Hebréos 11 - Dupade Uruode

Pacajnaquéode quigode u unojo ome panguretigai iji Dupade

¹ Obiréjna uje panguretigai déji gosi ujetiga ca potigayaquérique déji uté gosi ome irodigode cucha yúode. U to uje que chotigase cucha pibojmane úringane ũrepíso.

² Enga yocayode jnani bajácho ore chise dáringane Dupade imeserãque to nanique gu danguretigai.

³ Uje yanguretágo Dupade enga jé u uje yirajágo uje angúroméone u daruode nanique ome dapesudode cucha jnese iji erámi, gaté ore. Enga yirajágo to uje yoquimone cucha jnese que pipesute iji cucha pimone uñeque, mu ore garani u Dupade uru pibojmane jnese nanique.

⁴ Yirajágo uje jnacare bajai Abel chujé cuchiso nanique enga tẽrame Dupade gu danguretigai iji uté. Enga Abel guerani sué dajõrai Caín gueranone gai to nanique. Jecute Dupade chimesẽre Abel gueranone nanique enga cho ayoré ujñapetáguiji. Abel uté toi nanique mu cho ujetiga qué eca enga catecã́ri yoque ome panguretigai quigode.

⁵ Jnani bajai Enoc changuretapise Dupade to nanique. Jecute que chimo pitoringai to nanique ome re. Mu Dupade jno údi aja gaté iji úringai ueca nanique. Urasade ore chucué jórogui nanique, mu que ore chise. Enga Dupade uruode chatata uje Dupade irasique re ome Enoc adode nanique uje cáma jnome gaté.

⁶ Que toc ujetiga Dupade irasique uñeque atique ujetiga jé ca panguretigai déji uñeque. Jecute ujetiga gosi pota ujetiga chise Dupade enga uté gosi doi enga ca chotigase Dupade úringai Dupa jne. Enga changuretapise Dupade to ome úringai posõrangore uje jecucha chisi ome cucha arégode ome dacuesórone ore jnese.

⁷ Noé changureta Dupade to nanique uje Dupade chatata cucha dacadode yúode uje cáma pimo cuchade udore quigode to ome ayorérique nanique. Doi Dupade uruode enga pésu cucórique. Enga cucoi uté u uje chiqueta Noé jogasui ore uje gue dequejnangóri di iji ore nanique. Uje Noé changureta Dupade nanique enga jogadi u uté uje erámi unirisórone uñane jnese ore úringáringo angoninguite parique pijógome Dupade enga Dupade cho dajuñame ore. Jé basa Dupade cho ayoré ujñapetáguiji Noé gu anguretigai.

⁸ Jnani bajai Abraham jé adápo rĩ uje changuretapise Dupade to nanique. Jecute uje Dupade catecã́ri ujetiga jnoji daniri, enga jĩraque doi Dupade uruode nanique. Jnoji daniri mu que chimo daquitique erãpe nanique. Mu chiraja uje Dupade a choréji erã́tique ujetiga cho daniri iji.

⁹ Abraham anguretigai u to nanique uje chise Dupade ojningai punire uté uje a gueranome jne. Mu purása quedéjna Abraham iji puniri uté jogosórone ore ujade nanique. Jecute Abraham chapúsaja daguíjnane nanique enga iguíjnane u cárpade iji ore ujade nanique. Enga Isaac, Jacob ore gajnéone Dupade urúo jé chopise Abraham gajnéone nanique to. Jecute jé ore adi u Abraham adode to nanique uje purása quedéjna ore iji puniri tuté to nanique.

¹⁰ Mu Abraham changureta idáidatéi uñeque yui uje jogadípise guidai tuté ero. Chamáñaje Dupade u uje pésu dáyipiedie ome guidai tuté quigode, enga u to uje chimate cuchade aja gaté iji.

¹¹ Gatapise Sára to nanique jecute abere. Mu Sára anguretigai u to nanique uje chiqueta enga jeque uaté iji dáringa gata nanique. Abi cuse to nanique uje changureta Dupade ojningane cucha yúode gu.

¹² Abraham choquíjnape to nanique, enga déji deruei yui uje quene abi cuse. Quigade enga ape disi ejode jiépisi, enga que pisecarãte ore, uje ore gajnúone u guédodie gu iji gaté, ujnanie ore rĩ iji yote quedéjnai pijnanane.

¹³ Jnani bajade unojo ore toi bajaque nanique uje cáma Dupade ingoméone cucha tocade nanique ome ore. Mu cho ujetiga ore chimo cuchade udore iji quedéjnarique nanique. Chamáñaje ore changuretapise Dupade gu. Enga que ore ininaquei chajire re nanique ome Dupade ingoméone udore cucha ome ore. Jecute ore chojninga nanique: "Cachi urugu yóguiji erámone unojo. Yoquidáipisi déji guéode uéchai gu."

