Héchos 13 - Dupade Uruode

Bernabé, Sáulo ore jnome Dupade iroquéode

¹ Jesús anguretasórone iji ore idai Antioquía ore acadisórone cuse uje ore chacate ore ome Dupade uruode. Enga Dupade uruode atatasórone dépoji ore gari rĩ. Jnanione udore ore íode u udojo: Bernabé u uñai. Simón u uñai uje i gaté u Utatai. Lúcio u uñai, uje idai u Cirene. Manaén u uñai. (Galiléa jogonórone ore eduguéjnai Heródes, Manaén ore ipesungóri chojmára nanique iji dáringane disi.) Sáulo u uñai to.

² Dire uñai uje udore ore catecã́ri Dupade iji ñane gari enga ore chopo uyatáguiji re rĩ ome dacatecãraitigade ome Dupade. Enga jé u uje Espíritu Sánto catecã́ri ore enga chojninga: –Angaráño Sáulo, Bernabé ore jogatígome uaque ujetiga ore doi yiroquei uñeque uje e yimánome ore.–

³ Uje e ore chudute Dupade Ujopié Espíritu Sánto áyipiedie udire enga jé u uje ore jno dáringane uyataque údi enga ore catecã́ri Dupade gaté ome Bernabé, Sáulo ore. Enga jé u uje ore chicha dajmainie aja ore gáyode uje e ore pijógome Dupade iroquéode. Uje e ore chejna udojo guesi ga ore chiroque Bernabé, Sáulo ore aja doi ujetiga ore doi dajnéone Dupade iroquéo.

Bernabé, Sáulo ore chacate Chipre jogosórone

⁴ Enga Bernabé, Sáulo ore jno ga Dupade Ujopié Espíritu Sánto chingo ore quigode aja ore. Enga ore chicai ore idai uje i tu Seleúcia. Enga ore chacája cucoi tiji uté enga ore chicáji yote quedéjnai ajã́ro uje i tu Chipre.

⁵ Uje ore chise daqui uté ga ore chacája guidai uje i tu Salamína uje déji yote quedéjnai edógai. Enga ore chacate ore ome Dupade uruode iji judíode aquiningaméone guiguíjna sinagóga iji Salamína. Jesús anguretasórone uñai nóna ore to uje i tu Juan ujetiga cháta cuchade aja ore.

⁶ Ore chise ore idáyode jnese iji yote quedéjnai ajã́ro enga ore chise ore idai uñai uje i tu Páfos. Enga ore chise judíode uñai iji uté uje i tu Barjesús. Enga daijna uté. Mu táquechoquí uje chiese Dupade acho atatagode.

⁷ Daijnai uté jecucha nóna ore eduguéjnai Sérgio Páulo, enga irajataque eduguéjnai uté. Enga ore eduguéjnai tibidi Sáulo, Bernabé ore uje pota jeta tangári Dupade uruode iji ore pijnani to.

⁸ Mu daijnai Barjesús i uñai cuse enga Elímas u. Enga uté chetaque ore acajnaquéode ome eduguéjnai enga cho eduguéjnai quique ujetiga ca changureta Jesús to.

⁹ Mu Dupade Ujopié Espíritu Sánto irágu Sáulo ajei uje uté i uñai u Páblo. Enga Páblo toji daijnai gai.

¹⁰ Enga chojninga: –Satanás abi á. Pisijnaringuéone gajnengóri á. Paringaquéode gajnengóri á. Pátegoningáne guetésõri á. ¿Gotique ĩ́rique uje que aya uje bo táguiji Yocangarádejnai uru uréone?

¹¹ Mu Yocangarádejnai Dupade a cho dajuñame ua jne. A suruábu bedodie enga a ca amópo guedé to jne rĩ jec aja dire uñeque jne iji baquei.– Enga jĩrique opoi jnumi ome daijnai uté enga chucué dojórique ayoré ujeta chijñaque. Uje que chimópise daquénique gu.

¹² Uje eduguéjnai chimo udojo ga changureta Jesús. Chamáñaje tija Páblo ore acajnaquéode ome Yocangarádejnai adode gu.

Páblo, Bernabé ore chise ore idai Antioquía

¹³ Udojo quigade ga Páblo, Bernabé ore chacája cucórique iji ore idai Páfos, enga ore chicáji ore idai Perge uje déji ore uniri Panfília. Mu ore jõrai Juan noñome ore iji uté ga chajni aja Jerusalén.

¹⁴ Mu Páblo, Bernabé ore jnoji Perge ga ore chicáji ore idai Antioquía to, uje déji ore uniri Pisídia. Ore chicáji judíode aquiningamei guiguíjna iji uté iji dire puyátique. Enga ore chacája enga ore chácariji ore charipíode gáyode.

¹⁵ Judíode ore naráraja darujna aode gai bajaque enga ore ajirigode u Moisés urusarane, jé aja Dupade uruode atatasórone uñane urusarane. Uje e ore cha enga ore angaránone chojningame Páblo ore: –Yocurása di ichade uaque, uacuñeque chacadape yoque to jne rĩ ujetiga uacuñeque pota.–

¹⁶ Enga Páblo chague ga chãrai dajmanai tiji ore ujetiga ore cho parac. Enga jé u uje chojninga: –Yujode israélgose uaque á, ujetiga angáchoi Dupade enga angáchoi yu to.

