Héchos 15 - Dupade Uruode

Páblo, Bernabé, Jesús anguretasórone ore taquiríji ñane iji Jerusalén

¹ Judéa unirisórone uñane déji Antioquía uje Páblo, Bernabé qué ore déji. Enga ore chacate Jesús anguretasórone ujetiga ca ore chedu danguretigade ome Jesús mu chiese cucha amiri tu ujetiga ore doi Moisés acajnaquéode quigode to enga ore chica raque. Chiese quene jogadi u ome ore ujetiga ore chise dáringane piquetaque ome Dupade.

² Mu Páblo, Bernabé ore botaripise Judéa unirisórone ome ore acajnaquéode udore. Jecute Jesús anguretasórone ore chiroque Páblo, Bernabé, jé aja Jesús anguretasórone uñane aja Jerusalén ujetiga ore catecã́ri Jesús irógode uje apóstoles u ore ome Judéa unirisórone ore acajnaquéode udore. Que gusu Jesús irógode ujetiga ore catecã́ri ore, mu ujetiga ore catecã́ri Jesús anguretasórone angaránone anciáno ore to iji Jerusalén.

³ Jesús anguretasórone iji Antioquía ore nóna Páblo, Bernabé ore aja guidai eruei enga jé u uje Páblo ore jno. Ore chicáji ore unirone Fenícia, Samária ore uje ore chicáji Jerusalén yui. Enga ore chingo purása quedéjnane ujnoméone ome Jesús anguretasórone jnese aja dajesúode. Enga ore atatagode quigode u uje purása quedéjnane ore cha dangurete cucha bisideque bajade uje ore changureta Jesús. Enga Jesús anguretasórone jnese ore irasique re ome ore ojñane udore.

⁴ Uje Páblo, Bernabé ore díji Jerusalén enga Jesús anguretasórone, jé aja ore angaránone, jé aja Jesús irógode apóstol rĩ ore nína Páblo, Bernabé ore yui. Enga jé u uje Páblo ore chatata dojñane ome Dupade adode ome ore uje ore déji dajesúode erámio.

⁵ Mu fariséode uñane uje ore changureta Jesús to, ore chojninga: –Jec arec ujetiga angoñome purása quedéjnane uje ore changureta Jesús enga ore chica re to. Angoñome ore to ujetiga ore doi Moisés acajnaquéode quigode to rĩ.–

⁶ Jecute Jesús irógode apóstol udore, jé aja Jesús anguretasórone angaránone anciáno ore chamáta ñane ujetiga ore pésu dáyipierigui ome ñane ome cuchade udore.

⁷ Iyajmaque ore ome dabotaquéode enga Pédro chague enga chojninga: –Yujode Jesús anguretasórone uaque, uacarajáyo jnese uje diyajmaque ica uje Dupade ajegaite yu iji uacajade ujetiga yacate purása quedéjnane ome Jesús adode to. Gaidi u gu ujetiga purása quedéjnane changureta Jesús to.

⁸ Dupade u uje chiraja erámi unirisórone áyipiedie jnese. Enga uté u uje chisi ome Dajopié Espíritu Sánto ome purása quedéjnane to, adi jé u uje chisi ome judíode uyoque. Obiréjna gu ome udore uje Dupade pota purása quedéjnane to.

⁹ Que Dupade cãra dasocárique ome uyoque gotique. Jé chojmára isocai ome yoque jnese. Uje ore changureta Jesús enga Dupade chĩro ore isijnaringuéone, adi jé u uje chĩro yoquisijnaringuéone to ome yocanguretarétigade.

¹⁰ ¿Jé gotique ĩringuipise a uje uacotigáso uje Dupade chacája purása quedéjnane to? ¿Jé gotique ĩringuipise uje uacaróchorase ore aja Moisés iroqué jiéode uje yocayode jnani bajácho, uyoque que yimécaco go?

