Hebréos 13 - Dupade Uruode

Pisocade quigode unojo u uje Dupade chimesẽre

¹ Ca ayáyo ajnóraño ñane enga oyo ujetiga jé uacajõrápise ñane.

² Jé ca etácho ayoré dírique iji uacaguíjnai, enga jé ca ajusécho ore. Uje jnacare bajade que ore suseque ayoré díode nanique uje ore jos eti ayoré ore to nanique, mu Dupade irógode gaté unirísoño u ore nanique.

³ Osṍcho uacojode ayoréo ore ujetiga ore suru ore gáyode. Enga uacacaniratiguéode udore gajnui urásu ujetiga apatíoraño ore. Osṍchopó ore ujuyade rĩ uje ore chaquesu ore údode. Uacarajáyo pujuyaquéode úringane urõso gu uje ore aode jé u uacaode to.

⁴ Uome ujetiga asayo uacacotérigui jnese enga gusu uacacotérigui ore ome uaque. Jé chopo chequedíe to rĩ ujetiga gusu ore abayode ome ore. Uje Dupade a cho dajuñame udore ore jnese jne uje ore chachia ráguiji gapu quedéjnanie ore jeoga jnacare quedéjnarique. Enga Dupade ujuyaquéode gajnengórone a upo acotẽrachugode ore to jne rĩ, ujetiga ore chachia ráguiji uñane acotedie. Jeoga amanachuguedie ore chachia ráguiji uñane abayode to.

⁵ Ajuso uaqueo ujetiga ca ajnóraño plátadie. Mu anínaño uágome uacaríjogonórone cucha. Uje Dupade jé urúo uje chojninga: "A yugúsi bari jne iji deréjnane jnese. Enga a ca yijíñapóme ua iji te jmete jne rĩ."

⁶ Uje e yirajágo Dupade uruode unojo enga yirajágo yógome Dupade. Jecute yojnico: Yocangarádejnai u uje chátaja yu. Jecute que yitodo ayorérique atígo ome yu.

⁷ Ajnusináño uacangaránone ore adode ome uaque. Uje udore ore u uje ore chatata Dupade uruode quigode ome uaque nanique. Ajnusináño ore adode, ore anguretigade to, enga acãcho uágaja uacangaránone udore to.

⁸ Jesucrísto que chécãre datique gotique iji deréjnane enga isoca bajade jé cho isoca ejode iji deréjnane unojo, enga a jé chopo dirome to rĩ.

⁹ Jecute ca beyoi enga ca angáchoi pacajnaquérique ujetiga quedéjna quitígo. Uje uñane pésu cucha pibosode quigode uje chiese uerate cucha pibosode uñane ujetiga yajo. Jeque chiese gajnaréngome uñane. Mu que cuchárique tṍraji ore gaidode udore pacajnaquéo. Jé basa ga yocucuei urásu payuquetotiguei uje garani u Dupade ijnoraquei.

¹⁰ Yirajágo uje Dupade icatecãraisórone jnani bajácho ore tagu darasade gueranone cucha nanique ome Dupade. Mu Jesús anguresórone ore uyoque yoco yoquerani iji Jesús ome Dupade. Jecute que toque jeta Dupade icatecãraisónique tagu yoquerani.

¹¹ Yirajágo uje isocade u unojo ome judíode ore nanique: uje gusu sacerdóteode angarádejnai u ujetiga chijna cuchisode iyojna aja Dupade iguíjnai Ajé Puyaguipísi ujetiga catecã́ri Dupade ome darasade ujetiga Dupade chĩro ore isijnaringuéone. Jé basa ga ore chãru degode cuchiso iji ore idai guesi nanique.

¹² Jecute uje Jesús toi nanique enga toji ore idáidatéi guesi nanique. Gaidi u gu ujetiga chinoningase danguresórone isijnaringuéone ome dayoi ujetiga ore chise dáringane icha iji quigade.