¹⁷ Israélgosode yocangaráni Dupade imeserãque yocayode jnani bajácho nanique. Uje purása quedéjna ore iji ore uniri Egípto nanique mu Dupade pésu ore enga ore quérã enga jiépisi ore. Enga udojo quigade enga chijnime ore iji egíptogosode ore ujade ome dajopiédaté.

¹⁸ Enga sequeredie 40 nanique uje Dupade chidota re ome israélgosode ore ate gajnaréngone iji erãpetarei uje ore jnoji Egípto.

¹⁹ Udojo quigade u uje Dupade guejnanie gague gare iji ti iji cananéogosode ujetiga chisi ome ore unirone ome yocayode jnani bajácho.

²⁰ Enga Dupade angúroméone u páyipie ipesungórone jnanío nanique ujetiga israélgosode cho dangaránone iji ore. Enga sequeredie 450 u nanique uje israélgosode ore cho dangaránone iji ore. Mu israélgosode angaránone páyipie ipesungóño ore eruei u uje ore cho dangaráni iji Dupade uruode atatasṍri Samuel nanique.

²¹ Mu yocayode jnani bajácho ore chutai Samuel ujetiga pésu ore eduguéjna cuchátique ome ore. Enga Dupade tangári ore enga cho ore eduguéjna cuchábi iji Cis ujnacari Sáulo. Enga Sáulo ore gãrapi u jnani bajade uñai Benjamín. Sáulo uté guejnanie sequeré 40 ome dáringai eduguéjna.

²² Mu diga Dupade chijna Sáulo úringai eduguéjna iji gari enga cho ore eduguéjna cuchábi iji David. Enga Dupade chojninga: "Jnacare paraque Isaí ujnacari Davide uté enga yirasique gu uje tangári yu enga a uté u jne ujetiga doi yáyipiedie quitígo jnese."

²³ Dupade jé urúo ome ore nanique uje a chisi ome israélgosode iquetangónique ome ore jne. Jecute Dupade ojningai piquetangore di iji yoque enga Jesús u. Enga gãrapi u yocayode jnani bajácho ore eduguéjna cuchábi David.

²⁴ Mu uje cáma Jesús di nanique enga Juan u uje chacate israélgosode. Enga acajnaquéode quigode u ujetiga ore chécãre dáyipie quigode ome Dupade ujetiga chaca ore edodie iji yodi.

²⁵ Uje Juan e chimanirase dajnéone Dupade iroquéo enga chojningame ayorébui nanique: "Uacajoso ati uacaquetangóri u yu. Mu que uyu u go. Mu a di jne iji yiquigade. Enga a uté suépise yibai jne ome dáringai Dupade utocaite."

²⁶ Yujode israélgose, Abraham gãrapiésorone, uaque uje uacoyo uacangarádejnai iji Dupade, yacajnaquéode gajnesórone upúsu uaque ujetiga anguretáyo Jesús enga eso uacáringane piquetaque to.

²⁷ Jerusalén idaisórone, jé aja ore eduguéjnane rĩ, que ore chiraja Jesús nanique uje ore iquetangóri u. Cachi ore igotaque re uje ore chajire darujna aode uje que ore tangári go. Uje ore naráraja gai ome darasade iji ore aquiningamei guiguíjna iji dire puyade gatuaque. Ore ajirigode Dupade uruode atatasórone urusãracho chingopísa ore iquetangóri adode ome ore, mu que ore chirajapise quitígo go. Mu uje ore chisi ome pitoringai ome Jesús enga jé u uje Dupade uruode atatasórone ore urusarane tocade.

²⁸ Que ore chiraja bárique mu jé ore chutai Piláto ujetiga chisi ome pitoringai ome Jesús.

²⁹ Uje e chejna guesi Dupade uruode atatasórone urusarane ojningane cucha ome Jesús enga ore chiramurase Jesús iji curesei enga ore chijóchame.

³⁰ Mu Dupade chiquetápo rĩ iji itoringai enga ecápo rĩ.

³¹ Enga dirode jiei iji udojo quigade enga Jesús chiqueta raja dacadigode uñane gatuaque. Uje acadigode udore nóna to nanique uje jnoji Galiléa enga chicai Jerusalén. Enga udore jé u to iji deréjnane udojo uje e ore chatata adode ome ayoréode ore.

³² Jecute e yingome uaque uje uacaquetangóri e di enga pujnomé ueradi a urásu ome uaque. Uje jé upúsu Dupade uruode ome yocayode jnani bajácho ore nanique uje a ore iquetangónique di jne.

³³ Dupade uruode udore ome yocayode jnani bajácho e tocade ome disi ejode uyoque. Chamáñaje Dupade chiqueta Jesús iji itoringai gu ujetiga ca potigayaquérique déji ome úringai yoquiquetangore. Eduguéjnai David urusarane Sálmo 2 quigode jé upúsu cuchade udojo to uje chojninga: "Yape ua enga bai tu yu gajneri, uje bacuecaringuei garani tu yu gu."

