Héchos 14 - Dupade Uruode

Páblo, Bernabé ore chise ore idai Icónio

¹ Páblo, Bernabé ore nóna ñane aja judíode aquiningamei guiguíjna uje i tu sinagóga iji ore idai Icónio. Enga ore chacate ore iji uté ome Dupade uruode enga uneréjna ore acajnaquéode. Jecute jiei purása quedéjnane, jé aja judíode ore uje ore changureta Jesús to.

² Mu judíode uñane uje que ore changureta to go ore chingo detétigade ome purása quedéjnane. Jecute purása quedéjnane ore chirate ore aja ore etétigade ome Jesús anguretasórone.

³ Mu que Páblo, Bernabé ore jno míraque mu iyajmaque ore iji uté enga ore chejna rángaja datatagode Dupade urúo. Picasitigai déji ore gu uje ore changuretapise Yocangarádejnai ome cuchade. Enga Yocangarádejnai chátaja ore ujetiga ore pésu dapesútedatéode, cucha pitijabácho iji ayoréode ujade. Gaidi u gu ujetiga pangurete ore uje ore chacate ayoréode ome Dupade ijnoraquédatéi ome erámi unirisórone.

⁴ Mu guidai idaisórone chajuque ñane ajei. Uñane chirota Jesús irógode uje apóstoles u ore, jec uñane chirota judíode.

⁵ Mu udojo quigade enga judíode, purása quedéjnane ore cháta raja deduguéjnane. Enga jé u uje ore pésu dáyipiedie ujetiga ore pojna Páblo, Bernabé ore enga ore pota ujetiga ore chimitingare ore ome cucaranenie.

⁶ Mu uje Páblo, Bernabé ore chudute udojo ga ore chayome ore. Enga ore chicáji ore uniri uje i tu Licaónia. Enga ore chise ore idáyode iji uté uje ore íode u Lístra, Derbe ore enga ore chisápo udore ejominórone guidáyo to rĩ.

⁷ Enga ore chacate ore aja dajesúode ome Jesús adode enga uneréjna ore atatagode quigode.

Lístra idaisórone chimitingare Páblo ome cucaranenie

⁸ Jnani noñai déji ore idai Lístra enga noñaque aja guesi iji daté. Enga que dique to go.

⁹ Jnani uté chudute Páblo acajnaquéode to enga Páblo chajire enga chimo uje changureta ujetiga chiqueta.

¹⁰ Jecute Páblo chinguíra dabijnani aja ga chojninga: –Ayague.– Enga jnani chague ga choja daquei enga jĩrique dique.

¹¹ Uje ayorébui ore chimo uje Páblo chiqueta jnani uté enga jé u uje ore chinguíra dabijnanone aja ñane. Ore doi licaóniagosode uruode enga ore chojninga: –Yocangurete cuchábode uñane ore cho ayoré iji raque enga ore base yoquibai.–

¹² Ore cho dangureni Júpiter iji Bernabé, jeque ore cho dangureni Mercúrio iji Páblo. Darachoqui ore angureni Mercúrio gu, jecute ore choji Páblo.

¹³ Ore angureni Júpiter iguíjnai déji ore idai gabi enga jnani déji iguíjnai uté uje pésu cuchade aja quigode ome ore. Enga jnani uté jĩrique tibágui Páblo, Bernabé ore enga chijna aquirájnane aja ore uje chadi ujnápeode aja. Enga ujnápeode u cucha pojnánguenie. Uté pota jeta chujé aquirájnane udore ome Páblo ore uje cho dupa iji ore gu.

¹⁴ Mu Páblo, Bernabé ore chimo uje ayorébui cho dupa iji ore enga jé u uje ore chajningarase daguidedie. Ore chetaguipise gu uje ore cho dupa iji ore. Enga ore chacája ayorébui ujade. Ore chejnapúsu daruode enga ore chojninga:

¹⁵ –¿Jé gotique ĩ́rique uje uacoyo dupa iji yoque? Uacojo ayoré yoque arĩ́e. Mu yibájoi uaque gu ujetiga yingongo uaque ujetiga ayáyo uacangurenone cucha bisidécho. Enga angáchoi Dupa uecai to uje ipesute gaté, jnumi, yote quedéjnane ore; jec aja jnumi, gaté ore jogonórone cucha jnese.

