Hebréos 9 - Dupade Uruode

Dupade iguíjna gaté jogosṍri sué Dupade iguíjna jnumi jogosṍri gai

¹ Yirajágo uje Dupade áyipie bajedie quigode cuse nanique ujetiga jnanione ore pésu udore aja quigode jnese. Enga Dupade iguíjnai cuse to ome udore uje pipesute ome erámi unirisórone.

² Uje ore pésu Dupade iguíjnai tuté nanique enga quigode u unojo: ore pésu ajé bajai enga ore chĩ́care Ajé Puyai aja. Enga mésa déji ome arureque puyade, enga ore apósode dépoji rĩ.

³ Enga borapeque cuchábi chijna Ajé Puyai iquei, mu borapeque cuchape gatei dépoji ajé uñai yui te rĩ uje i tu Ajé Puyaguipísi.

⁴ Gaserani déji Ajé Puyaguipísi uté rĩ uje óro ueque. Enga uté u uje ore chãru cucha ai unérone iji. Cuchade pi dépoji rĩ enga óro déji gañámi jnese. Cuchade pi uté i cuse to enga ore chĩ́care Dupade uru iyiejájnane pi cajo aja. Co déji cuchade pi uté ajei to rĩ enga óro uegue co uaté to. Enga Dupade iringuíone arureque déji ajei uje i tu maná. Enga jnani bajai Aarón ogué dépoji cuchade pi tuté ajei to rĩ. Uje ogué uaté u uje agatadi sué nanique. Enga Dupade áyipiedie jogotodie cucaranei dépoji cuchade pi ajei to rĩ.

⁵ Dupade iroque gateminórone gajnúone déji cuchade pi uté gai uje ore íode u querubíneone. Ore cháji gai gu uje qui tu uje Dupade déji uté to. Enga querubíneone udore ore ujnóngone suru jogadi gai uje pĩroque pisijnaringuéone iji. Quique uñane qué déji mu que togome yoque ujetiga qué yajnerango údi.

⁶ Mu Dupade iguíjnai ajéode udore jé adode u, enga pangaránone uje ore catecã́ri Dupade ome ore, ore pésu cuchade aja ñane iji Ajé Puyaque bajai uté iji dirode jnese.

⁷ Mu que ore chacája ajé uñai uje i tu Ajé Puyaguipísi iji dirode jnese gotique. Písõri chojmára enga pangarádejna cuchábi u uje chacája mu chojmára iji sequeredie enga e gusu. Enga que chimoque uje chacája enga chijna cuchisode iyode iji dajmainie ujetiga catecã́ri Dupade ome dasijnaringuéone, jé ome darasade ore isijnaringuéone to rĩ.

⁸ Dupade Ujopié Espíritu Sánto cho cuchade udore quique ome yoque enga chósi te: uje pangaránone qué ore pésu cuchade aja quigode iji ajé bajai, enga jé basa que pibípise Ajé Puyaguipise uñai uté ome ayorérique.

⁹ Enga jé adi tu to iji deréjnane unojo to rĩ: uje ore tẽrája Dupade ome cuchade iji deréjnane unojo to, enga ore tẽrapója Dupade ome degode cuchiso to rĩ, mu cáma ore chise dáringane ujñapeque go ome dadode udore.

¹⁰ Jé upo ore isocade rĩ ome cucha pibosode, cucha pódode ore. Jé upo rĩ uje ore churu raque gatuaque ome cucha puyade. Mu que urénga cucha udore bisitique pijoque go. Enga pisocade udore jnese eruei tu uje Dupade e chécãre pisoca bajade udore ome pisoca icha ejode.

¹¹ Enga Crísto e di icaite. Jecute uté e u pangarate cuchábi ujetiga catecã́ri Dupade ome yoque. Enga uté diapo cucha pagutíyamánone údi iji yoque to rĩ. Uté jé upo rĩ uje e pésu cucha dacadode aja quigode iji Dupade iguíjnai ajei. Mu uté charidi Dupade iguíjna suépise pangarate bajade ore charidode gai. Uje uté charidi guiguíjna déji guéode uéchai gu. Enga que ayorérique ipesute charidi tuté go uje que déji erámi uné gu.

¹² Enga Crísto uté chacája guiguíjnai Ajé Puyaguipísi iji gaté. Mu que gaidi u ujetiga tẽrája Dupade ome erámoro quedéjnai iyórique jeoga ternéro iyórique. Mu edugádi jé u dayópisi. Enga uje e tẽrája Dupade ome dayoi tuté enga que tẽrapója Dupade rĩ iji Ajé Puyaguipísi uté rĩ iji deréjnane. Gome gu ujetiga chojmára, enga adi jé u uté uje chise pucuecaringué eyúgojmai ome danguresórone uyoque jnese.

¹³ Jé ũré yu ome unojo: ujetiga gosi iñoñaringuei cuse nanique enga pisoca bajade udore ore u uje chinoningase uté gosi iñoñaringuéone nanique. Yojningai u uje pangaránone ore chuta ore nanique ome tórode iyode, jeoga erámoro quedéjnane iyode. Jé u to uje ore chãru deguedie vaquílla iji gaserani gai nanique enga ore chaguñéra dabáyode ome udire urúode. Enga adi jé u uté nanique uje ore iñoñaringuéone bijna ome ore, mu jé gusu iji ore gañámi.