¹⁴ Obiréjna ome ore uruode unojo uje ore ucuei tu punire uñai nanique ujetiga ore cho danirípisi iji uté.

¹⁵ Que ore uru quigode u ujetiga qué ore gajneque darani dedai bajaque. Uje ore uruode quigode urásu, enga a ore chajniapórasaja daniri uté rĩ.

¹⁶ Mu ore ucuei u punire ueradipísi uje Dupade idai u uté iji gatajnoquei. Jecute que Dupade ajéngome gotique uje ore cho dadupade iji. Enga Dupade e chimate guidáidatéi tuté ome ore.

¹⁷ Yimóngo Abraham anguretigai to ome adode ome abi. Chamáñaje Dupade chetingare anguretigai nanique enga jĩraque Abraham doi dabi Isaac ujetiga tẽrája Dupade enga gajnui u cuchiso pẽrapáitique. Chiraja mu uje ape disi ejórigo a ore gãrapi urásu Isaac ome Dupade uruode, mu que doi enga chãraque dape ugurui tuté to gotique nanique.

¹⁸ Uje Dupade uruode chósi te ome Abraham nanique: "Bape disi ejórigo ore gãrapi u Isaac jne."

¹⁹ Dimane Abraham ujetiga chujé dabi. Chiraja gu uje Dupade ujopié cuse ujetiga chiringare togode ore. Jecute Abraham que chujépise dabi nanique, mu gajnui u ujetiga e chujé, enga Dupade chiringare iji itoringai enga chatire Abraham gai nanique.

²⁰ Isaac chacacãre dabode Jacob, Esaú ore nanique ome cucha pagutíyamánone uje changureta Dupade ujetiga uruode tocade ome ore.

²¹ Jnani bajai Jacob changureta Dupade to. Jecute uje choquíjna enga chiraja deruei yui, doi dajnacari José abode enga chacacãre ore jnese ome cucha pagutíyamánone. Quigade enga catecã́ri Dupade enga chugutána dogué.

²² José changureta Dupade ujetiga chijnime israélgosode iji egíptogosode ore gari. Jecute uje e chiraja deruei yui enga chojningame ore: "Yocurasade israélgose a ore jnoji Egípto uné jne. Jecute boyo jne enga ajnócho yajnoquéode jne aja uacajesúrique."

²³ Moisés dayode ore changureta Dupade to. Jecute que ore todo dejórique nanique uje ore chacósosi dababi Moisés nanique uje ueradape. Enga guedosíode gadioque iji ore agoyapídi nanique. Ore chiraja eduguéjna cuchábi ijmongaquéode mu ome ore ape diyoquíode ujetiga ore chujé ore.

²⁴ Jé basa Moisés changureta Dupade to. Jecute e jnacare enga que cho daté iji dapesuto Egípto gosi eduguéjna uro.

²⁵ Moisés chiraja uje urasade ore chejnáreque re ome eduguéjna cuchábi josipiedie nanique, mu jé ajegaite ujetiga cháta raja ore. Chiraja uje Dupade urása ore gu. Jé basa que ajegaite pipotigué ayoréode ome cucha gajnaréngone iji egíptogosode ore gari. Uje chiese pininaquei garani u cuchade udore ome ore. Chiraja gu uje cuchade udore unéningai eruei tu ujetiga gosi toi.

²⁶ Moisés a jé gajnenguírase cuchade jnese iji eduguéjnai iguíjnai nanique mu noñome cuchade udore jnese. Chimo uje cucha orerãi u ujetiga gosi cho daba Crísto iroquéode gu. Jecute Moisés doi Crísto iroquéode to. Enga áyipie jogadípise Dupade gueranone cucha yui ujetiga diga Dupade cho oré ome adode.

²⁷ Jecute Moisés chajo raja danguretigai ome Dupade enga jnoji Egípto. Enga que todo eduguéjna cuchábi ijmongaquéode ome re. Mu jnoja daquei. Enga cho ujetiga chimópise Dupa pibojma iji daquei.

²⁸ Moisés changuretapise Dupade enga doi uruode to nanique ome Páscua. Enga chiroque darasade israélgose ujetiga ore changuñéra áyasadie iyode aja daguíjnane piagode gáyode jnese nanique. Gaidi u gu ujetiga Dupade iroi pitoringai oisõre chimo iyoi uté jne, enga chó ore gáyode enga ca chujé ore ape bajade to.

