Héchos 17 - Dupade Uruode

Uñane iji ore idai Tesalónica chijnime pocaningai ome Páblo ore

¹ Páblo, Sílas ore jno ga ore chó ore idáyode gai uje ore íode u Anfípolis, Apolónia ore. Enga ore chisápo ore idai rĩ uje i tu Tesalónica. Enga judíode aquiningamei guiguíjna sinagóga déji uté.

² Páblo doi dadébei uje ijója judíode aquiningaméone iji dire puyade. Enga chacate judíode iji ore aquiningamei uté iji dire puyaque gadiógode.

³ Enga acajnaquéode quigode u Dupade uruode quigode uje judíode ijnati Crísto a di jne. Enga chejnáreque re iji erámi udojo. Mu udojo quigade enga toi, mu e ecápo rĩ iji datoringai quigade. Enga Páblo chojninga: –Dupade ojningai Crísto uté jé u Jesús uje yingome adode ome uaque.–

⁴ Enga judíode uñane ore changureta enga ore cháta rágaja Páblo, Sílas ore. Jiei gréciagosode rĩ uje ore changureta Dupade enga ore changuretápo Jesús rĩ. Jiépoi chequé atedie rĩ uje ore changureta Jesús to ome Páblo acajnaquéode udore.

⁵ Mu judíode uñane ore charatáyime darasade ome Páblo, Sílas ore. Jecute ore chamáta jnani ducutade aja re uje jecucha ore chácariji guidai bisideque. Enga udore ore chijnime pocaningai ome Páblo, Sílas ore. Jecute ájningarãque guidai idaisórone jnese ome Páblo, Sílas ore to. Jé u uje ore cugujnáji Jasón iguíjnai uje ore chucué Páblo, Sílas ore iji. Ore gaidi u gu ujetiga ore chijna Páblo, Sílas ore aja guesi enga ore chisíome ore ome ayorébui.

⁶ Mu uje que ore chise Páblo, Sílas ore iji Jasón iguíjnai enga ore chisa Jasón, jorane Jesús anguretasóño ore, enga ore jno ore údi aja guidai uté eduguéjnapísode. Enga ore chinguíra dabijnanone aja ore enga ore chojninga: –A e uacadúcho Páblo, Sílas ore ujnoméone to jõ, uje ore pésu ore ujuredie iji erámi údode. Enga e ore di iji yoquidai udé to ome dacajnaqué quedéjnane.

⁷ Enga Jasón udé oite ore aja daguíjnai. Enga cháta raja ore ome ore etétigade ome rómagosode yoqueduguéjna cuchábi iroquéode. Uje chiese eduguéjna cuchábi uñai cuse ome ore uje i u Jesús.–

⁸ Uje ayoréode, eduguéjnane ore chudute udore enga ore chinguíra dabijnanone aja ñane to.

⁹ Mu uje Jasón ore cho doré enga jé u uje ore chirame ore.

Páblo, Sílas ore chise Beréa

¹⁰ Jĩrique Jesús anguretasórone ore chiroque Páblo, Sílas ore aja doi iji dejai ujetiga ore chicáji Beréa. Uje ore di iji Beréa enga jĩrique ore chicáji judíode ore aquiningamei guiguíjna uje i tu sinagóga.

¹¹ Judíode iji Beréa que ore cho dojode judío iji Tesalónica go. Paraque ore ga ore tangári Páblo, Sílas ore acajnaquéode. Ore chajire Dupade uruode iji deréjnane ujetiga jé ũrepise Páblo ome acajnaquéode.

¹² Jecute jiei ore uje ore changureta Jesús. Gréciagosode iji ore ujade ore changureta Jesús to rĩ. Chequé atedie, jnani atade, ore déji Jesús anguretasórone udore ujade to.

¹³ Mu judíode ore iji Tesalónica ore chudute Páblo ore ujnomei uje e ore déji Beréa. Ore chudute to uje qué ore chacate ore ome Dupade adode iji Beréa. Jecute ore chajna ore aja rĩ. Mu uje tesalónicagosode ore díji Beréa enga ore chijnime pocaningane ome Páblo ore iji uté to.

¹⁴ Mu jĩrique Jesús anguretasórone iji Beréa ore chiroque Páblo aja guidai iji yote quedéjnai edógai, mu Sílas, Timotéo qué ore chácariji Beréa.

¹⁵ Páblo jorane ore jno údi aja ore idai uje i tu Aténas, mu jĩrique ore chajni to aja Beréa ujetiga ore chingome Sílas, Timotéo ore uje Páblo ajéode u ujetiga jĩrique ore tibágui to iji ore idai Aténas.

Páblo chacate ore iji ore idai Aténas

¹⁶ Uje Páblo chirote Sílas, Timotéo ore yui iji Aténas mu chopise dáyugu re gu uje jiei ayoré gajnúone iji ore idai uté uje ayoréode ore cho dadupa iji ore.

¹⁷ Jecute Páblo chacate judíode iji ore aquiningamei guiguíjna, jé aja purása quedéjnane ore rĩ uje ore changureta Dupade. Chacadápo ayoréode rĩ iji ore idai ajã́ro iji dirode jnese.

