Héchos 12 - Dupade Uruode

Heródes chujé Jacóbo enga suruápo Pédro gai te rĩ

¹ Ore eduguéjnai Heródes cho damajo Jesús anguretasórone uñane iji dirode udore.

² Enga chiroque darógode ore aja Juan uyai Jacóbo ujetiga ore chujé uté ome quesérique.

³ Heródes chimo uje judíode ore irasique ome jocaningai. Jecute chisa Pédro to iji judíode jnusinamáneméi dire uje i tu Páscua. Dirode udore u uje judíode ore tagu arureque uneróngone iji.

⁴ Enga ore jno Pédro údi enga Heródes chiroque ore aja ujetiga ore suru Pédro gai. Soldádode ore pésu dáguedie enga gagájni ore iji ore uague chojmara. Enga ore uáguedie gagájni to. Diga ore chécãre rágome uje ore chirodipise Pédro. Heródes ajéode u gu ujetiga chijnime Pédro jne iji ore jnusinamáneméi Páscua quigade enga chingo Pédro aja judíode jne.

⁵ Jecute soldádode udore ore chirodipise Pédro iji jurúgaisórone iguíjnai. Mu Jesús anguretasórone ore chejna rángaja to uje ore catecã́ri Dupade ome Pédro.

Dupade chijnime Pédro iji úringai pujurúgai

⁶ Dejai amiri tu uje Heródes chijnimírase Pédro ga chujérase dirome iji ayoréode ajei. Enga Pédro moji darodisórone soldácho gáreode ujai uje ore chigaru Pédro ome ojnaquéro gáredie. Enga soldádode uñane ore chirote guiguíjnai piagoi.

⁷ Pédro chuningame eti Dupade utocaitique chiqueta raja enga díreca guiguíjnai ajei uje Dupade utocaidi díji ore gu. Enga Dupade utocaidi uté chisa Pédro orotabidode ga chiringare enga chojninga: –Pédro, aguito enga ãriji.– Enga jĩrique ojnaquérodie basíji Pédro jmanegataidie.

⁸ Dupade utocaidi chojningápome rĩ: –Adi bagarubi taja ua enga achíe bachiédode.– Pédro chadi dagarubi aja re, ga chuchíe dachiédode. Jé u uje Dupade utocaidi chojninga: –Agui baguidé, babai gaimito, enga ajína yu ga yico.–

⁹ Jecute Pédro nóna Dupade utocaidi, mu que chiraja ujetiga jé ũrepise uje ore doi guesi. Jose denomitígo aja gu.

¹⁰ Ore chise piago bajai mu que piagoi irodisórone chunina ore go. Ore chise piago uñai mu jé ate. Que piagoi irodisórone chunina ore go. Uje ore chise piagode, dajere yuminórone, uje jorídedie guebecho ga chuchẽre dabai bisideque. Jé u uje ore chise guesi ga ore nóna ñane aja dajei. Mu udojo quigade enga Dupade utocaidi noñome Pédro ga gusu Pédro iji dajei.

¹¹ Jé u uje Pédro chiraja uje que enomicho gotique enga chojningame re: –Jé ũrepise uje Dupade chiroque datocaidi aja yu que, ujetiga chijnime yu iji yúringai pujurúgai ujetiga ca Heródes, judíode ore áyipie gajnarénguenie tocade ome yu.–

¹² Pédro qué áyipie déji udore enga jĩrique chicai María iguíjnai uje Juan Márcos daté u. Enga jiépisi Jesús anguretasórone uje qué ore catecã́ri Dupade ome Pédro iji María uaté iguíjnai.