¹¹ Mu que quigode u go. Mu yirajágo uje Yocangarádejnai Jesús chiqueta yoque bisideque ome dacaniratiguédatéi. Enga adi jé u to ome ore ujetiga Jesús chiqueta ore.–

¹² Udojo quigade ga ore cha uje ore botare ñane. Enga ore tangári Páblo, Bernabé ore ojñane uje ore chojninga: –Dupade chatapísaja yoque diríca ujetiga yipéco yoquipesútedatéode, jé aja cucha pitijabádode uñane uje yugúcoji purása quedéjnane ujade.–

¹³ Uje e ore cha dojñane udore enga Jacóbo narare enga chojninga: –Yujode Jesús anguretasórone uaque, angáchoi yu.

¹⁴ Simón Pédro chingome yoque ica Dupade isocai uje quene chingo dajnoraquei ome purása quedéjnane to enga chamáta danguretasórone iji ore ujade ujetiga cho darása iji ore to.

¹⁵ Uacamóño uje Dupade uruode atatasórone ore urusarane ojningane jé u udore to uje ore urusarane chósi te:

¹⁶ Udojo quigade enga a yĩriápo jne rĩ Enga a yipésapo David iguíjna arímei rĩ. Ujetiga yipésapo iguíjna arímei amirone rĩ enga a ichapo jne rĩ.

¹⁷ Jogadi jé u jne ujetiga ayoré uñane ore chucué dangarádejnai uyu jnese. Jé u pachamite quedéjnane unirisórone jnese to rĩ. Jé u udore ore jnese uje yipota ujetiga yo yurása iji ore.

¹⁸ Yocangarádejnai Dupade jé urúo udojo nanique iji taningane.

¹⁹ Jecute yingome uaque ujetiga ca yirójo purása quedéjnane iji yocujade aja cucha ibirade. Chamáñaje e ore cha dangurete cucha bisideque bajade ujetiga ore doi Dupade adode to.

²⁰ Gusu ujetiga yurúsãcome ore ujetiga ca ore tagu ayoré gajnúone gajnéone cucha ãrío. Ujetiga ca uñeque tungarája gapu quedéjnaraque, jeoga chequé enga ca moji jnani quedéjnarique gari. Ujetiga ca ore tagu cuchiso pimocherane. Ujetiga ca ore tagu cucha iyojnanie rĩ.

²¹ Uacamóño gu uje diyajmanguipise uje judíode yocaquiningaméone guiguíjna déji purása quedéjnane idáyode jnese to. Enga Moisés urusarane atatasórone dépoji udore rĩ uje ore cho quique Moisés urusarane iji dire puyade jnese iji purása quedéjnane ujade.–

²² Jecute Jesús irógode apóstol ore, jé aja Jesús anguretasórone uñane, jé aja ore angaránone anciáno ore chimate dáyipiedie. Enga ore chucué jnani gárerigo iji uraque dajade ujetiga ore nóna Páblo, Bernabé ore aja Antioquía. Ore irógode jõrai u Júdas uje i u Barsabás to. Jeque uñai i tu Sílas. Enga obiréjnapise jnanione udore iji dojode Jesús anguretasórone ujade.

²³ Enga ore chisi ome darusarane ome udore ore ujetiga ore chijnoque enga ore urusarane quigode u udojo: "Jesús irógode apóstol uyoque, jé aja Jesús anguretasórone iji de, jé aja ore angaránone yoquirasique uaquei jnese. Yurúsãco yocurusarane ome purása quedéjnane uaque uje uacagúsoji Antioquía. Yocurusarane gajnengórone u uaque to rĩ uje uacanirone u Síria, Cilícia ore.

²⁴ Yudúco uje yocurasade uñane ore chicáji uaque mu que yoquiroque ore aja uaque go. Enga ore chacate uaque ujetiga acáyo uaque enga beyoi Moisés iroquéode quigode. Enga yudúco to uje e que arajáyo uacangarátiguiji ore. Ujetiga angáchoi Páblo, jeoga angáchoi ore.

²⁵ Jecute omome yoque jnese iji de ujetiga yirójo yocuñéngo aja uaque ujetiga ore tibágui uaque. Enga udore ore a ore nóna yoquirasiguipísode Páblo, Bernabé ore aja uaque jne.