¹⁸ Jnanione uñane iji ore idai uté ore gaidode u pacajnaqué quedéjnane ujetiga ore chiraja quigode to. Ore chĩ́care epicúreode aja udore uñane, jé basa ga ore chĩ́care estóicode aja uñane. Enga udore uñane ore catecã́ri Páblo ome acajnaquéode quigode. Enga ore chojningame ñane: –Darachoqui uté ¿jé cho ringome yoque jne a?– Jeque uñane ore chojninga: –Ise ga gaidi u ujetiga yangácoi acajnaquéode enga yoco yocangureni iji dupa quedéjnaringo to.– Ore uruode u udojo gu uje Páblo chacate ore ome dacajnaqué unérone uje piquetangore Jesús uje toi mu ecápo rĩ iji datoringai quigade.

¹⁹ Jecute ore jno Páblo údi aja ore aquiningamei jogadi uje i u Areópago. Enga ore chojningame Páblo: –Yoquigaidi u ujetiga yangácobí bacajnaqué ichade to jne.

²⁰ Uje quedéjna bacajnaquéode ome yoque enga yipótago jeta yirajágo udore quitígo to.–

²¹ Chamáñaje aténasgosode, purása quedéjnane iji ore ujade que ore áyipieraque déji cucha uñeque. Mu ore ajegaidode u gojña ichárigo gatuaque ujetiga ore tangári enga ore chatatame ñane.

²² Enga Páblo chague iji ore ajei iji ore aquiningamei jogadi Areópago. Enga chojninga: –Yimo uje aténasgosode uaque uacabeyopísi uacangaránone ayoré gajnúo adode uje uacoyo dupa iji ore.

²³ Uje yisõre iji uaquedai ujade enga yimo gaseranone uje uacapéso ome uacangaránone ayoré gajnúo, uje uacacatecãchoi ore iji. Yise gaseranone udore uñai uje uacarúsãcho uacarusarane iji uje chojninga: "Dupa pimojmai u udé." Dupa pimojmai u uté ome uaque mu jé uacacatecãchoi. Mu yangaráni Dupa jé u uté to enga yiraja adode. Enga a yatata adode ome uaque jne.

²⁴ Dupade uté u uje ipesute erámi, jé aja erámi jogonórone cucha ore jnese. Enga uté gajneque gaté, jnumi ore jnese rĩ. Enga que cháji jnanione ipesutique guiguíjna go.

²⁵ Que cuchárique chona to go jetiga ayorérique chisi ome. Mu uté u uje guẽrate cuchade ome yoque. Guẽrate yocucuecaringuei ome yoque. Enga guẽrate yocujñari ome yoque rĩ. Cuchade jnese uje déji yoque iji erámi tudé jé garani u uté to.

²⁶ Yocãrapi u Dupade uté ipesudi jnani bajaque jnese. Enga uté chisite yógaja erámi ujetiga ayorérigo déji punirone jnese. Dupade uté ipesute punirone jogadode to, enga ichajapite yógaja dajegaidode puníño ome yoque. Enga chingo yoquibatigade díño aja yoque jnese rĩ ujetiga yibacóji.

²⁷ Dupade chicha yógaja erámi udé gu ujetiga yetingaco enga yucuegoi. ¿Soca yico a? Jec ũré uje que Dupade idája iji yoque go.

²⁸ Yiquecágo gu Dupade. Yijocáco yoque gu Dupade. Yugúcoji erámi gu Dupade. Uacarasade uñai iradedie achachagúgode jé cho uje chojninga: "Dupade jogasu yoque jnese."

²⁹ Ujetiga jec ũré ujeta Dupade jogasu yoque enga ca yoco dupa iji ayoré gajnúrique uje ore ipesucho iji órodie, plátadie, cucaranenie ore. Uje jnanione cachi ore ipesucho ome dajéode.

³⁰ Que Dupade jĩrique chajire purása quedéjnane isijnaringuéone yúrique nanique uje que ore chiraja cuchárique gu. Mu e chiroque erámi unirisórone jnese ujetiga ore chécãre dáyipie quigode, dadode ore.

³¹ Dupade e chimate diri ujetiga pajirique erámi unirisórone yocadode aja quigode iji jne. Enga e chimate dajegaidi jnani to ujetiga chajire yocadode aja quigode. Ũrepise uté jne enga a ca cho parágome dajirigode udore ujetiga pésu yoquiquigode. Enga que potigayaquérique déji uje Dupade ajegaidi uté u Jesús. Chamáñaje toi mu Dupade chiquetápo uté rĩ iji itoringai ujetiga úringai Dupade utocaite obiréjna ome yoque.–

³² Mu uje ore chudute uje chiese togode ecápo jne rĩ enga ore chujñieta Páblo enga uñane ore chojninga: –E gome. Yangácopoi bacajnaquéode iji dirode uñeque dirome rĩ.–

³³ Jecute Páblo noñome ore iji te.

³⁴ Mu ayoréode uñane cháta rágaja Páblo uje ore changureta acajnaquéode. Jnanione udore uñai u Dionísio. Ore eduguéjnane uñai u uté uje jecucha cháta raja dojode eduguéjna iji ore aquiningamei jogadi Areópago to. Chequé changureta to uje uaté i u Dámaris. Enga jnanione uñane ore changureta to uje ore tangári Páblo acajnaquéode udore.