi u ujetiga ore chujé áyasadie. Enga a ca udore ore susípise Jesús anguretasórone uaqueo gotique jne.

³⁰ Que gusu udore mu a yicatecãraisórone uáguiji de, a uacuñéngo u to ujetiga acacho ore ome pacajnaqué tágode to. Uje a uacagaidi u to jne ujetiga ore cha cháta raja Jesús anguretasórone enga ore nóna uágaja quedéjnane.

³¹ Jecute ajusópise uaqueo enga ajnusináño yacajnaquéode quigode jnese uje yacate uágome enga sequeredie gadioque nanique. Jecucha yejnáreque yajnéone cucha dacate gajnarécho marínga que yiya yacate uaque jnese iji dirode, dejade ore jnese.

³² Yujode Jesús anguretasóño uaque á, a e yingo uágaja Dupade jne ujetiga chingopísa daruode quigode ome uaque uje chatata dajnoraquédatéode ome yoque. Yigaidi u gu ujetiga uacarajatigade ome udore pésu uaque enga etoguipise uágome Dupade adode. Yigaidi upo rĩ ujetiga uacarajatigade udore pésu uaque to enga eso Dupade gueranone cucha omío to uje chisi ome danoningañane ore jnese.

³³ Jé uacamóño uje que yipota plátaraque jeta uñeque chisi yu iji nanique iji uacari. Que yipota piguidé quedéjnaraque rĩ.

³⁴ Mu uacarajáyopise uje yijmainie isagode imanique yibosode, yiguidedie ore nanique. Enga jé chuságaja yijorane ore to uje yijmainie isagode imanique cuchade ome ore to uje cuchade qué chona ore.

³⁵ Jecucha yacate uaque to ujetiga asayo uaquejórigo ujetiga átayoja uacajõráringo to ujetiga qué cuchárigo chona ore. Yujnusinápo yocangarádejnai Jesús uruode ome uaque to rĩ uje chojninga: "Peranone gajnesórone ore irasique raque mu cuchiyi tupúsu guẽrasórone ore irasitigade ome raque."–

³⁶ Uje chejna daruode udore guesi enga jé u uje Páblo chichaga dagataidie aja jnumi iji dojode Jesús anguretasórone ajei enga catecã́ri Dupade ome ore.

³⁷ Enga jorane udore ore po jnese enga ore chisa Páblo pajei aja re, enga ore tagu uredie.

³⁸ Enga ore jnusipísi Páblo. Chamáñaje Páblo chojningame ore: –A ca amóñopo yu to jne rĩ iji erámi udé.– Enga ore nóna Páblo aja cucoi jnese.