¹³ Uje Pédro chise ore iguíjnai ga chujé piagoi joride. Gapabia tibágui uje i tu Rode enga chojninga: –¿Jé ua gosi a?–

¹⁴ Pédro chajnai ga chojninga: –Uyu u.– Enga jĩrique gapabia chiraja uje Pédro uruode u. Que chuchẽre gai ome gotique mu chayóji Jesús anguretasórone yui, uje irasape re gu enga chojningame ore: –Pédro déji guiguíjnai piagoi.–

¹⁵ Mu Jesús anguretasórone ore chotigásosi ga ore chojningame gapabia: –¿Ja ũrusape ua ya? Pédro a ca u go.– Mu Rode chajo raja enga chojninga: –Jec ũré yu arĩ́e.– Mu ore chojninga: –A ca Pédro u go. Dupade utocaitique a u jõ uje chirote Pédro.–

¹⁶ Mu uje qué ore botare gapabia enga Pédro jé ate uje chujé guiguíjnai piagoi. Mu uje ore chuchẽre gai enga chajuque ore agutedie uje Pédro jé u.

¹⁷ Mu Pédro chajo ore aja jnumi ome dajmanai ujetiga ore cho parac. Enga chingo cucha dacadode quigode ome ore uje Dupade chijnime iji úringai pujurúgai. Enga chojninga: –Angoño udojo aja Jacóbo; jec aja yocujode Jesús anguretasóño uñane ore jnese to.– Chejna udojo guesi enga jno ga chicáji sañeque.

¹⁸ Uje dire enga soldádode chopise dáyugu ga ore botare ñane uje íjnoque ore jurúgai iji jogadi. Enga que ore chiraja quitique.

¹⁹ Enga Heródes chiroque ore aja ujetiga ore chucué, mu que ore chise go. Jecute Heródes catecã́ri soldádode uje bijna ore irodi casé. Enga que ore chiraja daru quitígo ome. Jecute Heródes chiroque darógode uñane aja ore ujetiga ore chujé ore uje bijna ore irodi casé. Udojo quigade ga Heródes jnoji Judéa ga doi guidáidatéi Cesaréa enga cháji uté.

Heródes itoringai isocade u udojo

²⁰ Heródes chetaguipise Tíro, Sidón idaisórone iji dirode udore enga chãraque oredie ome ore ujetiga ore doi cucha pibosode iji uniri. Jecute Tíro, Sidón idaisórone chimate dáyipiedie ujetiga ore chiroque datocaidode aja Heródes ujetiga ore chaquĩ́ra ome ájningai. Mu ore catecãripísi Heródes iroi Blásto bajaque ujetiga catecã́ri darósõri ome ore ujetiga cha dájningai ome ore enga juégapo cucha pibosode ome ore rĩ ujetiga ore doi oré tome iji uniri. Chamáñaje ore posode garani upúsu puniri uté gu.

²¹ Heródes chingo diri taja ore ujetiga catecã́ri ore iji. Chise gojni dojningai dire ga Heródes chacája dáringai eduguéjna iguidedie enga chácariji dayaripi cuchábi gai iji daguíjnai ajei uñai. Enga ajei uñai uté u uje chajire cucha dacadode aja quigode iji. Enga jé u uje cho dojñame Tíro, Sidón idaisórone ore enga que chuseque re ome dojñane udore.

²² Uje ayorébui chudute Heródes ojñane udore enga jé u uje ore chicotapise. Ore chejnapúsu daruode enga ore chojninga: –¿Ja yocujo ayoré uté a? Úngare. Obiréjna ome arecujaidie udire que uje a dupa que.–

²³ Mu jĩrique Yocangarádejnai Dupade utocaidi gateminore chutṍri dequejnarei ome Heródes enga chequésãre. Chamáñaje que chãraque ome ayoréode ujetiga ore chicota enga ore cho Dupade iji. Jecute toi gojni enga júpuchade tagu.

²⁴ Mu Dupade uruode chubu erámi. Chamáñaje ore chacate ayoréode ome iji erámi údode jnese gu.

²⁵ Uje Bernabé, Sáulo ore chimate antioquíagosode ore gueranone aja jerusaléngosode enga ore chajniápo rĩ iji Jerusalén. Enga Juan Márcos nóna ore to.