Héchos 19 - Dupade Uruode

Páblo chise Éfeso to rĩ

¹ Uje Apólos qué déji Corínto enga Páblo chicáji guidáyode aja Éfeso yui uje ore déji cucaranone edodie. Uje díji Éfeso ga chise pacadigode uñane iji.

² Páblo catecã́ri ore enga chojninga: –¿Ga Dupade Ujopié Espíritu Sánto base uacabai to a uje uacanguretáyo?– Mu ore chojninga: –Úngare. Que yudúco Espíritu Sánto gotique ujnomérique to.–

³ Jecute Páblo jno dacatecãraitigade údi ome ore enga chojninga: –Uje ore tṍra uágaja yodi ica enga ¿uacanguretígo cucha cho rique a?– Enga ore chojninga: –Yanguretágo Juan casicaite acajnaquéode ica uje ore tṍra yógaja yodi ome bautísmo.–

⁴ Jecute Páblo chojninga: –Juan tṍra ore aja yodi nanique uje ore chécãre dáyipie quigode, dadode ore ome Dupade. Mu chacadápo ore rĩ ome Dupade utocaidi uñeque uje a di jne iji Juan quigade ujetiga ore changureta uté jne. Enga ojningai u Jesús, judíode ore ijnati Crísto.–

⁵ Uje ore chudute Páblo acajnaquéode udore enga ore changureta Jesús to. Enga jé u uje ore tṍra ore aja yodi gu ore anguretigai iji yocangarádejnai Jesús.

⁶ Enga Páblo chicha dajmainie aja ore ójodie enga jĩrique Dupade Ujopié Espíritu Sánto base ore gai. Enga ore chiraja dara quedéjnane enga ore chacate darasade ome dajnéone Dupade urúo to.

⁷ Gare jnanione iji yirídai uje ore changureta Jesús iji deréjnai uté.

⁸ Páblo guejnane guedosío gadioque iji uté enga chacate ore iji judíode aquiningamei guiguíjna gatuaque. Enga que chagutu rome dacajnaquéode gotique. Chingopísa quigode ome ore ujetiga ore chise dáringáringo Dupade urása to.

⁹ Mu angoronéparíque uñane enga que ore changureta Jesús to go ome Páblo acajnaquéode. Enga ore chujñieta Jesús adode iji dojode judío ujade. Jecute Páblo jnoji ore ajei enga chiroque Jesús anguretasórone aja daquigade enga ore chicáji escúela iji sinagóga uje ore acadisṍri i tu Tiránno. Enga Páblo chacate ore ome Dupade uruode iji uté iji dirode jnese.

¹⁰ Sequeredie gare uje Páblo jé ate uje chacate ore. Jecute Ásia unirisórone jnese, judíode jé aja purása quedéjnane rĩ, ore chudute yocangarádejnai Jesús ujnomei.

¹¹ Enga Dupade pésu dapesútedatéode iji ore ujade nanique uje angúromei u Páblo.

¹² Enga ayoréode ore chijna borapetígo, piguidérigui ore aja Páblo ujetiga chisa enga jé u uje ejnaretade chisa enga ore eca ome. Jé basa Satanás utocaidode píode ore chisa udore to enga jĩrique Satanás utocaidode doi guesi iji ore.

¹³ Diga judíode uñane uje disorángueméque ore, ore ijnimique Satanás utocaidode iji píode to. Enga ore pota ore chiradírase Páblo aja adode to. Jecute ore chĩ́care Jesús i to uje ore chijnime Satanás utocaidode iji píode. Diga ore chojningame Satanás utocaidode uñai: –Yirójo ua aja guesi ome pangarádejnai Jesús ujopié uje Páblo chacate yógome.

¹⁴ Jnacare gare iji tíode udore uje ore ipesute udore ore dai i u Escéva. Enga sacerdóteode eduguéjnane uñai u.

