Héchos 11 - Dupade Uruode

Pédro cho dojñame Jesús anguretasórone iji Jerusalén

¹ Jesús irógode uje apóstoles ore, jec aja Jesús anguretasórone to uje ore déji Judéa, ore chudute purása quedéjnane ore ujnomei to uje ore chimesẽre Dupade uruode to.

² Mu uje Pédro diapo iji Jerusalén rĩ enga judíode uñane ore botare. Pédro adode guetesórone u ore uje qué ore chajo raja ujetiga Jesús anguretasórone dopísi Moisés acajnaquéode quigode to.

³ Jecute ore chojningame Pédro: –¿Jé gotique gu a uje babágui purása quedéjnane enga báta ua aja ore iji ore posode gáyode?–

⁴ Mu Pédro chingopísa cucha dacadode quigode aja ore jec iji taningápisi. Enga chojningame ore:

⁵ –Uje yugúsi ore idai Jope ica ga yicatecã́ri Dupade. Uje qué yicatecã́ri ga yimo yenominone. Yimo pepeque cuchábi uje tṍraji gaté. Uje pigaricho erué gagájnione. Enga diga basája yiquei.

⁶ Uje yajire ajei enga yimo cuchiso ponáyone, jec aja chugúperone, ugade ore to.

⁷ Enga darade tṍraji gaté enga chojningame yu: "Pédro á, ayague. Ajé cuchade udore uñeque enga agu."

⁸ Mu yojninga: "Úngare á. Cáma yagu to go cuchiso puyade, isójnane ore, uje puyágome judíode uyoque."

⁹ Mu yudúdapo darade rĩ ga chojningame yu: "Dupade juéga ujetiga agu, enga ca opo cucha puyáguiji to rĩ."

¹⁰ Enga gadioque uje yudute darade mu darade jé chojmára. Mu quigade ga pepeque cuchábi jnome gaté enga que diapo rĩ.

¹¹ Uje yenominone jĩrique íjnoque ga jnani gadiógode di iji yu iji yiyaridi guiguíjna. Cesaréagosi Cornélio iroque ore aja yu ujetiga ore chucué yu.

¹² Enga Dupade Ujopié Espíritu Sánto chojningame yu: "Ca etaque jeta ajína ore, enga ca agutu ua ome ore. Uyu uje yiroque ore aja ua gu." Jecute yijína ore. Enga yujode Jesús anguretasõre jnani chojmára iji tíode ore nóna yoque to. Yojningane u yijorane udore uje ore déji yocari iji de. Uje yico Cesaréa enga yacágoja yoquibidisṍri iguíjnai ajei.

¹³ Jnani uté chingo denominone aja yoque uje chimo Dupade utocaidode gateminore uñeque iji daguíjnai. Enga uté chague iji iquei enga chojningame: "Aroque barótigo aja Jope ujetiga ore tibidi Simón uje i uñai u Pédro to.

¹⁴ Ujetiga uté chise uaque enga a chingo Dupade uruode aja uaque jne ujetiga bajogasui uhuaque eso uacáringane piquetaque to."

¹⁵ Uje qué yacate ore mu Dupade Ujopié Espíritu Sánto basája ore gai. Adi jé u uje basája yoquibai ica iji taningai.

¹⁶ Enga jĩrique yáyipie déji Yocangarádejnai Jesús acajnaqué casodica uje chojninga: "Juan chaca ore edodie iji yodi, mu e idógosi jeta Dupade Ujopié Espíritu Sánto chacája uaque to."

