Hebréos 5 - Dupade Uruode

¹ Yirajágo uje jnani bajade ore doi Dupade ajegaidi tiji uraque dajade icaite ujetiga uté gosi icatecãraite Dupade ome ore. Sacerdote uté to, mu sué dojode sacerdóteode gáyode ome úringai eduguéjna cuchape. Enga uté u to uje chingo darasade gueranone cucha ome Dupade nanique, enga chujépo ore gachidode cuchiso nanique rĩ ome ore isijnaringuéone.

² Enga sacerdóteode eduguéjna cuchábi uté gosi nejéna darasade údode nanique. Chiraja gu uje urasade ore ujo ayoré pisijnaringuéone amatate to nanique. Jecute uje chimo darasade uje agúpurai ore, jeoga ore chicáji quedéjnarique ome Dupade adode, mu que tagu dejórique ome ore.

³ Que gusu urasade ore gachidode cuchiso nanique uje chujé ome ore isijnaringuéone, mu chujépo cuchisode to nanique rĩ ome dasijnaringuéone. Uje chiraja nanique gu uje que etotiguérique cuse ome pisijnaringuéone.

⁴ Ujetiga jnanírique potárasa dáringárique eduguéjna cuchape nanique ome dojode sacerdóteo ore mu que togome uté gosi go. Chamáñaje Dupade u uje ajegaite jnanione ome udore. Adi u jnani bajai Aarón nanique. Dupade ajegaite taningui u nanique ujetiga ujode sacerdóteo ore cho deduguéjna cuchábi iji uté.

⁵ Isocai jé upo ome Crísto rĩ. Uje que chingo erámi ujetiga ore eduguéjna cuchape ujetiga catecã́ri Dupade ome ore. Mu Dupade ajegaite Crísto ome udore. Jecute urúo ome nanique uje chojninga: Yape ua. Enga bai tu yu gajneri.

⁶ Dupade chojningápome dabi nanique rĩ iji darusãraque uñane: Báringai pangarate a jé jogate ua jne iji deréjnane uje bacatecã́ri yu ome barasade, enga bajnui tu sacerdóteode eduguéjna cuchábi iji jnani bajade ore nanique. Mu bajnai a jé u jnani bajai te jne uje i tu Melquisedec uje ore eduguéjna cuchape uté to nanique.

⁷ Uje Crísto qué déji erámone unojo nanique enga jecucha catecã́ri Dupade enga chutai cuchade iji. Uje catecã́ri Dupade iji uñane enga chejnapúsu daruode enga educadode cusapo icaite rĩ iji uñane. Chiraja uje a Dupade ajéraso enga ca torási gu. Jecute Dupade pañapísiji uje angoninguite guesaque Crísto nanique, enga jecute tangári icatecãraitigade nanique.

⁸ Dupade Abípise Crísto múñi, jé chejnáreque re to iji erámi tuné nanique. Mu jecucha ga tangári Dupade iji udore jmainie, enga jé u uje úringai angoninguite guesaque pijoque.

⁹ Enga úringai ujñapetaguipise jé pijoque to. Jecute pucuecaringué eyúgojmai garani u uté ome udore ore jnese uje ore doi uruode.

¹⁰ Jecute Dupade pésu nanique enga Yocangarádejna Crísto ujetiga catecã́ri dai Dupade ome yoque, adi tu sacerdóteode eduguéjna cuchábi iji jnani bajade ore nanique. Mu Crísto ajnai tu jnani bajai Melquisedec uje catecã́ri Dupade ome ore to nanique.

Omi tu ujetiga yujucópise yocanguretigai guio enga ca yicagóji quedéjnarique ome Dupade

¹¹ Cucha amirone qué uásejna ujetiga yacaco uágome cuchade udore, mu piraguipise ujetiga arajáyo quigode. Uje que apótayo arajáyo quigode gu.

¹² E uacajnei urásu ujetiga acacho uacojode ayoréo to ome Dupade uruode. Mu uacajnei jé qué u ujetiga yacacopo uaque gaté rĩ ome cucha obiréjnane iji Dupade uruode. Cho ujetiga ajníñoja uacáringane disi parátaque. Enga uacajnéone u uacatedie ijnanie jeta acúyo. Uje que ajnóño cucha pibotipísode gu ujeta acho.

¹³ Jecute ujetiga qué eduyo Dupade uru obiréjnane mu que arajáyo uru ibirade enga gajnui tu ujetiga qué disi parátagape uaque iji Dupade adode. Enga que arajáyo cucha gajnaréngone, cucha arégode ore iji ñane.

¹⁴ Jé basa ga udore ore uje ore chiraja Dupade uru ibirade enga ore gajnúone u jnanione uje ore tagu cucha uajádode, enga ore chiraja cucha gajnaréngone, cucha arégode ore iji ñane. Uje ore chetingare re iji Dupade adode gatuaque gu.