Hebréos 3 - Dupade Uruode

Dupade iroque Moisés nanique, mu cuchiyípise Jesús ome úringai Dupade iroque

¹ Yujode Dupade anguresõre uaque á, Dupade ibididique uaque to ome dadode. Uaque u uje uaqueduyo Dupade iji uacajéode to, jecute adójnachopísa Jesucrísto uté. Chamáñaje Dupade utocaidipísi apóstol tu gu ujetiga yutocoi enga catecã́ri Dupade ome danguresórone uyoque. Enga gajnui u sacerdóteode eduguéjna cuchábi iji jnani bajade uje catecã́ri Dupade ome darasade nanique.

² Dupade u uje ajegaite Jesús ujetiga doi iroquéode. Jecute Jesús doi gojni enga chimanipise Dupade ojningane aja guesi jnese. Isocai jé upo ome Moisés rĩ uje que cho caru ome dapesudode Dupade iroquéo to nanique iji Dupade urasade ujade.

³ Uje yimóngo guiguíjnarique ueratigai enga yitijago guiguíjnai tuté. Mu yoquicotaquéode gajnengoripísi tu guiguíjnai tuté ipesungóri. Jé cho ome Jesús, Moisés ore to. Yitijago ore ipesudode jnese, mu jé tiógara ujetiga yoquicotaquéode gajnengóri tu Jesús.

⁴ Yirajágo uje guiguíjnane ipesungórone cuse jnese. Mu Dupade u uje ipesute cuchade jnese. Enga que imótique cucha cuse ujetiga ca ipesute.

⁵ Moisés dopísi Dupade iroquéode iji Dupade urasade ujade. Enga gajnui u guiguíjnarique gajnesónique irótique uje dimane ome darósõri iroquéode ujetiga chajnerame uté uru piqueminórone ome darasade.

⁶ Mu Crísto gajnui u guiguíjnai gajnesṍri ujnacari uje pésupúsu cuchade aja quigode iji dayé Dupade iguíjnai. Jé basa ga yocajnui tu Dupade iguíjnai tuté rĩ. Yojningane u yoque uje que yoco cutúguiji yocanguretigai ome Dupade ojningane cucha yúode, jé aja ujetiga yimóngo cuchade udore ome yoquedodie.

Dupade pota ujetiga yanguretágo uté enga yoco yocujñare iji gari

^7-8 Dupade Ujopié Espíritu Sánto arecujáchi uje purúsãra iji Dupade uruode nanique chósi te: Iji ne gajneri ujetiga adúcho Dupade uruode, enga ca ajároyo uágaja ome uruode. Ca oyo Moisés urasade uñane uje ore pésu Dupade ujuredie nanique uje ore cháji údode icaite iji erãpetarei.

⁹ Sequeredie 40 nanique uje uacai cásodicáite ore chimo yipesútedatéode gatuaque, mu ore quigode jé u nanique uje ore pésu yujuredie gatuaque to.

¹⁰ Jecute yajei dotárome ore nanique, enga yojninga nanique: "Ore áyipiedie chicáji quedéjnane ome yu enga que ore pota ore chiraja yadode gotique."

¹¹ Jecute ájningarãque yu nanique ome ore enga yo yurúja ore nanique ujetiga ca ore chacája yari ujetiga ore cho dajñare iji yari.

¹² Yijorane uaque á, ajuso uaqueo to ujetiga ca uacáyipieraque chicáji quedéjnarique ome Dupápisi, Dupa uecai tuté. Enga diga chiborátaja ujetiga uaque gosi ca changureta.

¹³ Jé basa ga ajnusoi uágome ñane iji Dupade adode gatuaque uje qué piotigué deréjnai tu uné. Uacagaidi u gu ujetiga pisijnaringuérique ca chãra uacuñeque, enga diga uacuñeque tagu Dupade uruode aja.

¹⁴ Ujetiga yajógo yógaja yocanguretíga taninguíone ome Jesucrísto jé aja erámone eruei, enga a yocajnecho Crísto gajnéone cucha jnese to jne.

¹⁵ Uje ore urusarane Dupade urúo chósi te: Iji ne gajneri ujetiga adúcho Dupade uruode, enga ca ajároyo uágaja ome uruode. Ca oyo Moisés urasade uñane uje ore áyipiedie uajádei nanique enga ore chijáro raja ome Dupade uruode.

¹⁶ ¿Jé gosode a uje ore chudute Dupade uruode nanique, mu ore tagu Dupade uruode aja? Udore ore u jnese uje Moisés ijnimique ore nanique iji egíptogosode ore gari.

¹⁷ ¿Jeque Dupade ájningai gajnengórone jé gosode a, iji sequeredie uje guejnanie ayoré gare nanique? Udore ore u uje ore pésu pisijnaringuéone ome Dupade nanique. Enga quigade enga ore toji erãpetarei ajei nanique.

¹⁸ ¿Enga Dupade jé urugaite gosode rĩ a, ujetiga jé ca ore chacája guerani punire jeta ore cho dajñáriji to? Urugaidode u ore uje que ore tangári.

¹⁹ Yimóngo uje que ore chise Dupade guerani punire to nanique, uje ore chotigase Dupade uruode nanique gu.