¹³ Jecute yicoi enga yátago yógaja Jesús iji cachodi iji guidáidatéi guesi. Yirajágo mu uje pajegátiga ujetiga ducarãte gosi aja guesi iji ore idáidatérique. Mu yico enga yátago yógaja Jesús ome gajnéone pujuyaqué.

¹⁴ Yirajágo gu uje Dupade anguresórone uyoque que yocajneque guidáidatérique iji erámone unojo ujetiga yiyágoji deréjnane. Mu yocucuei tu guidáidatéi ichárique yui uje a yocajneque jne iji dirode uñeque.

¹⁵ Jecute omi tu ujetiga yicotágo Dupade gatuaque enga Jesucrísto jno yoquicotaquéode udore údi aja gaté. Chamáñaje yocajnei tu gu ujetiga yẽcója Dupade ome yoquicotaquéode unojo. Jecute yico gojni enga yisígo Dupade gai ome yoquibijnanone.

¹⁶ Enga ca yicadíjoi yoquicaniratiguéode to ome ñane, ujetiga yosṍco ñane ome yocaríjogonórone cucha. Uje Dupade cho yoqueraníji cuchade unojo ome re, enga irasique yoque.

¹⁷ Angachopísi uacangaránone pastor ore ome Dupade adode enga beyopísi ore uruode quigode. Udore u gu uje ore susípise uaqueo. Chamáñaje ore chiraja gu uje Dupade a catecã́ri ore ome ore ipesudode cucha iji uacajade. Ujetiga angáchoi ore enga a ore irasique raque iji dasagode gai, enga a ca ore isagode chibéro ore údode jne. Mu ujetiga ore isagode chibéro ore údode gu uacangoninguite paritigade, enga a ca toque jne ujetiga agutíñañome ore.

¹⁸ Acatecãchoi Dupade ome yoque. Uje yirajagopise uje que paguté joráraque déji yoque. Uje yoquigaidi tu gu ujeta ca gajnareque yocatique uñeque.

¹⁹ Cuchiyi tupúsu ujetiga acatecãchópoi ome yu rĩ ujetiga Dupade ajéo enga jĩraque yisápo uaque jne rĩ.

Purusarane unojo urusãrasṍri cho darusarane eruéji darasitigade ome ore

²⁰ Pajesereringai guẽrasṍri Dupade iringarãque Yocangarádejnai Jesucrísto nanique iji itoringai. Enga Jesucrísto uté gajnui u áyasadie irodisõre paraguipísi uje susípise darodedie guio. Enga Jesucrísto uté iyoi u uje pésu Dupade áyipie ejodie úringanie ujñapeté nanique.

²¹ Jecute yajéode jé u to ome uaque ujetiga Dupade uté pésu uacáringane areguipíso ujetiga apéso cucha arégode gatuaque. Enga jogadi a u jne ujetiga apéso Dupade ajegaidode cucha jnese. Enga Dupade jé dopoi dajéningo ome yoque jnese rĩ uje yanguretágo Jesucrísto. Yicotágo Crísto uté jne iji deréjnane jnese. Amén.

²² Yiraja uje que umáño yurusarane unojo ome uaque, enga cucha amirone qué déji uje que yurúsarome uaque. Jecute yijócha uacajéode údi ujetiga ca arañíñome udore uje uacajicho yurusarane unojo quigode ome uaque. Yigaidi u gu ujetiga yisi ome pirasitigade ome uaque ome yurusarane unojo.

²³ Yipota jeta arajáyo uje yoquijõrai Timotéo e déji guesi iji dáringai pujurúgai. Jecute jĩraque chise yoque enga a uté nóna yu jne aja uaque ujetiga diga yibájoi uaque.

²⁴ Asayo uacangaránone pastor ore jmanáyone jnese ome yu. Jé upo Dupade anguresórone jnese rĩ iji uáguiji te rĩ. Yaríjogonórone ore jnese iji puniri Itália uné ore ajéode u ujetiga jé areguipise uáguiji te.

²⁵ Yajéode u ujetiga Dupade chacacãre uaque jnese ome cucha pagutíyamánone. Amén.