Hebréos 7 - Dupade Uruode

Jesús, Melquisedec jé ore ujo Dupade catecãraisõre ñane icaite

¹ Melquisedec uté jé u uje Salem idaisórone ore eduguéjna cuchape icaite. Enga Dupápisi jé ipesute úringai pangarate nanique ujetiga catecã́ri Dupade ome darasade. Abraham di nanique iji ore jocaningai uje ore sué eduguéjna cuchábode gáyode nanique, enga Melquisedec chachai iji garani nanique. Enga chimo, enga chacacãre ejode nanique.

² Abraham tẽrája Melquisedec ome dasagode cucha péode uje di údi iji ore jocaningai nanique. Enga chisecãru nanique. Uje cuchade e chise 9 enga Melquisedec e gajneque jõrai. Enga adi jé u ome dasagode cucha jnese uje chisi ome Melquisedec. Melquisedec uté i quigode u "eduguéjna áyipierãque" nanique. Enga uté idai Salem i quigode u "tijójnaringuéone." Jecute Melquisedec i uñai u "tijójnaringuéone jogosórone eduguéjna."

³ Mu que pijoque Melquisedec datéraque, danique, dáquirigo ore nanique. Que pirajagápo batigárique dire nanique rĩ. Que pirajagápo isocárique rĩ ujetiga toi. Jecute Jesús, Dupade Abi, gajnui u Melquisedec enga úringai pangarate jé jogate iji deréjnane ujetiga catecã́ri Dupade ome ore.

⁴ Jecute adójningachopísa Melquisedec úringai cuchape to nanique. Enga a ca cuchabirase nanique enga yocai jnani bajai Abraham a ca chisírasome dasagode uñéngo ome nanique iji dajocaningane uje chajnose eduguéjna cuchábode uñane nanique.

⁵ Uacarajáyo Moisés urusarane quigode uje Leví ape disi ejode u nanique ujetiga ore chisa darasade ore gueranone dagúcha pecho ome Dupade nanique uje i tu "la décima parte." Sacerdote ore, jecute ore u uje ore chutai darasapísode ore ome dagúcha péode udore, mu jé ũré uje utaisórone, utaidode ore úringai Abraham ape disi ejo chojmáriji jnumi jnese.

⁶ Mu Melquisedec que Leví ape disi ejo gotique. Bajaque gu ome Leví ore. Mu Melquisedec jé chutai dajnepídi iji Dupade uruode gajnesṍri Abraham ugúchade to nanique. Enga Melquisedec úringai cuchape pijoque gu uje acacarãque Abraham tuté nanique.

⁷ Que potigayaquérique déji uñeque ome unojo: gosi ujetiga doi enga chacacãre dojórique ayoré enga uté gosi sué dacacarãi tuté gai.

⁸ Yirajágo uje ore jnese uje ore chisa yoqueranone yocugúcha péode ome Dupade iji dirode unojo, yocujo ayoré pitoringai amatate ore. Mu Melquisedec jé cãrápisa re ome udore ore, uje Dupade uruode que chatata itoringárique isocárique. Chorase ujetiga ca toi nanique.

⁹ Jecute ísenga Leví, ape disi ejode, jé aja udore ore uje ore chutai Dupade gajnéone iji yoque iji deréjnane unojo gajneri, ore chisi dagúchade petígo iji Melquisedec to nanique. Enga isocai jé urásu ujetiga ore dérasi Abraham gari nanique uje Melquisedec chachai nanique enga Abraham tẽrája.

¹⁰ Chamáñaje cáma ore base nanique enga jé jogate ore iji dãrapi Abraham ajei nanique uje Melquisedec chachai iji dajei.

¹¹ Yirajágo uje israélgosode uyoque yirajágo Moisés urusãraque puyade gu yocacadisórone uje yĩ́caco levíteode aja ore. Enga yocacadisórone udore ore garani u Leví ape disi ejoi Aarón jnese. Mu que ore acajnaquéode chimate yógaja yocúringáringo arécho. Jecute Dupade chisi ome pacadisõre uñai ome yoque uje jé cãra rome Aarón ore. Mu chopise jnani bajai Melquisedec.

¹² Ujetiga pecaranguírase pangaránone ujetiga uñeque basája udore ore jogadi ujetiga chacate yógome Dupade ipotigádode cucha, enga cucha amiri tu ujetiga pecãraque Dupade iroquéode ome pacajnaqué ichárique to rĩ.

¹³ Enga ore urusarane Dupade urúo chatata uje Yocangarádejnai u pangarate ichai tuté ujetiga cho yoquiquique ome Dupade ipotigádode cucha. Mu que uté gãrapi u jnani bajai Leví go, mu gãrapi u Jacob ujnacare uñai Judá. Enga que Judá ape disi ejode uñeque cuse nanique ujetiga pangarate enga catecã́ri Dupade ome darasade.

