Héchos 16 - Dupade Uruode

Timotéo nóna Páblo, Sílas ore to

¹ Páblo, Sílas ore díji guidáyode uje ore íode u Derbe, Lístra ore enga ore chise Jesús anguretasṍri iji uté uje i tu Timotéo. Timotéodaté judía enga changureta Jesús to. Mu gréciagose dayé.

² Jesús anguretasórone uje ore idáyode u Lístra, Icónio ore irasique Timotéo adode jnese.

³ Páblo pota jeta Timotéo nóna, jecute doi enga chica bajaque. Chica gu uje que pota jeta Timotéo urasade judío iji guidáyode udore ore dojnóngaja. Chamáñaje ore chiraja jnese gu uje gréciagose dayé, enga ore chiraja to uje gréciagosode que ore chica dabode to go.

⁴ Udojo quigade enga Timotéo nóna Páblo enga ore chingo jerusaléngosode ore urusarane aja ore iji ore idáyode jnese uje Jesús irógode apóstol ore, jé aja Jesús anguretasórone ore angaránone anciáno ore urusãracho ome purása quedéjnane.

⁵ Enga jec u uje Jesús anguretasórone chidota re iji danguretarétigai. Enga Jesús anguretasórone chõre re iji dirode jnese.

Iji Páblo edominone ga jnani chiqueta raja uté uje uniri u Macedónia

⁶ Dupade Ujopié Espíritu Sánto chãraque ore uniri Ásia yui ome ore ujetiga ore chacate ore ome Dupade adode iji. Jecute ore chicáji punirone uñane uje ore íode u Frígia, Galácia ore.

⁷ Uje ore chise ore uniri eruei uje i tu Mísia enga ore chicárasiji puniri uje i tu Bitínia. Mu Jesús Espíritu Sánto chãraque yui tome ore.

⁸ Jecute ore chó Mísia gai. Enga ore chicáji ore idai uje i tu Tróas, uje déji yote quedéjnai edógai.

⁹ Uje qué Páblo ore déji Tróas enga Páblo chimo denominone iji dejai. Uje macedóniagosi chiqueta raja enga cháguena gai. Enga chojningame Páblo: "Acáji Macedónia ga acadape yoque to."

¹⁰ Uje Páblo chimo denominone ga yirajágo uje Dupade pota jeta yicagóji Macedónia. Enga yijócãco ujetiga yicagóji Macedónia ujetiga yacaco ore ome Jesús adode iji uté ujetiga Jesús chiqueta ore to.

¹¹ Yico ga yacágoja cucoi iji ore idai Tróas. Enga yoquiquítequigája yote quedéjnai ajã́ro uje i tu Samotrácia. Enga dire uñai enga yico guidai uje i tu Neápolis.

Páblo, Sílas ore chise Filípos

¹² Yicoji Neápolis enga yicagóji guidáidatéi uñai uje i tu Filípos. Rómagosode ore ipesute ore idáidatéi uté enga obiréjna ome guidáyode uñane iji ore uniri Macedónia uécha uñai uté. Enga yoquimochádode jiei iji uté.

¹³ Diga yisõcóji guidáidatéi ejode iji dire puyátique enga yicagóji tié uje jecucha ayoréode charite ujetiga ore catecã́ri Dupade iji. Enga yico chequedíe iji uté uje qué ore chamáta ráguiji. Enga yácagoji ore gari enga yacaco ore ome Jesús adode.

¹⁴ Chequedíe udire uña i tu Lídia. Enga uaté idai u Tiatíra. Borapeque ueradode guẽrato. Enga Lídia uaté changuretapise Dupade. Jecute uje qué tangári Páblo acajnaquéode enga Dupade catecã́ri iji ajei ujetiga tangaripísi.

¹⁵ Diga changureta Jesús to, jé aja iguíjnai jogosórone ore. Jecute ore tṍra ore aja yodi jnese. Udojo quigade enga Lídia chojningame yoque: –Ujetiga jec ũré yu uje yangureta Yocangarádejnai Jesús ome uaque enga ajínaño yu aja yiguíjnai enga ácayoji.– Chaquĩ́rapise yóguiji daguíjnai jecute yácagoji.

¹⁶ Dire uñai enga yicagopóji rĩ uje ore catecã́ri Dupade iji. Enga yico gapua iji yui uje Satanás utocaidi déji ajei. Enga irósorone ore iplátadie garané u uje ayoréode chutṍri. Uje uaté chiraja cucha piqueminórone gu uje Satanás utocaidi déji ajei. Jecute ayoréode ore pota ore chiraja to enga ore chutṍri gapua ujetiga chatatame ore.

¹⁷ Gapabia suaté chajna Páblo uyoque enga tibidája yoquiquigade. Enga chojninga: –Jnanione udore ore angureni u Dupa pujnuéngaisṍri. Enga ore chingome uaque Dupade isocai ujeta chiqueta uaque jne.–

¹⁸ E iyajmaque uje gapabia tibidája yoquiquigade iji dirode jnese. Mu Páblo chacho gapua pijnane. Enga chajire iji daquigade enga chojningame Satanás utocaidi: –Yiroque ua aja guesi ome Jesucrísto ujopié. Be guesi tiji gapua.– Enga Satanás utocaidi jĩrique doi guesi tiji gapua.

¹⁹ Mu uje gapua irósorone ore chimo uje que ore chirajápo daplátaraque garãtique rĩ enga ájningarãque ore ome Páblo, Sílas ore. Jecute ore chisa Páblo, Sílas ore enga ore jno ore údi aja eduguéjnane uje ore iguíjnane déji ajã́ro uje déji ore idáidatéi ajei.

