Hebréos 6 - Dupade Uruode

¹ Jecute yujnucoi yógome yoquiquei enga yico yocúringane jnani. Enga yichago yocududigode Dupade uru bajácho aja yoquirosadode. Enga jé ca yijárogo Dupade uru bajade iji jnumi. Yojningane uru bajácho u: yoquisijnaringuéone uje jno yocúdi aja pitoringai, jé upo panguretigai ome Dupade rĩ.

² Jé upo pacajnaquéode rĩ ome yodi uje ore tṍra ore aja. Jé upo rĩ pacajnaquéode rĩ ujetiga ore catecã́ri Dupade enga ore chicha dajmanáyone aja Dupade anguresónique úringáringo piringarangápo rĩ. Jé upo pacajnaquéode ome Dupade ujuyaqué cuchábi yui rĩ.

³ Mu a yujnucoi yógome yoquiquei ujetiga Dupade chátaja yoque.

⁴ Yirajágo uje jnanione déji uje pacadique ore ome Dupade uruode. Enga ore chiraja Dupade gueranone cucha ome ayoréode, uje Dupade Ujopié Espíritu Sánto chijocase ore áyipiedie to.

⁵ Ore chirajapise to Dupade uruode úringane uerate. Enga ore chimo uje Dupade ujopiédaté uje a pijoguipise jne iji erãpe ichai, e gajnesórone u yoque to iji deréjnane unojo.

⁶ Mu ujetiga diga jnanione udore ore doi enga ore cho cucha tágode iji Dupade uruode, adode ore enga que qué toque jne jeta ore chécãrapo dajéode rĩ enga ore chajniápo Dupade gai to rĩ. Chamáñaje ore cho Dupade Abi yungórone ore gu uje udore ore chotigase Crísto úringai Dupade utocaite nanique. Enga ore chopo cucha bisidéguiji Dupade Abi uté rĩ iji dojode ayoréo ore ujade.

⁷ Ore gajnúone u jnumi uje guéode chuta gatuaque. Ujetiga diga sequeré omé tṍraji jnumi uté ome isangórone ore, chiborátaja Dupade irasitigade ome jnumi tuté.

⁸ Mu ujetiga gusu ojnacúcodie ujetiga suéji jnumi tuté enga que ujñapeque jnumi. Jé u uje Dupade urugaite jnumi tuté, ujetiga diga dacapose gai.

Ca yiyágo yocangoroné ome Yocangarádejnai ujetiga diapo rĩ, enga a uajate yóguiji yocanguretigade jne

⁹ Mu que uacajneque yigotade tijo unojo, yijorane uaque. Uje yiraja uje uaque u uje uacanguretáyopise Dupade. Enga a uacajneque Dupade gueranone cucha omío to jnese, uje Dupade iquetade u uaque gu.

¹⁰ Uje Dupade que chapúsaja dáyipierangome uaque gotique ome dapesute arégode ome uaque. Enga a ca chicadígapo uacapesudode cucha ome jne rĩ. Uje uacangoño uacajnoraquéode ome uacojode Dupade anguresóño, enga jecucha uacátayo cuchade aja ore ica. Enga jé qué uacagúsoji gai uje uacátayoja ore.

¹¹ Yocajéode u ujetiga ca abéroyo uáguiji uacadode unojo. Enga jé ajneraño údi aja uaqueruei. Ujetiga beyoi udore enga a Dupade ojningane cucha tocade jne ome uaque jnese uje qué uacarocho cuchade udore yúode.

¹² Que yipótago ujetiga tagoideque uaque iji Dupade adode. Mu acãcho uágaja Dupade anguresõre chaguesíode ome ore anguretigade, uje que ore chacho doi Dupade adode. Udore ore u gu uje ore gajneque Dupade ojningane cucha jnese uje chichaga danguresõripísode jnese.

¹³ Ajnusináño uje Dupade catecã́ri jnani bajai Abraham nanique. Enga chingo abi ujnomei tome uje a chisi ome jne. Enga Dupade chojningame: "Jé yarecujate yingomenie ome ua." Enga yirajágo uje que parecujate uñáraque cuse ujetiga sué Dupade arecujaidie gai.

¹⁴ Jecute Dupade chojningame Abraham icaite: "Jé ũrepise yu, a yisi ome yosõraquédatéi ome ua jne. Enga a yisi ome bape disi ejo dipesérigo jne ome ua."

¹⁵ Enga Abraham que chotigase Dupade, mu timiningapísa Dupade uruode. Enga que chacho uje chirote yui. Jecute diga Dupade ingoméone cucha jnese díji Abraham.

¹⁶ Ujetiga ayorérique pota piminingate ome dojode ayoréo enga chajo raja uje ayoredatérique uñeque chiraja úringai ũré. Enga ojningai ayoredaté tuté jecucha sué uté gosi gai ome úringai cuchadaté. Jecute jogadi u uté uje pangurete ome dojode ayoréo enga que ore botare uruode.

¹⁷ Dupade isocai jé u uté to. Jecute chojninga nanique: "Jé yarecujate yingomenie ome uaque." Gaidi u gu ujetiga ojningane cucha gajnesóningo ca ore chotigase ingoméone cucha udore yúode. Gaidi upo rĩ ujetiga ore chiraja uje uruode tocade jnese jne enga a ca pecãraque uruode udore quitique uñeque.

¹⁸ Dupade gueranone cucha gare ome yoque ujetiga ca yotigáco. Enga u unojo: ingoméone cucha u uñai ome yoque. Jé arecujate urenie u uñanie. Enga yirajágo uje Dupade que cho darapatáringa to go. Jecute uyoque uje yayógo aja Dupade ujetiga chirote yoc, enga yanguretágo ojningane cucha yúode, e yocáyuguhebátigade bijna ome yoque enga yajógo yógaja uté uru uréone.

¹⁹ Cucode isangurúone cuse uje jogadi u jnumi iji yodi údi ujetiga cucoi ca chinguíra raja quedéjnarique. Isocai u to yocanguretigai ome Dupade. Yoquisangurui u yocanguretigai to, mu jogadi upúsu Dupade iguíjna gateminóri ajé uñai uje borapeque cuchátique déji iquei. Jecute e que toque ujetiga cuchárique chinguíra yógaja quedéjnarique ome Dupade adode, mu jogadípise yóguiji Dupade gari iji deréjnane.

²⁰ Mu bajaque Jesús uje chacája ajé uñai uté ujetiga pésu enga guesája yui ome yoque to. Jecute Yocangarádejnai u uté ujetiga catecã́ri Dupade ome yoque. Enga ajnai u jnani bajai Melquisedec uje catecã́ri Dupade to nanique ome darasade.