Hebréos 10 - Dupade Uruode

Crísto tẽra re ome yoquisijnaringuéone, enga chojmára nanique; enga que tẽrapo raja gotique rĩ iji deréjnane

¹ Uje yimóngo ayorérique oréraque enga yirajágo uje idógosi oresṍri iji. Enga jé isocai u to ome Moisés urusarane cucha puyácho uje Dupade áyipie bajedie u. Cachi pocoré u purusarane udore. Jé basa oresṍri u Dupade áyipie ejodie uje di iji udore quigade. Enga yirajágo uje áyipie ejodie iringuíone u cucha omone. Yirajágo to uje yocúringane ujñapetaque ome Dupade que garani u cuchiso pẽrapáitique uje yicoi Moisés iroquéode quigode. Jecute yocangaránone ore chajnera dẽrapáidode cuchiso udore údi iji sequeredie jnese, socaseti yico yocúringane ujñapetágome Dupade.

² Mu ujetiga ore chisírase dáringáringo ujñapetácho ome dagaidode pacajnaqué bajácho udore, enga a ore charásu ore chujé cuchisode gatuaque. Chamáñaje ujetiga ujñapetaguirase ore enga a e íjnonguirase ore aguté joradie ome ore ipesutígo cucha gajnarétigo.

³ Mu ore aguté joradie que íjnoque go ome ore ipesudode cucha nanique, jecute que chimoque nanique uje ore chujé cuchisode iji sequeredie jnese. Enga jĩraque ore jnusina dasijnaringuéone iji dẽrapáidode cuchiso gáyode.

⁴ Uje tórode iyode, erámoro quedéjnane iyode que udore chijnime ore isijnaringuéone ãrírique nanique gu.

⁵ Jecute uje Crísto déji erámone nanique enga catecã́ri Dupade, enga chojninga: Que apota cuchisode iyórique go. Bedugádi uyu gu. Jecute basi ome yibai ayoré ome yu ujetiga yitoi ome pisijnaringuéone jnese.

⁶ Yiraja uje que ese ore gueranone cuchiso unétique gotique uje ore chujé gatuaque enga ore chãru iji gaseranone gáyode ome ore isijnaringuéone.

⁷ Jecute yojningame ua nanique: "Dupade á, yugúsi ne ujetiga yiji bojningane cucha jne. Adi jé upúsu ore urusarane quigode uje purusãracho iji baruode."

⁸ Cucha bajai uje yimóngo iji Crísto uruode udore u uje Dupade que pota ore gueranone cucha, jeoga cuchiso pẽrapáitique u, jeoga ore iboritígo cuchiso u. Moisés urusarane jé quigode u udore nanique marínga, Dupade que chise ore gueranone udore unétique gotique.

⁹ Quigade enga Crísto chojninga: "Dupade á, yise de gu ujetiga yipésu báyipiedie aja quigode." Unojo quigode u uje Dupade e tṍra pisoca bajade uje chuque cuchisode ome jnanione isijnaringuéone, enga e chicha Crísto aja udore jogadode ujetiga tẽra re enga toi ome pisijnaringuéone jnese.

¹⁰ Enga Dupade e chinoningase yoque gu Crísto ipesudode udore ome yoque. Uje uté pésu Dupade áyipiedie jnese gu enga tẽra re ome yoquisijnaringuéone. Enga Dupade que qué chucuepoi pẽrate uñeque rĩ ome pisijnaringuéone iji deréjnane jnese.

¹¹ Mu pangaránone judío uje ore catecã́ri Dupade ome darasade que ore chimoque uje ore tẽrája Dupade ome cuchisode iji dirode jnese. Mu que ore gueranone cucha udore chinoningase pisijnaringuérique go nanique. Mu jé ore jno dasocade udore údi iji deréjnane unojo to.

¹² Mu Jesucrísto que cho ore go. Uje uté tẽra re ome yoquisijnaringuéone enga chojmára nanique. Enga que tẽrapo raja gotique rĩ iji deréjnane. Enga e déji Dupade gari iji guéode uéchai iji ne gajneri enga cháji Dupade ãrachua.