²⁶ Uacamóño uje Páblo, Bernabé ore cho daba Yocangarádejnai Jesucrísto adode to uje ore déji dajesúode erámio.

²⁷ Enga e yirójo Júdas, Sílas aja uaque. Enga a ore chingo yocurusarane quigode aja uaque jne.

²⁸ Chamáñaje omome Espíritu Sánto uyoque ujetiga ca yirójo uágaja cucha ibirade. Mu yirójo uágaja cucha obiréjnane uje que piraque ujetiga apéso.

²⁹ Enga yoquiroquéode ome uaque u udojo: Ca acho ayoré gajnúone gajnéone cucha ãrío. Ca acho cucha iyojnanie rĩ. Ca acho cuchiso pimocherane rĩ. Ca uacuñeque tungarája gapu quedéjnaraque, gusu dacotéraque. Enga ca uacuñáraque tungarája jnani quedéjnarique, gusu abai ome. Ujetiga ajuso uaqueo ome yoquiroquéode udore enga a uerate uaque jne. Jé gusu yocurusarane."

³⁰ Jé u uje Páblo, Bernabé nóna dajorane udore enga ore jno enga ore chicáji Antioquía. Uje ore díji Antioquía ga ore chamáta Jesús anguretasórone enga ore chisi ome ore gajnéone, jerusaléngosode urusãracho, ome ore.

³¹ Uje Jesús anguretasórone ore chajire ore urusarane ga ore irasiguipise re, enga ore cha dáyuguhebátigade.

³² Dupade uruode atatasórone u Sílas, Júdas ore to, uje ore chĩ́care profétas aja ore. Jecute ore chacate Jesús anguretasórone gatuaque uje qué ore déji Antioquía. Enga pininaquei jogadi tu ome ore uje ore chudute udore ore acajnaquéode enga jogadi u to uje ore chejna rángaja Dupade adode gaté.

³³ Mu uje e iyajmaque Júdas, Sílas ore iji ore gari iji te enga ore pota arorárique aja darasade. Enga jé u uje Jesús anguretasórone chojninga: –Jec arec ujetiga boyo mu yocajéode u ujetiga etoguipise uáguiji dajei.–

³⁴ Mu Sílas chécãre dajéode enga chácariji ore gari.

³⁵ Páblo, Bernabé chácariji Antioquía to enga ore cháta rágaja Dupade uruode atatasórone uñane to enga ore chingo Dupade uruode quigode aja ore enga ore chacate ore ome Yocangarádejnai Jesús adode.

Páblo e jnopo Jesús ujnomei údi rĩ aja erámi

³⁶ Udojo quigade enga Páblo chojningame Bernabé: –Bo yico, enga yicagopóji Jesús anguretasórone iji yoquiqui casodica guidáyo rĩ. Yojningane u udore ore jnese uje yacaco ore ome Yocangarádejnai Jesús adode nanique.–

³⁷ Bernabé pota jeta Juan nóna ore to uje i tu Márcos to.

³⁸ Mu Páblo que pota go jeta Juan Márcos nóna ore to. Uje Juan Márcos noñome ore ica iji Panfília uje ore doi Dupade iroquéode iji uta. Enga que chátapo Dupade iroquéode aja ore rĩ.

³⁹ Ore botaripise ñane, Páblo, Bernabé ore. Jecute ore cho jmíti, jmíti ome ñane. Enga Bernabé nóna Juan Márcos enga ore chacája cucoi enga ore chicáji Chipre.

⁴⁰ Mu Páblo chaquĩ́ra Sílas iji dari ujetiga nóna aja quitígo. Enga Jesús anguretasórone catecã́ri Dupade ome Páblo ujetiga Yocangarádejnai Dupade chatapísaja iji quitígo.

⁴¹ Ore jno ga ore chicáji punirone uje ore íode u Síria, Cilícia ore. Enga ore cho Jesús anguretasórone quique iji udore ujetiga ore chejna rángaja Jesús adode to.