²⁹ Moisés urasade israélgose ore changureta Dupade to. Jecute ore chiramísara tié nanique uje i tu Tié Caraté. Enga Dupade chajuque tié. Jecute israélgosode ore chuchiéjna jnupe cajnóri jé aja tié uéchai. Jé basa ga egíptogosode chayóna israélgosode enga ore chicáji ore qui to iji tié. Mu Dupade chátapo yodi taja ñane to rĩ enga egíptogosode ore toji tié jnese.

³⁰ Israélgosode ore changureta Dupade to nanique enga ore doi uruode quigode nanique. Uje chojningame ore: "Apacho ore idáidatéi Jericó gai jne iji dire garitírigo." Uje ore doi Dupade uruode quigode unojo enga jé u uje ujuyaquéode iji Jericó gai cṍra.

³¹ Jericó idaito déji nanique uje agupíerẽ́. Mu uaté u uje chañurúpusu israélgosode ore irógode guidáyo ore guio nanique. Jecute uaté chapite uje urasade ore toi jnese nanique. Uje udore ore toi gu dangoninguite paritigade nanique.

³² Uñane qué déji uje ore changuretapise Dupade to nanique. Mu yipota yiji yurusarane údi ome cucha uñéngo. Jecute que yurúsãre jnani bajai Gedeón adode ome uaque. Jé cho Barac adode, Sansón adode, Jefté adode rĩ. Jé upo David, Samuel ore adode rĩ. Jé upo Dupade uruode atatasórone uñane adode to rĩ.

³³ Udore ore jnese ore changureta Dupade. Jecute udore uñane ore sué damajosórone gáyode enga ore gajneque ore unirone. Udore uñane eduguéjna áyipierãque ore nanique ome darasade. Enga jecucha Dupade doi daruode ome ore enga chatapísaja ore. Enga suru caratedie pijnanone ome ore ujetiga ca ore tagu ore.

³⁴ Enga chajni pióquedatéode ome ore. Chátaja uñane enga que chuque ore ome ore ijmongarájasórone iqueséode. Uñane que ujñapeque, mu Dupade pésu ore ujñapetáringane. Quigade enga ore tiógarapísa pocaningane enga ore suépo damajósõre dipeséode gáyode rĩ.

³⁵ Chequedíe uñanie cuse nanique uje ore changuretapise Dupade to. Jecute Dupade chiquetápo ore iguiose togode nanique rĩ ome ore. Mu Dupade anguresórone uñane ore cho daba danguretigai nanique. Uje ore chojningame ore nanique: "Ayáyo uacanguretigade iji Dupade enga ca yujégo uaque jne." Mu que ore dosóñime ore nanique. Jecute ore chujé ore. Mu a ore chise pucuecaringué icha areguipísirique jne iji Dupade gari ujetiga Dupade chatirépo ore ucuecaringuéone ore gáyode rĩ.

³⁶ Dupade anguresõre uñane ore chopo daba danguretigade to nanique rĩ uje ore chujñieta ore enga ore chaquesu ore údode ome paójnane. Ore suruápo uñane gáyode rĩ enga ore chigaru ore ome enué ojnane.

³⁷ Ore chujépo uñane rĩ enga ore chimitingare ore ome cucaranenie. Ore chajuque uñane iji ore gatócorodie ome arámuchequedíe nanique. Uñane urasade chetingare ore anguretigade ome dajosipiedie iji dirode jnese. Jeque ore chujépise uñane ome queséode. Uásejna Dupade anguresórone ore uje ore chinguíra datoidie aja quedéjnane uje jmataque ore. Enga ore pésu daguidedie iji cuchisode aode. Enga ducañerájma ore ome ore urasade.

³⁸ Jecute udore ore uje ore cho daba danguretigade ome Dupade ore tiógarapísa ujetiga ore déji guéode enga ca ore déji erãpe iyiejnai tuné. Udore uñane ore chayome damajosórone nanique enga ore chacája erugode ajéode nanique ujetiga ca chuque ore. Uñane chacája cucarãte ujade iji dagajñunie. Uñane chicáji erãpe eyutiguéode enga ore cho daguíjnai iji jnupe péroringáne.

³⁹ Pequetingarãque udore ore anguretigade ome Dupade jnese. Mu ore anguretigade que doi jnumone. Jecute Dupade imeserãque ore. Mu cáma ore chimópise Dupade ingoméone cucha ome ore to.

⁴⁰ Chamáñaje Dupade pésu dáyipie ujñapetedie gu ujetiga cháta disi ejode uyoque aja anguresõre bajade ore to. Enga quene ore chimo dáringane ujñapetaguipíso ujetiga yugúcoji ñane gari jnese.