¹⁵ Mu uje jnacarode udore catecã́ri Satanás utocaidi tiji pi ajei mu Satanás utocaidi uté chojninga: –Yiraja Jesús. Yirajápo Páblo rĩ. ¿Mu jé uaque gosode?–

¹⁶ Enga jé u uje Satanás utocaidi pi uté cugujnáji ore enga chijna detotiguei aja ore. Enga sué ore gai. Ájningaránguipíse ome ore enga chujé ore údode. Jecute jnacarode udore ore chayopísome enga jĩrique ore doi guesi iji guiguíjnai. Mu choquíbi ore aja dagajñunie enga ajnangoque ore rĩ.

¹⁷ Éfesogosode jnese ore chudute udojo ujnomei to, judíode jé aja purása quedéjnane ore to rĩ. Enga ore todópisa enga ore tujua yocangarádejnai Jesús i aja quedéjnane uje cuchadaté Jesús uté ujopié.

¹⁸ Jiei Jesús anguretasórone to iji ore ujade uje ore pógu date gajnareque bajade, mu e ore chatatame ore.

¹⁹ Jé basa Jesús anguretasórone uñane ore chijna Satanás ujopié ome dapesudode uje cáma ore changureta Jesús. Mu ore yugode darujna ao qué déji ore uje chatata pujopié gajnarénguenie udire isocade. Jecute ore doi degode darujna ao udore enga ore chipotame iji ayorébui ajei. Enga jiei darujna aode udore oredie marínga jé ore chipotame. Uje udore oredie chise 50.000 iji pláta guebéode.

²⁰ Cuchade udore ujnoméone chubu erámi enga que ore chopo cucha bisidéguiji Dupade uruode. Enga uásejna ore uje ore changureta yocangarádejnai Jesús ome ore atatagode Dupade urúo.

²¹ Udojo quigade enga Páblo pésu dajéode ujetiga qué tibágui Jesús anguretasórone iji ore unirone Macedónia, Acáya ore. Enga chojninga: –A yicáji Jerusalén to jne enga ujetiga yejna Jerusalén guesi enga Dupade ajéode u ujetiga yicapóji Róma rĩ.–

²² Mu Páblo que jno míraque. Mu chutṍri dajõra gáreode aja Macedónia bajaque. Enga utocaidode udore u Timotéo, Erásto ore. Mu Páblo qué chácariji Ásia unirisórone ore gari.

Demétrio ijnimique pocaningai ome Páblo ore

²³ Ayoréode uñane ore chetaguipise Jesús adode iji Éfeso iji dirode udojo.

²⁴ Chamáñaje jnani déji Éfeso uje i u Demétrio enga uté ijnimique pájningai ome Páblo ore. Jnani uté, jorane jnanío ore pésu dangarané Diána iguíjna cuchábi oredie. Enga pláta ore ipesudode udore jecute jiei oredie uje ore tẽrame ayoréode.

²⁵ Enga Demétrio uté doi enga chamáta darógode, jé aja dojode ayoré gajnúone ipesungóño enga chojningame ore: –Uacamóño uje yoquiplátadie garani u yoquipesudode ayoré gajnúo. Enga yiquecágo gu udore oredie enga que cuchárique chona yoque gu uje jecucha ayoréode doi oredie ome yoquipesudode.

²⁶ Ise ga e uacamóño jnani to uje i tu Páblo, jeoga e uacadúcho uté ujnomei. Uje uté chacate ayoréode aja dajesúode uje cucha bisidécho ayoré gajnúone uje pipesute ome jnanione. Enga chiese ca cuchárique tṍraji panguretigai ome udore uje yicatecãcoi ore. Uásejnapise ore uje ore changureta uté acajnaquéode. Que gusu iji yoquidai Éfeso udé mu jé u to iji yocuniri Ásia údode.