¹³ Enga jé charite Dupade dosadi iji guéode uéchai, jé aja ujetiga Dupade sué umajosórone ore gáyode jnese iji erámone unojo.

¹⁴ Chojmára uje tẽra re ome yoque, mu itoringai chojmarai uté u uje chinoningase yoque enga yico yocúringane ujñapetaque to. Enga yocúringane ujñapetácho a ca bijna ome yoque jne iji deréjnane jnese.

¹⁵ Dupade Ujopié Espíritu Sánto chingopísa udore ome yoque uje jé ũrepíso. Enga chósi te:

¹⁶ Yocangarádejnai Dupade chojninga: Yáyipie ichárigui a cuse jne ome ore ape disi ejórigo. A yicha yáyipiedie aja ore áyipiedie jne enga a ca jnoji ore ajéode jne. Gajnui u jne ujetiga purusãrai yáyipiedie iji ore áyipiedie ajéode.

¹⁷ Quigade enga chojningápo rĩ: Jé u jne uje a ca yujnusinápo ore isijnaringuéone, ore ate gajnaréngone jne rĩ iji deréjnane.

¹⁸ Jecute uje e pĩroque pisijnaringuéone jnese, enga e que páyipieraque dépoji cuchiso pẽratique rĩ ome pisijnaringuéone iji deréjnane jnese.

Dupade juéga dei ome Crísto anguresórone ore

¹⁹ Jecute, yijorane uaque á, uje uacanguretáyo Jesucrísto, e que yicájnacopo yógome Dupade yui rĩ ujetiga yacágoja gari iji Ajé Puyaguipísi tuté. Uje Jesucrísto e toi gu ome yoquisijnaringuéone. Enga e chojne ome dayoi ujetiga puruque yógome.

²⁰ Enga cho ujetiga Jesucrísto jé u borapeque cuchábi iji Dupade iguíjnai Ajé Puyaguipísi yui. Enga cho jeta borapeque cuchábi uté e doi enga chuchẽre dabai ome yoque ujetiga yico pucuecaringué ichai iji jogadi tuté ajei.

²¹ Jesús uté u yocangarate cuchábi ujetiga catecã́ri Dupade ome yoque. Enga uté gajneque cuchade jnese iji Dupade iguíjnai.

²² Jecute e yocajnei tu ujetiga yijoco Dupade yui, enga yirajagópo yógome Dupade yui rĩ. Chamáñaje ũrepise yógome yocanguretigai gu. Yirajágo gu uje uté chinoningase yoquisijnaringuéone iji yocáyipiedie, enga e que máraque yoque gotique. Isocai upo rĩ uje puruque yoquibai iñoñaringuéone to ome yote yocárerique.

²³ Yicoi enga yujnucoi yógome Dupade adode enga yanguretágo Dupade ome ojningane cucha yúode gatuaque. Uje Dupade a ca chó dangoméone cucha uñeque gai jne ujetiga chisi ome yoque.

²⁴ Yocajnei tupo rĩ ujetiga yucuegoi yoquisocade ome yocujode Dupade anguresóño ore to, ujetiga pijnoraquéode déji ore ome ñane enga ore pésu cucha arégode to.

²⁵ Ca yoco yocujode Dupade anguresõre uñane uje que ore dopoi Dupade uruode to rĩ. Mu yicoi enga ca Dupade uruode unerotiguérique cuse ome yoque. Yinejeco ñane ome Dupade uruode gatuaque to. Cuchiyípise dirode unojo. Yirajágo gu uje Yocangarádejnai diringai e idógosipise.

²⁶ Ujetiga yirajágo Dupade uru uréone, mu yico enga yajnerango yocate gajnaréngone udore údi enga a ca yiboco pẽrapáitique uñeque jne ujetiga yẽcója Dupade ome yoquisijnaringuéone úringane pĩrocho.

²⁷ Amiri e u pisadodéringadatéi ome uyoque ome yocajnei Dupade ujuyaqué cuchape yui. Uje pióquedaté Dupade ujuyaquei tuté ujetiga chejna Dupade guetesórone ore jnese.