¹⁴ Ujetiga cuchisode iyoi chinoningase ore adode nanique iji ore gañámi, jétapũré Crísto iyoi ome yoque. Chamáñaje Dupade Ujopié Espíritu Sánto eyúgojma jogonóri u Crísto nanique uje tẽra re ome Dupade ome yoquisijnaringuéone. Enga que iyoguérique cusipise go nanique uje tẽra re ome yoque. Jecute ujñapeque uté iyoi ujetiga chĩropise yoquisijnaringuéone jnese, uje pisijnaringuéone udore jnorase yocúdi aja pitoringai nanique. Jecute e íjnoque paguté joradie iji yoque ome yoquisijnaringuérique, enga e que yagutúgo yógome Dupade uecai iroquéode ujetiga yicoi.

¹⁵ Jecute yimóngo uje Jesucrísto u uje pésu Dupade áyipie ichadie úringanie ujñapetei. Toi gu nanique ujetiga cho yoquisijnaringuéone oré ome dayoi. Yojningane u yoque uje yiyógo Dupade áyipie bajedie gáyode gatuaque nanique. Mu Crísto uté e ipesute ujetiga Dupade ibidigode uyoque yocajneque Dupade ojningane cucha jnese, uje cuchade udore que eruénique erãpe cuse iji deréjnane.

^16-17 A yacãra yacajnaquéode jne aja jnanírique uje chingo dagúcha omone ome dabode ujetiga ore gajneque jne. Enga doi enga churúsãre dáyipiedie udire. Mu uje qué uté eca enga áyipiedie cáma tocade gotique ome ore. Mu quigade uje e toi enga quene udore ore pijógome jnani tuté ingoméone cucha ome ore.

¹⁸ Enga adi jé u ome Dupade áyipie bajedie to. Quene chise dáringanie ujñapetei uje chuque cuchisórigo nanique.

¹⁹ Ajnusináño Moisés ate bajade ome darasade. Uje uté chingo Dupade áyipie bajedie ome darasade jnese bajaque. Quigade enga doi tórode, erámoro quedéjnane ore enga chujé ore. Chisa ore iyode enga chaníraja yodi. Quigade enga doi áyasa ojo caratade enga pésu pamatadé iji. Chacáji yodi uje diquiyode chimera enga doi gojni enga chuta darujna aode gai uje Dupade iroquéode déji. Chutapo damatadé caraté aja darasade ójodie jnese rĩ.

²⁰ Enga jé u uje Moisés chojningame ore: "Diquiyojna unaque imoi tu uje e ujñapetei Dupade áyipiedie. Yojninganie u Dupade áyipiedie udire uje Dupade e chiroque uágaja ujetiga beyoi udire quigode jnese."

²¹ Moisés chutapo cuchisode iyojna aja Ajé Puyai, Ajé Puyai ajeminórone cucha jnese to nanique rĩ.

²² Dupade áyipiedie quigode u ujetiga puta piyojna aja cuchade ujetiga chinoningase cuchade úringane noñácho. Enga que urénga cuchárique déji ujetiga ca Dupade pota ujetiga puta ome piyojna nanique. Jecute yirajágo ome udore uje a ca pojneque piyórique, enga que puruque pisijnaringuéringo to iji deréjnane unojo to.

Jesucrísto úringai toque u uje chinoningase pisijnaringuéone jnese

²³ Jecute yirajágo uje quene ujñapeque cuchade iji Dupade iguíjnai jnumi jogonore uje ore chuta udore ome dẽrapáidode cuchiso iyojna nanique. Mu cachi cucha gajnúo cuchade udore jnese iji jnumi jogonore Dupade iguíjna. Mu cucha ũrepísode u cuchade udore uje ore déji Dupade iguíjnai gaté jogonore. Jecute que iyieguipisirase diquiyojna te jne ujetiga chinoningase cuchade udore iji gaté.

²⁴ Dupade iguíjna jnutiminóri uné imoi u Dupade iguíjnapísi iji gaté. Mu Jesucrísto que pi u Dupade iguíjna jnutiminóri gotique, mu pi u gateminóri. Enga jé déji uté enga narare yoquibai iji Dupade iquei iji gaté.

²⁵ Yirajágo uje pangarádejna cuchábi judío uje catecã́ri Dupade ome darasade iji sequeredie jnese que chijna dayopísirique gotique uje chacája Ajé Puyaguipísi. Mu oidi u cuchisode iyode. Mu Crísto tẽra re enga chojmára ome Dupade, enga jé gusu iji deréjnane jnese.

²⁶ Ujetiga Crísto gajnei urásu ujetiga tẽra re gatuaque jé iji taningane uje Dupade pésu erámi, jé aja deréjnane unojo, enga a e uásejnapisirase. Mu que quigode u udore go. Mu Crísto quene chingo raja erámi iji erámi tuné eruei yúode. Enga jé u uje tẽra re ome yoque ujetiga cho yoquisijnaringuéone oré. Enga chojmára uje tẽra re nanique, enga e gusu.

²⁷ Adi jé u uje yitogoi enga chojmára to. Enga quigade u uje pajirique yocadode aja quigode enga pipesute yoquiquigode rĩ.

²⁸ Isocai jé u Crísto. Uje toi enga chojmára enga chisi ome re ujetiga pĩroque yoquisijnaringuéone. Quigade enga a diapo jne rĩ. Enga diringane gare uje chise erámi. Bajai u nanique ujetiga chĩro pisijnaringuéone. Mu diringai ejoi u ujetiga chiqueta uyoque jnese jne uje yiroco yui.