¹⁴ Ore chiraja jnese uje Yocangarádejnai gãrapi u jnani bajai Judá nanique. Enga jnani bajai Moisés que acajnaquei u go nanique ujetiga jnani bajade ore cho dangaránone iji Judá ape disi ejode ujetiga ore catecã́ri Dupade ome ore.

¹⁵ Jecute yipáñangopísiji uje Dupade e chécãre cuchade jnese. Jecute yocangarate ichai cuse iji deréjnane unojo, enga u Jesucrísto. Enga uté cunguésõripísi Melquisedec, jnani bajai.

¹⁶ Enga que Crísto chise dáringai pangarate gu ayorérique acajnaquérique ujetiga garani u jnani bajai Leví. Mu chise dáringai pangarate gu dajopiédaté uje ecáji deréjna pitade.

¹⁷ Jecute Dupade ojningai jé upúsu Crísto uje chojninga: Báringai pangarate a ca eruénique cuse jne ujeta acatecã́ri yu ome barasade. Uje jé bopise Melquisedec gu.

¹⁸ Jecute yimóngo uje Dupade e chicháji ti yui daroqué bajade ome Moisés. Uje piroquéode udore que etotiguérique cuse gu ujetiga chécãre ayorérique atígo.

¹⁹ Enga Moisés urusarane cucha puyácho que pésu ayorérique úringárique ujñapetaque nanique. Mu pacajnaqué ichade uje basája udore jogadi u uje suépise bajade udore gai. Enga e yijoco Dupade yui ome yocanguretigai ome pacajnaqué ichade udore.

²⁰ Dupade arecujate iyiejnai nanique ome dabi uje cho pangaráni iji ujetiga catecã́ri Dupade ome darasade iji deréjnane.

²¹ Jé basa ga uje jnani bajade basája dáringane pangarate nanique ujetiga ore catecã́ri Dupade ome darasade, mu Dupade que arecujate iyiejnanie cuse ome ore. Mu pangarate ejoi tuté uje catecã́ri Dupade ome yoque, uté gajnei u Dupade arecujate iyiejnanie nanique uje purusãracho quigode iji Dupade uruode, enga chojninga: Yocangarádejnai Dupade jé arecujáchi ome dabi enga que toc jeta pecãraque quigode uje chojninga: "Báringai pangarate a ca eruénique cuse jne ujeta acatecã́ri yu ome barasade. Uje jé bopise Melquisedec."

²² Jecute Jesús u uje chajo raja uje ũrepise Dupade ome daru ejode. Enga chajopo raja to rĩ uje uru ejode u uje suépise uru bajade gai ome úringane omipíso.

²³ Dipesé pangarate bajade uje ore catecã́ri Dupade ome darasade nanique. Uje toguébeque ore nanique, enga ore basája ñane jogadode gatuaque.

²⁴ Mu Jesús que toi gotique. Jecute a ca pecãraque yocangarátique tuté jne ujetiga catecã́ri Dupade ome yoque.

²⁵ Ujetiga ayorérique pota tibágui Dupade enga doi enga changureta Jesús ome Dupade yui, enga Jesús ujopié cuse ome udore ore jnese ujetiga chiqueta ore. Chamáñaje eca Jesús iji deréjnane jnese gu enga jecucha ga chijócha Dupade ajei údi ome yoque.

²⁶ Jecute Jesús jé upúsu yocucuei pangarate cuchape ujetiga catecã́ri Dupade ome yoque. Uje ueque gu ome cucha gajnaréngone, pisijnaringuéone ore jnese. Enga Dupade e cãra jogadi ome pisijnaringuéone ipesusórone ore jnese. Enga uté jogadi jé upúsu Dupade gari iji guéode uéchai.

²⁷ Que Jesús isocai u Dupade icatecãraisõre bajade ore isocade go. Uje ore chujé cuchisode iji dirode jnese, enga ore chisi ome Dupade. Ore gaidi u ujetiga Dupade chimo ore gueranone enga chĩro ore isijnaringuéone. Ore chujépo cuchiso uñane gaté rĩ ujetiga Dupade chimópo rĩ enga chĩro ore urasade isijnaringuéone to. Mu Jesús guerani cucha chojmára enga jé gusu. Enga a jé ca tẽrápo rĩ cucha uñeque ome Dupade ome pisijnaringuéone. Uje uté guerani ome Dupade jé u re nanique uje toi ome yoquisijnaringuéone.

²⁸ Yirajágo uje Moisés urusarane cho quique gosode ujetiga ore catecã́ri Dupade ome darasade nanique. Mu Dupade catecãraisõre bajade udore jé ore cho ñane jnese icaite uje que ore ujñapeque. Mu Dupade arecujate iyiejnanie di iji Moisés urusarane quigade ujetiga pangarate cuchape dajnacari enga catecã́ri Dupade ome darasade. Uje ujñapetaguipise Ujnacari gu, enga úringai ujñapetaque que eruénique cuse iji deréjnane jnese.