Héchos 10 - Dupade Uruode

Cornélio tibidi Pédro

¹ Jnani déji ore idai Cesaréa uje i tu Cornélio. Enga soldádode uje ore batigai u 100 cho deduguéjnai iji uté, uje ore uague i tu "Italiáno."

² Jnani uté, jé aja jogasui ore jnese, ore cho dangureni iji Dupade enga ore tangaripísi. Uásejna Cornélio uté icaniratiguéode ome jmatágode iji judíode ujade, enga jecucha ga catecã́ri Dupade.

³ Dire uñai uje guedé cho jñuque ga Cornélio chimo denominone. Dupade utocaidi gateminore chacája gari enga chiqueta raja. Enga Dupade utocaidi uté tibidi enga chojninga: –Cornélio á.–

⁴ Mu Cornélio todópisa ga toji Dupade utocaidi gai, enga chojninga: –¿Gotique a?– Enga Dupade utocaidi chajnai ga chojninga: –Dupade chimesẽre bacatecãraitigade. Enga irasique ua ome bátegoningáne uje basi jmatágode iji baplátadie.

⁵ Aroque barótigo aja ore idai Jope ujetiga ore tibidi Simón uje i uñai u Pédro.

⁶ Uté déji Simón uñai iguíjnai uje cucha aode acangore. Iguíjnai déji yote quedéjnai edógai. Enga Simón Pédro uté a u jne ujetiga chingo bapesutígaja ua jne.–

⁷ Uje Dupade utocaidi jnoji gari ga jĩrique Cornélio tibidi daroque gáreode. Tibidápoi soldádode uñai rĩ uje iroque to. Soldádo uté cho dangureni iji Dupade to.

⁸ Cornélio chingo denominone aja ore bajaque. Quigade enga chiroque ore aja Jope.

⁹ Dire uñai uje qué ore chirõre Jope, mu Pédro choru guiguíjnai ujetiga catecã́ri Dupade iji ójo. Guedé a déji gatócoro.

¹⁰ Enga chaguhei chejna Pédro enga unere chagúi yui ome. Mu uje qué ore pésu posode ga Pédro chimo denominone.

¹¹ Enga Pédro chimo gaté uje chuchẽre dabai enga chimo pepeque gajnu cuchábi uje tṍraji gaté uje pigaricho erué gagájnione. Enga pepeque gajnu cuchábi uté basája iquei.

¹² Enga cuchiso ponáyone déji bora ajei jnese; jec aja ugade, chugúperone ore rĩ.

¹³ Enga Pédro chudute darade uje tṍraji gaté uje chojninga: –Pédro á, ayague. Ajé cuchisode udore uñeque enga agu.–

¹⁴ Mu Pédro chetaque. Chojningame yocangarádejnai: –Úngare á. Cáma yagu to go cuchiso puyade, isójnane ore uje puyágome judíode uyoque.–

¹⁵ Mu chudúdapo darade rĩ enga chojninga: –Pédro á, Dupade juéga ujetiga agu. Enga ca opo cucha puyáguiji ore rĩ.–

¹⁶ Pédro chudute darade ga gadioque enga darade jé chojmára gatuaque. Mu quigade ga pepeque gajnu cuchábi jnome gaté enga que diapo rĩ.

¹⁷ Mu uje Pédro qué cho dáyugu denominone uje que chiraja quigode enga Cornélio irógode e ore chise Simón uñai iguíjnai piagoi. Uje ore catecã́ri ore aja dajesúode ome Simón iguíjnai jogatique.

¹⁸ Enga ore chejnapúsu daruode ga ore chojninga: –¿Ja ca Simón Pédrorique upusiédode u uáguiji ne a?–

¹⁹ Mu Pédro qué áyipie déji denominone. Enga Espíritu Sánto chojningame: –Pédro á, jnani gadiógode qué ore chucué ua.

²⁰ Be jnumi ga abágui ore. Enga ca etaque jeta ajína ore enga ca agutu ua ome ore. Chamáñaje uyu u gu uje yiroque ua aja ore.–

²¹ Jecute Pédro doi jnumi tiji guiguíjnai ójo ga tibágui Cornélio irógode enga chojningame ore: –Pédro u yu, uacacuei. ¿Uacagaitique a?–

²² Ore chojningame Pédro: –Yoqueduguéjnai Cornélio chiroque yoque aja ua enga e yico ua. Uerate yoquirósõri Cornélio adode. Dopísi Dupade adode ga judíode jnese ore irasique enga ore tangári. Chimo denominone diríca enga chimo Dupade utocaidode uñai enga uté chojninga diríca: "Abidi Pédro ujetiga angáchoi acajnaquéode to." Jecute chiroque yógaja ua diríca.–

²³ Uje ore chejna daruode udore guesi enga ore chacája Pédro upusiédi guiguíjna to enga ore moji uté iji dejai tuté. Mu uje e dire enga Pédro nóna ore, enga Jesús anguretasórone uñane uje ore idai u Jope enga ore nóna ore to.

²⁴ Dire uñai ga ore díji Cesaréa. Cornélio jorane, jé aja iguiosode e dimane ore iji iguíjnai ujetiga ore tangári Pédro ojñáringo to.

²⁵ Uje Pédro ore di ga Cornélio doi guesi tiji daguíjnai ujetiga chachai ore. Uje chise ore enga jĩrique chichaga dagataidie aja jnumi iji Pédro iquei enga chicotapise.

²⁶ Mu Pédro chojningame: –Ãriji. Ca achaga bagataidie aja jnumi iji yiquei. Bojo jnani yu enga jé yo ua.–

²⁷ Enga Cornélio niji ga ore catecã́ri ñane aja guiguíjnai ajei yui. Enga Pédro chimo ayorébui iji guiguíjnai ajei.