¹⁷ Dupade u diríca uje chisi ome Dajopié Espíritu Sánto ome purása quedéjnane ore. Adi jé u uje chisi ome Dajopié Espíritu Sánto ome yoque to uje yanguretágo Jesucrísto. ¿Jé yorási rique a jeta yetaque Dupade áyipiedie udaji?–

¹⁸ Mu uje Jesús anguretasórone iji Jerusalén ore chudute Pédro ojñane udore enga ore cha detétigade ome Pédro. Enga ore chicota Dupade enga ore chojninga: –Obiréjnapise uje Dupade juéga re ome purása quedéjnane to ujetiga ore chécãre dáyipie quigode udore enga ore gajneque Dupade guerani pucuecaringué iji deréjnane jnese to.–

Jesús anguretasórone adode u udojo iji ore idai Antioquía

¹⁹ Uje ore chujé Estéban ica ga ore chopo damajo Jesús anguretasórone uñane to rĩ. Jecute uñane chayome damajosórone enga ore chicáji ore idai Fenícia. Jec uñane chicáji Chipre. Jec uñane chicáji Antioquía. Enga ore chacate ore iji pidáyode udore jnese ome Jesús adode. Mu ore acajnaquéode gajnengórone u judíode enga que ore chacate purása quedéjnane to.

²⁰ Mu Jesús anguretasórone uñane, chípregosode, cirénegosode ore chise Antioquía. Enga ore chacate purása quedéjnane iji Antioquía ome Yocangarádejnai Jesús adode to, enga unere ore acajnaquéode quigode.

²¹ Dupade Ujopié Espíritu Sánto dépisi ore gari. Jecute jiei purása quedéjnane uje ore cha dangurete cucha bajade enga ore changureta Yocangarádejnai Jesús to.

²² Jesús anguretasórone iji Jerusalén ore chudute uje jiei purása quedéjnane iji Antioquía uje ore changureta Jesús to. Jecute ore chiroque Bernabé aja Antioquía ujetiga jé tibágui ore.

²³ Uje Bernabé díji Antioquía enga irasiguipise re uje chimo uje Dupade chatapísaja purása quedéjnane to. Enga Bernabé cho ore quique enga chojninga: –Ejnáño uágaja Yocangarádejnai Jesús adode enga adotáyo uáguiji.–

²⁴ Jnani paraque Bernabé gu enga changuretapise Dupade. Enga Dupade Ujopié Espíritu Sánto irágu ajei. Jecute jiei ore uje ore changureta Yocangarádejnai Jesús ome Bernabé acajnaquéode.

²⁵ Udojo quigade enga Bernabé chucué Sáulo iji ore idai Társo. Uje chise Sáulo ga jno údi aja Antioquía to.

²⁶ Ore guejna sequeré chojmára iji Jesús anguretasórone gari iji Antioquía, enga jiei ore acadigode iji antioquíagosode ujade. Bajade u antioquíagosode uje ore chĩ́care Cristiánone aja Jesús anguretasórone iji ore ujade.

²⁷ Uje Bernabé, Sáulo qué ore déji Antioquía ga Dupade uruode atatasórone uñane ore díji Antioquía uje ore garani u Jerusalén. Jnanione udore u uje Dupade chingo cucha piqueminórone ome ore ujetiga ore chajnerame dojode Jesús anguretasóño to.

²⁸ Udore uñai i tu Agábo enga uté chague iji dojode Jesús anguretasóño ajei. Enga chingo ore uje chaguhérigo a di jne iji erámi údode jnese. Chiraja udojo gu uje Dupade Ujopié Espíritu Sánto chingome. Enga jé ũrepise uje atatagode udore tocade uje ore eduguéjnai u Cláudio.

²⁹ Enga Jesús anguretasórone iji Antioquía ore pésu dáyipiedie ome ñane ujetiga ore chátaja dojode Jesús anguretasóño iji Judéa. Ujetiga ore iplátadie déji ome ore enga que ore chise deranone unerotiguérique to go ujetiga ore chisi ome ore.

³⁰ Enga jé u uje ore chamáta deranone aja ñane ga ore chisi ome Sáulo, Bernabé ore ujetiga ore jno údi aja Jesús anguretasórone angaránone iji Judéa, ujetiga ore chajuguína dojode Jesús anguretasóño.