²⁷ Yo yáyugu ujetiga diga ayoréode ore cha ore doi oredie ome yoquipesudode gu uté acajnaquéode. Mu que gusu udore go mu yopo yáyugu rĩ ujetiga yocangarané cuchabé Diána iguíjnai ujnomei ca cusapo rĩ. Uacamóño uje yicotágo yocangarané uaté iji yocuniri Ásia. Jé cho ayoréode uñane iji erámi údode to rĩ. Picota opejã uaté to ome ore jnese. Enga gajnarenguipise ujetiga ayoréode ore tangári Páblo uté enga ore cha changureta Diána úringa cuchadaté.–

²⁸ Uje ore chudute udojo enga ájningaránguipíse ore. Jecute ore chinguíra dabijnanone aja dejode enga ore chojninga: –¡Pujnuéngaitó éfesogosode yocangarané dupa Diána!–

²⁹ Enga guidai idaisórone ore chirate ore aja ore ájningai. Jecute ore chisa macedóniagosode Gáyo, Aristárco ore. Páblo jorane u jnani gáreode udore aja dajesúode erámio. Mu e ore chisa ore enga ore jno ore údi aja guiguíjnai uje jecucha guidai idaisórone ore taquiríji.

³⁰ Páblo pota jeta chacája ore gari to ujetiga catecã́ri ayoréode. Mu ujode Jesús anguretasóño ore charángome.

³¹ Jé cho Ásia unirisórone ore asutedie uñanie uje ore jõrapise Páblo. Ore chiroque daruode aja Páblo to ujetiga ca chacája ayorébui ore uague.

³² Mu ayorébui chinguíra dabijnanone aja dejode iji ore uague uaté enga ore pijnane chacája ñane. Enga jiei ayoréode uñane uje que ore chiraja uague uaté gajnesónique cucha gotique.

³³ Mu judíode uñane uje ore déji ore uague uaté to ore chutṍri Alejándro ujetiga catecã́ri ayorébui. Enga ore chucuase aja ayorébui uague ajei yui. Jé u uje Alejándro chãrai dajmanai tiji ore ujetiga ore cho paraque. Ajéode u gu ujetiga cho quique cuchade.

³⁴ Mu uje ayorébui chimo uje judío Alejándro enga ore tibite gaté. Enga diyajmanguipise ore ome dabijnacaraidie enga ore chojninga: –¡Pujnuéngaitó éfesogosode yocangarané dupa Diána!–

³⁵ Udojo quigade ga guidai idaisórone adode urusãrasṍri chaquĩ́ra ore ome ore pijnacaraidie ujetiga ore cho parac enga chojninga: –Éfesogosode uaque á, ore chiraja iji erámi údode jnese uje éfesogosode yocajnei tu ujetiga yujuco yocangarané dupa Diána iguíjnai guio. Chamáñaje uaté oré ayoré gajnu base yoquibai nanique iji gaté. Jecute yujucópise uaté guio to.

³⁶ Uacamóño uje que potigayaque uyógome udore. Jecute ayáyo uacájningai enga ca apéso cuchárique ujetiga cáma ajichopise cucha dacadode aja quigode.

³⁷ Uacamóño uje jnanione udore uje uacabeyoi ore údi aja de que ore toria cucháriguiji yocangarané dupa Diána iguíjnai gotique, enga que ore urúrigo gajnaréngapo aja rĩ.

³⁸ Ujetiga Demétrio, ujode ayoré gajnúone ipesungóño ore chetaque uñeque atígo, yocasutedie cuse gu cucha dacadode udore. Omi tu ujetiga ore chijna uté gosi aja dacasutedie gari enga ore chingo detétigade aja ore. Diga ore etei uté narare dabai to.

³⁹ Que yimo ujetiga apótayo acatecãchoi ñane gaté ome cuchárique mu omi tu ujetiga beyoi yocasutedie áyipiedie ome udore ujetiga diga amátayopo ñane rĩ.

⁴⁰ Yocajnúone u ayoré sijnángone uje ore tagu deduguéjnane uruode aja. Chamáñaje yoquichorájna que enga yoquibijnane chacája ñane iji udé. Enga a ca yirajagórase yocuru quitígome yocadode udore ujetiga uñeque catecãrirási yógome.

⁴¹ Uje guidai idaisórone adode urusãrasṍri uté chejna daruode udore guesi enga jé u uje ore cha dague enga ore chajni aja daguíjnane.