Hebréos 4 - Dupade Uruode

¹ Mu qué piotigué uné ome yoque ujetiga yacágoja Dupade gari enga yoco yocujñare iji gari to. Jecute yujuco yoquio ujetiga yico jnese jne enga ca yocuñeque déji guesi iji Dupade adode.

² Uje pacadique yógome Dupade áyipie piquetatodie iji deréjnane unojo to. Adi jé u uje pacadique jnani bajade ome udire to nanique. Mu que cuchárique tṍraji Dupade uruode udore ome ore nanique, uje ore chotigase gu nanique.

³ Mu uyoque uje yanguretágo Dupade uruode enga yocajneque ujetiga yugúcoji uté gari iji ti, enga yoco yocujñare. Uné jé u Dupade ojningai casicaite uje chojninga nanique: Yo yurúja ore gu yájningai ujetiga ca ore chacája yerani punire to enga ca ore cho dajñare iji. Mu Dupade jé u uje e chimate dasagode cucha jnese iji taningai uje pésu erámi nanique.

⁴ Ore urusarane Dupade urúo déji jogate uñane uje chojninga: Dupade chimate dapesudode jnese nanique, enga cho dajñare iji dire gare iji tia.

⁵ Chojningápo rĩ iji daru uñane: A jé ca udore ore chise yari to jne, ujetiga ore cho dajñare iji.

⁶ Yirajágo uje uñane cáma ore chise Dupade gari to ujetiga ore cho dajñare iji. Yirajagópo rĩ uje bajaque jnani bajade uje ore chudute Dupade áyipie piquetatodie nanique, mu que ore nóna Dupade to icaite ujetiga ore cho dajñare iji gari. Angoninguite parique ore nanique gu ome uruode.

⁷ Jecute Dupade pésu dire uñai enga u uné ujetiga yacágoja gari to. Enga chingo daruode udore ome David to nanique iji Moisés urasade ore quigade. Enga yocajneque David urusarane Dupade urúo to uje chojninga: Iji ne gajneri ujetiga adúcho Dupade uruode enga ca ajároyo uágaja ome uruode.

⁸ Israélgosode ape ejode ore chise Dupade ojningai punire uje ore eduguéjnai u Josué nanique. Mu que ore cho dajñare iji. Ujetiga ore chorase dajñare iji uté, enga a ca Dupade chĩ́carirase dire uñai ome ore ujetiga ore chacája gari enga ore cho dajñare iji.

⁹ Jecute yirajágo uje diri qué déji ome Dupade urasade uyoque ujetiga yoco yocujñare iji. Enga a jé cho uje Dupade cho dajñare nanique uje chimate dasagode cucha iji erámi taningai.

¹⁰ Jecute gosi ujetiga nóna Dupade enga cho dajñare iji gari enga gosi chopise dajñare, enga que áyipieraque dépoji dapesutique cucha. Isocai jé u Dupade to uje chimate dasagode enga chopise dajñare nanique.

¹¹ Jé ca yicoi enga ca yoco israélgosode ore uje que ore chise Dupade uruode unétique nanique uje chingo punire ichai ome ore. Mu yicoi enga yujnucoi yógome Dupade ojningai uté yui ujetiga yico enga yoco yocujñare iji.

¹² Uje iyiejna Dupade uruode enga chijocase ayoréode áyipiedie. Asíco to enga sué queséode gáyode uje ore asode gare. Jecute gosi ujetiga chudute Dupade uruode enga Dupade uruode chijnare aja uté gosi áyipie ajepísi. Enga jé u uje cuchade doi guesáringane iji ore. Enga jé u uje pijoque ore áyipiedie quigode ome.

¹³ Que togome yoque ujetiga yipójo cuchárique ome Dupade. Chamáñaje Dupade ipesute cuchade gu, enga chimo cuchade udore jnese iji ore jogadode. Enga chirajápo cucha dacadode quigode jnese rĩ. Enga Dupade uté u jne ujetiga yingongo yoquipesudode cucha aja jnese.

Jesús chacãra raja sacerdóteode ore eduguéjna cuchábi

¹⁴ Dupade Abi Jesús e chacája Dupade gari iji gaté ujetiga catecã́ri ome yoque. Enga gajnui u sacerdóteode ore eduguéjna cuchábi iji jnani bajade ore. Jecute yicoi enga yujnucoi yógome yocanguretigai ome uté enga ca yibérogo yóguiji yocajesui Dupade acho.

¹⁵ Enga Yocangarádejnai uté que dojnóngaja yoque uje que urénga yoquetotiguérique cuse iji yocujuredie jmainie. Chamáñaje ayoré uté to nanique gu uje déji erámone unojo nanique. Enga chiraja cuchade jnese uje chetingare ayoréode uyoque, mu que pésu pisijnaringuérique to go nanique.

¹⁶ Jecute jé ca yagutúgo yoque jne ujetiga yicatecãcoi yoquijnorangóri Dupade. A yibájoi Dupade jne enga a jĩraque chosõre yoque jne enga chátaja yoque iji yocajnéone petingaquéo jnese.