Héchos 18 - Dupade Uruode

Páblo chise Corínto

¹ Udojo quigade ga Páblo jnoji Aténas enga chicáji ore idai uñai uje i tu Corínto.

² Páblo chise judíode uñai iji uté uje i tu Aquíla. Uté unirípisi u Pónto nanique enga acoté i tu Priscíla. Ore déji Itália mu ore jnoji uté enga quene ore díji Corínto. Ore jnoji Itália gu uje eduguéjna cuchábi Cláudio chijócãre judíode jnese iji ore idáidatéi Róma gu. Diga Páblo chicáji Aquíla, Priscíla ore iguíjnai.

³ Páblo isagode jé u ore isagode to. Jecute chácariji ore gari enga cháta ore isagode aja ore to uje ore pésu guiguíjnane cucha ao.

⁴ Mu jecucha ga Páblo chicáji judíode aquiningamei guiguíjna iji dire puyade uje i tu sinagóga. Enga catecã́ri judíode, purása quedéjnane iji sinagóga uté ome Jesús adode. Ajéode u gu ujetiga chingopísa Dupade uruode quigode ome ore ujetiga ore changureta Jesús to.

⁵ Mu Sílas, Timotéo ore jnoji Macedónia enga ore di to iji Corínto. Enga jé u uje Páblo cha cháta Aquíla, Priscíla ore isagode aja ore enga chedu datatagode Jesús acho ome judíode. Enga chopise Dupade uruode quigode quique ome ore uje Jesús jé upúsu judíode ore ijnati Crísto uje ore chirote yui.

⁶ Mu judíode ore chetaque Páblo. Enga ore uruode gajnarécho ome. Jecute Páblo chijninguese daguidedie aja jnumi. Imoi tu gu uje a jnoji ore gari jne. Enga chojninga: –Ujetiga diga eso uacáringárique toque mu a ca u gu uje que yingome uacaquetangóri aja uaque. Mu a uacangoninguite paritigade u gu ome yatatagode. A yiji jne jé iji de gajneri enga a yiji Dupade uruode údi aja purása quedéjnane jne.–

⁷ Chejna daruode udore guesi enga jnoji judíode ore aquiningamei guiguíjna uje i tu sinagóga ga chicáji jnani iguíjnai uje i tu Jústo. Jnani uté angarate Dupade to enga iguíjnai déji judíode aquiningamei guiguíjna ejoi.

⁸ Mu judíode aquiningamei guiguíjna piésorone angaráni Críspo changureta yocangarádejnai Jesús to, jé aja iguíjnai jogosórone ore jnese rĩ. Jiépoi Corínto idaisórone to rĩ uje ore chudute Dupade uruode iji Páblo pijnani enga ore changureta Jesús to. Enga ore tṍra ore aja yodi ome bautísmo jnese.

⁹ Dejaque uñai enga yocangarádejnai Jesús catecã́ri Páblo iji enominone enga chojninga: –Jé ca atodo. Jé acate ore enga ca aya.

¹⁰ Chamáñaje yugúsiji bari enga a ca pijocayaque ua jne ome ayorérique. Yimo uje qué jiei ore uje a ore changureta yu jne iji de guidai.–

¹¹ Sequeré chojmara enga guedosíode chojmarápo iji ti rĩ uje Páblo cháji Corínto. Enga jecucha ga chacate ore iji uté ome Dupade uruode.

¹² Mu udojo quigade uje Galión u gobernador iji ore achamini Acáya uté enga judíode ore chamáta ñane ujetiga ore chisa Páblo. Enga ore jno údi aja ore eduguéjna cuchábi Galión uté ujetiga ore chatata detétigade ome Páblo ome uté.

¹³ Enga ore chojningame eduguéjnai: –Jnani udé chacate ayoréode aja dajesúode ujetiga ore tangári Dupade, mu ujetiga ore cha yoqueduguéjnane iroquéode.–

¹⁴ Páblo e nararírase dabai mu Galión narare bajaque enga chojningame judíode ore: –Ujetiga gajnarenguipise uté adode enga a jĩrique yangárirási uaque.