²⁸ Ujetiga uñeque ca doi Moisés iroquéode uñeque enga uté imósoningo ayoré gadiótigo, jeoga gárerigo ore doi enga ore chatata adode. Enga jogadi jé u uje que ore chagutu re ome uté gosi uje ore chujé.

²⁹ Jecute a doi datéringane jne ome Dupade ujuyaquédatéi ome ore uje ore chiraja Dupade áyipie ichadie quigode marínga, que ore doi go. Gajnui u gu ujetiga uté gosi chuchiéjna Dupade Abi Jesucrísto iji jnumi, enga chujñieta iyoi gaté rĩ. Gajnui jé upo rĩ ujetiga chujñietápo Dupade Ujopié Espíritu Sánto rĩ uje chijnóra yoque. Uje ore ujñieni Jesucrísto iyoi uté ipesute Dupade áyipie ichadie úringai ujñapeté ome yoque nanique. Upo rĩ uje chinoningase ore isijnaringuéone jnese uje ore changureta uté. ¿Ma ca tiógararása ya ujetiga pujuyápise ore ome Dupade a?

³⁰ Yirajágo uje Yocangarádejnai chojninga iji daruode: "Yajneque jeta yo yujuñame ore. A jnutaque yu jne." Enga Dupade uruode chojningápo rĩ: "Yocangarádejnai a jé u jne ujetiga chajire darasade adode aja quigode jnese jne."

³¹ Cucha iyiejnapise Dupa uecai ujuyaquei te jne ujetiga yocuñeque gajneque to.

³² Mu uaque enga ajnusináño uacajnéone cucha dacacho uje tocade ome uaque nanique. Uacoyo uacaba uacanguretigade nanique uje quene Dupade chijñate uacabáyode ome daru uréone. Mu que arayíñome ore josipiedie nanique go uje uacanguretáyo Dupade iji taningai nanique.

³³ Ore chujñieta uacuñane nanique enga ore chujé uáguiji uacarasade ore enominone nanique. Uacuñane que gajneque ore ujñiequéode to, mu que boyo iji ore yugode uacojo Dupade anguresõre ore gari nanique rĩ.

³⁴ Mu uje ore suru uacojode Dupade anguresóño ore gáyode nanique enga uacabáchoi ore gatuaque nanique. Ore chijnapo uacagúchade iji uacari nanique rĩ, mu que cucha ome uaque nanique. Uacarajáyo gu uje uacajnéone cucha iji guéode uéchai sué uacagúchade udore gáyode iji jnumone unojo. Uacarajáyo to uje uacajnéone cucha iji guéode a ca íjnongapo jne rĩ iji uacari iji deréjnane.

³⁵ Anguretáyopise Dupade enga ca oyo uacanguretigade uja. Uje uacanguretigai iji Dupade a di uacagutíyamátique cucha ueradéjna údi iji uaque ujetiga Dupade tẽrája uaque.

³⁶ Ujetiga uacajéode u ujetiga apéso Dupade áyipiedie ome uaque enga cucha amiri tu ujetiga adotáyo uágome cucha dacadode jnese. Enga jé u jne ujetiga Dupade ingoméone cucha jnese chise uaque.

³⁷ Uje ore urusarane Dupade urúo déji uje chojninga: E idógosi. E idógosipise ujetiga yoquirodi diapo rĩ. Enga e qué sase.

³⁸ Yimeserane u ore uje ore chise dáringane ujñapetácho ome danguretigade. Enga yajéode u ome ore ujetiga jé ore chajnera danguretigade údi ome yu uje qué ore eca. Mu a ca yise ore unétique jne jetiga ore chajniapója date bajade rĩ.

³⁹ Mu yiraja uje uyoque enga a ca yajningopója yocate bajade jne rĩ. Enga a ca yocajneque Dupade ujuyaquédatéi te jne ujetiga chejna yoque. Mu yocanguretigai jogadípise Dupade enga a piquetaque yoque jne.