Hebréos 12 - Dupade Uruode

Yoquedóraque ca chiramurase Yocangarádejnai Jesús aja quedéjnane

¹ Gajnui urásu ujetiga Dupade anguresõre bajade ore chaparu yoquibai, uje jiei ore nanique enga pijoguipise ore ome danguretigai ome Dupade jnese. Enga cho ujetiga e ore chajire yoque to ome yocanguretigade iji Dupade. Jecute yicoi gajneri enga yiyágo cuchade gajneri uje chijocase yoque. Jé aja yoquisijnaringuéone uje chimere re iji yoque. Enga yoco bayade gajneri aja yoquiquei. Enga yajnerango yocanguretigai údi ome Dupade. Enga ca yirayíngome yoquigajñua aja yoquiquei.

² Enga ca yoquedóraque chiramurase Jesús aja quedéjnane. Yirajágo gu uje yocanguretigai garani u, enga uté u to uje pésu enga yocanguretigai quérã to. Jesús uté chejnáreque re iji curesei gai nanique. Yirajágo uje gosi toi iji curesérique gai enga pajegátigai u ome uté gosi. Mu que pajegátigárique chimo Jesús nanique uje toji curesei gai. Uje áyipie jogadípise pininaquei, jé aja pirasitigade ore nanique rĩ iji datoringárique quigade. Jecute e chácariji Dupade ãrachua iji gatajnoquei.

³ Jecute jé ca uacáyipieraque jnoji Jesús úringai pumajódaté nanique ome jnani sijnángone ore. Aracho uté enga ca oyo caru iji uacanguretigade ome Dupade. Enga ca arañíñopóme uacáringane ducañerájma rĩ.

⁴ Yiraja uje uacapéso pocaningai ome pisijnaringuéone uje pota sué uacabáyode, mu cáma eso pitoringai ome uaque iji uacajnéone pocaninga udore jmainie.

⁵ Ca acadíchoi uacajnéone Dupade urúo uje cho uacaquique nanique uje uacajnúone u ujetiga abipise uaque. Uje purusãracho uruode udore enga chósi te: Yabode uaque á, ca etácho uacangarádejnai Dupade adode ome uaque uje chacate uaque. Enga ca oyo caru uje Dupade chaquĩ́ra uágome cuchade.

⁶ Ujetiga jnanírique chimo datique ate gajnarétique enga jé u uje chaquesu dabi tuté údode. Enga Yocangarádejnai adi jé u to ome udore ore jnese uje cho dabi iji ore. Uje chijnóra gosi, enga jé u to uje chaquesu údode.

⁷ Jecute ca arañíñome ujetiga Dupade chacate uaque, uje Dupade cho dabi iji uaque gu. ¿Ma disírique cusirase ujetiga danique jé ca chaquesu údode?

⁸ Mu ujetiga Dupade jé ca dorási dasocai ome uaque uje chacate dabode ore, enga a ca abipísirase uaque. Mu pape unejánguirase uaque.

⁹ Uacarajáyo to uje disío yoque nanique enga yocai ayoréode ore chacate yoque nanique. Enga yangácoi ore nanique. Ca iyieguirase yocangoninguite guesáringarique ome Yocai Dupade ujetiga yocúringane ujñapetácho pijóguiji yoque.

¹⁰ Yocai ayoréode ore chacate yógome cuchade nanique uje cachi ore áyipiedie quicho nanique. Enga garósi deréjnane nanique uje ore chacate yoque. Jé basa ga Dupade ucuei u yocueratigárique ome yoque uje chacate yoque. Gaidi u gu ujetiga yoco uté enga yico yocúringane ueque ome pisijnaringuéone to.

¹¹ Yirajágo uje Dupade angúroméone u petingaquéode ujetiga chacate yógome. Mu que uñeque irasique dajnetique petingaqué. Chamáñaje urõsopis ome uté gosi gu. Mu ujetiga gosi e chimate raja petingaquéode uéchai enga jogadi u uje chise dáringai ujñapetaque enga pajesereringai dépoji rĩ.

Ujetiga gosi chetaque Dupade uruode enga Dupade ujuyaquei gajnengore uté gosi

¹² Ujetiga eyuque uágome Dupade adode enga adotáyo uágaja.

¹³ Enga acueyoi dajei tuté jne uje cáputaji dajesui. Jogadi u uaté gu ujetiga uacarídogorodíe ninguira enga ca oyo tatoque, tatoque aja uacajesúode.

¹⁴ Acueyoi pajesereringane ome uacojode ayoréo ore jnese. Enga eduyo Dupade iji uacáyipiedie. Ujetiga gosi ca chedu Dupade iji dáyipie enga a jé ca chimópise Yocangarádejnai jne.

¹⁵ Dupade pota jetiga chátaja yoque. Jecute ajuso uaqueo ujetiga ca etácho Dupade úringai paraque ome uaque. Ajusópise uaqueo to ujetiga uaque gosi ca cho pore paca uje adie iringonguei. Chamáñaje que cuchárique tṍraji adie udire, mu gusu uje pésu uñane ore igajnarétigade to.

