Hebréos 2 - Dupade Uruode

A ca yapíco to jne ome Dupade ujuyaquei ujetiga yoco cucha bisidéguiji pujnomé ueradi quigode uje tṍraji Dupade uté

¹ Jecute yocajnei tu ujetiga yicoi enga yangacopísi yocududigode Dupade urúo, enga ca yicagoi quedéjnarique ome Dupade.

² Yirajagopise uje Dupade irógode gaté unirísoño jé ore di Dupade uruode údi nanique iji jnani bajai Moisés. Enga Dupade uruode udore que iyiécho nanique. Jecute ayorérique ujetiga chó uruode udore gai nanique enga pujuyápise uté gosi nanique. Enga tiógarapísa dáringai pujuya nanique.

³ Jé cho to ome Dupade áyipie ejodie ome yocúringane piquetaque. Uje cuchadatépise áyipie ejodie udire gu. Enga a ca yapíco to jne ome Dupade ujuyaquei ujetiga yoco cucha bisidéguiji áyipie ejodie. Bajai tu Yocangarádejnai nanique uje chatata udire quigode ome ore. Enga uté ududisórone ore u uje ore cho quique ome yoque ujetiga ca potigayaquérique déji yógome uruode udore úringane ũréo.

⁴ Enga Dupade jé u to uje chetingare daruode úringane ũréo ome dajopié iji danguresórone. Jecute anguresórone udore ore urasade pañaji ore ate pitijabádode. Enga uásejna ore ipesútedatéode udore nanique. Enga Dupade pésu dáyipiedie ome danguresórone uyoque to enga chisi ome Dajopié Espíritu Sánto gueranone pirajatíga ome yoque jnese, uje yoquirajatigade udore cãra rome ñane.

Jesucrísto, anguresórone ore cho jetiga jõrápise ore

⁵ Dupade que doi enga pésu darógode gaté unirísoño úringane eduguéjna ome ore ujetiga ore chijocase cuchade iji yocojningai erãpe ichai.

⁶ Jé basa enga ore urusarane Dupade urúo déji uje chojninga: Jecute ¿gotique gu a, Dupade á, uje bosõre yoque uje jĩraque yitogoi múñi? ¿Gotique to rĩ a uje bejna báyipiedie aja yocujoi erámi unirísõre uté uje barógaja yoque?

⁷ Bajuéga nanique ujetiga barógode gaté jogonóño ore sué uté gai, mu garósi deréjnane ujetiga ore sué gai. Quigade enga batire uté úringai cuchape gai ujetiga picotaque ome ore jnese. Enga basi ome bapesudode cucha jnese ome uté ujetiga sué cuchade jnese gai.

⁸ Enga erámi unirísõri uté gajnei tu ujetiga chijocase cuchade jnese. Enga que cucha amínique cuse ujetiga ca Dupade chisi ome uté ujetiga gajneque. Jé ũré yu ome udore, mu jé ũré yu to rĩ uje cáma angoninguite guesaque cuchade jnese ome uté.

⁹ Mu yirajágo uje Jesús uté u uje Dupade chicháji darógode gaté jogosóño ore údi nanique, mu garósi dirode uje déji ore údi. Dupade chijnóra erámone jogosórone jnese gu, jecute chiroque Jesús uté aja erámi nanique ujetiga cho daba ore isijnaringuéone jnese. Mu e Dupade chatirepója úringai cuchape gai te rĩ ujetiga yisígo gai ome itoringai ome yoque.

¹⁰ Dupade uté uje ipesute cuchade jnese ome re, juéga ujetiga Jesucrísto chejnáreque re nanique. Gaidi u gu ujetiga ujñapetaguipise Ujnacari tuté enga erámi unirisórone ore cho daquetangóri iji uté. Pota gu ujetiga cho dabi iji yoque enga pota to ujetiga abode ore gajneque ingoningájnai to jnese.

¹¹ Enga ore inoningayasṍri Jesucrísto, inoningañane ore e ore cho dají Dupade jnese. Jecute Dupade Abi uté que ajéngome go uje cho dajõra iji ore.

¹² Purusãraque uté uruode nanique iji Dupade uruode enga chojninga: A yingo badode ome yijorane ore jne. Enga a yicota ua jne iji udore ore ujade iji yocuáguedie.

¹³ Chojningápo rĩ: Yangureni u Dupade. Enga chojningápo gaté rĩ: Yugúsi ne á. Enga Dupade gueranone yabío ore déji yari to.

¹⁴ Adi u uje disírique a quene base enga erámi e unirísõre to. Jesús isocai jé u to nanique. Uje uté basíji chequé ayoré nanique jecute nóña ga erámi unirísõre to. Gaidi tu gu ujetiga cho daba dojode erámi unirísoño ore isijnaringuéone. Enga u to ujetiga chejnápise Satanás, uje Satanás u gu uje ujopié cuse ujetiga chisi ome pitoringai ome ore.

¹⁵ Enga Jesús isocai tu uté to uje chijnime yóguiji pitoringai jmainie. Chamáñaje yitodógo pitoringai yui gatuaque jnese uje qué yiquecágo iji erámi tuné.

¹⁶ Jesucrísto que di gu ujetiga Dupade irógode ore chagutíñame iji gaté. Mu di gu ujetiga Abraham ape disi ejode ore chagutíñame.

¹⁷ Jecute Dupade pésu Jesús nanique ujetiga chopise dojode ayoré uyoque. Gaidi u gu ujetiga pangarate cuchape uje osõraquei tate ome darasade ore uyoque, uje tẽrája Dupade ome yoquisijnaringuéone.

¹⁸ Enga uté jé u uje chejnáreque dáringai petingarãque to nanique, jecute chosõripise yoque to uje petingaquéode chise yoque. Enga chiraja to ujetiga chijnime yóguiji petingaquéode jmainie.