Hebréos 8 - Dupade Uruode

Dupade áyipie ichadie ipesungóri u Yocangarádejnai Jesús

¹ Yacajnaquéode quique obiréjnai u uje Jesús u yocangarate cuchábi tuté enga chácariji Dupade ãrachua iji guéode uéchai.

² Enga e pésu cuchade aja quigode iji Dupade iguíjnapísi uje déji gaté. Enga que ayorérique ipesute guiguíjnai tuté go, mu Yocangarádejnai ipesute.

³ Yirajágo uje pangarate cuchábode jnese uje ore catecã́ri Dupade ome darasade ore gajnei u to icaite ujetiga ore tẽrája Dupade ome darasade gueranone cucha, jé ome cuchiso pẽrapáidode to rĩ. Jecute que toc ujetiga pangarate cuchábi Jesucrísto ca tẽrája Dupade to ome cuchárique.

⁴ Mu ujetiga Jesucrísto jé jogadírase erámone unojo enga a ca ore chorase pangarate cuchábi iji ujetiga catecã́ri Dupade ome ore. Chamáñaje ore angaránone cuse gu ome udore ujetiga ore doi Moisés urusarane quigode ome deranone cucha ome Dupade.

⁵ Mu pangaránone udore iji dirode unojo ore angúroméone jé u Moisés acajnaqué diyajmane ome dasagode cucha. Mu ore isocade cachi cucha gajnúo. Mu pisoca ũrepísode u uje pipesute iji gaté. Yirajágo unojo gu uje Dupade jé urúo ome Moisés nanique uje chojninga: "Ajusípise bapesudi yiguíjna jnutiminore guio ujetiga jé chopise yiguíjna gateminóri uje yingo quigode ome ua iji cucarani gaté."

⁶ Mu pangarate cuchábi Jesucrísto uje catecã́ri Dupade ome yoque isocade sué pangaránone uñane isocade gáyode uje ore angúroméone u Moisés urusarane. Jé basa Dupade áyipie ichadie ipesusṍri u Jesucrísto enga Dupade ingoméone cucha ome Jesucrísto anguresórone uyoque suépise ingoméone cucha gáyode ome Moisés urasade to nanique.

⁷ Jecute ujetiga Moisés urusarane Dupade áyipie bajé pesurásu ayorérique úringárique ujñapetaque, enga a ca pipesudaporase áyipie ejórigui rĩ.

⁸ Mu Dupade chiraja nanique uje que ore ujñapeque, urása bajade. Jecute purusãracho Dupade uruode ome ore iji Dupade uruode enga chojninga: A chise dínique jne ujetiga yipésu yáyipie ichárigui jne ome Israel, Judá ore ape disi ejórigo.

⁹ A jé ca isocai tu yáyipie bajedie jne ome ore dai cásodicáite ore. Uje yipésu yáyipiedie udire ome ore nanique uje yijnime ore iji Egípto nanique. Mu que ore doi yáyipiedie quique bajade nanique, jecute que yangarapoi ore yúrique rĩ.

¹⁰ Jecute a yipésu yáyipie ichárigui jne ome israélgosode ape disi ejórigo ore. Enga a chósi te jne: A yicha yáyipiedie aja ore áyipiedie jne. Enga a ca jnoji ore ajéode jne. Enga gajnui u jne ujeta purúsãrai yáyipie ichadie iji ore áyipiedie. Jogadi jé u jne ujetiga ore idupade u yu. Jé basa ga a yurása ore jne.

¹¹ A ca uñeque doi enga chacate dojórique ayoré ome yadode jne iji dirode udore. A ca uñeque chopo dojórique ayoré quique ome yu to jne rĩ enga chojninga: "Omi tu ujetiga arajáyo Dupade adode to." Chamáñaje a ore chiraja yu jnese jne: ayoredatéode, jé aja ayoré gajnaréngone ore jnese.

¹² Enga a yĩro ore isijnaringuéone jnese jne. Enga a ca yujnusinápo ore ate gajnaréngone rĩ iji deréjnane jnese.

¹³ Uje Dupade chĩ́care dáyipie ichadie enga obiréjnapise uje áyipie bajedie e que ujñapeque ome Dupade. Enga yirajágo uje que cuchárique ujñapeque enga jĩraque íjnoque.