²⁰ Ore chijna ore aja eduguéjnane iquei enga ore chojningame eduguéjnane: –Guidai idaisórone uyoque, que yocópo paráguiji yoquidai rĩ ome judíode udore ore uje ore pésu yocujuredie ome dadode.

²¹ Chamáñaje ore chacate yógome pacajnaqué quedéjnane. Enga que togome rómagosode uyoque ujetiga yicoi ore acajnaquéode quigode. Chamáñaje que pacajnaquéode udore cunguésõri yoqueduguéjnane iroquéode ome yoque gu.–

²² Uje ore chejna daruode udore guesi enga ayorébui chamáta raque enga ore socárome Páblo, Sílas ore. Enga eduguéjnane chiroque darógode aja Páblo, Sílas ore to ujetiga ore chejñu ore iguidedie enga ore chaquesu ore údode ome pidode.

²³ Uje ore cha dajocaningai ome ore enga ore suru ore gai. Enga eduguéjnane chiroque ore jurúgaisṍri aja ore ujetiga chirote ore enga chirodipise ore ujetiga ca toque guetique ome ore.

²⁴ Uje jurúgaisṍri chudute deduguéjnane uruode udore ga doi Páblo, Sílas ore enga nápisa ore aja guiguíjnai ajei erueminóripísi ujetiga ca toque guetique ome ore. Enga chijníe ore guídogorodíe jogadode iji poridie enga ore chajo ojnaquérodie aja.

²⁵ Uje dejnínga gatócoro ga Páblo, Sílas ore chijñecare enga ore chirate Dupade iradedie. Enga ore catecãrápoi Dupade rĩ. Enga ore jurúgayode uñane qué ore tangári ore.

²⁶ Mu ore chuningame eti jnumi tãrara enga guiguíjnai cutádode tãrarápo rĩ. Enga jĩrique guiguíjnai piagode chuchẽre dabáyode enga ojnaquérodie, poridie ore basapóji ore jurúgayode jnese rĩ.

²⁷ Ore jurúgaisṍri cho cuyúgome jnupe tãrarachui enga chimo uje guiguíjnai piagode guesája. Enga chijnime daquesei enga chujérase re. Uté jos eti jurúgayode ore jno jnese gu.

²⁸ Mu Páblo tibidi enga chojninga: –Ca ajé ua. Jé yugúcoji de jnese.–

²⁹ Jecute ore jurúgaisṍri chucué dabiotique enga chayóji Páblo ore yui. Enga chichaga dagataidie aja jnumi iji Páblo, Sílas ore iquei enga tãrara ome dasadodéringai.

³⁰ Enga jĩrique chijna ore aja guesi enga catecã́ri ore enga chojninga: –¿Jé yo ringome ujetiga Dupade chiqueta yu to a?–

³¹ Ore chajnai enga ore chojninga: –Angureta yocangaráni Jesucrísto to, enga a chiqueta ua, jé aja bajogasui ore to jne.–

³² Jé u uje Páblo, Sílas ore nóna ore jurúgaisṍri aja iguíjnai ga ore chacate ore iji ome yocangarádejnai Jesús adode.

³³ Uje qué dejaque mu ore jurúgaisṍri churu Páblo, Sílas ore iyode iji ore yupídode. Udojo quigade enga ore tṍra ore jurúgaisṍri, iguíjnai jogosórone ore jnese aja yodi.

³⁴ Udojo quigade ga ore jurúgaisṍri chijna Páblo, Sílas ore aja daguíjnai ujetiga chisi ore iji dabotígo. Enga ore jurúgaisṍri irasiguipise re uje e changureta Dupade to. Enga jé ate jogasui ore to uje ore irasique raque to ome dáringane Dupade anguretasóño.

³⁵ Uje dire ga eduguéjnane páyipiedie ipesungóño ore chiroque guidai irodisórone aja jurúgaisṍri iguíjnai ujetiga ore chingome ujetiga chuchẽre dajurúgayode, Páblo, Sílas ore gai.

³⁶ Enga ore jurúgaisṍri chojningame Páblo: –Eduguéjnane e ore chingome yu ujetiga yirame uaque. Jecute boyo enga ca atodóyopo jne rĩ.–

³⁷ Mu Páblo chojningame guidai irodisórone: –Rómagose yoque mu ore chaquesu yocúdode bisideque iji ayorébui ajei diríca. Enga que ore chajire yocadode bajaque uje ore suru yoquibai. ¿Ja apóchorásu yoque a ujetiga ajnicho yoque a? Úngare. Eduguéjnane a doi yoque jne enga ore chijnime yoque jne.–

³⁸ Guidai irodisórone jno enga ore chingo Páblo, Sílas ore uruode aja deduguéjnane uje rómagose ore to. Enga eduguéjnane todópisa deduguéjnapísode yui uje ore suru rómagosode gáyode bisideque.

³⁹ Jecute eduguéjnane chicáji jurúgaisṍri iguíjnai enga ore chijnime Páblo, Sílas ore enga ore chojninga: –Dipónguerã yoque uje rómagose uaque to uje yaquesúgo uacádode bisideque.– Enga ore chijócha ore ajéode údi ujetiga ore jnoji ore idai.

⁴⁰ Uje Páblo, Sílas ore doi guesi tiji dáringane pujurúgai enga ore chicapóji Lídia iguíjnai bajaque enga ore catecãripísi dojode Jesús anguretasóño ujetiga ore chejna rángaja Dupade adode. Enga jé u uje ore jno.