³⁴ Dupade jé urúo nanique ujetiga chiqueta Jesús iji itoringai, ujetiga ca arione tarata. Dupade jé urúo iji daruode to uje chojninga: "A yisi ome yojningane cucha ueracho ome uaque jne uje e yingome David nanique."

³⁵ Jecute dépoji Sálmo uña rĩ enga chósi te: "A ca ajuéga jne jeta batocaidi bajnorai arione tarata aja jnumi jne."

³⁶ Que David ojningai u re go iji darusarane udore. Uje qué eca nanique enga David doi Dupade áyipiedie quigode ome darasade. Mu quigade enga toi to enga chicai dayode jnani bajácho iji jnaropié. Enga aoi tarata aja jnumi.

³⁷ Mu Dupade ojningai que aoi tarata to go mu Dupade chiquetápo uté rĩ iji itoringai quigade.

³⁸ Yujode israélgosode uaque, yipotapísa ujetiga arajáyo to uje Jesús u uje chĩro yoquisijnaringuéone, enga yatatagode ome uaque quigode u udojo.

³⁹ Jesús u uje chĩro ore isijnaringuéone jnese ujetiga ore changureta. Jé basa panguretigai ome Moisés urusarane que chĩro uñeque isijnaringuérique gotique.

⁴⁰ Ajusópise uaqueo ujetiga ca otigáso yuruode. Jé socaseti Dupade uruode atatasórone ojningane cucha chise uaque to jne a, uje ore chojninga:

⁴¹ Uaque uje uacadojnóchoja yuruode, angachopísi yu. Uje a óraño uágome uacatoringárique jne. A yipésu yipesute cuchadatérique iji uacajade jne. Ujetiga uñeque chatatarása udore ome uaque bajaque mu a jé otigasorase ore atatagode udore úringane ũréo.

⁴² Páblo acajnaquéode eruei u udé, enga jé u uje Páblo jorane ore doi guesi iji judíode aquiningamei guiguíjna. Enga purása quedéjnane iji judíode udore ujade ore catecã́ri Páblo ujetiga ore chacadápo ore rĩ ome cuchade udore iji dire puyai ejórique.

⁴³ Uje ayoréode cha dague iji daquiningamei guiguíjna ga jiei judíode ore uje ore nóna Páblo, Bernabé ore to. Purása quedéjnane uñane nóna ore to uje ore cho judíode iji raque to. Enga Páblo, Bernabé ore cho ore quique ujetiga ore chimesẽre Dupade ijnoraquei ome re enga ore chidota re iji danguretigade iji Dupade.

⁴⁴ Dire puyai e upo rĩ enga guidai idaisórone jnese ore chamáta ñane ujetiga ore tangári Dupade uruode iji Páblo ore pijnanone to.

⁴⁵ Mu judíode ore chimo ayorébui ga ore charatáyime ayorébui ome Páblo ore. Enga jé u uje ore chotigase ore enga ore botárapo ore rĩ. Enga gajnarenguipise ore uruode ome Páblo ore.

⁴⁶ Mu Páblo, Bernabé que ore todo ore go mu ore chajnai ore enga ore chojninga: –Dupade uruode gajnengórone urásu uaque bajaque uje judíode u uaque gu. Mu uaquetácho adode. Cho ujetiga ojnicho: "Dupade guerani pucuecaringué eyúgojma que gajnesórone u yoque go." Jecute a yico jne. Yicagóji purása quedéjnane ore uje que judío ore to, enga yacaco ore ome Dupade uruode.

⁴⁷ Chamáñaje Yocangarádejnai chiroque yógaja ore uje chojninga: Yiroque uágaja purása quedéjnane Ujetiga ajñacho ore gáyode. Yigaidi u gu ujetiga ore chise dáringane piquetaque to Iji erámi údode jnese.

⁴⁸ Uje purása quedéjnane chudute udojo enga ore nína re enga ore chojninga: –Uerate Dupade uruode uje yudúco que iji ore pijnani.– Enga Dupade ajegaidode iji ore ujade ore changureta Jesús jnese ujetiga ore gajneque pucuecaringué eyúgojmai to.

⁴⁹ Enga Yocangarádejnai Jesús ujnomei chubu ore uniri údode jnese.

⁵⁰ Mu judíode ore catecã́ri chequé atedie uje jecucha ore dopísi judíode isocade. Enga ore catecãrápoi jnani atade to rĩ iji ore idai. Enga ore chijnime pocaningai ome Páblo ore to. Jecute ore chijócãre ore iji daniri.

⁵¹ Mu Páblo, Bernabé ore chijninguese jnumi iji darídade aja ore gai ga imoi tu uje ore chetaque guidai idaisórone udore isijnaringuéone. Enga ore jno enga ore chicáji guidai uñai uje i tu Icónio.

⁵² Mu Jesús anguretasórone ore irasiguipise re ga Espíritu Sánto irágu ore ajéode.