¹⁵ Mu uaquetégode ome uté cucha bisidécho ome yu. Chamáñaje judíode uhuaque jecucha ga uacabotácho ñane ome puruode quitígo, jeoga jnani bajade ore írigo, jeoga Moisés urusarane quitígo. Cucha bisidécho cuchade udore jnese ome yu. Jecute apéso uáguiji te uje a ca yangári uaque to.–

¹⁶ Enga Galión chijnime ore iji daguíjnai uté uje chajire ore adode aja quigode iji.

¹⁷ Enga gréciagosode jnese iji ore ujade ore chisa judíode aquiningamei guiguíjna piésorone eduguéjnai uje i tu Sóstenes. Enga ore chaquesu údode iji eduguéjnai iquei. Mu cucha bisidégome gobernador Galión uté.

Páblo chajniápo aja Antioquía rĩ mu jnopome Dupade iroquéode rĩ

¹⁸ Páblo qué iyajmánguiji Corínto mu udojo quigade enga chingo raja dojode Jesús anguretasóño uje pota doi. Jno ga nóna Priscíla, Aquíla ore. Enga ore chicáji guidai uje i tu Cencréa uje déji yote quedéjnai edógai. Uje qué ore déji Cencréa uté enga Páblo chuju datui. Imoi tu gu uje e chimate dáyipiedie quigode ome Dupade. Enga jé u uje ore chacája cucórique enga ore jnome Síria.

¹⁹ Uje ore díji Éfeso ga Páblo jnoji Aquíla, Priscíla ore gari enga chicáji judíode ore aquiningamei guiguíjna uje i tu sinagóga. Enga catecã́ri judíode uje ore taquiríji uté.

²⁰ Ore chaquĩ́ra Páblo ujetiga chácarabíji ore gari, mu Páblo chetaque.

²¹ Enga chojningame ore: –Que yácarabíji uacari gu uje yipota jeta yugúsi Jerusalén uje e idógosi jeta judíode chamáta ñane iji uté ome yocujnusinamáni dire. Mu yajniápo uacabai jne rĩ ujetiga Dupade pota.– Enga jé u uje chacája cucoi ga jnoji Éfeso.

²² Uje Páblo díji Cesaréa ga chicáji Jerusalén ujetiga chidójninga Jesús anguretasórone iji uté. Enga jĩrique jnopóji rĩ enga chicáji Antioquía.

²³ Uje diyajmaque Páblo iji Antioquía ga jnopóji rĩ. Enga chicáji guidáyode uñane iji ore unirone Galácia, Frígia ore. Enga cho Jesús anguretasórone quique iji udore, udore ujetiga ore chejna rángaja Jesús adode.

Apólos chacate Éfeso idaisórone to

²⁴ Judíode uñai díji Éfeso iji dirode udore uje i tu Apólos. Uté idaipísi u ore idai Alejandría. Enga uneréjna uté acajnaquéode enga chirajapise Dupade uruode quigode.

²⁵ E pacadique Apólos ome Jesús adode uñane enga irasique re uje chacate ore ome darajatigade udore. Enga obiréjnapise acajnaquéode quigode ome ore. Mu gusu irajade u Juan acajnaquéode uje tṍra ore aja yodi.

²⁶ Uje Apólos chacate ore iji judíode aquiningamei guiguíjna enga que chagu tu rome uje chacate ore. Mu uje Priscíla, Aquíla ore chudute acajnaquéode enga ore doi ga ore jno údi aja quedéjnarique ujetiga ore catecã́ri uje gusu ore iji gari. Enga ore chacadome Dupade adode uñane uje cáma Apólos chiraja to.

²⁷ Uje Apólos chingo raja dojode Jesús anguretasóño iji Éfeso uje pota jeta chicáji Acáya, enga ore chimesẽre áyipiedie. Enga jé u uje ore churúsãre darusarane ome Jesús anguretasórone iji Acáya ujetiga ca ore chuseque Apólos ujetiga díji ore idai. Uje Apólos e di enga chatapísaja Jesús anguretasórone uje ore chise dáringane Jesús anguretasóño gu Dupade icaniratiguéode.

²⁸ Enga Apólos chajnai judíode ibotaquéode ome re iji ayorébui iquei. Enga angúromei u Dupade uruode uje chajnai ore. Jecute que judíode udore chiraja daru quitígo ome. Enga obiréjnapise ome Apólos acajnaquéode udore uje Jesús jé upúsu judíode ore ijnati Crísto uje judíode ore chirote yui.