²⁸ Enga Pédro catecã́ri ore ga chojninga: –Uacarajáyo uje puyágome judíode uyoque ujetiga yátago yógaja purása quedéjnaringo iji ore uágueraque. Puyaque rĩ ujetiga yacágoja purása quedéjnarique iguíjnarique. Mu yimo yenominone diríca enga Dupade chingo yu ujetiga ca yopo cucha puyáguiji yujórique jnani uñeque rĩ.

²⁹ Jecute jĩrique yijína uacarógode diríca enga que yãra yu iji cuchárique. ¿Mu gotique gu a uje uacabichoi yu?–

³⁰ Enga Cornélio chajnai Pédro enga chojninga: –Dirode e gagájni uje yimo yenominone to iji yiguíjnai. Enga guedé jogadi jé u udé diríca. Yo uyatáguiji yu diríca enga yicatecã́ri Dupade iji guedéjnoringái uje jecucha yate. Enga Dupade utocaidi uñai chiqueta raja yu enga iguidé nanganata.

³¹ Enga uté chojningame yu: "Cornélio á, Dupade chudute bacatecãraitigade enga chimo to bátegoningáne uje basi jmatágode iji baplátadie.

³² Aroque barótigo aja ore idai Jope ujetiga ore tibidi Simón uje i uñai u Pédro. Uté déji Simón uñai iguíjnai uje cucha aode acangore. Iguíjnai déji yote quedéjnai edógai. Ujetiga Simón uté di jne enga a chacate uágome yuruode jne."

³³ Jecute jĩrique yiroque yirógode aja ua diríca ujetiga ore di bádi. Enga omipise uje e bãríji yoque. Bamo uje dimane yóguiji de iji Dupade iquei ujetiga yangácoi batatagode jnese uje Yocangarádejnai Dupade chiroque ua aja ujetiga atata adode ome yoque.–

Pédro acajnaquéode u udojo ome Cornélio ore

³⁴ Pédro e chacate ore enga chojninga: –Quene yiraja uje Dupade que cãra dasocárique ome erámi unirisórone uyoque iji erámi jnese.

³⁵ Mu chimesẽre erámi unirisórone ore jnese iji erámi údode uje ore tangári enga ore chejna rángaja dátegoningáne.

³⁶ Jesucrísto u uje di Dupade uruode údi ome jnani bajai Israel ape disi ejode uyoque ujetiga pajesereringai chise yoque ome adode. Mu que gusu israélgosode uje yocangarádejnai u Jesucrísto mu uté gajneque erámi jnese, jecute jé tiógara ujetiga ore cho dangarádejnai iji to iji erámi údode.

³⁷ Uacarajáyo uje bajaque Juan nanique uje chacate ayoréode enga chaca ore edodie iji yodi. Mu quigade u uje Jesús chatata Dupade uruode ome ore. Ore chudute atatagode Dupade urúo bajaque iji Galiléa iji taningai mu quigade enga chubu erámi enga chise ore to iji Judéa údode.

³⁸ Enga uacarajáyo to uje Dupade chisi nazarétgosi Jesús iji Dajopié Espíritu Sánto, enga adode omío iji dajesúode erámio. Enga chiqueta Satanás utocaidode píode uje Satanás cho dajuñame ore. Chamáñaje Dupade déji gari gu.

³⁹ Enga Jesús imosórone u yoque. Uje yimóngo ipesudode cucha jnese uje pésu iji Judéa údode, jec iji ore idáidatéi Jerusalén rĩ. Mu udojo quigade ga ore chujé ga ore chajo aja curesei.

⁴⁰ Toi mu Dupade chiquetápo rĩ uje dirode gadióguiji yui iji itoringai. Mu quigade enga Dupade chingo dabi Jesús aja yoque to uje ecápo rĩ.

⁴¹ Dupade ajéode u iji taningai ujetiga Jesús pijogúsorone u darógode uyoque, uje yátago yógaja iji posode, jódode cucha otate gáyode iji itoringai quigade diríca. Jecute chiqueta raja yoque, mu que chiqueta raja ayoréode jnese go.

⁴² Enga chiroque yógaja erámi unirisórone iji erámi údode jnese ujetiga yacaco ore, enga yingongo ore uje Dupade ajegaidi u Jesús uté ujetiga pésu togode, uecade ore adode aja quigode jnese.

⁴³ Dupade uruode atatasórone jnese iji jnani bajade, ore urusarane júdi u Jesús jnese uje ore chojninga: "Ore jnese uje ore changureta uté enga ore gajnei tu jne ujetiga pĩroque ore isijnaringuéone."–

Espíritu Sánto chacája purása quedéjnane to

⁴⁴ Uje qué Pédro chacate ore ga Dupade Ujopié Espíritu Sánto basája ore gai jnese uje ore tangári acajnaquéode.

⁴⁵ Mu Dupade anguretasórone uje judío ore enga ore jõra Pédro aja Cesaréa diríca, ore tija jnese. Uje Dupade Ujopié Espíritu Sánto basája purása quedéjnane gáyode to uje que judío ore to múñi.

⁴⁶ Ore chimo gu uje ore doi puru quedéjnane uje ore chicota Dupade.

⁴⁷ Enga Pédro chojninga: –¿Ja parenguirase ome ore a ujetiga parãte ore aja yodi? Uacamóño gu uje ore cho yoque uje Dupade Ujopié Espíritu Sánto chacája ore ajéode to.–

⁴⁸ Jecute Pédro chiroque ore aja ujetiga ore chaca ore iji yodi. Chamáñaje ore changureta Jesús gu. Iji bautísmo quigade ga Cornélio ore chaquĩ́ra Pédro ujetiga ore chejnape díningo iji ore gari.