¹⁶ Diyajmanguipise uje Dupade noñome purása quedéjnane uhuaque iji te ujetiga beyoi uacáyipiedie quitígo ome cuchade.

¹⁷ Jecucha chingo raja uaque múñi. Enga cháta cuchade aja uaque to. Chamáñaje Dupade u gu uje chiroque guéode aja uaque. Upo rĩ uje chiroque sequeré omenie aja uaque. Enga jecucha ga chisi ome uacabosode ome uaque ujetiga anínaño uaque.–

¹⁸ Páblo acajnaquéode u udojo ome ore mu que ore charásu uje ore cho dupa iji ore enga jé ore chujérase aquirájnane ome ore.

¹⁹ Jé u uje judíode uñane ore di uje ore tṍraji Antioquía, Icónio ore uje ore chetaque Páblo. Enga udore ore chijnime darade ome ayoréode. Diga ájningarãque ayorébui ome Páblo to enga ore chimitingare ome cucaranenie. Ore jos eti Páblo e toi enga ore churugúsiji jnumi aja ore idai eruei.

²⁰ Mu Jesús anguretasórone ore chamáta ñane iji Páblo gai. Mu Páblo niji ga chague enga chacapója ore idai to rĩ. Mu dire uñai ga Páblo, Bernabé ore jno enga ore chicáji ore idai uñai uje i tu Derbe.

²¹ Uje ore chacate Derbe idaisórone ome Dupade uruode ga jiei ore uje ore changureta Jesús ome ore acajnaquéode. Enga unéño ore atatagode quigode. Mu uje ore chejna dacajnaquéode guesi enga ore chajniápo aja guidáyode uje ore íode u Lístra, Icónio, Antioquía ore.

²² Enga ore cho Jesús anguretasórone ore quique iji ore idáyode udore jnese enga ore chojninga: –Adotáyo uáguiji uacanguretarétigai. Uje a yejnárejo yoque ome cucha dacate gajnaréngone iji de jnumi bajaque marínga, quigade ga yicagóji Dupade idai enga yocúringai purása jé u ome Dupade enga yocasuté u Dupade iji idai jne.–

²³ Enga ore pésu Jesús anguretasórone angaránone anciáno iji ore idáyode udore ujetiga ore chirote dojode Jesús anguretasóño. Enga ore catecã́ri Dupade ome ore uje ore cho uyatáguiji re ujetiga Yocangarádejnai Jesús chatapísaja danguresórone udore ome ore isagode udore.

Páblo ore chajniápo aja Antioquía rĩ

²⁴ Uje Páblo, Bernabé ore jno ga ore chicáji ore uniri uje i tu Pisídia. Mu ore jnopo rĩ iji uté ga ore chicáji punire uñai uje i tu Panfília.

²⁵ Ore chacate ore ome Dupade uruode iji ore idai Perge mu udojo quigade enga ore chicai ore idai uñai uje i tu Atália.

²⁶ Ore chacája cucoi iji Atália ga ore chicapóji ore idai casé Antioquía rĩ. Chamáñaje antioquíagosode ore u iji taningai uje ore catecã́ri Dupade ome Páblo ore ujetiga chatapísaja ore aja ore ajesúode uje ore jno uruode údi aja erámi. Enga ore noñome Páblo ore iji Dupade jmainie uje ore chiraja gu uje caniranguipise Dupade gu ome darógode. Mu uje Páblo ore chimate dajnéone Dupade iroquéo enga ore chajniápo aja Antioquía rĩ.

²⁷ Uje ore díji Antioquía enga jĩrique ore chamáta dojode Jesús anguretasóño aja ñane. Enga jé u uje ore chatata dojñane ome Dupade adode ome ore aja dajesúode erámio. Enga ore chojninga: –Yocangarádejnai chosõre purása quedéjnane to enga chiroque yógaja ore ujetiga ore changureta to ome yocatatagode Dupade urúo.–

²⁸ Enga diyajmaque Páblo, Bernabé ore iji Jesús anguretasórone ore gari iji Antioquía.