¹⁶ Jé ca uacuñeque pota moji chequé quedéjnaraque gari. Enga ca oyo cucha bisidéguiji Dupade uru iyiejnane to. Chamáñaje Esaú isocai u uté to nanique uje cho cucha bisidéguiji dai ingoméone cucha nanique. Uje a gajnecho jne gu uje dai ape bajai nanique. Enga doi enga chutai dangarómi ome cucha pibosode enga chojninga: "A bajnecho yocai gajnéone cucha jnese jne ujetiga asi ome yu bãraquegode udore."

¹⁷ Unojo quigade enga Esaú pota chijnárasa dai acãraquéode nanique, mu dai chetaque. Enga uté po nanique. Enga popise nanique. Mu e que pisocárique cuse nanique ujetiga qué gajneque dai acãraquéode. Uje pimanique cuchárique enga e que toque ujetiga qué pecãraque.

¹⁸ Israélgosode ore sose cucarãte iyiejnai yui nanique uje puyaque ujetiga gosi chijocase. Ore chimo pioi iji nanique. Mu que gusu pioi go, mu ijnangunua dépoji to nanique rĩ, jé aja acherangórone iji ejode. Mu uaque gajneri, que acunguésõriñoi cucarãte puyai tuté to.

¹⁹ Cáma adúchopo ore ududigode cucha to rĩ. Uje ore chudute pubuchugode jocarane nanique. Ore chudúdapo Dupade uruode nanique rĩ uje catecã́ri ore. Mu pisadodéringai chise ore nanique uje ore chudute Dupade uruode. Enga ore chingome Dupade ujetiga ca catecãrápoi ore rĩ.

²⁰ Uje Dupade catecã́ri ore nanique enga chojningame ore nanique: "Uñeque cheru cucarani tuné enga ajéyo gosi to jne. Anguíraño cucaranéringui aja jne. Jeoga achachome asṍreraque jne. Cuchiso jé u marínga, jé ajéyo to jne." Mu ore ujñapié ajámiji Dupade uruode unojo jmainie nanique.

²¹ Iquiyiringuetáguipíse ore imone cucha udore nanique to. Jé ũré uje Moisés todópisa to, enga chojninga nanique: "¡Yitãrara ome yisadodéringai!"

²² Jé basa ga uaque enga uacajoso cucarãte Sión yui, jé aja Dupade uecai idáidatéi yui rĩ. Uje Dupade idáidatéi tuté i u Jerusalén gateminóri. Enga uacoyo uacarasade iji Dupade iroque dipeséode iji gaté.

²³ Enga a amátayo uágaja ñane iji uté jne ujetiga acotáyo Dupade jne. Enga a átayo uágaja Dupade abode uñane to ujetiga diga ore chamáta ñane uje udore ore íode purusãracho iji gatajnoquei to. Enga e uacajoso Dupade yui uje Dupade uté u uje chajire yocadode aja quigode jnese. Enga uacajoso jnani parágode ore oré gatedie yui to, uje Dupade ipesute ore úringane ujñapetácho nanique.

²⁴ Enga uacajoso Jesús yui to uje uté ipesudei Dupade áyipie ejodie úringanie ujñapetei nanique uje chojne ome dayoi. Enga Jesús iyoi suépise jnani bajai Abel iyoi gai. Chamáñaje cho ujetiga Jesús iyoi catecã́ri yoque enga cho yoquiquique ome pisijnaringuéone úringane purucho.

²⁵ Jecute ajuso uaqueo ujetiga Dupade catecã́ri uaque. Enga ca ajusécho uruode ujetiga angáchoi. Uacamóño gu uje yocayode jnani bajácho que ore chapite nanique uje ore chetaque Dupade uruode quigode uje ore ujoi erámi unirísõre chacate ore ome. Ca iyieguirase uyoque ujetiga yetájo Dupade uruode ome yoque uje gaté unirísõri Crísto di údi iji yoque.

²⁶ Yirajágo uje jnumi tuné tãrara nanique ome Dupade uruode uje catecã́ri jnani bajade nanique. Mu Dupade e chojningápo rĩ: "A yipésu enga jnumi tãrarápo jne rĩ, mu eruei e u ujetiga yijocase cuchade jne. Mu a ca gusu jnumi jne, mu guéode u jne ujetiga tãrara to."

²⁷ Uje Dupade chojninga: "Eruei e u jne ujetiga yijocásapo cuchade rĩ," enga udore qui tu uje Dupade a tṍra dapesudode cucha aja quedéjnane jne, enga gusu eyúgojmane u jne ujetiga jé ore jogate dajogadode.

²⁸ Enga que toc ujetiga pijocayaque yocúringane Dupade urása. Jecute yicoi enga yacãco Dupade gai ome cuchade udore jnese. Enga yijnórango Dupade gaté. Chamáñaje Dupade irasique re uje yicoi adode enga yangacopísi uruode quigode.

²⁹ Uje Yoquidupade gajnui tu pioque ditaguei uje tagu cuchade enga chejna cuchade udore jnese.